Wat Matthew Wen Write

7 “No judge if you no like get judge. 2 Cuz how you judge oddas iz how you goin get judge, an how you ack to oddas iz how dey goin ack to you. 3 So how come you look da sawdus in yoa braddah’s eye but you no can even see da big piece wood in yoa eye? 4 Or how you can tell yoa braddah, “Try let me take da dus outa yoa eye,” but look, you get one big piece wood in yoa own eye? 5 No ack! Firs hemo da wood from yoa own eye, den you goin see moa betta how fo hemo da dus from yoa braddah’s eye.

6 “No give God’s spesho tings to dogs. An no give yoa pearls to pigs* cuz dey goin walk all ova um den turn aroun an rip you up.

7 “No stop asking an you goin get um. No stop looking an you goin find um. No stop knocking an da door goin open. 8 Cuz evrybody dat ask, goin get um. Evrybody dat look, goin find um. Evrybody dat knock, da door goin open fo dem. 9 Wat you tink, if yoa boy ask fo bread, you goin give um one rock? 10 Or if he ask fo fish, you goin give um one snake? 11 You know how fo give good tings to yoa kids even tho you bad. So garanz yoa Faddah in da heavens goin give good tings to da guys dat ask him!

12 “Wat you like odda peopo do to you, you gotta do to dem. Dass wat da Law an da Prophets* teach.

13 “Go thru da skinny gate. Cuz get one big gate wit one road dat get plenny room fo walk. Choke guys go thru um. If dey stay on um, dey goin mahke. 14 But da skinny gate wit one road dat no moa plenny room an hahd fo walk on, ony litto bit peopo goin find um. If dey stay on um, dey goin live foeva.

15 “Watch out fo da guys dat make like dey talk fo God. Dey come by you an ack jus like one sheep, but dey one real hungry wolf dat like hurt you. 16 You goin know who dese guys iz by da tings dey do.* Peopo no pick grapes from one bush wit thorns or fruit from weeds. 17 So den, one good tree goin make good fruit but one junk tree goin make bad fruit. 18 One good tree no can have bad fruit an one junk tree no can have good fruit. 19 Evry tree dat no make good fruit get chop down an thrown in da fiyah. 20 So den, you goin know who dese guys iz by da tings dey do.

21 “Not evrybody dat tell me, “Lord, Lord” goin be part of God’s Govament. Ony da guys dat do wat my Faddah in da heavens like goin be part of um. 22 Goin get one day wen plenny peopo goin tell me, “Eh Lord, you no rememba wen we had use yoa name fo tell oddas about you, kick out da demons, an do plenny unreal tings?” 23 But I goin tell dem: “I donno who you! Beat it! You guys ony like do bad tings!”

24 “So evrybody dat lissen wat I tell an do um goin be like da akamai guy dat build his house on top da rock. 25 Da rain had come down real hahd, an wen start fo flood an had strong winds. But da house neva fall down cuz he wen build um on top da rock. 26 But evrybody dat hea wat I tell an no do um, goin be like da stupid guy dat build his house on top da sand. 27 Da rain had come down real hahd, an wen start fo flood an had strong winds. Da house wen fall down an evryting wen get wipe out.”

28 Wen Jesus pau talk, all da peopo no could believe how good he wen teach dem, 29 cuz he neva teach like da scribes.* Wat he wen teach had come from God.