Wat Matthew Wen Write

10 He call 12 of his guys fo come by him an wen give dem powa fo hemo da demons from peopo an fo heal all kine healt problems.

2 Dis da names of da 12 aposals:* Simon, da one dey call Peter, an his braddah Andrew; James, dass Zebʹe·dee’s boy an his braddah John; 3 Philip an Bar·tholʹo·mew; Thomas an da tax collecta Matthew; James da boy of Al·phaeʹus; an Thad·daeʹus; 4 Simon, he da one dat jus give um all da time;* an Judas Is·carʹi·ot, who bumbye wen stab Jesus in da back an sell um out to da guys dat hate him.

5 Jesus sen dese 12 guys out, an dis wat he tell um fo do: “No go to da peopo dass not Jews, an no go inside any Sa·marʹi·tan town. 6 But ony go look fo da Israel peopo, cuz dey jus like sheep dat stay los. 7 Wen you guys go, tell um dis: “God’s Govament in heaven goin come pretty soon.” 8 Make da sick peopo come good, bring da dead back to life, heal da lepers, kick out da demons. Give fo free cuz you wen get fo free. 9 No go get silva or gold or coppa fo yoa money bags, 10 or one bag fo food, or extra clothes, or slippas, or one walking stick fo da trip, cuz ony make sense dat da peopo goin give one worka wat he need.

11 “Wateva big or small town you go, look fo da guys dass worth talking to, an stay dea wit dem til you leave dat place. 12 Wen you go inside one house, give evrybody dea yoa aloha. 13 If dey like talk to you, den goin be good fo dem. But if dey no like talk to you, den da good you wanted fo share wit dem goin stay wit you. 14 Wea eva peopo no like take you in or lissen to you, wen you leave dat house or dat town, dus off yoa feet.* 15 But I tell you dis, da day goin come fo God judge peopo, an goin be moa betta fo Sodʹom an Go·morʹrah den fo dat town.

16 “Try watch out, cuz you guys jus like sheep dat I goin sen wea get plenny wolfs. So you gotta be keaful like one snake an be like doves dat no hurt nobody. 17 Watch out, cuz get guys dat like make you go in front da judge an beat you in dea synagogs.* 18 Cuz you my followa, dey goin bring you in front govnas an kings an you goin get chance fo tell dem an peopo in da world about me. 19 But wen dey turn you in, no worry about wat you goin say an how you goin say um, cuz right den an dea you goin know wat fo say. 20 Cuz az not jus you talking, but yoa Faddah goin use his powa fo tell you wat fo say. 21 Anodda ting, peopo goin turn in dea braddah or dea kid to da guys dat goin kill dem, an kids goin turn agains dea maddah an faddah fo have dem killed. 22 An evrybody goin hate you cuz you my followa, but God goin save da guy dat hang in dea til da end. 23 Wen dey make you suffa in one town, run to anodda town, cuz I tell you dis, no ways you goin pau yoa work in all da towns of Israel til me, da Son of man,* come.

24 “One student not goin be moa betta den his teacha, an one slave not goin be moa betta den his masta. 25 Az good if one student can come jus like his teacha, an one slave jus like his masta. If peopo call da masta Be·elʹze·bub,* den fo shua dey goin say da same ting fo da odda guys in da house! 26 So no sked dem, cuz wateva dey cova goin be seen, an tings dass secret goin come out in da open. 27 Wat I tell ony to you, say to evrybody. An wat I whispa to you, yell um out from da roof. 28 No sked da guys dat can kill da body but no can take away da life.* Moa betta you sked da one dat get da powa fo kill both da life an da body in Ge·henʹna.* 29 Try tink, you can buy two sparrows wit one coin dass worth ony litto bit. But yoa Faddah know wen one of dem fall down on da groun. 30 An you know wat? He even know how much hair you get on top yoa head. 31 So no sked, you worth moa den plenny sparrows.

32 “Evrybody who tell dey know me in front peopo, I goin say I know him in front my Faddah who stay in heaven. 33 But da guy who tell in front peopo dat he donno me, I goin tell my Faddah in heaven dat I donno him. 34 No tink I wen come to da earth fo make evrybody get along. I wen come wit one sword fo split peopo up. 35 I wen come fo split up one guy agains his faddah, one girl agains her maddah, an one daughtah in law agains her maddah in law. 36 Fo shua da guys dat go agains you goin come from yoa own house. 37 Whoeva love his faddah or maddah moa den me, no stay good enuff fo be my followa. An whoeva love his son or daughtah moa den me, no stay good enuff fo be my followa. 38 An whoeva no like pick up his torcha pos* an follow me, no stay good enuff fo me. 39 Whoeva try fo save his life* goin lose um, but whoeva lose his life cuz of me goin live again.

40 “Whoeva take you in stay showing me respeck, an whoeva show respeck fo me stay showing respeck fo da one who wen sen me. 41 God goin bless whoeva take in one prophet cuz dey know he one prophet. An He goin bless him da same way He bless da prophet. God goin bless whoeva take in one good guy cuz dey know he lissen God. An He goin give him da same kine blessing az dat good guy. 42 An whoeva give one of dese regula guys one cup cold watta cuz dey follow me, I tell you fo shua, no ways he goin lose out on his blessing.”