Ndị Agadi, Unu Na-abara Ọgbakọ Ezigbo Uru

O nwekwara ike ịbụ na nká anaghịzi ekwe gịnwa mee ihe ndị ị na-emebu. Ikekwe, i jirila obi gị fee Jehova ruo ọtụtụ afọ. N’agbanyeghị ya, i nwere ike ịna-ele onwe gị anya otú na-adịghị mma n’ihi ihe ndị ị na-anaghị emelizi. Dị ka ihe atụ, i nwere ike ịna-achọ iji ihe ndị ị na-eme ugbu a na-atụnyere ihe ndị i mere n’oge gara aga. Ọ bụrụ otú ahụ, gịnị ga-enyere gị aka ịna-enwe ọṅụ ugbu a?

IHE JEHOVA CHỌRỌ KA I MEE

Jụọ onwe gị, sị: ‘Gịnị ka Jehova chọrọ ka m mee?’ Ihe e kwuru na Diuterọnọmi 6:5 nwere ike ịkasi gị obi. Ebe ahụ sịrị: “Jiri obi gị niile na mkpụrụ obi gị niile na ike gị niile hụ Jehova bụ́ Chineke gị n’anya.”

Ihe amaokwu ahụ kwuru gosiri na Jehova chọrọ ka i jiri obi gị niile, mkpụrụ obi gị niile, na ike gị niile fee ya. Ihe a ga-enyere gị aka ka ị ghara ịna-eji onwe gị atụnyere ndị ọzọ ma ọ bụkwanụ jiri ihe ndị i mere n’oge gara aga atụnyere ihe ndị ị na-eme ugbu a.

Chegodị gbasara ihe a: Mgbe ị ka bụ okorobịa ma ọ bụ agbọghọbịa, gịnị ka i meere Jehova? Ọtụtụ ndị ohu Jehova na-ekwu na ha meere ya ike ha niile. Ihe i mere n’oge ahụ bụ ihe ị ga-emeli. Olee ihe ndị ị na-emeliri Jehova ugbu a? Ọ ga-abụ na ihe ị na-eme bụ ihe ị ga-emeli ugbu a n’ihi otú ihe si dịrị gị. Ọ bụrụ na i si otú a na-ele ya anya, i nwere ike ikweta na ihe i meere Jehova n’oge gara aga bụkwa ihe ị na-emere ya ugbu a. I meere ya ike gị niile n’oge ahụ. Ị na-emekwara ya ike gị niile ugbu a.

I NWERE IKE INYERE NDỊ ỌZỌ EZIGBO AKA

Kama ịna-eche gbasara ihe ndị ị na-anaghị emeli ugbu a, chee gbasara ohere ndị i nwere ike iji nyere ndị ọzọ aka. Ugbu a i merela agadi, e nwere ihe ndị ị ga-emeli ị na-emelighị n’oge ị bụ okorobịa ma ọ bụ agbọghọbịa. Dị ka ihe atụ, ị ga-emeli ihe ndị a:

Kọọrọ ndị ọzọ ihe ndị ị mụtarala ná ndụ. Legodị ihe ụfọdụ e kwuru na Baịbụl:

Eze Devid sịrị: “E nwere mgbe m bụ nwata. Ma ugbu a, abụzi m agadi. Ma ahụbeghị m ka a hapụrụ onye ezi omume ọ bụla, ahụbeghịkwa m ụmụ ya ka ha na-arịọ nri.”​—Ọma 37:25.

Joshụa sịrị: “Ugbu a, oge ọnwụ m eruwela. Unu makwa nke ọma na o nweghị otu n’ime ọmarịcha nkwa niile Jehova bụ́ Chineke unu kwere unu nke na-emezughị. Ha niile emezuolara unu. O nweghị nke n’ime ha na-emezughị.”​—Josh. 23:14.

O nwere ike ịbụ na gịnwa ekwuola ụdị ihe ndị a. Ihe Devid na Joshụa kwuru bụ ihe mere n’oge ha dị ndụ. Mmadụ abụọ a bụ́ ndị ji obi ha niile fee Jehova kwuru ihe ndị ha ji anya ha hụ na ihe ndị ha ji ntị ha nụ n’ọtụtụ afọ ha biri ndụ. N’ihi ya, ihe ha kwuru bakwuru uru.

Ọ bụrụ na o teela i fewere Jehova, i nwere ike ịkọrọ ndị ọzọ uru ị hụrụla ọ baara gịnwa ma ọ bụ ndị ọzọ. È nwere oge ị na-echeta Jehova si n’ụzọ pụrụ iche nyere ndị ohu ya aka? Ọ bụrụ na e nwere, na-akọrọ ya ndị ọzọ. O nwere ike ịbụ na ị chọpụtala na ọ na-agba ndị ọzọ ume. Ọ bụrụ na ị kọọrọ ụmụnna gị ihe ndị merela ná ndụ gị, o nwere ike ịgba ha ume.​—Rom 1:11, 12.

Otú ọzọ i nwere ike isi gbaa ndị ọzọ ume bụ ịga ọmụmụ ihe ihu na ihu otú ike kwere gị. I mee otú ahụ, ị ga na-agba ụmụnna gị ume, hanwa ana-agbakwa gị ume. Nwanna Connie anyị kwuburu okwu ya sịrị: “Ịga ọmụmụ ihe na-eme ka m ghara ịda mbà n’obi. Olee otú m ga-esi dawa mbà n’obi ebe ọ bụ na ụmụnna ji obi ha niile na-egosi m ịhụnanya n’Ụlọ Nzukọ Alaeze? Otú m si egosi ndị ọzọ na obi dị m ụtọ bụ ịgbalị na-enye ha obere onyinye. M na-agbalịsi ike ka m soro ụmụnna m na-eme ihe gbasara ofufe Jehova.”

JEHOVA JI OZI Ị NA-EJERE YA KPỌRỌ IHE

Baịbụl kọọrọ anyị banyere ọtụtụ ndị Jehova hụrụ n’anya n’agbanyeghị na otú ihe si dịrị ha ekweghị ha mee ihe niile ha chọrọ ime n’ozi ya. Chee banyere Simiọn bụ́ onye Izrel merela agadi n’oge a mụrụ Jizọs. Ọ gaa n’ụlọ nsọ, o nwere ike ịbụ na ọ na-ahụ ụmụ okorobịa na-arụ ọrụ ndị dị mkpa n’ebe ahụ. Yanwa kwanụ? O nwere ike ịna-eche na o nweghịzi uru ya na-abara Jehova ebe ọ bụ na ọ gaghị emelizi ihe ụmụ okorobịa ndị ahụ na-eme. Ma, Jehova eleghị ya anya otú ahụ. N’anya Jehova, ọ bụ “onye ezi omume na onye na-asọpụrụ Chineke.” Jehova gọzikwara ya mee ka ọ hụ Jizọs mgbe ọ ka bụ nwa ọhụrụ. O sikwa n’ọnụ Simiọn buo amụma banyere onye a ga-abụ Mezaya. (Luk 2:25-35) O doro anya na Jehova elekwasịghị anya n’ihe Simiọn na-agaghị emeli. Kama, o lekwasịrị anya n’otú okwukwe ya si sie ike nakwa n’otú ‘mmụọ nsọ si na-edu ya.’

Ka obi sie gị ike na Jehova ji ozi i ji obi gị na-ejere ya kpọrọ ihe n’agbanyeghị ihe ọ bụla ị na-anaghị emelizi. “Onyinye Chineke kacha anabata bụ onyinye si mmadụ n’obi, n’ihi na Chineke na-atụ anya ka mmadụ nye ihe ọ ga-enyeli, ọ bụghị ihe ọ na-agaghị enyeli.”​—2 Kọr. 8:12.

N’ihi ya, lekwasị anya n’ihe ị ga-emeli. Dị ka ihe atụ, chee banyere ụzọ dị iche iche i nwere ike isi kwusaa ozi ọma, ọ bụrụgodị ruo obere oge. Ì nwere ike ịkpọ mmadụ n’ekwentị ma ọ bụ zigara ya akwụkwọ ozi? Obere ihe e meere ụmụnna iji gosi ha ịhụnanya nwere ike ịkpa ezigbo ike, karịchaa ma ọ bụrụ na onye mere ya ejeerela Jehova ozi ọtụtụ afọ.

E nwere ndị nká ma ọ bụ ọrịa na-anaghị ekwe mee ihe ndị ha chọrọ ime. Gụọ akụkọ si n’Ọwụwa Anyanwụ Afrịka n’igbe isiokwu ya bụ “Ihe Zọrọ Otu Nwa Agbọghọ Ndụ.”

Na-echeta na okwukwe gị na otú i si erubere Jehova isi kemgbe ọtụtụ afọ nwere ike ịgba ndị ọzọ ume. Ị bụ onye e ji ama atụ n’ịtachi obi. Obi kwesịkwara isi gị ike na “Chineke abụghị onye ajọ omume. Ọ gaghị echefu ọrụ unu na otú unu si gosi na unu ji aha ya kpọrọ ihe n’ihi na unu jeere ndị nsọ ozi ma ka na-ejere ha ozi.”​—Hib. 6:10.

NA-EME IHE NIILE I NWERE IKE IME

Nchọpụta e mere na-egosi na ahụ́ na-aka agbasi ọtụtụ ndị agadi ike ma ha na-enyere ndị ọzọ aka. Ha na-aka eche echiche nke ọma, na-akakwa ebite ndụ aka.

O doro anya na imere ndị ọzọ ihe ọma agaghị ewepụ nsogbu niile ha na nká so. Ọ bụ naanị Alaeze Chineke ga-eme ya. Otú ọ ga-esi eme ya bụ iwepụ ihe kpatara nká na ọnwụ, ya bụ, ezughị okè anyị.​—Rom 5:12.

N’agbanyeghị ya, ozi i ji obi gị na-ejere Jehova, nke inyere ndị ọzọ aka so na ya, ga-eme ka olileanya gị sikwuo ike. O nwedịrị ike ime ka ahụ́ sikwuo gị ike. Ndị agadi, biko maranụ na Jehova ji ozi unu na-ejere ya kpọrọ ihe. Ọgbakọ ejighịkwa okwukwe unu egwu egwu.