Na-enwe Ọṅụ Mgbe Ị Na-elekọta Onye Agadi Ma Ọ Bụ Onye Ọrịa

1-2. Olee otú obi na-adị Jehova gbasara ndị na-elekọta onye agadi ma ọ bụ onye ọrịa? (Ilu 19:17) (Kọwaakwa foto.)

OTU nwanna aha ya bụ Jin-yeol si Koria sịrị: “Mụ na nwunye m alụọla ihe karịrị afọ iri atọ na abụọ. Kemgbe afọ ise ugbu a, ọ na-arịa ezigbo ọrịa na-eme ka ọ ghara ịna-emegharị ahụ́. Ọ bụ m na-elekọta ya kemgbe ahụ. M hụrụ nwunye m n’anya, jirikwa ya kpọrọ ihe. Obi na-adịkwa m ụtọ ilekọta ya. N’abalị ọ bụla, ọ na-ehi n’àkwà pụrụ iche dị n’ụlọ anyị a rụụrụ ya maka ọrịa ya. M na-edina n’akụkụ ya, anyị abụọ ejikọta aka hie ụra.”

² È nwere onye ị na-elekọta? O nwere ike ịbụ nne gị ma ọ bụ nna gị, di gị ma ọ bụ nwunye gị, nwa gị, ma ọ bụ enyi gị. Ọ bụrụ na e nwere, ọ ga-abụ na obi na-adị gị ụtọ inyere ya aka n’ihi na ị hụrụ ya n’anya. Otú ahụ i si elekọta ya na-egosikwa na ị hụrụ Jehova n’anya. (1 Tim. 5:4, 8; Jems 1:27) N’agbanyeghị ya, ọ naghị adị mfe ilekọta onye ị hụrụ n’anya. Mgbe ụfọdụ, e nwere nsogbu ndị ị na-enwe ndị ọzọ na-anaghị ama. O nwekwara ike ịdị gị mgbe ụfọdụ ka ọ̀ bụ naanị gị na-ata ahụhụ. Ndị ọzọ nwere ike ịhụ gị ka ị na-achị ọchị. Mana, ha amaghị na obi na-ajọ gị ezigbo njọ mgbe ụfọdụ. (Ọma 6:6) Ọ bụrụgodị na ndị ọzọ amaghị ihe gị na ya na-alụ, Jehova ma. (I nwere ike ịtụle Ọpụpụ 3:7.) O jighị anya mmiri gị na mbọ ị na-agba ilekọta onye gị egwu egwu. (Ọma 56:8; 126:5) Ọ na-ahụ ihe niile ị na-emere onye gị. Ọ na-ewere ya na ị na-agbazinye ya ihe. O kwekwara nkwa na ọ ga-akwụ gị ụgwọ.​—Gụọ Ilu 19:17.

3. Olee nsogbu ndị ọ ga-abụ na Ebreham na Sera nwere ka ha na-elekọta Tira?

³ Baịbụl kọrọ gbasara ọtụtụ ndị lekọtara onye ha mere agadi ma ọ bụ na-arịa ọrịa. Dị ka ihe atụ, chee gbasara Ebreham na Sera. Mgbe ha hapụrụ Ọọ, Tira bụ́ nna ha dị ihe dị ka narị afọ abụọ (200). N’agbanyeghị ya, o so ha pụọ. Ha gara ihe dị ka narị kilomita itoolu na iri isii (960) rute Heran. (Jen. 11:31, 32) O doro anya na Ebreham na Sera hụrụ Tira n’anya. Ma, ọ dịghịrị ha mfe ilekọta onye mere agadi otú ahụ, karịchaa mgbe ha na-eme njem. Ọ ga-abụ na ihe ha ji mee njem ahụ bụ kamel ma ọ bụ jakị. O nwere ike ịbụ na o siiri Tira ezigbo ike ịrịgoro n’elu anụmanụ ndị ahụ ma nọrọ na ha ruo ogologo oge. Ọ ga-abụ na e nwere oge ndị ezigbo ike gwụrụ Ebreham na Sera. Nke ọ bụla ọ bụ, Jehova mere ka ha nwee ike. Jehova ga-enyekwa gị ike ma nyere gị aka otú ahụ o meere Ebreham na Sera.​—Ọma 55:22.

4. Gịnị ka anyị ga-amụ n’isiokwu a?

⁴ Ọ ga-adịrị gị mfe ilekọta onye agadi ma ọ bụ onye na-arịa ọrịa ma ị na-enwe obi ụtọ. (Ilu 15:13) Cheta na i nwere ike ịna-enwe obi ụtọ ma mgbe ihe siiri gị ezigbo ike. (Jems 1:2, 3) Olee otú ị ga-esi na-enwe obi ụtọ? Otu ihe ị ga-eme bụ ịna-ekpe ekpere ka Jehova nyere gị aka ịna-enwe obi ụtọ. N’isiokwu a, anyị ga-amụ gbasara ihe ndị ọzọ ndị na-elekọta onye agadi na onye ọrịa ga-eme iji na-enwe obi ụtọ. Anyị ga-ekwukwa otú ndị ọzọ ga-esi enyere ha aka. Ka anyị buru ụzọ kwuo ihe mere ndị na-elekọta ndị agadi na ndị ọrịa kwesịrị iji na-enwe obi ụtọ na ihe ndị nwere ike ime ka ha ghara ịna-enwe obi ụtọ.

IHE MERE ILEKỌTA ONYE AGADI NA ONYE ỌRỊA JI ESI IKE

5. Gịnị mere ndị na-elekọta onye agadi ma ọ bụ onye ọrịa ji kwesị ịna-enwe ọṅụ?

⁵ Ọ bụrụ na onye na-elekọta onye agadi ma ọ bụ onye ọrịa akwụsị inwe ọṅụ, o nwere ike ime ka ike gwụ ya. (Ilu 24:10) Ọ bụrụkwa na ike agwụ ya, o nwere ike ọ gaghịzi eji obiọma na-elekọta onye ahụ otú o kwesịrị. Olee ihe ndị nwere ike ime ka ndị na-elekọta onye agadi ma ọ bụ onye ọrịa kwụsị inwe ọṅụ?

6. Gịnị mere ezigbo ike ji na-agwụ ụfọdụ ndị na-elekọta onye agadi ma ọ bụ onye ọrịa?

⁶ Ezigbo ike nwere ike ịgwụ gị. Otu nwanna nwaanyị aha ya bụ Leah sịrị: “Ọ bụrụgodị ụbọchị a na-enweghị ihe dapụtaranụ, ezigbo ike na-agwụ m n’abalị nke na e nweghị ihe ọzọ m ga-emeli. Mgbe ụfọdụ, ike anaghịdị adị m ịzaghachi ozi e ziteere m n’ekwentị.” E nwere ndị ọ na-esiri ike ịrahụ ezigbo ụra ma ọ bụ izu ike otú ha kwesịrị. Otu nwanna nwaanyị aha ya bụ Inés sịrị: “Anaghị m arahụ ụra nke ọma. N’abalị, m na-etetakarị awa abụọ ọ bụla ka m lekọta nne di m. Kemgbe ọtụtụ afọ, mụ na di m enwebeghị ike ịga ebe masịrị anyị zurutụ ike.” Ụfọdụ ndị na-elekọta ndị agadi ma ọ bụ ndị ọrịa anaghịdị enwe ohere soro ndị enyi ha nọkọọ ma ọ bụ mee ụfọdụ ihe ná nzukọ Jehova n’ihi na ha ji oge ha niile na-elekọta onye ha. Ọ na-eme ka ha na-eche na ha nọ naanị ha, obi ana-ajọkwa ha njọ maka na ha anaghị emeli ihe niile ha gaara achọ ime.

7. Gịnị na-ewute ụfọdụ ndị na-elekọta onye agadi ma ọ bụ onye ọrịa ma ọ bụ na-eme ka obi na-ama ha ikpe?

⁷ Obi nwere ike ịna-ajọ gị njọ n’ihi ahụhụ onye gị na-ata ma ọ bụkwanụ na i chere na ị naghị emecha ihe niile i kwesịrị ime. Otu nwanna nwaanyị aha ya bụ Jessica sịrị: “M chere na e nwere ihe m kwesịrị imere papa m m na-anaghị emere ya. M wepụta oge zurutụ ike, obi na-ama m ikpe n’ihi na ọ na-adị m ka m̀ na-eche naanị gbasara onwe m.” Ụfọdụ ndị na-elekọta onye ha nwere ike ịna-echegbu onwe ha na ha anaghị enyere ya aka otú ha kwesịrị. Mgbe ụfọdụkwa, ha nwere ike ịna-eche na ha agaghị elekọtalizi onye ha. Ha nwere ike ikwu okwu otú na-adịghị mma ma ọ bụ mee ihe ha na-ekwesịghị ime mgbe ike gwụrụ ha. Ihe a niile nwere ike ime ka obi na-ajọ ha ezigbo njọ. (Jems 3:2) Ọ na-ewutekwa ụfọdụ ndị ma ha hụ ka ọrịa jituru onye ha na-awụbu gam gam. Otu nwanna nwaanyị aha ya bụ Barbara sịrị: “Otu n’ime ihe ndị kacha enye m nsogbu bụ ịhụ ka ọrịa enyi m na-akakwu njọ kwa ụbọchị.”

8. Kọọ akụkọ gosiri otú ikele onye na-elekọta onye agadi ma ọ bụ onye ọrịa na-eme ka obi dị ya.

⁸ I nwere ike ịna-eche na e nweghị ihe ndị ọzọ ji ihe ị na-arụ kpọrọ. N’ihi gịnị? Ọ bụ n’ihi na ọtụtụ ndị anaghị ekele gị ma ọ bụ na-aja gị mma maka ihe ị na-eme. Ma, ọ bụrụ na mmadụ ekelee gị maka ihe ị na-eme, ọ na-eme gị obi ụtọ. (1 Tesa. 5:18) Otu nwanna nwaanyị aha ya bụ Melissa sịrị: “E nweela oge ndị m bere ákwá n’ihi na obi dara m mbà. Ma, ọ bụrụ na ndị m na-elekọta ekelee m maka ihe m na-emere ha, ọ na-eme m ezigbo obi ụtọ. Ọ na-emekwa ka m nwee ike m ga-eji na-elekọta ha.” Otu nwanna aha ya bụ Ahmadu kwuru uru ọ na-abara ya ma e kelee ya maka ihe ọ na-eme. Ya na nwunye ya na-elekọta nwa nwanne nwunye ya na-arịa akwụkwụ. Ọ sịrị: “Ọ bụ eziokwu na e nwere ike ọ gaghị aghọtacha mbọ niile anyị na-agba iji na-elekọta ya, ma obi na-atọ m ezigbo ụtọ ma o kelee anyị maka ihe ndị anyị na-emere ya ma ọ bụ gwa anyị na ọ hụrụ anyị n’anya.”

OTÚ Ị GA-ESI NA-ENWE ỌṄỤ

9. Gịnị ka onye na-elekọta onye agadi ma ọ bụ onye ọrịa ga-eme iji gosi na ọ ma ebe ike ya ruru?

⁹ Mara ebe ike gị ruru. (Ilu 11:2) Ọ bụghị mgbe niile ka anyị na-enwe ike na oge anyị ga-eji eme ihe niile anyị chọrọ ime. N’ihi ya, kpebie ihe ndị ị ga-emeli na ihe ndị ị na-agaghị emeli. E nwee ihe ị na-agaghị emeli, kwuo na ị gaghị emeli ya. Ọ dịghị njọ. Ọ na-egosi na ị ma ebe ike gị ruru. Ọ bụrụ na ndị ọzọ achọọ inyere gị aka, jiri obi ụtọ kwe ka ha nyere gị aka. Otu nwanna aha ya bụ Jay sịrị: “Ọ bụghị ihe niile ka anyị ga-emeli. Ịmata ebe ike anyị ruru, gharakwa ịgafe ya, ga-eme ka anyị na-enwe obi ụtọ.”

10. Gịnị mere o ji dị mma ka ndị na-elekọta ndị agadi na ndị ọrịa na-aghọta ihe mere onye ha na-elekọta ji eme ihe ọ na-eme? (Ilu 19:11)

¹⁰ Na-aghọta ihe mere onye ị na-elekọta ji eme ihe ọ na-eme. (Gụọ Ilu 19:11.) Ịna-aghọta ya nwere ike ime ka iwe ghara iwe gị ma o kwuo ma ọ bụ mee ihe na-adịghị gị mma. Onye na-aghọta ihe na-achọ ịma ihe mere mmadụ ji eme ihe ọ na-eme. Ụfọdụ ọrịa nwere ike ime ka mmadụ mee ihe ọ na-agaraghị eme. (Ekli. 7:7) Dị ka ihe atụ, onye dịbu nwayọọ nwedịrị ike isesawa gị okwu ma ọ bụ malite ime mkpesa ma ọ bụkwanụ wewe iwe. Ọ bụrụ na ị na-elekọta onye na-arịa ọrịa ọjọọ, o nwere ike ịbara gị uru ma ị mụọ gbasara ọrịa ahụ. Ị mụtakwuo gbasara ọrịa ahụ, i nwere ike ịghọta na ọ bụ ọrịa ahụ mere o ji na-akpa àgwà otú o si akpa, ọ bụghị na ọ bụ onye ọjọọ.​—Ilu 14:29.

11. Olee ihe ndị dị ezigbo mkpa onye na-elekọta onye agadi ma ọ bụ onye ọrịa kwesịrị iwepụta oge na-eme kwa ụbọchị? (Abụ Ọma 132:4, 5)

¹¹ Wepụta oge na-eme ka gị na Jehova na-adị ná mma. Mgbe ụfọdụ, ọ ga-adị mma ka ị hapụtụ ihe ndị ị na-eme mee ihe ndị ọzọ “ka mkpa.” (Fil. 1:10) Otu n’ime ha bụ ime ka gị na Jehova na-adịkwu ná mma. E nwere ọtụtụ ihe Eze Devid na-eme. Mana, ife Jehova bụ ihe kacha ya mkpa. (Gụọ Abụ Ọma 132:4, 5.) Ọ dịkwa mkpa ka gịnwa na-ewepụta oge ụfọdụ n’ụbọchị na-agụ Baịbụl ma na-ekpe ekpere. Otu nwanna nwaanyị aha ya bụ Elisha sịrị: “Ihe na-eme ka m na-enwe ọṅụ bụ na m na-ekpe ekpere, na-agụ akwụkwọ Abụ Ọma, na-atụgharịkwa uche n’ihe ndị na-akasi obi m gụtara na ya. Ihe na-akacha enyere m aka bụ ikpe ekpere. M na-ekpe ekpere ọtụtụ ugboro n’ụbọchị na-arịọ Jehova ka o nyere m aka ịnọrọ jụụ.”

12. Gịnị mere o ji dị mkpa ka ndị na-elekọta onye agadi ma ọ bụ onye ọrịa na-eme ihe ga-eme ka ahụ́ na-agbasi ha ike?

¹² Wepụta oge na-eme ihe ndị ga-eme ka ahụ́ gbasie gị ike. O nwere ike ị gaghị enwe ohere ịga zụta ihe ndị ị ga-eji sie ezigbo nri ma ọ bụ ohere ị ga-eji sie ya. Iri ezigbo nri na imega ahụ́ dị ezigbo mkpa n’ihi na ọ ga-eme ka ahụ́ gbasie gị ike, isi ana-akpakọkwa gị ọnụ. N’ihi ya, ọ bụrụgodị na ị naghị enwe ohere, gbalịa wepụta oge na-eri ezigbo nri ma na-emega ahụ́. (Efe. 5:15, 16) Gbalịakwa na-ehi ezigbo ụra. (Ekli. 4:6) Ndị ọkachamara kwuru na ihi ụra na-eme ka ụbụrụ anyị jiri aka ya rụzie ihe ndị mebiri na ya. Otu isiokwu e dere gbasara ahụ́ ike kwuru na ọ bụrụ na mmadụ ana-ehi ezigbo ụra, ọ ga-eme ka ọ ghara ịna-echegbukarị onwe ya, nyekwara ya aka ịnọ jụụ ma ihe sie ike. I kwesịkwara iwepụta ohere mee ihe ndị na-amasị gị. (Ekli. 8:15) Otu nwanna nwaanyị kwuru ihe mere ka ọ na-enwe ọṅụ. Ọ sịrị: “Ụbọchị anwụ na-acha, m na-agbalị pụọ èzí ka anwụ chatụ m. M na-agbalịkwa wepụta oge mụ na otu enyi m ga-eji mee onwe anyị obi ụtọ, ọ dịkarịa ala, otu ugboro n’ọnwa.”

13. Gịnị mere o ji adị mma ịchị ọchị? (Ilu 17:22)

¹³ Na-achị ọchị. (Gụọ Ilu 17:22; Ekli. 3:1, 4) Ịchị ọchị ga-eme ka ahụ́ na-agbasi gị ike, gị aghara ịna-echegbu onwe gị. Ọ bụrụ na ị na-elekọta mmadụ, ọtụtụ mgbe, ihe anaghị aga otú ị tụrụ anya ya. Mana, ọ bụrụ na ị chịa ọchị mgbe ihe na-agaghị otú ị tụrụ anya ya, o nwere ike ime ka ihe ahụ ghara iwe gị iwe. Ọ bụrụkwa na gị na onye ị na-elekọta ana-achịkọ ọchị, o nwere ike ime ka unu abụọ na-adịkwu ná mma.

14. Olee otú ịkọrọ enyi gị otú obi dị gị nwere ike isi nyere gị aka?

¹⁴ Gwa otu ezigbo enyi gị otú obi dị gị. N’agbanyeghị otú i si gbaa mbọ, i nwere ike ịna-echegbu onwe gị mgbe ụfọdụ. Ụdị ihe ahụ mee, i nwere ike ịgwa ezigbo enyi gị otú obi dị gị. Ọ ga-abụ onye na-agaghị eme ka obi jọwa gị njọ maka ihe ị na-ekwu. (Ilu 17:17) Kama, ọ ga-ege gị ntị nke ọma ma gbaa gị ume. Ihe ahụ nwekwara ike ịbụ ihe ga-eme ka ị na-enwe obi ụtọ.​—Ilu 12:25.

15. Olee otú ikwu gbasara Paradaịs ga-esi eme ka obi na-atọkwu gị ụtọ?

¹⁵ Chee otú ihe ga-adịrị gị na ya na Paradaịs. Gbalịa na-echeta na ọ bụ obere oge ka ị ga na-elekọta ya. Ọ bụghịkwa ọrụ Jehova bu n’obi ka ụmụ mmadụ na-arụ mgbe o kere ha. (2 Kọr. 4:16-18) “Ezigbo ndụ” ka dị n’ihu. (1 Tim. 6:19) Obi ga na-atọ gị ezigbo ụtọ ma gị na onye ị na-elekọta na-ekwu ihe ndị unu ga-emekọ ọnụ na Paradaịs. (Aịza. 33:24; 65:21) Otu nwanna nwaanyị aha ya bụ Heather sịrị: “M na-agwakarị ndị m na-elekọta na n’oge na-adịghị anya, anyị ga-akwakọ ákwà, gbakọọ ọsọ, gbakọọkwa ígwè. Anyị ga-eme achịcha, siekwara ndị anyị hụrụ n’anya a ga-akpọlite n’ọnwụ nri. Mụ na ha na-ekele Jehova maka olileanya anyị nwere.”

OTÚ NDỊ ỌZỌ GA-ESI ENYE AKA

16. Olee otú anyị nwere ike isi nyere nwanna na-elekọta onye agadi ma ọ bụ onye ọrịa aka n’ọgbakọ anyị? (Kọwaakwa foto.)

¹⁶ Nyere ndị na-elekọta ndị agadi ma ọ bụ ndị ọrịa aka ka ha zurutụ ike. Anyị niile nọ n’ọgbakọ nwere ike inyere nwanna aka ilekọta onye ya. Ihe a ga-eme ka nwanna ahụ nwee ohere ọ ga-eji zurutụ ike ma ọ bụ mee ihe ndị ọzọ o kwesịrị ime. (Gal. 6:2) Ụfọdụ ụmụnna ahaziela otú a ga-esi na-enyere ndị agadi ma ọ bụ ndị ọrịa aka kwa izu. Otu nwanna nwaanyị aha ya bụ Natalya na-elekọta di ya na-anaghị agali ije. Ọ sịrị: “E nwere otu nwanna nọ n’ọgbakọ anyị na-abịa ka ya na di m nọrọ otu ugboro ma ọ bụ ugboro abụọ n’izu. Ya na ya na-ekwusa ozi ọma, na-akparịta ụka, na-elekwa fim. Oge ndị ahụ na-atọgbu di m atọgbu, na-enyekwa m ohere ime ihe ndị dịịrị m, dị ka ịgagharịtụ.” Ụfọdụ ndị n’ọgbakọ nwekwara ike ịga hie na nke nwanna na-elekọta onye ya ka nwanna ahụ nwee ike ihi ezigbo ụra n’abalị.

17. Olee otú anyị nwere ike isi nyere onye na-elekọta onye ya aka n’ọmụmụ ihe?

¹⁷ Na-enyere ndị na-elekọta onye ha aka n’ọmụmụ ihe. O nwere ike ụfọdụ ndị na-elekọta onye agadi ma ọ bụ onye ọrịa agaghị na-anụcha ihe a na-ekwu n’ọmụmụ ihe, ná mgbakọ sekit, ma ọ bụ ná mgbakọ ukwu n’ihi na ha na-elekọta onye ha. Ụmụnna nwere ike ịga ka ha na onye ahụ ọ na-elekọta nọrọ ruo oge ụfọdụ ma ọ bụ ruo mgbe a gbasara. Ọ bụrụ na onye ahụ a na-elekọta anaghị apụli èzí, i nwere ike ịga n’ụlọ ha ka gị na ya si n’Ịntanet na-ege ihe a na-eme n’ọmụmụ ihe. Ọ ga-eme ka onye na-elekọta ya nwee ike ịga ọmụmụ ihe n’Ụlọ Nzukọ Alaeze.

18. Olee ihe ọzọ anyị ga-emere ndị na-elekọta onye agadi ma ọ bụ onye ọrịa?

¹⁸ Na-aja ndị na-elekọta onye agadi ma ọ bụ onye ọrịa mma, na-etinyekwa ha n’ekpere. Ndị okenye kwesịrị ịna-agara ndị na-elekọta onye agadi ma ọ bụ onye ọrịa nleta ọzụzụ atụrụ mgbe niile. (Ilu 27:23) N’agbanyeghị otú ihe si dịrị anyị, anyị niile nọ n’ọgbakọ nwere ike ịna-aja ha mma mgbe niile. Anyị nwekwara ike ịrịọ Jehova ka o nye ha ike nakwa ka o mee ka ha na-enwe ọṅụ.​—2 Kọr. 1:11.

19. Gịnị ka anyị na-atụ anya ya?

¹⁹ N’oge na-adịghị anya, Jehova ga-ewepụ ihe niile na-eme ka anyị na-ata ahụhụ. Ọrịa na ọnwụ agaghịzi adị. (Mkpu. 21:3, 4) “Onye ngwọrọ ga-awụli elu ka mgbada.” (Aịza. 35:5, 6) N’oge ahụ, anyị agaghịzi na-aka nká ma ọ bụ na-ahụ ka onye anyị na-aka nká ma ọ bụ na-arịa ọrịa. “A gaghịzi echeta ihe niile mere na mbụ.” (Aịza. 65:17) Tupu oge ahụ eruo, ka obi sie anyị ike na Jehova agaghị agbakụta anyị azụ. Ọ bụrụ na anyị ana-atụkwasị ya obi ka o nye anyị ike, ọ ga-enyere anyị aka ka anyị “na-atachi obi n’ihe niile, jirikwa ọṅụ na-edi ihe niile.”​—Kọl. 1:11.