Onu Israẹl Ejodudu

Jihofa m’amakajọ ko ñwu abo Israẹl ku ma na nẹ ma le, amaa ma atene onu. Ma ka ñwu Samuẹl kakini: ‘Am’ojanẹ duu ki le wa daka-i che n’amonu. Awa onugo atene k’a nẹ abẹlẹ.’ Samuẹl f’u li kak e-lẹ nyọ n. Todulẹ, i ch’adua ru Jihofa oji ọla lẹ. Jihofa ka ñwu kakini: ‘I ch’uwẹ ma kọ egbomu-wñ-i n. Omi ma kọ egbomu-wñ-i. Ka ñwu ma kakini ma neke n’onu, amaa onu lẹ anya tene ẹñwu wewe kwef ọwọ ma.’ Tabalẹ tabalẹ, ma kakini ma kwula n, kak’onu ama atene!’

Jihofa ka ñwu Samuẹl ka k’ẹnẹ ku ma adọ ki Sọl aj’onu ma ejodudu. Ẹgba ki Sọl lo nya dejudo Samuẹl ewo Rama, Samuẹl b’ekpo ti Sọl oji ki j’onu ma.

Ubilẹ, Samuẹl d’abo Israẹl jeju ki d’ẹnẹ ki ch’onu ma etito ña ma. Amaa, ma muda li Sọl n. Ẹ che m’ẹñwu ki chi? Todu ki d’ọla-wñ maja ugbo ku ma k’anẹ jọ. Otitala-wñ, ubi ku ma fu Sọl li, ma mu du dufu wa dago alumeji amonẹ ki jeju. Sọl che gbọgba t’abo duu ki dọmọ le, i la che gbokolobia nyọnyọ. Samuẹl kakini: ‘Mẹ g’ẹnẹ ki Jihofa tu.’ Tak amonẹ lẹ kpogwu kakini: ‘Oji onu ki gbo kakala!’

Iko ki Onu Sọl chanẹ ej’ọfẹ ababa, i anetiru Samuẹl, i la aleb’ọda Jihofa. Amaa, i mu rida. Dabu ujiwe, onu dukpẹ ki ch’ichẹbọ n. I n’iko ka ki Samuẹl ka ñwu Sọl ki nede-wñ. Amaa, Samuẹl w’ọmọ ẹrẹrẹ n. Todulẹ, Sọl tu ki ch’ichẹbọ lẹ kp’ọla-wñ. Abu Samuẹl che le oji ọla lẹ? Samuẹl kakini: ‘I ma nyọ ichẹñwu k’ẹ leb’ọda Jihofa.’ Ẹ neju kaki Sọl kọchẹ kwef ẹñwu ki che-i?

Ubilẹ, ẹgba ki Sọl lo nya k’ogwu bọ abo Amalẹk, Samuẹl ka ñwu ki m’ọchakaa ma ko kpa, ẹnẹ duu efu ma ki deju n. Amaa, Sọl tu ki jẹñwu Onu Egag ki deju. Jihofa ka ñwu Samuẹl kakini: ‘Sọl t’umi nọ mẹ, i la netiru mi gẹ n.’ Ẹdọ Samuẹl mu kpabiẹ nyọnyọ, todulẹ i ka ñwu Sọl kakini: ‘Todu k’ẹ ma netiru Jihofa gẹ n, Jihofa achi onu omunẹ.’ Alu ki Samuẹl m’ubi dagba alo, oñ Sọl gwọnyu eti afẹ Samuẹl, oñ i mu kpana. Oñ Samuẹl ka ñwu Sọl kakini: ‘Jihofa f’ojanẹ Israẹl kpana b’uwẹ ọwọ tẹ.’ Jihofa anya d’ojanẹ lẹ ñw’ẹnẹ ki afẹdọ-wñ ki la aleb’ọda-wñ.