Wat Matthew Wen Write
8 Afta he wen go down from da mountain, choke peopo follow him. 2 Had one leper* come an go down on his knees in front him an tell: “Lord, you can make me come clean if you like.” 3 So Jesus had reach out his hand an touch him an tell, “Yeah, I like! I goin heal* you.” Right den an dea, he wen come clean from his leprosy.* 4 Den Jesus tell him: “Make shua you no tell nobody. Go to da pries an let him look you, an make da sacrifice dat Moses tell you gotta make, so dat peopo know you stay clean.”
5 Wen he had go Ca·perʹna·um, one army officer* wen come by him an beg fo his help. 6 He tell: “Mista, my worka stay suffa plenny. He been stuck in my house an no can move.” 7 Jesus tell him: “I goin go dea an heal um.” 8 Da army officer tell him: “Mista, I not good enuff fo have you come my house, but jus say da word, an my worka goin come good. 9 I say dis cuz I get guys in charge of me, an I get soldiers dat I stay in charge of. I tell one soldier “Go!” an he go. An I tell one odda guy “Come!” an he come. An wen I tell my worka “Do dis!” he do um.” 10 Jesus trip out wen he hea dat, an he tell his followas: “Fo shua, I neva find nobody in Israel wit dis much faith.” 11 But I tell you dis, plenny peopo goin come from all ova an sit at da table wit Abraham, Isaac, an Jacob in God’s Govament in heaven. 12 But da guys dat wuz suppose to be part of God’s Govament* goin get thrown outside in da dark. Dass wea dey goin cry real hahd an grind dea teeth cuz dey no moa hope.” 13 Den Jesus tell da army officer: “Go home. Cuz you show plenny faith, wat you had ask fo goin happen.” An same time, da worka wen come good.
14 Wen Jesus go inside Peter’s house, he see Peter’s maddah in law in bed wit one fever. 15 He hold her hand an she wen come betta. Den she get up an start fo take kea dem an make dem food. 16 Befoa dark, peopo bring Jesus plenny guys dat da demons wen take ova. He jus tell da demons fo come out, an da demons lissen him. An he wen heal all da guys dat wuz suffaring 17 so dat wat Isaiah da prophet tell would happen: “All da sickness an pain we get, he wen take um all away.”
18 Wen Jesus see choke peopo aroun him, he tell his guys fo go da odda side of da sea. 19 An one scribe* wen come by him an tell: “Teacha, I goin go wit you wea eva you go.” 20 But Jesus tell um: “Da fox get one place fo live an da bird get one nest, but I* no moa my own place fo sleep.” 21 Den one of his followas tell him: “Lord, I like go bury my faddah firs.” 22 Jesus tell him: “Let da dead go bury dea dead, but you, no stop following me.”
23 Den Jesus an his followas go on top one boat. 24 An try look! Wen dey wuz out on da watta, had one mean storm. Da boat wuz getting pounded by da waves an wen start fo fill up wit watta. But Jesus wuz sleeping. 25 Dey go wake him up an tell um: “Lord, do someting, we goin mahke!” 26 But he tell dem: “How come you so sked? You no moa nuff trus o wat?” Den he get up an tell da wind an da waves fo stop. Right den an dea, da watta wen come all glassy. 27 So da guys trip out an tell: “Wat kine guy dis? Even da wind an da waves lissen him?”
28 Wen dey get to da Gad·a·reneʹ land on da odda side of da sea, two guys da demons wen take ova wen come from da graveyard. Dese guys ack all nutz an wuz supa violent, so nobody wen like go dat road. Dey see Jesus an go up to him. 29 Den dey yell: “Eh, God’s Boy! Wat you hea fo? You come fo punish us befoa az even time o wat?” 30 Far away, dey could see plenny pigs eating. 31 So da demons wen start fo beg Jesus: “If you goin kick us outa dese guys, let us go in da pigs ova dea.” 32 He tell dem: “Go den!” So dey wen come outa da guys an go in da pigs. An you know wat? All da pigs had run off da cliff into da sea an wen mahke. 33 But da pig farmas had dig out an go into da town. Dey tell da peopo evryting, an all dat wen happen to da guys da demons wen take ova. 34 Afta dat, evrybody in town go to wea Jesus wuz. Wen dey see him, dey tell him fo get outa dea.