Wat Matthew Wen Write
11 Afta Jesus pau tell his 12 followas wat fo do, he wen go to da odda towns fo talk to peopo an teach dem about da good news.
2 Wen John wuz in jail, he hea about tings da Christ wuz doin, an he wen sen his followas 3 fo ask Jesus: “You da one we wuz waiting fo, or we waiting fo somebody else?” 4 Jesus say to dem: “Go back an tell John all da tings you wen see an hea. 5 Da blind can see an da cripple guys stay walking, da lepers wen come clean, da deaf can hea, da dead stay coming back to life, an da peopo dass pooa an hurting get fo hea da good news. 6 Da guys dat no look fo one reason fo stumbo cuz of me goin be happy.”
7 Afta John’s followas leave, Jesus start fo talk to all da peopo about John. He tell: “Wat you wen go out in da boonies fo see? One guy dass weak, like da tall grass da wind blow all ova? No. 8 So wat you wen see? One guy in fancy clothes? No, da guys dat wea fancy clothes live in da king’s house. 9 Fo real den, how come you wen go out dea? Fo see one prophet? John iz one prophet. But he way moa importan den all da prophets. 10 Da Scripchas wen tell about John: “Try look! I goin sen my messenja befoa you come. He goin clear da road an make um ready fo you.” 11 I goin tell you dis, outa evrybody who eva wen live, nobody moa importan den John da Baptiza. But somebody who ony litto bit importan in da Govament in heaven stay moa importan den him. 12 From da time John da Baptiza wen start his work fo God til now, da Govament in da heavens iz da prize peopo trying fo get. An da guys dat no stop working hahd fo dat prize, get um. 13 Da Law an da Prophets* wen tell wat wuz goin happen bumbye, an had start fo come tru wen John show up. 14 Wedda you believe um or not, he iz “E·liʹjah, who goin come,” da one dat da prophets wen talk about. 15 You guys dat get ears, lissen up.
16 “Da peopo now days, who dey ack like? You know how litto kids play outside in da market? Iz like dey tell each odda: 17 “We wen play da flute fo you, but you neva dance. We wen cry real loud, but you neva show you wuz sad.” 18 Same ting, John wen fast an neva drink wine, but peopo tell, “Ho! He get one demon.” 19 But I* wen eat an drink an peopo say, “How’s dis guy! He pig out an suck um up. He cruz wit tax collectas an sinnaz.” You goin know one guy stay akamai wen you look wat he do.”*
20 Da towns wea he wen do mos of his unreal miracles, Jesus wen scold dem big time cuz dey neva come sorry an turn aroun. 21 He tell dem: “Cho·raʹzin an Beth·saʹi·da! Bummahz fo you cuz you goin suffa! Cuz if Tyre an Siʹdon wen see da miracles dat wen happen in yoa guys town, dey woulda come sorry long time ago an put on da kine clothes fo show dey sad an sit down in ashes. 22 But I tell you dis, da day goin come fo God judge peopo, an goin be moa betta fo Tyre an Siʹdon den fo you. 23 Eh Ca·perʹna·um, God not goin lif you up to heaven. No! You goin down to da Grave!* Cuz if da unreal miracles you had see wen happen in Sodʹom, dat town would still be hea today. 24 But I tell you dis, da day goin come fo God judge peopo, an goin be moa betta fo Sodʹom den fo you.”
25 Dat time Jesus tell: “Faddah, you wen make da earth an da heavens, an I like evrybody know you so awesome! Cuz you wen hide dese tings from da guys dat tink dey so smart an you wen show um to da guys dass humbo like litto kids. 26 Faddah, dis da way you wen like um fo be. 27 My Faddah had give me evryting. Nobody really know da Boy, ony da Faddah. An nobody really know da Faddah, ony da Boy. An nobody can really get fo know da Faddah good, unless da Boy like teach dem about Him. 28 All you guys dat get heavy kine presha an stay real tired, come by me, an I goin make you feel betta. 29 Come learn from me an work* wit me, cuz I real kind an humbo, an you goin get res an come strong again. 30 Da work I give you not goin give you pain, an not goin be heavy fo carry.”