Marso

Adda met ibaga ti Biblia a nalinteg a tattao a nagbalin a nakillo. Maysa kadakuada ni Ari Solomon. Am-ammona ni Jehova. Ammona met ti panagdaydayaw nga anamongan ti Dios, isu a binendisionan ni Jehova iti kasta unay. Ngem idi agangay, nagdaydayaw kadagiti didiosen. Gapu iti dayta, nakapungtot ni Jehova ket sinagaba ti intero a nasion iti ginasut a tawen ti epekto ti basol ni Solomon. Agpayso nga ibagbaga ti Kasuratan a “naginana ni Solomon a kas kadagidi ammana,” kas iti matalek a ni Ari David. (1 Ar. 11:5-9, 43; 2 Ar. 23:13) Ngem gapu kadi ta naitabon a kas kadagidi ammana ket garantisadon a mapagungarto? Saan nga ibaga ti Biblia. Itedna dayta kadagidiay kayatna nga ikkan iti gundaway nga agserbi kenkuana iti agnanayon. (Job 14:13, 14; Juan 6:44) Umawatto kadi ni Solomon iti kasta a sagut? Ammo ni Jehova ti sungbat; saantayo nga ammo. Ngem ti ammotayo? Aramidento ni Jehova ti umiso. w24.05 4 ¶9

Idi nagdedikartayo ken Jehova, nagbalintayo a sangaili iti simboliko a toldana. Tagtagiragsakentayo ti aglaplapusanan a naespirituan a taraon ken ti pannakigayyem kadagidiay sangaili met ni Jehova. Saan a maymaysa a lugar ti ayan ti simboliko a tolda ni Jehova. Ti tolda ti Dios ket adda iti sadinoman nga ayan ti natulnog nga agdaydayaw kenkuana. (Apoc. 21:3) Dagiti ngay natayen a matalek a tattao? Sangaili latta kadi ida ni Jehova iti toldana? Wen! Apay a maibagatayo ti kasta? Ngamin, sibibiagda latta iti lagip ni Jehova. Inlawlawag ni Jesus: “Iti salaysay maipapan iti siitan a bassit a kayo, dinakamat ni Moises ti maipapan iti panagungar dagiti natay. Inawaganna ni Jehova kas ‘ti Dios ni Abraham ken Dios ni Isaac ken Dios ni Jacob.’ Isu ket Dios, saan a dagiti natay, no di ket dagiti sibibiag, ta sibibiagda amin kenkuana.”—Luc. 20:37, 38. w24.06 3 ¶6-7

Napan ni Zadok idiay Hebron nga awitna dagiti armasna ken nakasagana a makigubat. (1 Cron. 12:38) Situtulok a simmurot ken David iti paggugubatan ken mangidepensa iti Israel kadagiti kabusorda. Mabalin a bassit pay laeng ti kapadasan ni Zadok iti pannakigubat kas soldado ngem nakaturtured. Kasano a nasursuro ti padi a kas ken Zadok ti kinatured? Adu a nabileg ken natured a lallaki ti am-ammona. Sigurado a nakasursuro iti ulidanda. Kas pagarigan, natured ni David a ‘mangidaulo iti Israel a mapan makigubat.’ Gapu iti dayta, naimpusuan a kayat ti amin nga umili ti Israel a suportaran isuna. (1 Cron. 11:1, 2) Kanayon a nagpatulong ni David ken Jehova no maipasango kadagiti kabusorna. (Sal. 138:3) Nakasursuro met ni Zadok iti kinatured ti dadduma pay a lallaki a kas kada Jehoiada ken ti mannakigubat nga anakna a ni Benaias, agraman ti 22 a panguluen dagiti tribu a nangsuporta ken David.—1 Cron. 11:22-25; 12:26-28. w24.07 3 ¶5-6

Nakaad-adu ti dakes nga inaramid ni Saulo a taga-Tarso. Siuulpit nga indadanesna dagiti maipatpateg a pasurot ni Kristo. Mabalin a pinanunot ti kaaduan a Kristiano nga awanen ti namnama nga agbalbaliw ni Saulo. Ngem naiduma unay ti pampanunoten ti napagungar a ni Jesus no ikompara kadagita nga imperpekto a tattao. Nakitada ken Amana dagiti nagsasayaat a kualidad ni Saulo. Imbaga ni Jesus: “Pinilik daytoy a tao.” (Ara. 9:15) Nangusar pay ketdi ni Jesus iti milagro tapno matignay nga agbabawi ni Saulo. (Ara. 7:58–8:3; 9:1-9, 17-20) Idi nagbalinen a Kristiano ni Saulo, naawaganen iti apostol Pablo. Masansan nga inyebkasna ti panangapresiarna iti kinaimbag ken asi nga impakita da Jehova ken Jesus kenkuana. (1 Tim. 1:12-15) Nadamag ni Pablo nga adda maar-aramid a seksual nga immoralidad iti kongregasion idiay Corinto. Kasano ti panangasikasona iti dayta? Inaramidna dayta iti pamay-an a mangisuro kadatayo maipapan iti naayat a panangdisiplina ni Jehova ken ti kinapateg iti panangipakita iti asi. w24.08 13 ¶15-16

Iti panaglabas ti ginasut a tawen, in-inut nga impaawat ni Jehova no kasano nga agbalin a nasinged kenkuana dagiti managbasol a tattao. Ti maikadua kadagiti annak da Adan ken Eva a ni Abel ti kaunaan a nangipakita iti pammati ken Jehova kalpasan ti panagrebelde idiay Eden. Ay-ayaten ni Abel ni Jehova. Kayatna a paragsaken ken suminged Kenkuana, isu a nagdaton. Ni Abel ket maysa a pastor, isu a nangala iti sumagmamano nga urbon a karnero, pinartina dagita, sa indatonna ken Jehova. Ania ti narikna ni Jehova? ‘Naragsakan ken Abel ken iti datonna.’ (Gen. 4:4) Naragsakan met ni Jehova kadagiti indaton ti dadduma pay a tattao a mangay-ayat ken agtaltalek kenkuana a kas ken Noe. (Gen. 8:20, 21) Ti panangawat ni Jehova kadagiti datonda ipakitana a posible a magun-odan dagiti managbasol a tattao ti paborna ken agbalinda a nasinged kenkuana. w24.08 3 ¶5-6

No makapasartayo iti kinaawan hustisia, mabalin a masaktan ken malidayantayo unay. (Ecl. 7:7) Kasta met laeng ti narikna dagiti matalek nga adipen ti Dios, a kas kada Job ken Habakuk. (Job 6:2, 3; Hab. 1:1-3) Natural laeng dagita a rikna. Ngem masapul nga agannadtayo tapno saantayo a makaaramid iti minamaag ket kumaro laeng ti situasion No kasla saan a madusdusa dagiti agar-aramid iti kinaawan hustisia, baka mangrugin a pagduaduaantayo no pagsayaatantayo met laeng ti panagaramid iti umiso. Usigentayo ti naobserbaran ti maysa a salmista. Nakitana a dagiti dakes ti kasla rumangrang-ay, idinto ta dagiti nalinteg ti saan a nasayaat ti pannakatratoda. “Kasta dagiti managdakdakes, kanayon nga agnamnam-ayda,” imbagana. (Sal. 73:12) Permi met ti suronna gapu iti nakitana a kinaawan hustisia, nga uray la dandaninan pinagduaduaan a pagsayaatan ti maysa ti agserbi ken Jehova. Imbagana: “Idi padasek a tarusan daytoy, nariribukanak.”—Sal. 73:14, 16. w24.11 3 ¶5-7

Ipadayagtayo ni Jehova gapu iti nauneg a panagraemtayo kenkuana. Adu ti panggapuantayo a mangraem kenkuana. Ni Jehova ti mannakabalin-amin; awan ti limitasion ti pannakabalinna. (Sal. 96:4-7) Ti kasta unay a siribna ket nalawag a makita kadagiti bambanag nga inaramidna. Isu ti Gubuayan ti biagtayo ken ti Mangtagtaginayon iti dayta. (Apoc. 4:11) Isu ket napudno. (Apoc. 15:4) Agballigi ti amin nga aramidenna ken kanayon a tungpalenna ti amin a karina. (Jos. 23:14) Isu met la gayam nga imbaga ni propeta Jeremias maipapan ken Jehova: “Iti amin a masirib a tattao kadagiti nasion ken pagarianda, awan a pulos ti kas kenka”! (Jer. 10:6, 7) Wen, adu ti panggapuantayo a mangraem iti nailangitan nga Amatayo. Ngem saan laeng a maikari ni Jehova iti panagraemtayo. Maikari met isuna iti ayattayo. Ken kangrunaan iti amin, ipadayagtayo ni Jehova gapu ta ay-ayatentayo unay isuna. w25.01 3 ¶5-6

Ikagkagumaan dagiti bumusbusor iti Dios a pagparangen a dakes dagiti nasayaat nga ar-aramiden ti organisasion. Kas pagarigan, naammuantayo manipud iti Biblia nga ekspektaren ni Jehova a dagiti agdaydayaw kenkuana ket nadalus iti pisikal, moral, ken naespirituan. Ikalkalikagumna nga asinoman a saan nga agbabbabawi ken agtultuloy nga agaramid iti kinadakes ket maikkat iti kongregasion. (1 Cor. 5:11, 12; 6:9, 10) Ngem gapu ta sursurotentayo dayta a bilin, ibaga dagiti bumusbusor a saantayo nga ay-ayaten dagiti tattao, a konkondenarentayo ida ken saantayo a kayat ti asinoman a naiduma. Masapul nga ammuentayo ti pagtataudan dagita nga ibubusor. Ni Satanas a Diablo ti pagtataudan dagiti ulbod nga estoria. Isu “ti ama ti kinaulbod.” (Juan 8:44; Gen. 3:1-5) Ekspektarentayo ngarud nga usaren ni Satanas dagiti pasurotna nga agiwaras kadagiti ulbod nga estoria maipapan iti organisasion ni Jehova. w24.04 10-11 ¶13-14

Kalpasan a mangrugi ti dakkel a rigat, ania ti mabalin pay a mapasamak? Posible a dadduma kadagiti makakita iti pannakadadael ti “Babilonia a Dakkel” malagipdanto a nabayagen nga ikaskasaba dayta dagiti Saksi ni Jehova. Posible ngata a ti dadduma a makakita kadagitoy a pasamak ket maaddaanton iti pammati ken Jehova? (Apoc. 17:5) Adda kapada dayta a napasamaken idi kaaldawan ni Moises idiay Egipto. “Adu pay a sabali a tattao” ti nakikadua kadagiti Israelita idi pimmanawda iti Egipto. Dadduma kadagita ti mabalin a naaddaan iti pammati ken Jehova idi nakitada a pimmayso dagiti impakdaar ni Moises maipapan iti Sangapulo a Didigra. (Ex. 12:38) No bilang mapasamakto ti kasta kalpasan a madadael ti Babilonia a Dakkel, masurontayto kadi no makikadua kadatayo dagita a klase ti tattao sakbay unay a mangrugi ti Armagedon? Siempre, saan! Kayattayo a tuladen ti nailangitan nga Amatayo “a naasi ken mannakipagrikna, nabannayat nga agpungtot ken dakkel ti napudno nga ayatna ken kanayon a tungpalenna ti saona.”—Ex. 34:6. w24.05 11 ¶12-13

Ania ti mabalin a mapasamak no saantayo nga itultuloy a petpetan “ti pagtuladan iti nasayaat a sasao”? Kitaentayo ti maysa a pagarigan. Idi umuna a siglo, dadduma a Kristiano ti nangiwaras iti saan nga agpaypayso a damag a dimteng kanon ti aldaw ni Jehova. Adda pay ketdi kano surat a naggapu ken apostol Pablo a mangibagbaga iti dayta. Adda dagiti Kristiano a taga-Tesalonica a namati lattan ken nangiwaras iti dayta a damag a dida man la sinigurado no agpaypayso dayta. Saanda koma a naallilaw no tinandaananda dagiti insuro kadakuada ni Pablo idi kaduada pay isuna. (2 Tes. 2:1-5) Binalakadan ni Pablo dagiti kakabsat a dida patien ti amin a mangngegda. Ken tapno saanto manen a maulit dayta kadakuada, inngudo ni Pablo ti maikadua a suratna kadagiti taga-Tesalonica kadagitoy a sasao: “Awatenyo ti pakomusta nga insurat daytoy kabsatyo a ni Pablo. Kastoy ti panagsuratko iti amin a suratko.”—2 Tes. 3:17. w24.07 12 ¶13-14

Masapul nga ibturan dagiti Hebreo a Kristiano dagiti pannubok ti pammatida bayat a kumarkaro ti kasasaad idiay Judea. Uray no napadasan idin ti dadduma kadakuada ti nakaro a pannakaidadanes, adu pay ti saan. Isu a pinalagipan ida ni apostol Pablo a masapul a saganaanda ti nakarkaro pay a pannakaidadanes ken masapul a determinadoda nga agtalinaed a matalek agingga ken patay a kas ken Jesus. (Heb. 12:4) Gapu ta agtultuloy nga umad-adu dagiti Kristiano, lallalo met a nakapungtot dagiti bumusbusor a Judio. Sumagmamano a tawen sakbayna, nasurok a 40 a Judio ti “nagkukumplot . . . ken nagsapatada a mailunodda no mangan wenno uminumda a saanda pay a napapatay ni Pablo.” (Ara. 22:22; 23:12-14) Uray no magurgura ken maidaddadanes idi dagiti Kristiano, masapul nga itultuloyda ti agkakadua nga agdaydayaw, ikasaba ti naimbag a damag, ken pagtalinaeden a nabileg ti pammatida. w24.09 12 ¶15

Ni Juan ket apostol nga ipatpateg ni Jesu-Kristo. (Mat. 10:2) Adu a tiempo ti binusbos ni Juan a nakikadua ken Jesus iti panangasabana. Nakitana dagiti inaramid ni Jesus a milagro ken nagtalinaed a matalek ken Jesus, uray kadagiti narigat a tiempo. Nasaksianna ti pannakapapatay ni Jesus ken nakitana kalpasan a napagungar. Nasaksianna met ti irarang-ay ti kongregasion Kristiano. Gapu ta atiddog ti biag ni Juan, nakitana a ti naimbag a damag ket “naikaskasaba iti amin a parsua iti baba ti langit.” (Col. 1:23) Idi lakay unayen ni Juan, adda pribilehiona a mangisurat iti dadduma a paset ti Sao ti Dios. Insuratna ti makapaamanga nga “apocalipsis ni Jesu-Kristo.” (Apoc. 1:1) Insurat met ni Juan ti ebanghelio a naipanagan kenkuana agraman ti tallo pay nga idi agangay, ket naawagan nga umuna, maikadua, ken maikatlo a Juan. Inaramidna ti maikatlo a suratna para iti matalek a Kristiano nga agnagan Gayo, nga ay-ayatenna unay nga anakna iti naespirituan. (3 Juan 1) Agingga ita, mapabpabileg ti amin a pasurot ni Jesus kadagiti insurat daytoy a matalek a lalaki. w24.11 12 ¶15-16

No ay-ayaten ti asawa a lalaki ni baketna, ipateg ken aywananna isuna. Ibilangna ni baketna kas di magatadan a regalo ni Jehova. (Prov. 18:22; 31:10) Gapu iti dayta, nasayaat ti panangtratona ken baketna ken ipakitana ti panagraemna uray kadagiti pribado nga aspeto ti panagasawada. Dina piliten ni baketna a makiseks kenkuana iti pamay-an a saan a komportable wenno mangburibor iti konsiensiana wenno mangiparikna nga isu ket maab-abuso. Ikagumaan met ti asawa a lalaki a pagtalinaeden a nadalus ti konsiensiana iti imatang ni Jehova. (Ara. 24:16) Assawa a lallaki, masiguradoyo a makitkita ken ap-apresiaren ni Jehova dagiti panagreggetyo a mangpadayaw ken baketyo iti amin nga ibagbaga ken ar-aramidenyo. Determinadokayo koma a mangpadayaw ken baketyo babaen ti saanyo a panangaramid iti aniaman a mangpasakit kenkuana ken babaen ti panagbalinyo a naimbag, managraem, ken nadungngo. No aramidenyo dagita, ipakpakitayo nga ay-ayaten ken ipatpategyo ni baketyo. Padayawanyo ni baketyo, iti kasta, maprotektaranyo ti kapatgan a relasionyo—ti pannakigayyemyo ken Jehova.—Sal. 25:14. w25.01 13 ¶17-18

Ti kinaregta dagiti agserserbi ken Jehova iti ministerio ti maysa a nakaidumaanda kadagiti sinsinan a Kristiano. Ania ti aramidentayo tapno agtalinaedtayo a naregta wenno naregregta pay iti trabaho a panangasaba? Adda masursurotayo iti ulidan ni Jesus maipapan iti kinaregta iti trabaho a panangasaba. Bayat ti ministeriona ditoy daga, saan a pulos a bimmaaw ti kinaregtana. Kinaagpaysuanna, bayat ti panaglabas ti tiempo, lallalo pay a rimmegta. Kas iti paraaywan iti kaubasan a tallo a tawen a nangkultibar iti maysa a kayo ti higos a saan man la a nagbunga, agarup tallo a tawen met a kinaskasabaan ni Jesus dagiti Judio. Ngem kaaduan kadakuada ti saan a nagbalin nga adalanna. Nupay kasta, kas iti paraaywan iti kaubasan a saan a naawanan iti namnama iti kayo ti higos, saan a nauma ni Jesus a tumulong kadagiti tattao wenno saan man la bimmaaw ti regtana iti ministerio. (Luc. 13:6-9) Agtalinaedtayo a naregta no maammuantayo dagiti insurona ken tuladentayo dagiti inaramidna. w25.03 14-15 ¶1-4

Kasanon no iti panagkunam ket nakitamon ti nasayaat a pakiasawaam? Dagus kadin nga armem? Kuna ti Biblia a ti masirib a tao ket agpanunot a naimbag sakbay nga agtignay. Isu a masiribka no obserbaram pay laeng a naimbag sakbay nga armem. Ania ti mabalinmo nga aramiden tapno di madlaw nga ob-obserbaram ti kursonadam? Kadagiti gimong wenno gathering, mabalin nga adda mapaliiwmo maipapan iti espiritualidad, personalidad, ken ugalina. Siasino ti gagayyemna, ken ania ti kanayon nga ibagbagana kadakuada? (Luc. 6:45) Agpada kadi dagiti kalatyo? Mabalinmo ti agsaludsod kadagiti panglakayen iti kongregasionna wenno iti dadduma pay a nataengan iti naespirituan a makaam-ammo unay kenkuana. (Prov. 20:18) Mabalinmo a damagen no ania ti reputasion ken kualidadna. (Ruth 2:11) Bayat nga ob-obserbaram ti kursonadam, siguraduem a saan nga alusiisen wenno mabainan. Respetuem ti riknana ken ti pribado a biagna. w24.05 22 ¶7-8

Saan koma a dagus nga agkonklusion dagiti panglakayen a saanen nga agbabawi ti nakabasol. Nupay adda dagiti mabalin nga agbabawin bayat ti damo pay laeng a pannakisarita kenkuana ti komite, adda met dagiti agkasapulan iti ad-adu pay a tiempo. Masapul ngarud nga iyurnos dagiti panglakayen ti saan la a mammaminsan a pannakisaritada iti nakabasol. Mabalin nga iti damo a pannakisaritada, mangrugin a mabigbig ti nakabasol ti kadagsen ti naaramidna sigun iti naibaga kenkuana. Mabalin nga agpakumbaba ken dumawat ken Jehova iti pammakawan babaen ti kararag. (Sal. 38:18) Isu nga iti sumaruno a pannakisaritada, mabalin a naiduman ti kababalin ti nakabasol no ikompara iti damo a pannakisaritada. Tapno matulongan ti nakabasol nga agbabawi, masapul nga ipakita dagiti panglakayen ti empatia ken asi. Mangnamnama ken ikararagda ken Jehova a bendisionanna ti panagreggetda a tumulong iti nayaw-awan a Kristiano tapno agsubli ti nasimbeng a panunotna ken agbabawi.—2 Tim. 2:25, 26. w24.08 22-23 ¶12-13

Saan a kayat ni Jehova a madadael ti asinoman! Kayatna a maikappia kenkuana dagiti nakabasol. (2 Cor. 5:20) Kas ipakita ti pakasaritaan, maulit-ulit a kiniddaw ni Jehova kadagiti adipenna a nangpanaw kenkuana—ken uray kadagiti nasukir nga indibidual—nga agbabawi ken agsublida kenkuana. Pribilehio dagiti panglakayen ti makipagtrabaho ken Jehova bayat nga ikagkagumaanda a tulongan dagiti nakabasol nga agbabawi. (Roma 2:4; 1 Cor. 3:9) Panunotenyo ti rag-o idiay langit no agbabawi dagiti nakabasol! Maragragsakan a mismo ti nailangitan nga Amatayo a ni Jehova kada adda agsubli iti kongregasion a napukaw a karnerona. Umuneg nga umuneg ti ayattayo ken Jehova no ut-utobentayo ti asi ken ti nagpaiduma a kinaimbagna.—Luc. 1:78. w24.08 31 ¶16-17

No impalubos ni Jesus a pagbalinen isuna dagiti tattao kas arida, makiramraman no kuan iti politika dagiti Judio nga iturturayan dagiti Romano. Mabasatayo a saan a nagpangadua ni Jesus a ‘napan iti bantay.’ Uray no pinilit ti sabsabali a makiraman iti politika, saanna nga inaramid dayta. Nagpateg dayta a leksion para kadatayo! Siempre, saan met a kiddawen dagiti tattao a simimilagro a mangpaadutayo iti tinapay, wenno mangpaimbagtayo kadagiti masakit. Wenno saandatayo met ketdi a pagbalinen nga ari wenno presidenteda. Ngem mabalin a kombinsirendatayo a makiraman iti politika babaen ti panagbotos wenno panangsuporta iti ammoda a mangpasayaat iti biagda. Nupay kasta, nalawag ti ulidan ni Jesus. Saan a nakiraman iti politika. Imbagana pay idi agangay: “Ti Pagariak ket saan a paset daytoy a lubong.” (Juan 17:14; 18:36) Masapul a tuladen dagiti Kristiano ita ti panagpampanunot ken inaramid ni Jesus. Suportaran, ikasaba, ken ikararagtayo dayta a Pagarian.—Mat. 6:10. w24.12 4 ¶5-6

Bayat nga agad-adalka, panunotem no kasanom a mayaplikar iti biagmo dagiti masursurom. Kas pagarigan, matuladmo ti kinahustisia ni Jehova no patas ti panangtratom iti amin. Matuladmo ti panagayat ni Jesus para ken Amana ken iti dadduma no situtulokka nga agsagaba para iti nagan ni Jehova ken no tulongam dagiti kapammatiam. Matuladmo met ni Jesus no kasabaam ti dadduma tapno maaddaanda iti gundaway a mangawat iti di magatadan a regalo ni Jehova. No naun-uneg ti pannakaawat ken apresasiontayo iti subbot, ad-adda nga ayatentayo ni Jehova ken ti Anakna. Gapu iti dayta, ad-adda met nga ayatendatayo. (Sant. 4:8) Isu nga itultuloytayo nga usaren ti amin nga ipapaay kadatayo ni Jehova tapno agtultuloy a makasursurotayo maipapan iti subbot. w25.01 25 ¶16-17

Ti tekstotayo ita nga aldaw ket mabalin met a maipatarus kas: “Inikkatmo amin a basolko iti imatangmo.” Ipakita dayta nga ilustrasion nga ipuruak ken saanen a taliawen ni Jehova dagiti basol dagiti agbabbabawi. Mabalin a maipatarus met dayta iti kastoy: “Pinagbalinmo [dagiti basolko] a kas man la saan a napasamak dagita.” Impaganetget ti Biblia dayta a punto iti sabali pay nga ilustrasion a mabasa iti Mikias 7:18, 19. Ibagbaga dagita a bersikulo nga ipalladaw ni Jehova dagiti basoltayo iti adalem a baybay. Idi un-unana, imposiblen a maala ti maysa a banag a naipuruak iti kaadalman a paset ti baybay. Babaen kadagitoy nga ilustrasion, nasursurotayo a no pakawanennatayo ni Jehova, naan-anay nga ikkatenna dagiti basoltayo a mangpadpadagsen kadatayo. Pudno ti imbaga ni David: “Naragsak dagidiay napakawan dagiti dakes nga aramidda ken naabbongan dagiti basolda.” (Roma 4:7) Talaga a naan-anay ti panangpakawan ni Jehova! w25.02 9 ¶7-8

Adda paraiso ditoy daga ita a napno kadagiti tattao nga okupado nga agar-aramid iti naimbag a bambanag. Napno dayta iti minilion a tattao a mangtagtagiragsak iti pudpudno a talna. Dagidiay agbibiagen iti dayta a paraiso ket determinado a di pulos mangpanaw iti dayta. Kayatda met nga adu a tattao agingga a posible ti makikadua kadakuada iti dayta a naisangsangayan a kasasaad. Ania dayta? Ti naespirituan a paraiso! Nakaskasdaaw ta nangaramid ni Jehova iti simboliko a nakataltalinaay a lugar iti tengnga ti napeggad a lubong ni Satanas a napno iti gura ken kinadakes. (1 Juan 5:19; Apoc. 12:12) Makitkita ti naayat a Diostayo dagiti makadadael nga epekto daytoy a sistema ti bambanag ken mangipapaay iti kinatalged a kasapulantayo tapno rumang-aytayo iti naespirituan. Iladawan ti Saona daytoy a naespirituan a paraiso kas natalged a “pagkamangan” ken “hardin a napadanuman a naimbag.” (Isa. 4:6; 58:11) Iti pamendision ni Jehova, dagiti agnanaed iti daytoy a paraiso ket naragsak ken natalged uray kadagitoy narigat a maudi nga al-aldaw.—Isa. 54:14; 2 Tim. 3:1. w24.04 20 ¶1-2

No kayatmon ti makiasawa, sigurado nga inkararagmon dayta ken Jehova. Siempre, saan nga ikarkari ni Jehova iti asinoman nga ikkanna ida iti asawa. Ngem maseknan kadagiti kasapulam ken iti rikriknam ken tulongannaka bayat nga agbirbirokka iti agbalinto nga asawam. Isu nga itultuloymo nga ibaga kenkuana dagiti tarigagaymo ken ti rikriknam. (Sal. 62:8) Ikararagmo nga ikkannaka iti sirib ken tulongannaka nga agan-anus. (Sant. 1:5) Uray no saanka a dagus a makabirok iti nasayaat a pakiasawaam, ikarkari ni Jehova nga itultuloyna nga ipaay dagiti pisikal ken emosional a kasapulam. (Sal. 55:22) Ngem masapul nga agannadka. Saanmo nga ipalubos a ti panagbirokmo iti pakiasawaam ti agbalin a kapatgan iti biagmo. (Fil. 1:10) Ti pudno a kinaragsak ket nakadepende iti relasionmo ken Jehova, saan a no adda asawam wenno awan. (Mat. 5:3) Ken bayat a single-ka pay, mabalin a nawaywayaka a mangpalawa iti ministeriom. (1 Cor. 7:32, 33) Usarem ti tiempom iti kasayaatan a pamay-an. w24.05 21 ¶4; 22 ¶6

Kasano koma kapaut ti panagin-innammoyo kas agnobio? Masansan a dakes ti resulta ti nadarasudos a panagdesision. (Prov. 21:5) Isu nga umdas koma ti kapaut ti relasionyo kas agnobio tapno mas maam-ammoyo pay ti maysa ken maysa. Ngem saan koma a nabayag unay no saan a kasapulan. Kuna ti Biblia: “Ti namnama a maitantan pagsakitenna ti puso.” (Prov. 13:12) Ania ti maitulong ti dadduma kadagiti agnobio? Mabalin nga awisem ida a makikadua iti pannangan, panagdaydayaw ti pamilia, wenno panagrelaks. (Roma 12:13) Kasapulanda kadi ti tsaperon, pagluganan, wenno lugar tapno makapagtungtongda nga is-isuda? No wen, adda kadi maitulongmo? (Gal. 6:10) No awisendaka nga agtsaperon, ibilangmo koma dayta a tsansa tapno mas matulongam dagiti gagayyemmo. Siguraduem laeng a saanmo ida a baybay-an nga is-isuda. Ngem obserbaram met no kaano a baybay-am ida nga agtungtong nga is-isuda. w24.05 30 ¶13-14

Ikagumaan dagiti panglakayen nga ammuen dagiti kasasaad a nangituggod iti maysa nga agbasol. Kas pagarigan, in-inut kadi a kimmapuy ti relasionna ken Jehova? Insardengna kadin ti regular a panagadalna iti Biblia ken pannakiramanna iti ministerio? Manmano kadin ken parparawpaw laengen ti panagkararagna ken Jehova? Insardengna kadin a labanan dagiti di umiso a tarigagayna? Siasino dagiti pakikadkaduaanna? Ania dagiti magusgustuanna a paglinglingayan? Kasano a dagita ti nakaimpluensia iti puso ken isipna? Maawatanna kadi a dagiti nabiit pay a desision ken inaramidna ti nangpaliday ken Amana a ni Jehova? Mabalin a saludsodan dagiti panglakayen ti nakabasol tapno mabigbigna no ania dagiti nangpakapuy iti relasionna ken Jehova isu a nagbasol. Masapul nga aramidenda dayta iti naayat a pamay-an ken saanda nga agpalutpot kadagiti personal a detalye a saanda met a kasapulan a maammuan. (Prov. 20:5) Mabalinda met ti agusar iti ilustrasion tapno matulonganda ti nakabasol a mangamiris iti kadagsen ti inaramidna. Bayat ti damo a pannakisaritada, mabalin a talaga a pagladingitanen ti nakabasol ti inaramidna. Mabalin pay ketdi nga agbabawi. w24.08 22 ¶9-11

Sireregta nga inkasaba ni Jesus “ti naimbag a damag ti Pagarian” gapu ta ammona a dayta ti kayat ti Dios nga aramidenna. Nagpokus ni Jesus iti ministeriona ken dayta ti kapatgan iti biagna. Uray iti maudi a bulbulan ti ministeriona, napan “kadagiti siudad ken purok” a nangisursuro kadagiti tattao. (Luc. 13:22) Nangsanay met iti dadduma pay nga adalan a mangikasaba iti naimbag a damag a kas iti inaramidna. (Luc. 10:1) Ita, ti panangikasaba iti naimbag a damag ti kapatgan met a trabaho a kayat da Jehova ken Jesus nga aramidentayo. (Mat. 24:14; 28:19, 20) No tuladentayo ti panangmatmat ni Jehova kadagiti tattao, maparayraytayo ti kinaregtatayo iti ministerio. Kayatna nga adu a tattao ti dumngeg ken mangipangag iti naimbag a damag. (1 Tim. 2:3, 4) Gapu ta makaisalakan ti naimbag a damag, sansanayennatayo ni Jehova nga agbalin a mas epektibo iti trabaho a panangasaba. Uray no saan pay a mangrugi dagiti tattao nga agdaydayaw ken Jehova ita, mabalin nga addanto gundawayda a mangaramid iti dayta sakbay nga agpatingga ti dakkel a rigat. w25.03 15-16 ¶5-7

Masapul nga usaren ti tunggal Kristiano ti konsiensiana a sinanay ti Biblia no maipapan iti pannakilangenna iti maysa a naikkat iti kongregasion. Baka kayat ti dadduma a kablaawan wenno abrasaen dayta a tao no makigimong. Nupay kasta, saantayo koma a makiinnestoria wenno makilangen kenkuana. Mabalin a mapanunot ti dadduma, ‘Saan kadi nga ibagbaga ti Biblia a no kablaawantayo ti maysa a di agbabbabawi a nakabasol ket makiramramantayon kadagiti dakes nga aramidna?’ (2 Juan 9-11) Ipakita ti konteksto dagitoy a bersikulo a ti tuktukoyen daytoy a bilin ket dagiti apostata ken dagidiay mangim-impluensia iti dadduma nga agbasol. (Apoc. 2:20) Isu a no ti maysa ket mangitantandudo iti sursuro dagiti apostata ken im-impluensiaanna ti dadduma nga agaramid iti dakes, saan nga iyurnos dagiti panglakayen ti panangbisita kenkuana. Siempre, mangnamnamada latta nga agbalbaliwto. Ngem agingga a saan pay a nagbalbaliw, saantayo a kablaawan wenno awisen a makigimong. w24.08 30-31 ¶14-15

Kalpasan a pinakan ni Jesus dagiti tattao, pinagluganna dagiti adalanna iti bangka tapno agsublida idiay Capernaum. Ngem napan ni Jesus iti bantay tapno maliklikanna ti panangpilit kenkuana dagiti tattao nga agbalin nga ari. (Juan 6:16-20) Bayat nga aglaylayag dagiti apostol, dimmawel ti baybay gapu iti napigsa nga angin. Ngem nagna ni Jesus iti rabaw ti danum a napan kadakuada. Inawisna ni apostol Pedro a magna met iti rabaw ti danum. (Mat. 14:22-31) Idi addan ni Jesus iti bangka, nagsardeng ti napigsa nga angin. Nasdaaw dagiti adalan ket imbagada: “Pudno a sika ti Anak ti Dios.” (Mat. 14:33) Ngem makapainteres ta saan nga imbaga dayta dagiti adalan kalpasan ti simimilagro a panangpaadu ni Jesus iti tinapay, no di ket idi laeng nagna ni Jesus iti rabaw ti danum. Innayon ni Marcos daytoy a detalye: “Kasta unay ti siddaaw [dagiti apostol], ta saanda a naawatan ti kaipapanan dagiti tinapay.” (Mar. 6:50-52) Saan a naawatan dagiti adalan nga inikkan ni Jehova ni Jesus iti pannakabalin a mangaramid iti ad-adu pay ngem iti panangipaayna iti taraon. w24.12 5 ¶7

Maipakitatayo nga ap-apresiarentayo ti ayat ni Jehova no bayat ti tiempo ti Memorial, aramidentayo ti amin a kabaelantayo a mangipakita ken Jehova nga agyamyamantayo gapu iti subbot. Malaksid iti panagplanotayo nga umatender iti Memorial, kayattayo met nga awisen ti dadduma. Ilawlawagtayo kadakuada no ania ti mapasamak iti Memorial. Makatulong no ipabuyam kadakuada dagiti video iti jw.org nga Apay a Natay ni Jesus? ken Laglagipenyo ti Ipapatay ni Jesus. Masapul a siguraduen dagiti panglakayen a maawis dagiti di aktibo. Imadyinem ti rag-o idiay langit ken ditoy daga no adda dagiti napukaw a karnero ni Jehova nga agsubli iti arbanna! (Luc. 15:4-7) Iti Memorial, ikagumaantayo a kablaawan saan laeng a dagiti kakabsat no di ket nangnangruna pay dagiti kabbaro wenno dagiti nabayagen a saan nga immatender. Kayattayo nga iparikna kadakuada a maragsakantayo iti kaaddada!—Roma 12:13. w25.01 29 ¶15

Gapu iti subbot, naammuantayo a nalinteg ni Jehova. Ngem adda pay sabali a kualidadna nga ad-adda pay nga isuro kadatayo ti subbot—ti kauneg ti panagayatna kadatayo. (Juan 3:16; 1 Juan 4:9, 10) Isuro kadatayo ti subbot a saan laeng a kayat ni Jehova nga agbiagtayo iti agnanayon no di ket kayatna met nga agbalintayo a paset ti pamiliana. Idi nagbasol ni Adan, saanen a paset ti pamilia ni Jehova. Kas resultana, amintayo ket saan a paset ti pamilia ni Jehova sipud idi nayanaktayo. Ngem gapu iti subbot, pakawanenen ni Jehova dagiti basoltayo. Ket inton agangay, pagbalinenna a paset ti pamiliana ti amin a natulnog a tattao ken mangipakpakita iti pammati kenkuana. Uray pay ita, mabalintayon ti maaddaan iti nasinged a relasion ken Jehova ken kadagiti padatayo nga agdaydayaw kenkuana. Talaga nga ay-ayatennatayo ni Jehova!—Roma 5:10, 11. w25.01 21 ¶6

Sigurado nga umanamongka a ti subbot ket di magatadan a regalo ni Jehova a Dios! (2 Cor. 9:15) Gapu ta natay ni Jesus para kenka, mabalinmon ti maaddaan iti nasinged a pannakigayyem ken Jehova a Dios. Addaanka metten iti namnama nga agbiag nga agnanayon. Adu ngarud ti rasontayo nga agyaman ken Jehova iti panangipaayna iti subbot gapu ta ay-ayatennatayo unay! (Roma 5:8) Tapno ditay pulos malipatan dagiti inaramid da Jehova ken Jesus, imbilin ni Jesus a tinawen a selebrarantayo ti Memorial. (Luc. 22:19, 20) Ita a tawen, selebrarantayo ti Memorial inton Huebes, Abril 2, 2026. Sigurado nga ikagumaantayo amin ti umatender. Magunggonaantayo unay no bayat ti tiempo ti Memorial, iwayaantayo nga utoben wenno panunoten a naimbag dagiti inaramid da Jehova ken Jesus para kadatayo. w25.01 20 ¶1-2

Agtultuloy a makasursuroka maipapan iti panagayat kadatayo ni Jehova a Dios ken ni Kristo Jesus no itultuloymo nga utoben dagiti inaramidda para kadatayo. Iti lawlawas sakbay ken kalpasan ti Memorial ita a tawen, basaem a naimbag ti maysa wenno ad-adu pay kadagiti Ebanghelio. Saanmo a pampaminsanen a basaen ti adu unay a kapitulo. Dika agap-apura. Siputam ketdi ti dadduma pay a rason no apay a masapul nga ayatentayo da Jehova ken Jesus. No nabayagkan iti kinapudno, baka mapanunotmo no adda pay baro a masursurom kadagiti ammomon a topiko kas iti kinahustisia ti Dios, ti ayatna, ken ti subbot. Ngem ti agpayso, kanayon nga adda baro a masursurom kadagita ken iti dadduma pay a topiko. Isu a basaem ken adalem ngarud ti nagadu nga impormasion kadagiti publikasiontayo a naibatay iti Biblia. w25.01 24-25 ¶13-15