Աջակցիր քո ժողովին

Ամբողջ աշխարհում բազմաթիվ մարդիկ հազարավոր ժողովներում ուրախությամբ ծառայում են Եհովային։ Նրանք շնորհակալ են այն խորհուրդների ու հրահանգների համար, որ ստանում են հանդիպումների ժամանակ, և տարբեր կերպերով փորձում են աջակցել իրենց ժողովին։ Դու է՞լ ունես նման տրամադրվածություն։

1. Ինչպե՞ս կարող ես օգտագործել ժամանակդ և ուժերդ, որ աջակցես քո ժողովին

Բոլորս էլ կարող ենք մեր լուման ներդնել ժողովին օգնելու հարցում։ Ձեր ժողովում կա՞ն մեծահասակ կամ վատառողջ հավատակիցներ։ Կարո՞ղ ես օգնել նրանց գալ հանդիպումներին կամ գործնական այլ օգնություն ցույց տալ, օրինակ՝ գնումներ կամ տնային գործեր անել նրանց համար (կարդա Հակոբոս 1։27)։ Մենք կարող ենք նաև մասնակցել Ժողովների սրահի մաքրության և սպասարկման աշխատանքներին։ Ոչ ոք մեզ չի ստիպում դա անել։ Աստծու և մեր եղբայրների հանդեպ սերն է մղում, որ «պատրաստակամությամբ» օգնության ձեռք մեկնենք (Սաղմոս 110։3)։

Մկրտված քարոզիչները կարող են աջակցել ժողովին նաև այլ կերպերով։ Աստվածաշնչյան պահանջներին համապատասխանող եղբայրները կարող են նշանակվել ծառայող օգնական, իսկ հետագայում՝ երեց։ Թե՛ եղբայրները և թե՛ քույրերը կարող են ակտիվորեն աջակցել քարոզչական գործին՝ ծառայելով ռահվիրա։ Որոշ Վկաներ էլ հնարավորություն ունեն մասնակցելու երկրպագության վայրերի շինարարությանը կամ տեղափոխվելու այնպիսի ժողով, որն օգնության կարիք ունի։

2. Ինչպե՞ս աջակցել ժողովին նյութական միջոցներով

Մենք կարող ենք «պատվել Եհովային [մեր] ունեցած արժեքավոր բաներով» (Առակներ 3։9)։ Մեզ համար մեծ պատիվ է գումարով կամ այլ նյութական միջոցներով աջակցել ժողովին և համաշխարհային քարոզչական գործին (կարդա 2 Կորնթացիներ 9։7)։ Մեր նվիրատվությունները նաև օգտագործվում են աղետից տուժածներին օգնելու համար։ Շատերը կանոնավորաբար «ինչ-որ բան մի կողմ են դնում», որ նվիրատվություն անեն (կարդա 1 Կորնթացիներ 16։2)։ Մենք կարող ենք նվիրատվություն անել՝ գումարը գցելով մեր երկրպագության վայրերում գտնվող արկղերի մեջ կամ donate.jw.org կայքի միջոցով։ Եհովան մեզ հնարավորություն է տվել մեր նյութական միջոցները ճիշտ օգտագործելով ցույց տալ, որ սիրում ենք իրեն։

ԻՄԱՆԱՆՔ ԱՎԵԼԻՆ

3. Կարող ենք աջակցել ֆինանսապես

Եհովան և Հիսուսը սիրում են ուրախությամբ տվող մարդկանց։ Օրինակ՝ Հիսուսը գովեց մի այրու, որը թեև շատ աղքատ էր, բայց նվիրատվություն արեց։ Կարդացեք Ղուկաս 21։1-4-ը, այնուհետև քննարկեք հետևյալ հարցերը.

• Եհովային ուրախացնելու համար պե՞տք է արդյոք շատ փող նվիրաբերել։

• Եհովան և Հիսուսը ինչպե՞ս են վերաբերվում սրտանց արված մեր նվիրատվություններին։

Իմանալու համար, թե ինչպես են օգտագործվում մեր նվիրատվությունները՝ դիտեք ՏԵՍԱՆՅՈՒԹԸ և քննարկեք հետևյալ հարցը.

ՏԵՍԱՆՅՈՒԹ. «Նվեր՝ Եհովային» (4։47)

• Նվիրատվությունները ի՞նչ օգուտներ են բերում ողջ աշխարհի ժողովներին։

4. Կարող ենք սրտանց օգնության ձեռք մեկնել

Աստվածաշնչյան ժամանակներում Եհովային պաշտող մարդիկ ջանք չէին խնայում, որ լավ վիճակում պահեն իրենց երկրպագության վայրերը։ Նրանք գումար նվիրաբերելուց ավելին էին անում։ Կարդացեք 2 Տարեգրություն 34։9-11-ը և քննարկեք այս հարցը.

• Յուրաքանչյուր իսրայելացի ինչպե՞ս էր աջակցում Եհովայի տան վերանորոգման աշխատանքներին։

Տեսնելու համար, թե Եհովայի վկաները ինչպես են հետևում աստվածաշնչյան այդ օրինակին՝ դիտեք ՏԵՍԱՆՅՈՒԹԸ, այնուհետև քննարկեք հետևյալ հարցերը.

ՏԵՍԱՆՅՈՒԹ. «Հոգ տանենք մեր երկրպագության վայրերի մասին» (3։31)

• Ինչո՞ւ է կարևոր, որ Ժողովների սրահը լինի մաքուր և վերանորոգված։

• Ի՞նչ կերպերով կարող ես մասնակցել երկրպագության վայրերի մասին հոգ տանելու գործին։

5. Եղբայրները կարող են հավելյալ պատասխանատվություններ ստանձնել

Աստծու Խոսքը հորդորում է քրիստոնյա տղամարդկանց հնարավորինս շատ աջակցել ժողովին։ Նման օրինակ տեսնելու համար դիտեք ՏԵՍԱՆՅՈՒԹԸ և քննարկեք հաջորդող հարցը.

ՏԵՍԱՆՅՈՒԹ. «Եղբայրնե՛ր, ձգտեք «լավ գործի»» (5։19)

• Ռայանը ինչպե՞ս սկսեց լիարժեքորեն աջակցել ժողովին։

Աստվածաշնչում գրված է, թե երեցներն ու ծառայող օգնականները ինչ պահանջների պետք է համապատասխանեն։ Կարդացեք 1 Տիմոթեոս 3։1-13-ը և քննարկեք հետևյալ հարցերը.

• Ի՞նչ է ակնկալվում այն եղբայրներից, ովքեր ցանկանում են դառնալ ծառայող օգնական կամ երեց։

• Ի՞նչ է ակնկալվում նրանց ընտանիքներից (տես 4 և 11 համարները)։

• Երբ եղբայրները ձգտում են համապատասխանել այս չափանիշներին, ինչպե՞ս է դա անդրադառնում ժողովի վրա։

ԱՄՓՈՓՈՒՄ

Եհովան շատ է գնահատում, երբ ժողովին աջակցելու համար տրամադրում ենք մեր ժամանակը, ուժերը և նյութական միջոցները։

Վերհիշենք

• Ինչպե՞ս կարող ենք մեր ուժն ու ժամանակը օգտագործել ժողովին աջակցելու համար։

• Ինչպե՞ս կարող ենք մեր նյութական միջոցներով աջակցել ժողովին։

• Ի՞նչ կերպերով կցանկանայիր աջակցել ժողովին։

ԲԱՑԱՀԱՅՏԻՐ ԱՎԵԼԻՆ

Ինչո՞ւ այլևս տասանորդ վճարելու կարիք չկա։

«Ի՞նչ է Աստվածաշունչն ասում տասանորդ վճարելու մասին» (վեբ հոդված)

Աստվածաշնչում ասվում է, որ մկրտված տղամարդիկ որոշ դերեր են ստանձնում։ Բայց ի՞նչ, եթե կարիք առաջանա, որ մկրտված կինը կատարի դրանք։

«Գլխավորությունը ժողովում» («Դիտարան», 2021, փետրվար)

Ծանոթացիր մի քանի քաջ Վկաների հետ, ովքեր անձնազոհություն են դրսևորում, որ գրականություն հասցնեն իրենց հավատակիցներին։

«Աստվածաշնչյան գրականություն ենք տարածում Կոնգոյում» (4։25)

Տես, թե մեր կազմակերպության ֆինանսավորումը ինչպես է տարբերվում այլ կրոնական կազմակերպությունների ֆինանսավորման ձևից։

«Ինչպե՞ս է ֆինանսավորվում Եհովայի վկաների գործունեությունը» (վեբ հոդված)