Wat Matthew Wen Write
25 “Dat time, da Govament in da heavens goin be like ten virgins dat wen take dea lamps fo go meet da groom. 2 Five of dem wuz stupid, an five wuz smart.* 3 Da stupid ones wen bring dea lamps but neva take oil wit dem, 4 but da smart ones wen bring dea lamps an extra oil. 5 Cuz da groom neva come wen dey had expeck, all dem wen come tired an fall asleep. 6 In da middo of da night somebody wen yell: “Eh! Da groom stay hea! Go meet um outside.” 7 Den all da virgins wen get up an make dea lamps ready. 8 Da stupid ones sed to da smart ones, “We like some oil, oua lamps about fo go out.” 9 Da smart ones sed to dem: “Maybe not goin get nuff fo da both of us. You should go to da guys dat sell um an buy yoa own.” 10 Wen dey leave fo go buy da oil, da groom wen come. Da virgins dat wuz ready go in wit him to da wedding party an den da door wuz closed. 11 Afta, da res of da virgins wen come an tell: “Hui! Mista! Open da door fo us!” 12 He tell dem, “Fo real, I donno who you.”
13 “So stay ready, cuz you donno da day or da time.
14 “Cuz goin be jus like one guy dass ready fo travel far an he tell his workas fo take kea his stuffs. 15 He gave one guy five bags of money,* two bags to anodda guy, an one to da odda. He wen give each guy wat dey can hando. Den he wen leave. 16 Right away, da guy who get da five bags wen go do bizness wit um an wen make five moa bags. 17 Same ting wit da guy dat get two bags, he wen make two moa. 18 But da guy dat ony had one bag wen go dig one hole in da groun an hide da masta’s money.*
19 “Long time afta dat, da masta wen come back fo colleck his money from da workas. 20 So da guy dat wen get da five bags wen bring five moa. He tell, “Masta, you wen give me five bags, an I wen make five moa bags.” 21 His masta sed to him: “Good job! You one good worka I can trus. You wen show you could be trusted wit litto bit stuff. Now I goin put you in charge of plenny stuff. I stay happy, so be happy too.” 22 Den da guy who wen get da two bags wen tell, “Masta, you wen give me two bags, an try look! I wen make two moa.” 23 His masta sed to him: “Good job! You one good worka I can trus. You wen show you could be trusted wit litto bit stuff. Now I goin put you in charge of plenny stuff. I stay happy, so be happy too.”
24 “Den da worka who wen get one bag money sed: “Masta, I know you one hahd guy fo please, you harves wat you no plant an you gadda food you no work fo. 25 So I wen come sked an wen go hide yoa bag money in da groun. Hea, you can have um back.” 26 His masta sed to him: “You good fo notting* lazy buggah, you know dat I harves wea I neva plant an I gadda food I neva work fo. 27 You shoulda put my money in da bank den, so dat wen I come back, I woulda get da bag money plus interest from da bank.
28 ““So take da bag money away from him an give um to da guy who get da ten bags. 29 Cuz evrybody dat get, goin get moa, an he goin get plenny. But da guy who no moa dat much, even da litto bit he get, goin get taken from him. 30 An throw da good fo notting buggah outside in da dark. Dass wea he goin cry real hahd an grind his teeth.”
31 “Da Son of man* goin come wit all his awesome powa an his angels, den he goin sit down on his awesome throne. 32 All da peopo goin be in front him. Den he goin split um up jus like one shepherd split up da sheep from da goats. 33 An he goin put da sheep on his right side, but da goats on his lef.
34 “Den da King goin tell da guys on his right side: “Come, all you guys my Faddah wen bless. Cuz from da start of da world,* He wen make ready one Govament dat goin bless you. 35 Cuz I wuz hungry an you wen give me someting fo eat. I wuz thirsty an you wen give me someting fo drink. You neva know me but you wen let me stay yoa house. 36 I wuz naked an you wen give me clothes. I wuz sick an you wen take kea me. I wuz in jail an you wen come visit me.” 37 Den da righteous guys goin ansa: “Lord, wen we had see you hungry an give you food, or thirsty an give you someting fo drink? 38 Wen we neva know you an let you stay oua house, or had see you naked an give you clothes? 39 Wen you wuz sick or in jail an us had come visit you?” 40 Da King goin ansa dem, “I telling you fo shua, jus like how you wen do dis to even one of my braddahs, you wen do um to me.”
41 “Den he goin tell da guys on his lef side: “Get away from me. God wen judge you guys fo get punish in da fiyah dat goin las foeva, da fiyah God wen make ready fo da Devil an his angels. 42 Cuz I wuz hungry but you neva give me notting fo eat, an I wuz thirsty but you neva give me notting fo drink. 43 Cuz you neva know me, you neva let me stay yoa house. I wuz naked, but you neva give me clothes. I wuz sick an in jail, but you neva take kea me.” 44 Den dey goin tell: “Lord, wen we neva know you, or had see you hungry, thirsty, naked, sick, or in jail an neva take kea you?” 45 Den he goin ansa dem: “I telling you fo shua, jus like how you neva do dis to even one of my braddahs, you neva do um to me.” 46 Dese guys goin get cut off* foeva, but da righteous guys goin live foeva.”