Wat Matthew Wen Write

5 Jesus had see choke peopo, so he go up da mountain an afta he sit down, his followas come aroun him. 2 Den he start fo teach:

3 “Da guys dat know dey need God stay happy, cuz dey goin get da blessings from God’s Govament.

4 “Da guys who sad stay happy, cuz dey goin feel betta.

5 “Da guys who humbo stay happy, cuz God goin give dem da earth.

6 “Da guys dat like tings be right, da way God like, stay happy, cuz dey goin see dat happen.

7 “Da guys dat show pity stay happy, cuz oddas goin show dem pity too.

8 “Da guys dat get one good heart stay happy, cuz dey goin see* God.

9 “Da guys dat make peace stay happy, cuz dey goin be God’s kids.

10 “Da guys who had suffa fo doin da right ting stay happy, cuz dey goin get da blessings from God’s Govament.

11 “You stay happy wen peopo talk bad to you an make you suffa an tell all kine bulais about you cuz of me. 12 Dass wat dey wen do to da prophets dat wen live befoa time. So be supa happy, cuz yoa blessing wit God* goin be real spesho.

13 “You da salt in da world. But if da salt no moa taste, can make um salty again? No can! Az no good anymoa. Ony good fo throw um on da groun fo peopo walk on um.

14 “You da light fo da world. You no can hide one town dat stay on top one mountain. 15 Wen peopo light one lamp, dey no cova um. Dey put um on top one table an it light up da whole house so evrybody can see. 16 Same ting, show yoa light so dat odda guys can see da good stuff you do. Den dey goin tell how awesome yoa Faddah in da heavens stay.

17 “No tink I wen come fo say dat da Law an wat da prophets tell no stay importan. I not hea fo do dat. But I hea fo make wat dey wen tell come tru. 18 One ting fo shua, jus like heaven an earth not goin go away, not even one small letta or one line of one letta goin go away from da Law til all dese tings happen. 19 So den, anybody dat break wat dey tink iz da smalles rule from God an teach oddas fo do da same no stay good enuff fo be part of God’s Govament. But da one dat lissen an teach oddas fo do um goin be part of God’s Govament. 20 I tell you dis, if you no lissen God moa den da Pharisees an da scribes,* den no ways you goin be part of God’s Govament.

21 “You wen hea dat dey wen tell da guys befoa time: “No murda nobody. But if you murda somebody, gotta go court an ansa fo wat you wen do.” 22 But I tell you dis, whoeva supa mad wit his braddah* an stay lidat, gotta go court an ansa fo dat too. An whoeva say someting pilau fo try hurt his braddah, gotta ansa to da Highes Court.* But whoeva tell, “You stupid an good fo notting!” goin burn in Ge·henʹna.*

23 “So den, if you goin make one sacrifice to God at da altar* an you rememba yoa braddah stay mad wit you, 24 leave yoa gif dea, an go make peace wit yoa braddah, den come back an make yoa sacrifice.

25 “If somebody like take you court, fix da problem fas befoa you get dea, so dat he no make you go in front da judge, an den da judge give you to da guard who goin throw you in jail. 26 I telling you, you not goin get outa dea til you pay back all da money* you owe.

27 “You wen hea: “You betta not fool aroun on yoa odda half.”* 28 But I tell you dis, anybody dat keep looking at one wahine cuz he like fool aroun wit her wen awready do um in his heart. 29 So den, if yoa right eye stay jamming you up, rip um out an throw um away. Moa betta you lose yoa eye den fo yoa whole body get wipe out in Ge·henʹna. 30 Same ting, if yoa right hand stay jamming you up, cut um off an throw um away. Moa betta you lose yoa hand den fo yoa whole body end up in Ge·henʹna.

31 “Anodda ting you wen hea wuz: “If you goin divorce yoa wife, give her divorce paypas.” 32 But I telling you, anybody dat divorce his wife, an she neva sleep wit somebody else,* put her in danger of fooling aroun if she marry again. An if somebody marry her, den he goin be fooling aroun too.

33 “An you wen hea dey wen tell da guys befoa time: “No make one promise an no do um, but wat you promise Jehovah,* you gotta do um.” 34 But I telling you: No even swear on anyting, not on heaven, cuz dass God’s throne, 35 no swear on earth, cuz dass wea he put his feet, no swear on Jerusalem town, cuz dass da city of da greates King.* 36 No swear on yoa life, cuz you no moa da powa fo even turn one hair on yoa head white or black. 37 If you tell you goin do someting, do um. If you tell you not goin do someting, no do um. If you say tings you no mean, dass jus like you follow da Devil.

38 “You wen hea: “If somebody buss anodda guy’s eye, den his eye should get buss. If somebody knock out anodda guy’s teeth, den his teeth should get knock out.” 39 But I tell you: No fight back da guy dat wen hurt you. If somebody slap one side of yoa face, den let him slap da odda side too. 40 An if one guy like take you court cuz he like take yoa shirt, den give um yoa coat too. 41 If somebody dat get powa make you carry someting fo one mile, carry um fo two miles. 42 If somebody ask you fo someting, give um to dem. No turn down da guy dat like borrow someting from you.

43 “You wen hea: “You gotta love peopo but hate da guys dat like hurt you.” 44 But I tell you: No stop loving da guys dat like hurt you an pray fo da guys dat try make you suffa. 45 Wen you do dat, you show you one boy of yoa Faddah in da heavens. Cuz he make da sun shine on both da good an bad peopo an make um rain on both da guys dat do good tings an da guys dat do bad tings. 46 If you ony love da guys dat love you, you expeck dat God goin give you someting good fo dat? Da guys dat colleck tax do da same ting. 47 An if you ony tell howzit to yoa braddahs, you tink you doin someting spesho o wat? Peopo dat donno God stay do da same ting. 48 You gotta love full on like yoa Faddah. Da way he love stay perfeck.