Defid Kpai Golayat

Jihofa ka ñwu Samuẹl kakini: ‘Omi akp’ẹ uchẹ ny’ugbo Jẹsi, todu omi f’onu ka tu ñwu ọla-mi kwef amọma-wñ ọnẹkẹlẹ lẹ mẹ, ki ch’onu Israẹl.’ Samuẹl che dabalu ki Jihofa ka ñwu. Alu ki Samuẹl li ọma Jẹsi ejodudu, i ka ñwu ọla-wñ kakini: ‘Ẹnẹ ki Jihofa ab’ekpo t’ọ oji chuu dago-i.’ Ama, Jihofa ka ñwu Samuẹl kakini i ch’owñ dẹ-i n. Jihofa ka ñwu kakini: ‘Ẹñwu ki def’ẹdọ onẹ oñ omi ago, i ch’alu k’ẹnẹ lẹ dẹ ejọdọda n.’

Jẹsi m’amọma-wñ ọnẹkẹlẹ mẹfa ko w’ugbo Samuẹl. Ama Samuẹl ka ñwu kakini: ‘I ch’abo-i Jihofa tu n. Ọchaka amọma-wẹ ọnẹkẹlẹ dẹ-i?’ Jẹsi dohi kakini: ‘E-imọtọ bọ t’ubi ta, odu-wñ kọ Defid. I dọmọ adeju t’amala-mi.’ Alu ki Defid mu gwudu wa, Jihofa ka ñwu Samuẹl kakini: ‘Ẹnẹ k’omi tu lẹ dẹ!’ Taki Samuẹl f’ekpo ba tu Defid oji todu ki ch’onu Israẹl ejọgba.

I n’ẹgba ka k’abo Filistia k’ogwu bọ abo Israẹl. Abo Filistia n’akachi ka k’odu-wñ kọ Golayat ki aj’uja ñwu ma. Ọjọ duu, Golayat ab’abo Israẹl ina. I aka ñwu ma kakini: ‘Mẹ f’ẹnẹ ka chi kwefu mẹ ki wa b’umi j’uja. Ichẹñwu k’a f’uja ja ki neke f’umi kpa, a mud’amadu mẹ, ama ichẹñwu k’u f’owñ du, k’u la mu du kpa, mẹ mud’amadu wa.’

Defid lew’ugbo k’abo Israẹl aj’ogwu kp’abo Filistia, i n’ujẹñwu wa du ñwu amọmaye-wñ ku ma ch’isoja. I gbọ alu ki Golayat akọla, oñ Defid kakini: ‘Na j’uja kp’owñ!’ Tak Onu Sọl kakini: ‘Imọtọ ẹ che ta.’ Oñ Defid dohi ñwu kakini: ‘Jihofa ach’atẹko mi.’

Sọl m’afẹ ogwu-wñ ko nyi ñwu Defid, i la m’ugbada-wñ du ñwu. Ama Defid kakini: ‘U neke n’ẹñwu-i j’ogwu n.’ Defid m’inata-wñ du n’ọwọ, tak i f’okwuta bọbọlọ mẹlu re amẹr’aji, oñ i mu ko j’efu ikpa-wñ. Taki Defid chanẹ etẹmẹru Golayat. Oñ Golayat kwadọ Defid kakini: ‘Lew’ugbo mi emi, uwẹ ọma kẹkẹ-i. Na d’ọrẹla-wẹ ñwu am’ẹwẹ ojale kpai am’ẹla bibi ef’oko ku ma jẹ.’ Ama Defid ch’okpo n. Defid ñọ kwadọ Golayat kakini: ‘Ugbada kpai ọkwọ oñ ẹ nẹ w’ugbo mi-i, ama omi aw’ugbo wẹ ef’odu Jihofa. I ch’abo Israẹl ẹ j’uja kp’ama-i n, Jihofa ẹ j’uja kp’owñ-i. Ọchakaa abo ki jọ-i ama kakini Jihofa che n’ukpahiu t’ugbada kpai ọkwọ k’ẹ nẹ lẹ le. I la ad’ẹ ny’uwa ọwọ.’

Oñ Defid m’ọwọ-wñ du tunyu ef’ikpa-wñ, oñ i m’okwuta ka du gw’inata kp’ukpahiu. Lef’ukpahiu Jihofa, okwuta lẹ kpo tunyu ọgboji-wñ. Tak i lewanẹ feju banẹ ma kpiligidi. Abo Filistia ki bọ ra alu ku ma li kaki ma mi Golayat du kpa mẹ. Ẹ che kẹdọno Jihofa alu ki Defid kẹdọno Jihofa?