‘Ka Anyị Na-adị n’Otu Otú Mmụọ Nsọ Mere Ka Anyị Dịrị’

PỌL onyeozi gwara Ndị Kraịst nọ n’Efesọs, sị: “Na-edirinụ ibe unu ihe n’ihi na unu hụrụ ha n’anya. Unu na ibe unu dịrị n’udo, na-agbasikwanụ mbọ ike ka unu na-adị n’otu otú mmụọ nsọ mere ka unu dịrị.”—Efe. 4:2, 3.

Ọ bụ “mmụọ nsọ” Chineke na-eme ka anyị ‘dịrị n’otu.’ Ma, ihe Pọl kwuru gosiri na anyị agaghị adịli n’otu n’agbaraghị ya mbọ ọ bụla. Ònye ga-agba mbọ ahụ? Ọ bụ Onye Kraịst ọ bụla kwesịrị ịgbasi mbọ ike ‘ka anyị na-adị n’otu otú mmụọ nsọ mere ka anyị dịrị.’

Dị ka ihe atụ, ka e were ya na mmadụ nyere gị ụgbọala ọhụrụ. Ònye ga na-elekọta ya? Azịza ya doro anya. Ị gaghị ata onye nyere gị ụgbọala ahụ ụta ma o mebie n’ihi na i lekọtaghị ya nke ọma.

Otú ahụ ka ọ dịkwa anyịnwa. Ọ bụ eziokwu na ọ bụ Chineke na-eme ka anyị na-adị n’otu, ma, ọ dị onye ọ bụla n’ime anyị n’aka ịhụ na anyị nọgidere na-adị n’otu. Ọ bụrụ na e nwere nwanna anyị na ya na-adịghị ná mma, anyị kwesịrị ịjụ onwe anyị, sị: ‘M̀ na-agba mbọ ka mụ na ya kpezie ka ọgbakọ nwee ike na-adị n’otu?’

‘NA-AGBASI MBỌ IKE’ KA ANYỊ NA-ADỊ N’OTU

Ihe Pọl kwuru gosiri na ọ bụghị mgbe niile ka ọ ga-adị mfe anyị na ụmụnna anyị ịna-adị n’otu, karịchaa ma e nwee onye nke kpasuru anyị iwe. Ọ̀ pụtara na ọ bụ mgbe niile ka anyị kwesịrị ịgakwuru nwanna mejọrọ anyị ka anyị na ya kwuo gbasara ya? Ọ bụghị mgbe niile. Jụọ onwe gị, sị: ‘Ịgakwuru nwanna a ọ̀ ga-eme ka ihe ka mma ka ọ̀ bụ ka ọ ka njọ?’ Mgbe ụfọdụ, ihe ka mma ime bụ ileghara ihe ahụ anya ma ọ bụ ịgbaghara onye ahụ.—Ilu 19:11; Mak 11:25.

Foto ndị na-egosi: Ebe otu nwanna kpebiri ileghara ihe e mere ya anya. 1. Ebe otu nwanna na-abara ya mba. 2. Ebe ọ na-eche ihe nwanna ahụ mere ya. 3. Ebe ọ na-agụ Baịbụl ma na-atụgharị uche na ya. — Jụọ onwe gị, sị, ‘Ịgakwuru nwanna a ọ̀ ga-eme ka ihe ka mma ka ọ̀ bụ ka ọ ka njọ?

Pọl onyeozi kwuru ka anyị ‘na-ediri ibe anyị ihe n’ihi na anyị hụrụ ha n’anya.’ (Efe. 4:2) Otu akwụkwọ kwuru na ihe a nwere ike ịpụta “ịnabata ha otú ha dị.” Ihe ọ pụtara bụ na anyị ga-ekweta na ụmụnna anyị bụ ndị mmehie otú anyịnwa bụkwa. N’eziokwu, anyị na-agbalịsi ike ‘ịna-eyiri àgwà ọhụrụ.’ (Efe. 4:23, 24) Ma, ọ gaghị adịchara anyị mfe mgbe niile. (Rom 3:23) Ịghọta ihe a ga-enyere anyị aka ịna-ediri ibe anyị ihe ma na-agbaghara ibe anyị. Ọ ga-eme ka anyị ‘dịrị n’otu otú mmụọ nsọ mere ka anyị dịrị.’

Ọ bụrụ na anyị ana-agbaghara ihe ọjọọ e mere anyị ma na-echefu ya, anyị na ‘ibe anyị ga na-adị n’udo.’ Okwu Grik a sụgharịrị ‘ịdị n’udo’ ná Ndị Efesọs 4:3 pụtara “akwara ndị na-ejikọta ọkpụkpụ.” Akwara ndị ahụ na-esi ezigbo ike. E nwere ike iji udo tụnyere akwara ndị ahụ. Udo na ịhụnanya na-enyere anyị aka ka anyị na ibe anyị na-adị n’otu n’agbanyeghị nghọtahie ọ bụla anyị na ha nwere.

N’ihi ya, ọ bụrụ na nwanna akpasuo gị iwe, mee ihe wutere gị, ma ọ bụ na o nwere àgwà na-ewe gị iwe, gbalịa na-enwere ya ọmịiko kama ịna-ahụ naanị ihe na-adịghị mma ọ na-eme. (Kọl. 3:12) Ebe ọ bụ na anyị niile ezughị okè, ọ ga-abụ na e nweela mgbe i mejọrọ mmadụ. Iburu ihe a n’obi ga-enyere gị aka ịna-agbalịsi ike ‘ka anyị na-adị n’otu otú mmụọ nsọ mere ka anyị dịrị.’