Wat Matthew Wen Write
26 Wen Jesus pau tell all dese tings, he sed to his guys: 2 “You know dat in two days goin get da Passova,* an da Son of man* goin get turn in fo be killed on da pos.”
3 Den da main pries guys an da eldas wen get togedda inside da courtyard of da main pries Caʹia·phas house, 4 fo figga out one secret plan fo trap Jesus so dey can arrest an kill um. 5 But dey tell: “No do um Passova time, oddawise da peopo goin get all nutz.”
6 Wen Jesus wuz in Bethʹa·ny at Simon da leper’s house, 7 one wahine wit one expensive bottle* of perfume oil come by Jesus wen he wuz sitting at da table, an she start fo pour oil on his head. 8 Wen his guys see dis, dey come all mad an sed: “Ho! Ony wase! 9 Coulda sell da oil fo plenny money an den give da money to da pooa.” 10 Cuz Jesus know wat dey sed, he tell dem: “Why you make trouble to her fo? She wen do someting nice fo me. 11 Da pooa guys always goin be aroun, but I not goin always be hea. 12 Wen she put dis perfume oil on top me, she do um fo make my body ready fo wen I die. 13 I telling you fo shua, wea eva in da world peopo tell da good news, dey goin talk about wat dis wahine did an nobody goin foget her.”
14 Den Judas Is·carʹi·ot, one of da 12 guys, wen go to da main pries guys 15 an sed: “How much money you goin give me fo set him up fo you guys?” Dey make one deal fo give him 30 pieces silva. 16 From dat time, Judas keep looking fo one chance fo set him up.
17 On da firs day of da Festival Of Bread Dat No Moa Yeast,* Jesus guys come to him an tell: “Wea you like us make ready da place fo you eat da Passova?” 18 He sed: “Go by dis one guy’s house inside da town an tell him: “Da Teacha sed: “Time awready fo me mahke, I goin celebrate da Passova wit my guys at yoa house.””” 19 So Jesus guys do wat he tell an make tings ready fo da Passova.
20 Afta da sun go down, he wuz sitting at da table wit his 12 guys. 21 Wen dey wuz eating, Jesus sed: “I telling you fo shua, one of you guys goin stab me in da back.” 22 Cuz wen bodda dem plenny, evry one of dem tell: “Lord, not me ah?” 23 Jesus tell dem: “Da guy dat dip his bread inside dis bowl wit me iz da guy who goin stab me in da back. 24 Az tru wat da Scripchas tell dat da Son of man goin mahke, but goin be horraz fo da guy dat stab da Son of man in da back. Moa betta he no wuz even born.” 25 Judas, who wuz about fo set um up, tell: “Not me ah, Rabbi?” Jesus sed to him: “You da one sed um.”
26 While dey wuz eating, Jesus take da bread, an afta he pray, he broke um up an give um to his guys. He sed: “Hea, eat dis bread. Dis rep my body.” 27 Den he take one cup, sed one praya an give um to dem, an tell: “All you guys drink dis, 28 cuz dis rep my “blood of da New Deal,”* dat goin be poured out so dat plenny peopos sins can get let go. 29 But I tell you, I not goin drink any wine again til da day I drink new wine wit you wen we ruling togedda in my Faddah’s Govament.” 30 Afta dey pau sing songs,* dey go to da Mount of Olives.
31 Jesus sed to dem: “All you guys goin jam up tonight cuz of wat goin happen to me, cuz da Scripchas had tell: “I goin kill da shepherd, an all da sheep goin run away.” 32 But afta I come back alive, I goin go Galʹi·lee an wait fo you dea.” 33 But Peter sed to him: “Even tho da odda guys jam up cuz of wat goin happen to you, I neva goin do dat!” 34 Jesus sed to him: “I telling you dat tonight, befoa one roosta crow, three times you goin tell you donno me.” 35 Peter sed to him: “Even if I gotta die wit you, I not goin eva tell dat I donno you.” All da odda guys sed da same ting too.
36 Den Jesus an his guys wen go to Geth·semʹa·ne, an he tell dem: “Sit ova hea an I goin go ova dea fo pray.” 37 He take Peter an Zebʹe·dee’s two boys wit him, an he start fo feel real soa inside. 38 Den he sed to dem: “I stay all buss up inside, jus like I goin mahke. Try stay awake wit me ova hea.” 39 Den he walk litto bit moa an fall to da groun an pray: “My Faddah, if can, take dis cup* away from me. But still yet, I like tings happen da way you like, not da way I like.”
40 He wen come back an see his guys sleeping, an he tell Peter: “You no could stay up fo jus one hour wit me? 41 Stay awake an no stop praying, so dat you no give in to sin. Az tru, one guy like do wass right, but sometimes da body* not strong enuff fo do um.” 42 One moa time, he go pray: “My Faddah, if no moa any odda way, an I gotta drink dis cup, den let tings happen da way you like.” 43 Again he come back an see dem sleeping, cuz dey no could keep dea eyes open. 44 So he leave um dea an go pray da same ting fo da third time. 45 Den he come back to his guys an sed to dem: “Dis not da time fo you guys sleep! Try look! Almos time fo da Son of man get turn ova to evil kine peopo. 46 Get up, we go. Da guy dat goin stab me in da back stay nea.” 47 He wuz still talking an look! Judas, one of da 12 guys, wen come wit plenny peopo dat had swords an clubs. Da main pries guys an eldas wen sen dose guys ova dea.
48 Da one dat wuz goin turn in Jesus wen give dem one sign. He tell: “Da guy I kiss, he da one. Drag um away an lock um up.” 49 An he walk strait up to Jesus an tell: “Howzit Teacha!” an den he kiss um. 50 Jesus sed to him: “Brah, how come you stay hea?” Den da peopo wen grab Jesus an take um away. 51 But den try look! One of da guys dat wuz wit Jesus wen grab his sword an cut off da ear of da main pries worka. 52 Den Jesus sed to him: “Put yoa sword away, cuz evrybody dat use da sword goin mahke from da sword. 53 You tink I no can ask my Faddah fo sen me tousands* of angels right now? 54 But if I ask fo dat, how da Scripchas goin come tru dat tell tings gotta happen lidis?” 55 Den Jesus tell da peopo: “You come hea fo arrest me wit swords an clubs az if I one crook? Evryday I wen teach in da tempo, but how come you neva arrest me dat time? 56 But all dis happen so dat wat da prophets wen write in da Scripchas come tru.” An all his guys bag from him an run away.
57 Da guys dat arrest Jesus wen drag um away to Caʹia·phas da main pries, dass wea da scribes* an eldas wuz all togedda. 58 Peter wen follow dem from far, all da way to da main pries courtyard. Den he go inside an sit down wit da workas fo da house cuz he wanted fo see wat wuz goin happen.
59 Da main pries guys an all da guys in da High Court* wuz looking fo somebody dat would bulai agains Jesus so dey could give um da death sentence. 60 But even tho had plenny bulaias, dey neva find notting fo charge um wit. But layta on two guys wen step up 61 an tell: “Dis guy sed, “I can broke down God’s tempo an in three days build um back up.”” 62 Den da main pries stan up an tell Jesus: “You no moa notting fo say? You no hea wat dese guys stay telling about you?” 63 But Jesus neva say notting. So da main pries sed to him: “I orda you fo swear by da God dat stay alive, tell us if you da Christ, da Son of God!” 64 Jesus sed to him: “You sed um yoaself. But I tell you dis, from now on you goin see da Son of man sitting on da right side of da Powaful One. An he coming on top da clouds of heaven.” 65 Den da main pries rip his clothes an tell: “He stay talking agains God! We no need hea anybody else. Look! You wen hea da bad tings he sed agains God. 66 Wat you guys tink about all dis?” Dey ansa: “He deserve fo die.” 67 Den dey spit in his face an punch um. Odda guys wen slap um in da face, 68 an tell: “You Christ, so if you one prophet, tell us who wen hit you?”
69 Peter wuz sitting in da courtyard, an one girl dat work at da house come up to him an tell: “Eh you wuz wit Jesus, da guy from Galʹi·lee ah?” 70 But in front all dem he tell: “I donno wat you talking about.” 71 Den he go by da walkway to da courtyard. Anodda girl spock him an tell da guys ova dea: “Dis guy wuz wit Jesus da Naz·a·reneʹ.” 72 One moa time he tell: “I swear I donno dat guy!” 73 Afta litto while, da guys standing aroun wen come up to Peter an tell: “Fo shua you one of dem. Can tell cuz of da way you talk.”* 74 Den Peter tell dat he goin be cursed if he no tell da trut an he swear: “I donno da guy!” An right den an dea, one roosta wen crow. 75 An Peter rememba wat Jesus sed: “Befoa one roosta crow, you goin tell you donno me three times.” Den he go outside an cry real hahd.