Wat Matthew Wen Write

6 “Be keaful not fo do good stuff in front odda peopo jus fo show off. If you do dat, you no goin get notting good from yoa Faddah in da heavens. 2 So wen you give good stuffs to peopo dat need um,* no toot yoa horn so dat evrybody know. Dass how guys ack who ony make like dey serve God in da synagogs* or on da street, cuz dey like peopo tell how awesome dem. I telling you, az all dey goin get, but dey not goin get notting from God. 3 But wen you give good stuff to oddas dat need um, no let yoa lef hand know wat yoa right hand stay doin, 4 so dat nobody know da good tings you stay doin. An den yoa Faddah, who stay wea peopo no can see him, goin bless you.

5 “Same ting, wen you pray, no ack like da guys dat ony make like dey serve God. Dey like fo stan wea evrybody can see dem in da synagogs an on da main street cornas. I telling you, peopo goin say good stuff about dem. Az all dey goin get, but dey not goin get notting from God. 6 But wen you pray, go in yoa room wea nobody stay an close da door. Den pray to yoa Faddah who stay wea peopo no can see him. An he goin bless you. 7 Wen you pray, no say da same tings ova an ova again. Peopo all ova da world make lidat. Dey tink God goin lissen dem cuz dea prayas real long. 8 So no make like dem cuz yoa Faddah awready know wat you need even befoa you ask him.

9 “You gotta pray lidis:

““Oua Faddah in da heavens, we like evrybody get plenny respeck fo yoa name. 10 We like yoa Govament rule. An da way you do tings in heaven, we like dat happen hea on da earth. 11 Give us oua food* fo today, 12 an let us go fo da wrong tings we do, jus like we wen let go da guys dat do wrong tings to us. 13 Help us no give in to da presha fo do someting wrong an proteck us from da Devil.”*

14 “If you let guys go wen dey do wrong tings to you, den yoa Faddah in heaven goin let you go too. 15 But if you no let guys go wen dey do wrong tings to you, den yoa Faddah no goin let you go wen you do wrong tings.

16 “Wen you fast,* no make sad face like da guys who ony ack like dey worship God. Dey make dea face all hash so dat evrybody look dem an know dey stay fasting. I telling you, az all dey goin get, but dey not goin get notting from God. 17 But wen you fast, put oil on top yoa head an wash yoa face, 18 so wen peopo look at you, dey not goin know you had fast. Ony yoa Faddah goin know, an he da one goin bless you.

19 “No keep working hahd fo get stuffs dass worth plenny on top da earth, cuz da moth an rus goin eat um up, an da thiefs goin break in an cockaroach um. 20 Moa betta you work hahd fo get stuffs dass worth plenny to God in heaven, wea da moth an rus no goin eat um up, an da thiefs no goin break in an cockaroach um. 21 Wat you tink iz worth plenny, dass wea yoa heart goin be.

22 “Da light of da body iz da eye. If you pay attention to da right ting, yoa whole body goin be bright. 23 But if you look aroun at plenny odda tings, yoa whole body goin be dark. Bummahz fo you if inside you no moa light!

24 “You no can work fo two bosses, cuz you goin love one an hate da odda one, or you goin stick to one an no kea about da odda one. You no can go all out fo God an fo money.

25 “Dass how come I goin tell you dis: No worry all da time about how you goin live, like wat you goin eat or wat you goin drink or wat you goin wea. Yoa life stay way moa importan den all dat. 26 Try look da birds in da sky, dey no plant seed, gadda um, or store um away. Still yet, yoa Faddah in heaven make shua dey get food. You no tink you worth moa den dem? 27 You tink stressing out goin make you live litto bit moa long?* 28 An how come you stay worry about yoa clothes? Check out da flowas dat grow wild, dey no work, an dey no sew clothes. 29 But I tell you dis, not even Solʹo·mon wit all his nice stuff wen look az good az one of dem. 30 Da plants grow today an den tomorrow get thrown in da fiyah, but God still make shua dey look nice. If he do dat fo da plants, fo shua he radda give you clothes, you guys who trus God ony litto bit. 31 So no need worry an tell, “Wat we goin eat?” or, “Wat we goin drink?” or, “Wat we goin wea?” 32 Peopo all ova da world worry about all dis kine stuff. Yoa Faddah in heaven know dat you need all dese tings.

33 “Work hahd fo make God’s Govament an wat He tell da numba one ting in yoa life, an God goin make shua you get all da stuff you need. 34 So no need worry about tomorrow, cuz tomorrow goin get odda tings fo worry about. Take um one day at a time, an deal wit yoa problems fo dat day.