April

Meyer sole aan tëm fray khaaf opfer klaape fer eewiche leepe kriin. (Ëfe. 1:7) Es is woer tas ti layt woo Yeesus wii “anere xeef” kenënt hot, sole net tas proot ese un te wayn trinke im Oomtsmaal fom Hër. (Yoo. 10:16) Awer in een simpoolix aat, tuun se tas “proot fom leepe” ese. Tii mache tas wën se klaape tsayche aan tëm fray khaaf opfer un aan te tinge woo too teweeche meechlich sin. (Yoo. 6:53) Im keeche teel, ti kesalpte tsayche tas se teel fom nay pakt mache un tas se ti hofnung hon fer im himel rechiire wën se tas proot ese un te wayn trinke. Soo, ekaal ep mer fon te kesalpte orer ti anere xeef sin, fer eewiche leepe kriin, mise mer fest aan tëm fray khaaf opfer klaape. (w24.12 s. 13 ap. 14, 16)

Im Oomtsmaal fom Hër, hot Yeesus proot oone heep fer ti aphostele kep un hot kesaat tas es sayn khërper representiirt hot. Tan hot eyer se wayn kep un hot kesaat tas te wayn tas “pluut fom pakt” representiirt hot. (Mar. 14:22-25; Luk. 22:20; 1 Kor. 11:24) Te naye pakt is kemacht kep mit tëm ‘haus fon kaystlich Israël’, es wil saan, ploos tii woo mit Yeesus “in Kot sayn Raych” rechiire tuun. (Hep. 8:6, 10; 9:15) Was Yeesus im Oomtsmaal fom Hër kesaat hot, waar fer te “kleene trop”. Sayn troye aphostele waare ti eyerste woo teel fon tiise kleen krup kemacht hon. Tiise krup is kemacht fon tëne woo mit Yeesus im himel rechiire tuun. (w24.12 s. 11 ap. 9-10)

Eene fon Yeesus sayn tichte fraaynte hot tëm hinerkang. Tan hon sayn faynte tëm in kexpërt, ferxënt un akusiirt weeche kriime woo eyer net kemacht hat. Tii hon ëntxlist Yeesus mim toot xtroofe un tan hon se tëm ferkweelt. Tsum xlus, hon ti soltaate Yeesus aan een kweel phoste aan kenaachelt fer tëm um pringe. Yeesus hot tiise kanse phayn troy aus kehal. Awer ti phayn woo Yeehoowa kexpiirt hot wii eyer tas kesiin hot, waar noch kreeser. Opwool sayn iwermeesich kraft, hot Yeehoowa sich tsurik kehal etwas mache fer Yeesus rete. Warom? Weeche liip. Yeesus sayn opfer is ti kreest pewaysung fon wii fiil Yeehoowa tich liipt. Tee hot sayn aychne liipe Soon keopfert un hot fiil phayn aus kehal fer tich fon te sint un fom toot rete. (1 Yo. 4:9, 10) Yawool, Yeehoowa wil yeete eene fon uns helfe keeche ti sint khëmpfe un tiise khampf kewine! (w24.08 s. 6 ap. 13-14)

Meyer khene peser ferxteen wii fiil Yeehoowa uns liipt wën mer uns traan tenke wii tayer tas fray khaaf opfer tëm kekhost hot. Satanaas saat tas khee eene fon Kot sayn tiiner tuut leaal tsu Tëm plaype wën es xweyer is tas mache. Fer se pewayse tas Satanaas een liichner is, hot Yeehoowa erlaupt tas Yeesus layte teet foer se xtërpe. (Yoop 2:1-5) Yeehoowa hot kesiin wii ti layt Yeesus ferxpot hon, wii ti soltaate tëm ferklopt hon un wii se tëm uf een kweel phoste aan kenaachelt hon. Tan hot Kot kesiin sayn Soon fiil layte pis eyer kextorep is. (Mat. 27:28-31, 39) Yeehoowa hat ti kraft fer tas ales um hale. (Mat. 27:42, 43) Awer wën Yeehoowa tas kemacht hët, weyer tas fray khaaf opfer net petsaalt un soo hëte mer khee hofnung. Tes weeche hot Yeehoowa erlaupt tas sayn Soon layte teet pis eyer kextorep is. (w25.01 s. 22 ap. 7)

Es is 16^te Nisan fon 33 N.K. Yeesus sayn tisipele sin aarich traurich un tii hon fiil pang. Tswaay fon tëne reese fon Yeruusalem pis Emauus. Een frëmte man khomt ticht pay tëne un fangt aan mit tëne laafe. Ti tisipele saan tëm ti xlime tinge woo mit Yeesus pasiirt sin. Tan tuut te man aan fange se xpreche iwer tinge woo se nii ferkese teete. Tee penutst ti Xrifte un sayn profetsiie fer tëne aus leye warom te Mesias must layte un xtërpe. Wën ti tray mëner pis Emauus hin khome, tuut te frëmte saan weer tee wërklich is: Yeesus, woo fom toot uf kextii is! (Luk. 24:13-35) Torich sayn letste 40 taache uf te eyert, is Yeesus fiil mool fer sayn tisipele tsum foer xayn khom. Torich tiise tsayt, hot eyer sayn tisipele, woo traurich un mit pang waare, uf kemuut. Tes weeche, sin se froo kep un hon koraaj kriit fer ti kuute notisye iwer Kot sayn Raych preetiche un in lërne. (w24.10 s. 12 ap. 1-3)

Soo lang wii ti tsayt rom keet, een khint tuut automatix wakse; awer tas is net soo mit unser fraayntxaft mit Yeehoowa: meyer mise uns aan xtrenge fer tas wakse mache. Tsum payxpiil, ti priiter un xwestere in Korinto hon ti kuute notisye aan kenom, sich taafe kelos, hayliche kayst kriit un fiil mim aphostel Phaul kelërnt. (Aph. 18:8-11) Awer phaar yoore noo sayn taaf, waare etliche noch net rayfe kriste. (1 Kor. 3:2) Fer rayfe kriste wëre, mise mer eyerst te wunx hon fer tas hin kriin. Tii woo “khee speryens hon” un liipe soo plaype, wëre nii rayfe kriste. (Xpr. 1:22) Meyer wole net wii een folyeeriche mënx sin woo net sayn flichte erfiilt un mus imer ti hilef fon sayn eltere hon fer sayn ëntxlise mache. Xtats tas, wole mer uns aan xtrenge fer kaystlich wakse. Wëns tuu tich too traan aan xtrengst, peet tas Yeehoowa tich kept “te wunx un ti macht fer in krayfe”. (Fili. 2:13) (w24.04 s. 4 ap. 9-10)

Yeehoowa saat uns wii eyer sich xpiire tuut wën eyer ti layt richt. (Ese. 33:11) Yeehoowa tuut net ëntxlise yemant fer imer fernichte wën eyer net een kuut uersach hot. Tee is fol parmhërtslichkheet un tee tsaycht tiise kwaliteet imer wëns meechlich is. Was wise mer iwer ti layt woo net uf keruuft wëre? Ti Piipel kept ploos phaar payxpiile. Yeesus hot ketsaycht tas Yuutas Iskaryotis net uf keruuft wërt. (Mar. 14:21; kuk aach Yoohan 17:12 un ti xtuutyum noote.) Yuutas wust kans kenau tas was eyer kemacht hot, keeche Yeehoowa un Sayn Soon waar; awer noch soo, hot eyer tas kemacht. (Kuk Markus 3:29 un ti 2 xtuutyum noote.) Yeesus hot aach kesaat tas etliche fon te relichyeese fiirer woo sich keeche tëm kextelt hon, teete xtërpe oone ti hofnung fer uf keruuft wëre. (Mat. 23:33; kuk Yoohan 19:11 un ti xtuutyum noote “o homem”.) Un Phaul hot kesaat tas ti aphostate woo sich net peroye teete, weyere net uf keruuft. (Hep. 6:4-8; 10:29) (w24.05 s. 4 ap. 10-11)

Wën mer ticht pay Yeehoowa plaype, khan Satanaas kaar niks mache woo uns eewiche xaate pringe khent. (1 Yo. 3:8) In te nay welt, tuut Yeehoowa wayter sayn fraaynte xitse — net ploos fom kaystlich xaate, awer aach fom toot. (Apo. 21:4) Es is wërklich een eer een inkelaatne in Kot sayn parak sin. Meyer khene een ticht fraayntxaft mit tëm hon — een fraayntxaft woo fer imer hale khan. (Ese. 37:27) Awer wën mer wole wayter Yeehoowa sayn inkelaatne sin, wii sole mer uns aan xtele? Wëns tuu tsu yemant sayn haus in kelaat wërst, teest tuu kërn wise was eyer fon tich waart. Kraat soo, wole mer aach wise was Yeehoowa ferlangt fon tëne woo wole wayter sayn inkelaatne sin. Unser liip tsu Yeehoowa muut uns uf uns aan xtrenge fer “tee in ales tsufriite [lose]”. (Kol. 1:10) Meyer sole nii ferkese weer Kot is un tëm imer tiif respektiire. Soo een sort respekt tuut uns helfe uns wech hale fon kwalkee tings woo tëm pelaytiche khent. Meyer wole imer unser “Kot mit teemuut aan [heere]”. (Mik. 6:8) (w24.06 s. 4 ap. 8-9)

Yeehoowa hot Apraham ferlangt sayn soon Isak opfere. Meyer khene uns kaar net foer xtele wii fiil phayn Apraham too teweeche kexpiirt hot. Awer tee hot Yeehoowa kefolicht. Wii tee sayn soon neekst um keprung hat, hot Kot tëm kexikt xtil hale. Tiise payxpiil hot ketsaycht was Yeehoowa im futuer mache teet: sayn liipe Soon wilich opfere. Eyer teet tas mache weeche sayn kroos liip tsu te mënxe. (Xee. 22:1-18) Hunerte yoore xpeeter, wii Yeehoowa tas Kesets fer ti israeliiter kep hot, hot eyer tëne fiitsaych opfere ferlangt tas se khente fertsayung fon te sinte kriin. (Lew. 4:27-29; 17:11) Tiise opfere hon ketsaycht tas Yeehoowa een peser opfer fersoriche teet, woo ti mënxe fon te kanse sint pefraye teet. Kot sayn profeete waare inspiriirt aus leye tas te ferxprochne nookhomer — woo am ën Kot sayn liipe Soon waar — teet layte un um keprung wëre fer ti mënxe, too tepay tuu, fon te sint un fom toot rete. (Isa. 53:1-12) (w24.08 s. 4 ap. 7-8)

Noo etliche wersikele fon te Piipel leese, tenk iwer wiis tuu tas aan wëne khanst. Soo lang wiis tuu een xtikche fon te Piipel leest, froo tich: ‘Wii khan ich tiise informatsyoon yets orer im futuer aan wëne?’ Tsum payxpiil: wole mer saan tas tuu 1 Thesalooniker 5:17, 18 kelees host. Noo te leesung, khanst tuu xtil hale un triwer noo tenke aan wii ofts un tiif tuu peete tuust. Tuu khanst aach triwer noo tenke aan te uersache warom tuu petanklich pist. Fiilaycht khanst tuu ëntxlise Yeehoowa tanke weeche 3 spetsiifixe tinge. Soo kaar wëns tuu ploos phaar minute penutst fer triwer noo tenke aan te lisyoone fon te Piipel, es tuut tich helfe Kot sayn Wort heere un aan wëne. Un wëns tuu tas yeete taach machst, mit te tsayt wërst tuu een peser tiiner fon Yeehoowa. (w24.09 s. 4-5 ap. 9-10)

Yeehoowa hot uns mit een ekstra apiliteet kemacht. Opwool es frayt uns wën mer etwas kriin, unser frooheet is noch kreeser wën mer etwas kepe. Meyer xpiire uns kuut wën mer unser priiter un xwestere helfe khene un meyer wëre froo wën se uns petanklichkheet tsayche. Awer ekaal ep se uns tanke orer net, khene mer froo sin wayl mer tas richtiches kemacht hon. Ferkes tich net: ekaal wii fiil tuu kepst, “Yeehoowa khan tich fiil mee kepe wii tas”. (2 Kro. 25:9) Es is unmeechlich mee wii Yeehoowa kepe. Un niks lost uns frooer wii fon Yeehoowa peloont wëre. Soo wole mer pextimt sin wayter unser krooshërtsliche Fater im himel noo mache. (w24.09 s. 31 ap. 20-21)

Yeehoowa is parmhërtslich un mitlaytich. (Psal. 103:13; Isa. 49:15) Wën mer layte, tuut eyer unser phayn xpiire. (Sak. 2:8) Tee helft uns tëm khëne lërne un sayn fraaynte wëre. (Psal. 25:14; Aph. 17:27) Un tee is teemuutich. “Tee tuut sich pike fer te himel un ti eyert aan kuke, tuut te teemuutiche fom xtaap uf heepe.” (Psal. 113:6, 7) Weeche al tiise uersache, wole mer unser kroose Kot eere. Meyer eere Yeehoowa wayl mer wole hon tas ti anere tëm khëne lërne. Fiile wise net ti woerheet iwer Kot. Tas is soo wayl Satanaas haufe liie iwer Yeehoowa aus keprayt hot un ti layt klaape too traan. (2 Kor. 4:4) Satanaas hot ti layt rom kepapelt se klaape tas Yeehoowa wuutich is, tas eyer sich net mit uns khimert un tas eyer hinich fiile propleeme fon te welt is. Awer meyer wise ti woerheet iwer unser Kot! Tes weeche hon mer een ekstra oportuniteet: fer ti anere saan wii Kot wërklich is un tëne helfe Kot aach loope. (Isa. 43:10) (w25.01 s. 3 ap. 6-7)

Opwool Kot sayn Soon, Yeesus, perfekt waar un wunere kemacht hot, hot Satanaas etliche mënxe penutst fer fiile liie iwer tëm aus teele. Ti relichyeese fiirer, tsum payxpiil, hon fer ti layt kesaat tas Yeesus hot temoone aus ketriip “torich ti macht fom hërxer fon te temoone”. (Mar. 3:22) Wën Yeesus kericht waar, hon ti relichyeese fiirer tëm akusiirt Kot sayn naame ferfluuche un hon ti layt uf kehetst Yeesus um pringe. (Mat. 27:20) Xpeeter, wii Yeesus sayn tisipele ti kuute notisye kepreeticht hon, hon ti faynte “ti layt fon te natsyoone keeche ti priiter uf kehetst” fer tëne yachte. (Aph. 14:2, 19) A Sentinela 1^te Teetsemper fon 1998 hot iwer Aphostele sayn Kexicht 14:2 kesaat: “Ti yiitixe faynte hon tas pexeet net aan kenom. Awer es waar net kenuuch fer tëne. Tii hon aan kefang xrekliche tinge iwer ti kriste saan, soo tas ti layt net acht fer tëne kepe teete un tëne hase teete.” Pis hayt, is Satanaas “ti kans pewoont eyert am hinerkeen”. (w24.04 s. 11 ap. 15-16)

Een persoon sayn eewiche futuer hëngt net ap aan te tsayt woo se xtërpt. Yeehoowa is te perfekte Richter un sayn ëntxlise sin imer richtich un kerecht. (Psal. 33:4, 5) Meyer khene uns sicher sin tas “te Richter fon te kans eyert” tuut tas richtiches mache. Es xtimt aach se saan tas een persoon sayn eewich futuer hëngt net ap aan tëm plats woo se leept. Yeehoowa teet nii milyoone layt wii “kaprite” richte ploos wayl se leepe in een lant woo se nii ti xans hate fer iwer tas Raych lërne. (Mat. 25:46) Meyer khimere uns mit tiise layt, awer te Richter fon te kans eyert khimert sich noch fiil mee! Meyer wise net wii Yeehoowa ti ewënte lenkt torich ti kroos tripulatsyoon. Fiilaycht kriin etliche fon tiise layt ti xans fer iwer Yeehoowa lërne un aan tëm klaape wën eyer sayn naame foer ti kanse natsyoone ferhaylicht. (Ese. 38:16) (w24.05 s. 12 ap. 14-15)

Yeehoowa sayn tiiner tuun sich kërn naner helfe. (2 Kor. 8:4) Awer als mool, is es neetich koraaj hon fer tas mache. Tsum payxpiil, wën een kriich aus precht, mise ti elteste ti priiter un xwestere uf muute un sich sicher lose tas se tas neetiches hon in fiisix un kaystlich aat. Ti elteste liipe ti priiter un xwestere; tes weeche tuun se tëne mit tas neetiches fersoriche, soo kaar wën tas kefeerlich is se mache. In kefeerliche situatsyoone, is es wichtich tas mer eenich plaype. Folich ti oryentiirunge fon te filyaal fon tayn lant. (Hep. 13:17) Ti elteste mise ofts noo kuke ti oryentiirunge iwer wii sich foer perayte fer ti unklike un was se mache wën tas pasiirt. (1 Kor. 14:33, 40) Say koraajix, awer phas tich uf. (Xpr. 22:3) Say kluuch un xtel tich net umsonst ins kefoer. Trau uf Yeehoowa. Tee khan tich helfe tayn priiter unerxtitse awer tas mit sicherheet mache. (w24.07 s. 4 ap. 8; s. 5 ap. 11)

Te kheenich Tawi hot Yeehoowa kuut kekhënt un hot uf Tëm ketraut. Wii te kheenich Saul un anere faynte tëm keyacht hon, hot Tawi hilef tsu Yeehoowa in kepeet ferlangt. Kot hot sayn kepeet keantwort un tëm keret. Tes weeche, hot Tawi kesaat: “Yeehoowa leept!” (Psal. 18:46) Was wolt Tawi too temit saan? Een puuch leet aus tas Tawi wolt sayn fertraung tsayche tas Yeehoowa “te woere Kot is, woo sayn folek imer helfe wil”. Yawool, Tawi waar sich sicher tas Yeehoowa kemërkt hot was mit tëm pasiirt is un fërtich waar fer tëm helfe. Tas hot Tawi uf kemuut wayter Yeehoowa tiine un loope. (Psal. 18:28, 29, 49) Wën mer uns sicher sin tas Yeehoowa te lepeentiche Kot is, tas khan uns helfe tëm flaysich tiine. Meyer kriin ti kraft fer ti proope aus hale un aach ti muut fer wayter in Kot sayn tiinst xtram xafe. Meyer wëre aach pextimt ticht pay Yeehoowa plaype. (w24.06 s. 20-21 ap. 3-4)

Was khene mer fom aphostel Phaul sayn wërter fer ti thesalooniker lërne? Wën mer etwas woo xtimt net mit was mer in te Piipel kelërnt hon orer een xreklich kexicht heere, mise mer ferninftichkheet tsayche. In te friirix Sowyët Unyoon, hon unser faynte een priif fer ti priiter kexikt woo hot aus kesiin wii wën se fom haupst sets khom is. Te priif hot etliche priiter uf kemuut een aner un selepstxtëntich orkanisatsyoon mache. Es hot wërklich aus kesiin tas te priif fon te Orkanisatsyoon khom is. Awer ti troye priiter sin net hinerkang kep. Tii hon kemërkt tas ti informatsyoone im priif net kextimt hon mit was se kelërnt hon. Hayt tuun ti faynte fon te woerheet ti internet un ti sotsyaale weepe penutse fer uns konfus lose un uns teele. Xtats “klaych noo lose ferninftichkheet tsayche”, khene mer triwer noo tenke ep was mer heere orer leese, xtimt mit te woerheete woo mer xon kelërnt hon. (2 The. 2:2; 1 Yo. 4:1) (w24.07 s. 12 ap. 14-15)

Te wichtichste ëntxlus woo yemant mache khan, is sich tsu Yeehoowa tetikiire un teel fon sayn familye wëre. Yeehoowa wil hon tas ale layt tas mache. Warom? Tee wil hon tas se fer imer leepe wii sayn fraaynte. (Teut. 30:19, 20; Kal. 6:7, 8) Awer Yeehoowa tuut nimant tswinge tëm tiine. Tee erlaupt tas yeete persoon ëntxlist was se mache tuut. Un was pasiirt wën een ketaafte krist Kot sayn kesets iwertreet un een xweyer sint macht? Wën eyer sich net peroyt, mus eyer fon te kemaynt raus ketuun wëre. (1 Kor. 5:13) Awer aach wën tas pasiirt, wil Yeehoowa hon tas ti persoon sich peroyt un noch mool een xtark fraayntxaft mit Tëm ëntwikelt. In woerheet, een wichtich uersach warom Yeehoowa tas fray khaaf opfer fersoricht hot, is tas soo khan eyer fertsaye tii woo sich peroye. Unser liipliche Fater tuut hërtslich aan hale fer tii woo een xweyer sint kemacht hon, sich peroye. (Sak. 1:3; Rom. 2:4; Tya. 4:8) (w24.08 s. 14 ap. 1-2)

Wii te aphostel Yoohan sayn trite priif kexrip hot, hon etliche layt liieray aus keprayt un ti kemaynt keteelt. Awer anere sin wayter “in te woerheet [kang]”. Tii hon wayter Kot kefolicht un sin “wayter noo tëm sayn kepoote [kang]”. (2 Yo. 4, 6) Tiise troye kriste hon Yoohan un aach Yeehoowa froo kelos. (Xpr. 27:11) Was lërne mer too temit? Ti troyheet pringt frooheet. (1 Yo. 5:3) Tsum payxpiil, meyer sin froo wayl mer Yeehoowa froo mache. Kot frayt sich wën eyer siit tas mer ti fersuuchunge ap xtose un uns aan xtrenge fer sayn kesetse aan heere. Ti engele im himel fraye sich aach too temit. (Luk. 15:10) Meyer kriin aach frooheet wën mer siin unser priiter un xwestere troy aus hale. (2 The. 1:4) Un wën Satanaas sayn welt fernicht wërt, wëre mer froo tas mer troy tsu Yeehoowa keplip sin. (w24.11 s. 12-13 ap. 17-18)

Wii lang solst tuu ti persoon peopachte eeps tuu tëne saast tas tuu romantix interes aan tëne host? Wëns tuu tich ayle tuust fer mit te persoon xpreche, khan se rechne tas tuu net kenuuch tenkst foer een ëntxlus mache. (Xpr. 29:20) Awer wën ti persoon mërkt tas tuu interes host, un tuu nëmst tich tsu fiil tsayt fer mit tëne xpreche, khan se tenke tas tuu weest net was tuu wilst. (Ekl. 11:4) Ferkes tich net: wëns tuu mit yemant iwer tayn xpiirunge xprechst, prauchst tuu tich net sicher sin tas tuu mit te persoon tich hayrate tuust. Awer tuu must tich sicher sin tas tuu fërtich fer ti hayrat pist un tas ti aner persoon khan een kuute man orer fraa fer tich sin. Un wëns tuu mërkst tas yemant interes aan tich hot? Wëns tuu net mit te persoon namoriire wilst, los tas taytlich torich tayn aktsyoone. Es weyer net kuut tas ti aner persoon tenke teet tas se een xans hot fer mit tich namoriire, wëns tuu tas net wërklich mache wilst. (Ëfe. 4:25) (w24.05 s. 22-23 ap. 9-10)

Ploos tii woo wërklich kesalpt un troy sin, wëre fon Yeesus tsum himlixe Raych kenom. Eene kesalpte woo sich net wachsam halt, wërt net kesamelt mit te “rauskesuuchtne”. (Mat. 24:31) Kewis, al woo hofe fer imer uf te eyert leepe, sole sich aach troy un wachsam hale. Meyer tuun Yeehoowa kuut khëne. Soo meyer wise tas eyer imer kerecht is. Wën Yeehoowa raus suucht etliche kriste in unser tsayt salpe, mache mer uns net ketanke too triwer. Meyer tenke uns traan was Yeesus kesaat hot iwer ti aarwayter woo in te letste xtun xafe khom sin in sayn kexicht fon te traupe kriist. (Mat. 20:1-16) Tii woo in kelaat waare fer in te traupe kriist xafe xpeeter im taach, hon te selwich loon kriit wii tii woo friier aan kefang hate. Kraat soo, ekaal wanee ti kesalpte raus kesuucht kep sin, tuun se ti himlixe peloonung kriin wën se sich troy hale. (w24.09 s. 24 ap. 15-17)

Yeesus hot een perfekt payxpiil kelos iwer wii sich foer te unkerechtichkheet aan xtele. Fiile layt hon tëm unkerecht pehantelt, too tepay sayn familye. Sayn parente hon kesaat tas eyer ferikt waar; ti relichyeese fiirer hon kesaat tas eyer kraft fon te temoone kriit hot; un ti romaanixe soltaate hon tëm ferxpot, ferkweelt un um keprung. (Mar. 3:21, 22; 14:55; 15:16-20, 35-37) Noch soo, hot Yeesus nii tsurik petsaalt. Was lërne mer mit sayn payxpiil? (1 Phe. 2:21-23) Wën mer unkerecht pehantelt sin, mise mer Yeesus, tas perfekte payxpiil, noo mache. Tee wust wanee es peser waar ruych plaype orer xpreche. (Mat. 26:62-64) Als mool, wën ti layt iwer tëm keloo hon, hot eyer kaar niks kesaat. (Mat. 11:19) Un wën eyer kexproch hot, hot eyer net sayn keechner ferxënt orer kesaat tas eyer tsurik petsaale teet. (w24.11 s. 4-5 ap. 9-10)

Xtel tich mool foer tas tuu een kexenk kepst fer yemant woos tuu liipst. Tiise kexenk is xeen un nutslich. Awer ti persoon xtelt tas kexenk in een xrank un nii mool too triwer tenkt. Sicher weyerst tuu traurich. Im keeche teel, wën ti persoon tas kexenk penutse teet un tich tanke teet, sicher weyerst tuu froo. Was hot tiise payxpiil se tuun mit tëm kexenk woo Yeehoowa uns kep hot? Weeche liip, hot Kot sayn Soon kep fer weeche uns xtërpe. Sicher wërt Yeehoowa aarich froo wën mer petanklichkheet tsayche weeche sayn kexenk un liip. (Yoo. 3:16; Rom. 5:7, 8) Awer, soo lang wii ti yoore rom keen, khan unser petanklichkheet tsum fray khaaf opfer sich ferxweeche. Es weyer wii wën mer Yeehoowa sayn kexenk in een xrank xtele teete: meyer sin froo too teweeche, awer meyer lose tëm tsu im xrank. Meyer wole net hon tas soo was mit uns pasiirt! Tes weeche mise mer ofts tenke iwer ales was Yeehoowa un Yeesus fer uns kemacht hon. (w25.01 s. 26 ap. 1-2)

Een pruuter woo sich kwalifitsiirt fer een elteste sin, sol net een man sin woo kraat een krist kep is. Opwool tuu praychst net fiile yoore ketaaft sin, must tuu tich tsayt nëme fer een rayfe krist wëre. Soo wii Yeesus, must tuu teemuut tsayche un wilich sin fer Yeehoowa tiine in kwalkee flicht. Tuu must aach ketult hon un waarte pis Yeehoowa tich mee flichte in te kemaynt kept. (Mat. 20:23; Fili. 2:5-8) Wii khanst tuu pewayse tas tuu leaal pist? Tuu must troy tsu Yeehoowa plaype, in een aat leepe woo tëm kefalt un ti oryentiirunge fon sayn Orkanisatsyoon foliche. Ti Piipel tuut taytlich saan tas ti superintentente mise kwalifitsiirt sin fer in se lërne. Wil tas saan tas tuu must iwer xeene reete hale? Nee; net al ti elteste kriin es hin. Awer wën se preetiche un pesuuche mache fer ti priiter uf muute, mise se wise wii ti Piipel kuut penutse. (w24.11 s. 23-24 ap. 14-15)

Wëns tuu etwas in te Piipel leest woos tuu net kenau ferxteest, mach unersuuchunge. Tan, torich te taach, tenk triwer noo iwer was tuu kelërnt host iwer Yeehoowa, sayn Soon un tëne sayn liip tsu tich. (Psal. 119:97, noote) Say net oone muut wëns tuu net imer was nayes orer interesantes finst wëns tuu ti Piipel leest orer unersuuchung machst. Tenk iwer tich selepst wii yemant woo kolt suucht. Ofts, yemant woo kolt suucht mus fiile xtune orer taache xafe pis eyer kolt fint. Awer tee kept net uf un tuut wayter mit ketult suuche. Tee wees tas yeete xtik kolt woo eyer fint, soo kaar wën tas kleen is, hot fiil weyert. Yeete naye tings woo mer in te Piipel lërne, hot mee weyert wii kolt. (Xpr. 8:10) Soo, say ketultich un tuu wayter ti Piipel leese. (Psal. 1:2) (w25.01 s. 24-25 ap. 14-15)

Yeehoowa waart tas mer fërtich sin fer se fertsaye tii woo uns wee kemacht hon. (Psal. 86:5; Luk. 17:4; Ëfe. 4:32) Khan sin tas mer keëricht sin weeche etwas woo yemant kesaat orer kemacht hot, hauptseechlich wën tas yemant fon unser familye orer een tichte fraaynt is. (Psal. 55:12-14) Als mool, khan ti emotsyonaal phayn soo xtark sin wii ti xtiche fon een xwaart. (Xpr. 12:18) Khan sin tas mer fersuuche unser xpiirunge neewe lose. Awer tas weyer wii mit een meser kextoch sin un tas meser in te wee lose. Kraat soo, kriin mer es net hin unser xpiirunge heele wën mer se aynfach neewe lose. Wën yemant uns pelayticht, khan sin tas mer am aanfang pees wëre. Ti Piipel erkhënt tas, als mool, khan tas mit uns pasiire. Awer tii tuut uns aan reete tas mer sole net pees plaype. (Psal. 4:4; Ëfe. 4:26) Warom net? Wayl neekst nii pringt ti peesheet kuute resultaate. (Tya. 1:20) Ferkes tich net: pees wëre is net imer unich unser kontrol, awer pees plaype, is. (w25.02 s. 15 ap. 4-6)

Yeesus hot een kexicht fertseelt fer se tsayche wii tum es is kelt samele, awer “net raych foer Kot sayn aue” sin. (Luk. 12:16-21) Nimant wees was moye pasiire tuut. (Xpr. 23:4, 5; Tya. 4:13-15) Un Yeesus hot kesaat tas tii woo wole tëm sayn tisipele wëre, mise fërtich sin fer sayn kanse tinge “uf kepe”. (Luk. 14:33, noote) Im eyerste yoerhunert, muste ti kriste in Yuteea tas mache un tii waare wilich fer sayn kanse tinge uf kepe. (Hep. 10:34) In unser tsayt, tuun fiile priiter sayn aarwayt ferliire wayl se wole khee politix partay pay xteen. (Apo. 13:16, 17) Was tuut se helfe tas mache? Tii traue mim kanse hërts uf Yeehoowa sayn ferxpreche: “Ich tuun tich nii lose un ich tuun tich nii im xtich lose.” (Hep. 13:5) Soo meyer mache unser pestes fer tas neetiches im futuer hon, awer wën was unkewaartnes pasiirt, traue mer tas Yeehoowa uns uf phase tuut. (w25.03 s. 29 ap. 13-14)

Yeehoowa waart net tas mer rayfe kriste oone hilef wëre. Tee hot uns xeefer un leerer in te kemaynt kep, woo uns helfe een xtark fraayntxaft mit Yeehoowa hon. Tii helfe uns “folyeeriche mënxe [wëre], soo rayf wii Kristus”. (Ëfe. 4:11-13) Yeehoowa kept uns aach sayn hayliche kayst fer uns helfe “Kristus sayn ferxtant” hon. (1 Kor. 2:14-16) Kot hot uns aach ti 4 Ewankeelye kep fer se tsayche was Yeesus ketenkt, kexproch un kemacht hot too uf te eyert. Wën mer Yeesus sayn ketanke un aktsyoone noo mache, khene mer rayfe kriste wëre. Awer fer rayfe kriste wëre, mise mer mee lërne wii ploos “ti eyerste inlërnunge iwer Kristus” — es wil saan, ti haupste inlërnunge. (w24.04 s. 4-5 ap. 11-12)

Yeete taach mise mer ëntxlise mache. Etliche sin laycht — was unser friixtik wërt, was fer xtun mer xloofe keen... Awer anere sache sin xweyer fer se ëntxlise. Tii khene unser kesuntheet, frooheet, keliipte orer aanpeetung petrefe. Meyer wole hon tas unser ëntxlise nutse fer uns un unser familye pringe, awer tas haupste is tas se Yeehoowa kefale. (Rom. 12:1, 2) Een wichtich xrit fer een kluuch ëntxlus mache, is ti informatsyoone samele. Warom is tas important? Xtel tich mool foer yemant woo paym tokter keet wayl eyer een xlim krankheet hot. Sicher, foer een ëntxlus iwer te tratament mache, tuut te tokter ti persoon noo kuke un frooche mache. Tuu machst aach peser ëntxlise wëns tuu eyerst tenkst iwer ti informatsyoone woo in tayn situatsyoon phase. (w25.01 s. 14 ap. 1-3)

Was wise mer iwer Yeehoowa sayn parmhërtslichkheet? Wii hot eyer ketsaycht tas eyer “net winxt tas yemant fernicht wërt”? (2 Phe. 3:9) Mërk mool wii eyer parmhërtslich waar mit etliche layt woo xweyere sinte kemacht hon. Te kheenich Tawi hot phaar xlime sinte kemacht, soo wii atultëryo un een mënx um pringe. Awer Tawi hot sich peroyt un Kot hot tëm parmhërtslich fertsayt. (2 Sam. 12:1-12) Te kheenich Manasës hot xrekliche tinge kemacht torich neekst sayn kanse leepe. Noch soo, hot Yeehoowa parmhërtslichkheet ketsaycht un tëm fertsayt wayl eyer sich peroyt hot. (2 Kro. 33:9-16) Tiise payxpiile pewayse tas Yeehoowa parmhërtslichkheet tsaycht imer wën eyer een uersach siit fer tas mache. Yeehoowa tuut tiise sort layt uf ruufe wayl, opwool se xweyere sinte kemacht hon, hon se sich peroyt. (w24.05 s. 4 ap. 12)