Jisọs Fi Sọl Chi

Sọl ch’ẹnẹ Rom, ma la bi Tasọs. I ch’ẹnẹ ka ef’amiFarisi, i che m’ọda amiJu nyọnyọ, i la ach’ulaka Abo Kraist. I ch’alo nya m’abo Kraist kw’unyi-ma, i la ako ma jef unyi uga. Sọl la ñọ defu abo ku ma jẹñwu amonẹ r’ukpolo kpa Stifin.

Amaa, i di Sọl ẹdọ ki nya ch’Abo Kraist ku ma d’ojanẹ omunẹ ọbata, i che Jerusalẹm kate n. Tak i nya ka ñwu agboji amatama todu ki d’ọda ñwu ki lo ti Damaskọs ki neke nya ch’Abo Kraist ki d’ọmọ onugo ọbata. Alu ki Sọl na mẹru Damaskọs, achigili uganẹ mu ta l’o daka, oñ i mu chibu n’anẹ. Tak i gb’omukọla ki kakini: ‘Sọl, ẹñwu chi k’ẹ doli mi?’ Oñ Sọl t’ene kakini: ‘Ẹnẹ uwẹ che?’ Oñ omukọla lẹ dohi ñwu kakini: ‘Omi che Jisọs. Lo ti Damaskọs, ọmọ ma aka ñw’ẹ ẹñwu ki dukpẹ k’ẹ che.’ Alu ki Sọl kwanẹ, i li kak eju-wñ ganẹ gẹ n, taku ma gwọny’u ọwọ lo t’ewo Damaskọs.

I che n’Ẹnẹ Kraist ka ki arẹ Jihofa nyọnyọ ki d’efewo Damaskọs k’odu-wñ kọ Ananayas. Jisọs ka ñwu Ananayas ef’anẹ-ego kakini: ‘Kwanẹ k’ẹ lo t’unyi Judas ki d’ejọna ku ma adọ k’ọkpolo lẹ, k’ẹ tene ọnẹkẹlẹ k’odu-wñ kọ Sol.’ Oñ Ananayas kakini: ‘Ondu, u che m’ọnẹkẹlẹ-i nyọnyọ! I ak’amakọchẹ-wẹ jef unyi uga!’ Amaa, Jisọs ka ñwu Ananayas kakini: ‘Lo t’ugbo-wñ. U fi Sọl chi mẹ todu ki takoya uchẹnyọ ñwu abo uchẹichi duu.’

Alu ki Ananayas fi Sọl li, i ka ñwu kakini: ‘Ọmaye Sọl, Jisọs kpẹ mi r’ẹ todu k’u jẹñwu eju-wẹ ki dabi ganẹ gẹ.’ Ẹrẹrẹ lẹ, eju Sọl dabi chanẹ eganẹ gẹ. Taki Sọl f’ukọchẹ che lugbo Jisọs, i la mu d’akọchẹ-wñ. Ubilẹ, Sọl fi baptism che, i la chanẹ etakoya ef unyi Ọjọ kp’Abo Kraist ki bọ. Kpibe lugbo alu ki adẹ ọla amiJu alu ku ma li Sọl ki akọ amonẹ lugbo Jisọs. Ma chanẹ ekakini: ‘I ch’ọnẹkẹlẹ-i gbagẹdẹ ach’amakọchẹ Jisọs ọbata ni lẹ?’

Sọl d’ọdọ mẹta takoya uchẹnyọ ñwu abo ku ma dodo Damaskọs. Amaa, amiJu ach’ulaka Sọl nyọnyọ, ma la atene ku ma mu du kpa. Alu k’Abo Kraist ki dẹ Damaskọs f’u ma kaki amiJu atene alu ku ma ale ku ma mi Sọl du kpa, ma tene ọna ñwu ki neke ra kw’ọmọ. Amakọchẹ Kraist lẹ mi Sọl du tef agba, oñ ma mi Sọl du lef’ẹgwudu ọdọ ewo lẹ ki neke ra.

Alu ki Sọl le ti Jerusalẹm, i che ki d’ọla-wñ tef’Abo Kraist ki d’ọmọ. Amaa, Abo Kraist ki di Jerusalẹm achokpo-wñ. Amaa, ẹnẹ ka ef’amakọchẹ k’odu-wñ kọ Banabas mi Sọl du le t’ugbo amẹnukpuchẹ, oñ i ka ñwu ma kakini Sọl chẹ rida ochochi mẹ, i la dukpẹ ku ma chokpo-wñ gẹ n. Taki Sọl chanẹ etakoya uchẹnyọ kpai amọmaye ki di Jerusalẹm kp’ẹdọ chacha. Alu ki dẹ pẹẹ, odu Sọl mu di Pọl.