Mërts

In te Piipel, leese mer ti kexichte iwer kerechte layt woo unkerecht kep sin. Een payxpiil is te kheenich Salomon. Tee wust kans kenau weer Yeehoowa waar un wii tëm aan peete. Yeehoowa hot tëm aach raychlich keseechent. Awer xpeeter, hot Salomon aan kefang falxe keeter aan peete. Tas hot Yeehoowa aarich pees kelos un ti natsyoon fon Israël hot hunerte yoore too teweeche kelit. Wii Salomon kextorep is, saat ti Piipel tas eyer “mit sayn foerkhomer ruue kang [is]”; tepay aan sayn foerkhomer waare troye mëner, soo wii te kheenich Tawi. (1 Khe. 11:5-9, 43; 2 Khe. 23:13) Awer is ti aat wii eyer pekraapt kep is, een karantii tas eyer uf xtaye teet? Ti Piipel saat niks too triwer. Tas ufxtaye is een kexenk fon unser liipliche Kot. Yeehoowa kept ti xans fer tëm imer aan peete fer ti layt woo eyer wil. (Yoop 14:13, 14; Yoo. 6:44) Meecht Salomon tiise kexenk kriin? Yeehoowa wees ti antwort, awer meyer net. Was mer wise, is tas Yeehoowa tas richtiches mache tuut. (w24.05 s. 4 ap. 9)

Wën mer unser leepe tsu Yeehoowa tetikiire, wëre mer inkelaatne in sayn simpoolix parak. Tat hon mer fiil kaystlich esmitel un aach ti fraayntxaft mit anere woo in Yeehoowa sayn parak rin khom sin. Layt fon ale lënter khene inkelaatne in Yeehoowa sayn parak sin. Wën mer Yeehoowa troy tiine, khene mer inkelaatne in sayn parak wëre, ekaal woo mer leepe. (Apo. 21:3) Un Kot sayn tiiner woo xon kextorep sin? Sin se noch inkelaatne in Yeehoowa sayn parak? Yawool! Warom khene mer tas saan? Wayl tii sin noch in Yeehoowa sayn ketanke. Yeesus hot aus keleet: “Soo kaar Mooses hot ketsaycht tas ti toote uf keruuft wëre, im kexicht fom taarne phutx, wën eyer Yeehoowa wii ‘Kot fon Apraham, Kot fon Isak un Kot fon Yaakop’ keruuft hot. Eyer is Kot, net fon te toote, awer fon te lepeentiche, wayl fer tëm, tuun se al leepe.” (Luk. 20:37, 38) (w24.06 s. 3-4 ap. 6-7)

Wii Satok tsu Heprom kang is, hot eyer sayn wafe mit kenom un waar fërtich fer se khëmpfe. (1 Kro. 12:38) Tee waar wilich fer mit Tawi tsum kriich keen un Israël fon sayn faynte xitse. Fiilaycht hat Satok weenich speryens wii kriichs man, awer tee hat fiil koraaj. Wii hot een priister soo wii Satok kelërnt soo koraajix sin? Tee hot fiile mëner kekhënt woo xtark un koraajix waare. Un kewis, hot eyer fiil kelërnt wii eyer se peopacht hot. Tsum payxpiil: wayl Tawi eene koraajixe fiirer un kriichs man waar, sin al in Israël uf kemuut kep tëm hërtslich pay xteen. (1 Kro. 11:1, 2) Tawi hot imer aan Yeehoowa ketraut fer hilef keeche sayn faynte kriin. (Psal. 138:3) Satok hot aach mit anere koraajixe mëner kelërnt, soo wii Yeoyata un sayn soon Penaya, woo een kriichs man waar, un aach anere 22 xëfe fom folek woo Tawi pay kextan hon. (1 Kro. 11:22-25; 12:26-28) (w24.07 s. 3 ap. 5-6)

Saulus fon Tarsus hot Yeesus sayn liipe nookeener wyolënt keyacht. Ti meyerste kriste hon tsiimlich sicher ketenkt tas eyer sich nii ënere teet. Awer Yeesus wust tas Saulus sich ënere un peroye khent. Yeesus un sayn Fater hon ti kuute kwaliteete fon Saulus kesiin. Yeesus hot kesaat: “Tiise man is fer mich een rauskesuuchtne waase.” (Aph. 9:15) Yeesus hot soo kaar een wuner penutst tas Saulus sich peroye khent. (Aph. 7:58–8:3; 9:1-9, 17-20) Saulus, woo xpeeter wii aphostel Phaul kenënt kep is, hot sich peroyt un is een krist kep. Phaul hot ofts kesaat tas eyer mechtich petanklich waar weeche ti parmhërtslichkheet un kuutheet woo Yeehoowa un Yeesus tëm ketsaycht hon. (1 Tim. 1:12-15) Een mool hot Phaul tsum wise kriit tas ti kriste in Korinto erlaupt hon tas eene man woo seksuaal imoraaliteet pratikiirt hot, in te kemaynt plaype teet. Was hot Phaul too triwer kemacht? Ti wërter woo eyer fer ti korinter kesaat hot, lërne uns fiil in iwer Yeehoowa sayn liiplich tisipliin un wii wichtich es is parmhërtslichkheet tsayche. (w24.08 s. 13 ap. 15-16)

Xrit noo xrit, hot Yeehoowa taytlich kelos wii sintiche mënxe ticht pay tëm khome khente. Apël — Aatam un Ewa sayn 2^te soon — waar te eyerste mënx woo uf Yeehoowa keklaapt hot noo te repelyoon im Eetem kaate. Apël hot Yeehoowa keliipt. Tes weeche, fer Tëm kefale un ticht pay Tëm khome, hot Apël etwas fer Yeehoowa kep. Wayl eyer een xeefer waar, hot Apël etliche yunge leemer fer Yeehoowa keopfert. Wii meecht Yeehoowa sich too teweeche kexpiirt hon? Ti Piipel saat: “Yeehoowa hot Apël un sayn opfer kuut aan kesiin.” (Xee. 4:4) Yeehoowa hot sich aach kefrayt mit te opfere fon anere layt woo tëm keliipt un uf tëm ketraut hon, soo wii Noee. (Xee. 8:20, 21) Wayl Yeehoowa tiise opfere aan kenom hot, hot eyer ketsaycht tas ti sintiche mënxe khonte tëm kefale un ticht pay tëm khome. (w24.08 s. 3 ap. 5-6)

Ti unkerechtichkheet khan uns pelayticht orer unruych lose. (Ekl. 7:7) Troye tiiner, soo wii Yoop un Hapakuk, hon sich kraat soo kexpiirt. (Yoop 6:2, 3; Hap. 1:1-3) Opwool es normaal is sich soo xpiire, mise mer uf phase fer net etwas mache woo te propleem noch xlimer lose tuut. Wën es aus siit tas tii woo unkerecht sin, net kextrooft wëre, khene mer aan fange se tenke tas tas richtiches mache, umsonst is. Fer eene fon Yeehoowa sayn tiiner, hot es aus kesiin tas ti xlechte froo waare, opwool se ti kuute layt unkerecht pehantelt hon. Tee hot kexrip: “Tas sin ti xlechte — tii hon es imer laycht.” (Psal. 73:12) Tee is mechtich traurich too teweeche kep un tee hot ketenkt tas es sich net keloont hot Yeehoowa tiine. Tee hot kesaat: “Wii ich fersuucht hon tas ferxteen, sin ich unruych kep.” (Psal. 73:14, 16) (w24.11 s. 3 ap. 5-7)

Meyer eere Yeehoowa wayl mer tëm tiif respektiire. Es kept fiile uersache fer Kot respektiire. Tee is te Ale Mechtiche — sayn kraft hot khee krëns. (Psal. 96:4-7) Sayn kluucheet is taytlich in ales was eyer kemacht hot. Tee hot uns tas leepe kep un ales was neetich is fer tas hale. (Apo. 4:11) Tee is leaal. (Apo. 15:4) Ales was eyer macht, tuut kuut ap laafe un tee halt imer sayn ferxpreche. (Yos. 23:14) Tes weeche hot te profeet Yeeremias iwer Yeehoowa kesaat: “Tswixich al ti kluuche fon te natsyoone un fon sayn kanse rayche, kepts nimant soo wiis tuu.” (Yee. 10:6, 7) Sicher hon mer kuute uersache fer unser himlixe Fater respektiire. Awer mee wii tëm respektiire, tuun mer tëm fiil liipe. Un tas is ti haupst uersach fer Yeehoowa eere. (w25.01 s. 3 ap. 5-6)

Kot sayn faynte fersuuche aus siin mache tas ti kuute tinge fon Kot sayn Orkanisatsyoon sin, in woerheet, xlecht. Tsum payxpiil: meyer hon torich ti Piipel kelërnt tas Yeehoowa wil hon tas mer unser khërper, aanxtelung un aanpeetung rayn hale. Tee saat tas weer wayter tas xlechtes macht un sich net ënere wil, khan net in te kemaynt plaype. (1 Kor. 5:11, 12; 6:9, 10) Meyer tuun tiise piiplixe kepoot aan heere. Awer weeche tiise kepoot, unser faynte saan tas mer ti layt net liipe, tas mer se richte un tas mer net aan nëme yemant woo anerste is. Meyer mise ferxteen weer hinich tiise atake is. Satanaas, te Taywel, is hinich ti falxe kexichte; tee is “te fater fon te lii”. (Yoo. 8:44; Xee. 3:1-5) Soo meyer khene waarte tas Satanaas unser faynte penutse tuut fer falxe kexichte iwer Kot sayn Orkanisatsyoon aus teele. (w24.04 s. 10-11 ap. 13-14)

Soo kaar noo tëm aanfang fon te kroos tripulatsyoon, is es meechlich tas etliche woo ti fernichtung fon “Papiloon ti Kroos” siin, sich traan tenke tas Yeehoowa sayn Tsayer een lang tsayt kesaat hon tas es pasiire teet. Meechte etliche aan fange uf Yeehoowa klaape wën se tiise ewënte siin? (Apo. 17:5) Wën soo was pasiirt, es wërt net fiil anerste wii was pasiirt is im Ejipt in Mooses sayn taache. Fiile layt woo “net israeliiter” waare, sin mit te israeliiter kang wii se Ejipt kelos hon. (Eeks. 12:38) Etliche fon tëne hon fiilaycht aan kefang uf Yeehoowa klaape wën se kesiin hon Mooses sayn wërter iwer ti 10 pheste sich erfiile. Wën soo was pasiirt noo te fernichtung fon Papiloon ti Kroos, meechte mer tenke tas es net richtich is tas tiise layt pay uns khome kraat foer te Armaxeton? Kewis net! Meyer wole soo wii unser himlixe Fater sin, “een Kot woo parmhërtslich un mitlaytich is, ketultich un fol mit leaale liip un woerheet”. (Eeks. 34:6) (w24.05 s. 11 ap. 12-13)

Was khent pasiire wën mer uns ap lenke teete fom “muste fon nutsliche wërter”? Kuk mool een payxpiil. Im eyerste yoer hunert, hon etliche kriste ti falx kexicht aus keteelt tas Yeehoowa sayn taach xon khom weyer. Fiilaycht hot een priif tas kesaat, woo ti layt ketenkt hon fon Phaul khom weyer. Etliche kriste in Thesaloonika hon aan tiise kexicht keklaapt un waare tas soo kaar fer ti anere am aus teele. Awer tii hon net tsayt kehool fer se pewayse ep tiise informatsyoon woer weyer. Wën se sich traan ketenkt hëte was Phaul tëne in kelërnt hat wii eyer mit tëne waar, weyere se net hinerkang. (2 The. 2:1-5) Phaul hot sayn priiter aan kereet net klaape aan ales was se keheert hon. Un fer sayn priiter im futuer helfe, hot Phaul sayn tsweete priif fer ti thesalooniker xlus kemacht mit te wërter: “Too is mayn kriise, fon Phaul, torich mayn aychne hant, woo een sinaal in ale mayn priife is; es is soo wii ich xraype.” (2 The. 3:17) (w24.07 s. 11-12 ap. 13-14)

Ti hepreeyxe kriste muste in sayn tiinst tsu Yeehoowa aus hale, wayl klaych teete ti xwiirichkheete khome. Opwool etliche fon tëne xroo yachtung friier mit kemacht hate, tas weyer was nayes fer fiile. Soo hot te aphostel Phaul se erinert tas se solte sich foer perayte fer mee yachtung mit mache un fërtich sin fer troy pis te toot plaype, soo wii Yeesus es kemacht hot. (Hep. 12:4) Wii ti kristyanismus sich aus keprayt hot, sin fiile yuute wuutich un wyolënt kep weeche ti kroos numer yuute woo kriste kep sin. Phaar yoore foer sayn priif xraype, hat een krup Phaul atakiirt. Mee wii 40 yuute hon sich “fersamelt un ferxproch, unich ferfluuchung, niks ese orer trinke pis se Phaul um pringe teete”. (Aph. 22:22; 23:12-14) Opwool ti kriste keyacht un kehast waare, muste se sich wayter aan xtrenge fer sich samele fer Kot aan peete, ti kuute notisye preetiche un sayn klaape xtark hale. (w24.09 s. 11 ap. 15)

Te aphostel Yoohan waar eene tichte fraaynt fon Yeesus Kristus. (Mat. 10:2) Yoohan hot fiil tsayt mit Yeesus kepreeticht un hot sayn wunere kesiin. Opwool ti proope, is eyer leaal tsu Yeesus keplip. Yoohan hot kesiin wii Yeesus um keprung kep is un, xpeeter, fom toot uf keruuft kep is. Tee hot aach kesiin ti kristlich kemaynt wakse un hot kenuuch tsayt keleept fer se siin ti kuute notisye “fer ti kans kriatsyoon unich tëm himel kepreeticht” wëre. (Kol. 1:23) Wii Yoohan xon kans alt waar, hot eyer ti eer kriit fer tas wunerlich puuch Apokalipsis xraype. (Apo. 1:1) Tee hot eene fon te Ewankeelye un aach 3 inspiriirte priife kexrip. In sayn letste priif, hot eyer fer Kayo kexrip, een troy krist woo Yoohan keliipt hot wii wën eyer sayn aychne khint weyer. (3 Yo. 1) Was tiise man kexrip hot, tuut al Yeesus sayn nookeener uf muute — fon friier pis hayt. (w24.11 s. 12 ap. 15-16)

Eene man woo sayn fraa liipt, kept tëne weyert. Tee tuut se siin wii een weyertlich kexenk fon Yeehoowa. (Xpr. 18:22; 31:10) Tes weeche, tuut eyer se mit kuutheet un respekt pehantele, too tepay wën se sëks mache. Tee tuut se net tswinge etwas mache woo se xlecht xpiire macht, niter xtelt orer woo sayn kewise xteert. Tee tuut sich aach aan xtrenge fer een sauwer kewise foer Yeehoowa hale. (Aph. 24:16) Man, Yeehoowa kept fiil weyert fer ti aanxtrengung woos tuu machst fer tayn fraa eere torich wërter un aktsyoone. Say pextimt tëne eere; mach niks woo khent se xaate pringe. Xtats tas, tsaych tëne kuutheet, respekt un liip. Soo tuust tuu tsayche tas tuu tëne weyert kepst. Eer tayn fraa un soo tuust tuu ti wichtichste ferpiinung xitse — tayn fraayntxaft mit Yeehoowa. (Psal. 25:14) (w25.01 s. 13 ap. 17-18)

Yeehoowa sayn tiiner hon een xtarke wunx fer ti kuute notisye preetiche un tuun tas mit muut mache. Tas macht se anerste wii ti anere woo sich kriste nëne. Was khan uns helfe unser muut in te preetich aarwayt hale orer soo kaar ferxtërke? Yeesus sayn payxpiil khan uns in lërne muutich in te preetich sin. Wii tee uf te eyert waar, hot eyer imer flaysich kepreeticht. Un wii ti tsayt rom kang is, is eyer noch flaysicher kep. Yeesus hot sayn aarwayt ferklaycht mit te aarwayt fon eene man woo traupe krist uf kephast hot. Im traupe krist, waars een fayche paam un te man hot 3 yoore kexaft tas es friichte kepe teet, awer es is net pasiirt. Kraat soo, hot Yeesus 3 yoore fer ti yuute kepreeticht, awer ti meyerste sin net sayn tisipele kep. Un soo wii te man fon te ferklaychung, hot Yeesus net uf kep. (Luk. 13:6-9) Wën mer Yeesus sayn wërter foliche un tëm noo mache, khene mer uns muutich hale. (w25.03 s. 14-15 ap. 1-4)

Un wëns tuu tenkst tas yemant een kuute man orer fraa fer tich weyer? Solst tuu klaych fer ti persoon saan wiis tuu tich xpiirst? Ti Piipel saat tas een kluuch persoon kriit khëntnis eep se etwas macht. Soo, es is kluuch ti aner persoon een tsayt peopachte, oone tsu fiil acht ruufe, eeps tuu saast wiis tuu tich xpiirst. Wii khanst tuu yemant peopachte oone acht ruufe? In te fersamlunge orer festche mit te priiter, khanst tuu etliche tinge mërke iwer ti persoon sayn fraayntxaft mit Yeehoowa, personaliteet un aanxtelung. Weer sin sayn fraaynte un iwer was tuut ti persoon xpreche? (Luk. 6:45) Tuun ayre tsiile xtime? Fiilaycht khanst tuu mit te elteste fon te persoon sayn kemaynt xpreche orer mit anere rayfe kriste woo ti persoon kuut khëne. (Xpr. 20:18) Tuu khanst tëne frooe iwer wii ti anere ti persoon siin un iwer sayn kwaliteete. (Rut 2:11) Soo lang wiis tuu ti persoon peopachst, phas uf fer net imer trom rom ti persoon sin fer ales iwer ti persoon raus fine. Respektiir sayn priwasiteet un xpiirunge. (w24.05 s. 22 ap. 7-8)

Ti elteste tuun sich net ayle fer se tenke tas yemant sich net peroye tuut. Etliche khene sich peroye in te eyerst fersamlung woo ti elteste mit tëne hon. Awer anere im xtant prayche mee tsayt. Tes weeche khene ti elteste pleene mit te persoon mee wii een mool xpreche. Im xtant, noo te eyerst fersamlung, tuut ti persoon woo kesint hot aan fange ërnst tenke iwer was se mit te elteste kexproch hot. Khan sin tas se teemuut tsaycht un Yeehoowa sayn fertsayung ferlangt. (Psal. 38:18) Tes weeche, in te neekst fersamlung mit te elteste, khan ti persoon sich anerste aan xtele. Fer ti persoon helfe sich peroye, tuun ti elteste sich uf tëne sayn plats xtele un kuutheet tsayche. Tii ferlange in kepeet tas Yeehoowa sayn aanxtrengung seechent un tii tuun wayter hofe tas ti persoon aan sich khomt un sich peroyt. (2 Tim. 2:25, 26) (w24.08 s. 22-23 ap. 12-13)

Yeehoowa wil net hon tas yemant fernicht wërt. Tee wil hon tas ti sintiche layt tsurik tsu tëm khome. (2 Kor. 5:20) Tes weeche hot Yeehoowa imer sayn tiiner, woo tëm im xtich kelos hon, uf kemuut sich peroye un tsurik tsu tëm khome. Es is een eer fer ti elteste mit Yeehoowa xafe fer se helfe tii woo een xweyer sint kemacht hon, sich peroye. (Rom. 2:4; 1 Kor. 3:9) Es kept fiil frooheet im himel wën sintiche layt sich peroye! Unser himlixe Fater Yeehoowa kriit tiise frooheet yeetes mool woo eene fon sayn ferloerne xeef tsurik tsu te kemaynt khomt. Wën mer triwer noo tenke iwer Yeehoowa sayn mitlayt, parmhërtslichkheet un unfertiint kuutheet, tuut unser liip tsu tëm wakse. (Luk. 1:78) (w24.08 s. 31 ap. 16-17)

Wën Yeesus kelos hët tas ti layt tëm kheenich mache teete, teet eyer sich mit te politik rin mexe. Yeesus is aleen tsum përich kang. Soo, opwool ti anere tëm tswinge wolte, hot eyer sich net in te politik rin kemext. Meyer lërne een wichtich lisyoon too temit. Kewis tuun ti layt uns nii ferlange ese torich een wuner fersoriche, ti kranke heele orer sayn kheenich wëre. Awer tii khene uns ferlange fer een persoon in te waal pay xteen, woo se tenke een kuute rechiirente wërt. Awer Yeesus sayn payxpiil is taytlich: tee hot sich net rin kemext in politixe sache. Xpeeter hot eyer soo kaar kesaat: “Mayn Raych is khee teel fon tiise welt.” (Yoo. 17:14; 18:36) Wii kriste, mise mer soo wii Yeesus tenke un sayn payxpiil noo mache. Meyer tuun Kot sayn Raych pay xteen un meyer peete un preetiche too triwer. (Mat. 6:10) (w24.12 s. 3-4 ap. 5-6)

Wëns tuu xtutiirst, suuch aate fer aan wëne was tuu lërnst. Tsum payxpiil, soo wii Yeehoowa, say kerecht un mach khee unerxiit tswixich ti layt. Mach aach Yeesus sayn liip tsu Yeehoowa un ti anere noo. Say wilich fer se layte weeche Yeehoowa sayn naame un helf tayn priiter, soo kaar wën tas xweyer is. Tuu khanst aach Yeesus noo mache wëns tuu preetiche keest. Soo khene ti layt aach ti xans kriin fer klaape uf tëm fray khaaf opfer tsayche. Woo mee mer iwer tas fray khaaf opfer lërne, woo kreeser wërt unser liip tsu Yeehoowa un Yeesus. Un wayl unser liip tsu tëne kreeser is, tuun se uns noch mee liipe. (Tya. 4:8) Soo, tuu kuut penutse was Yeehoowa uns fersoricht fer wayter iwer tas fray khaaf opfer lërne. (w25.01 s. 25 ap. 16-17)

Te tekst fon hayt khent soo iwersetst wëre: “Tuu host ale mayn sinte uf een plats kextelt woos tuu se net mee siin khanst”. Tas petayt tas Yeehoowa tuut ti sinte fon tëne woo sich peroye, wech xmayse un net mee kuke. Tiise wërter khente aach soo iwersetst sin: “Foer tich, es is wii wën mayn sinte nii pasiirt weyere.” Ti Piipel lost tiise phunkt noch taytlicher in een aner ferklaychung in Mikeyas 7:18, 19. Tiise wersikele saan tas Yeehoowa xmayst unser sinte in te tiife pletse fom meer. In te friirixe tsayte, etwas woo in te tiife pletse fom meer kefal is, khent nii mools noch mool kefun wëre. Torich tiise ferklaychunge, hon mer kelërnt tas Yeehoowa tuut unser sinte soo wayt wech fon uns xtele tas mer prayche uns net mee xultich xpiire. Yawool, tas is soo wii Tawi kesaat hot: “Froo sin tii woo sayn aktsyoone keeche tas kesets fertsayt kriin un woo sayne sinte ketekt kriin.” (Rom. 4:6, 7) Tas is ti woere fertsayung! (w25.02 s. 9 ap. 7-8)

Es is meechlich een paratiis hayt too uf te eyert fine! Tas is fol layt — milyoone layt — woo woere friit hon. Tiise layt wole nii fom paratiis raus keen un tii wole hon tas anere tsum paratiis khome. Iwer was sin mer am xpreche? Tas kaystlich paratiis. Satanaas sayn welt is fol has, xlechtichkheet un kefoore. Soo, es is een wuner tas Yeehoowa een kaystlich paratiis in kextelt hot, woo Sayn folek khan in friit un eenichkheet woone. (1 Yo. 5:19; Apo. 12:12) Unser liipliche Kot mërkt wii fiil xaate tiise welt fer ti layt macht un tee kept ti neetich sicherheet fer sayn tiiner tas se khene tëm wayter froo aan peete. Ti Piipel pexraypt tas kaystlich paratiis wii een “xuts” un “een kaate mit fiil waser”. (Isa. 4:6; 58:11) Mit Yeehoowa sayn seechen, khene tii woo in tiise paratiis leepe sich froo un kexitst xpiire in tiise xweyere letste taache. (Isa. 54:14; 2 Tim. 3:1) (w24.04 s. 20 ap. 1-2)

Kewis, wëns tuu tich hayrate wilst, host tuu xon too triwer kepeet. Sicher, Yeehoowa ferxprecht net tas sayn tiiner yemant fine tuun fer sich hayrate. Awer tee khimert sich mit tayn xpiirunge un neetichkheete, un tee khan tich helfe soo lang wiis tuu fersuuchst yemant fine. Soo, tuu wayter iwer tayn winxe un xpiirunge mit tëm fertseele. (Psal. 62:8) Ferlang ketult un kluucheet in kepeet. (Tya. 1:5) Soo kaar wëns tuu yemant net klaych finst, Yeehoowa ferxprecht wayter tayn fiisixe un emotsyonaale neetichkheete uf phase. (Psal. 55:22) Awer, phas uf: los net tas tiise sache tas haupste in tayn leepe wërt. (Fili. 1:10) Ti woere frooheet khomt fon een ticht fraayntxaft mit Yeehoowa hon, ekaal ep mer ferhayrat orer letich sin. (Mat. 5:3) Un wëns tuu letich pist, host tuu een kreeser frayheet fer mee fer Yeehoowa mache. (1 Kor. 7:32, 33) Penuts tiise tsayt in te pest aat wiis meechlich is. (w24.05 s. 21 ap. 4; s. 22 ap. 6)

Wii lang sol een pheyerche namoriire? Sich ayle fer ëntxlise mache, tuut ofts xlime konsekwënse pringe. (Xpr. 21:5) Tes weeche, solst tuu kenuuch tsayt hoole fer ti aner persoon kuut khëne lërne; awer tuu solst net lënger namoriire wiis neetich is. Ti Piipel saat: “Ti hofnung woo sich net klaych erfiilt, macht tas hërts krank.” (Xpr. 13:12) Wën mer een pheyerche khëne woo am namoriire is, wii khene mer se helfe? Meyer khene se in laate fer mit uns ese, ti familye aanpeetung mache orer xpas hon. (Rom. 12:13) Meyer khene se aach helfe wën mer uns aan piite fer mit tëne keen, in te khare mit tëne faare orer tëne in laate fer tsu unser haus khome tas se net aleen plaype. (Kal. 6:10) Un wën een pheyerche uns ferlangt fer tsayt mit tëne plaype? Wole mer tas siin wii een xeen oportuniteet fer tëne helfe. Es is woer tas mer uf phase mise fer tëne net kans aleen lose, awer meyer mise aach ti tsayte mërke woo se mise aleen fertseele. (w24.05 s. 30 ap. 13-14)

Ti elteste fersuuche raus fine was fer aktsyoone ti persoon tsu te sint kenom hon. Tsum payxpiil: weeche was is ti persoon sayn fraayntxaft mit Yeehoowa xweecher kep? Hot ti persoon noo kelos reeklich ti Piipel xtutiire orer tsu te preetich aarwayt keen? Hot se noo kelos tsu Yeehoowa imer peete? Hot se noo kelos keeche ti ferkheerte winxe khëmpfe? Mit weem tuut se tsayt fertraype? Was is sayn ferkniichung? Wii hon tiise ëntxlise sayn ketanke un winxe influentsiirt? Tuut ti persoon ferxteen wii sayn ëntxlise un aktsyoone sayn Fater Yeehoowa petrof hon? Ti elteste khene frooche fer ti persoon mache woo se helfe tuun se tenke iwer was fer tinge sayn fraayntxaft mit Yeehoowa xweecher kelos hon un se tsu te sint kenom hon. Tii mache tas mit kuutheet un tuun net perseenliche frooche mache iwer tinge woo se net wise prayche. (Xpr. 20:5) Tii khene aach ferklaychunge penutse. Tas khan ti persoon helfe iwer sayn aktsyoone tenke un aach iwer warom se tas ferkheertes kemacht hot. Fiilaycht torich tiise eyerst fersamlung, tuut ti persoon aan fange traurichkheet iwer sayn ëntxlise un aktsyoone tsayche. Khan sin tas se sich peroye tuut. (w24.08 s. 22 ap. 9-11)

Yeesus hot “ti kuute notisye iwer Kot sayn Raych” flaysich kepreeticht wayl eyer wust tas es waar ti aarwayt woo Kot wolt hon tas eyer mache solt. Fer Yeesus, preetiche waar tas haupste. Soo kaar in te letste moonate fon sayn leepe, “hot eyer ti layt in kelërnt fon xtat tsu xtat un altee tsu altee”. (Luk. 13:22) Tee hot aach mee tisipele keiipt fer ti kuute notisye preetiche. (Luk. 10:1) Hayt aach, ti kuute notisye preetiche is ti haupst aarwayt woo Yeehoowa un Yeesus wole hon tas mer mache. (Mat. 24:14; 28:19, 20) Meyer khene unser muut in te preetich ferxtërke wën mer ti layt siin soo wii Yeehoowa se siit. Tee wil hon tas soo fiil layt wiis meechlich is, ti kuute notisye heere un ti woerheet aan nëme fer keret wëre. (1 Tim. 2:3, 4) Too tefoer, tuut eyer uns iipe fer ti kuute notisye peser preetiche. Aach wën se net yets aan fange Kot tiine, im xtant kriin se ti xans fer tas mache foer tas ën fon te kroos tripulatsyoon. (w25.03 s. 15-16 ap. 5-7)

Yeete krist mus penutse was eyer fon te Piipel kelërnt hot fer se ëntxlise was eyer mache tuut iwer tii woo fon te kemaynt raus ketuun kep sin. Etliche khene ëntxlise ti persoon kriise orer wilkhome wën se tsu te fersamlung khomt. Awer meyer sole net lange kexpreeche orer keselxaft mit te persoon hon. Ti Piipel saat tas mer sole net pekriise etliche sintiche layt. Wën mer tas mache teete, weyere mer “mitxultich fon … sayn xlechte aarwayte”. (2 Yo. 9-11) Awer ti wersikele um tiise tekste rom tsayche tas se am xpreche sin iwer een aphostate orer yemant woo ti anere uf hetst tas ferkheertes mache. (Apo. 2:20) Tes weeche, wën yemant aphostate inlërnunge aus prayt orer een ferkheert aanxtelung uf hetst, tuun ti elteste tëm net pesuuche. Kewis es is noch meechlich tas ti persoon sich peroyt. Awer pis tas pasiirt, tuun mer se net ti tsayt piite orer tsu een fersamlung in laate. (w24.08 s. 30-31 ap. 14-15)

Noo tas Yeesus ese fer een folek kep hot, hot eyer sayn tisipele faart kexikt. Mim xif, wolte se tsurik tsu Kafarnaum keen. Yeesus is aleen tsum përich kang, wayl ti layt wolte tëm kheenich mache. (Yoo. 6:16-20) Soo lang wii ti aphostele im xif waare, hot een forx xtorm aan kefang. Kroose weele sin witich tas xif kextikt weeche te xtarke wint. Too is Yeesus pay tëne khom, ufm waser am laafe. Tee hot soo kaar te aphostel Pheeter in kelaat tas selwiche mache. (Mat. 14:22-31) Wii Yeesus im xif in kextii is, hot te wint sich peruycht. Ti tisipele hon sich ferwunert un kesaat: “Tuu pist wërklich Kot sayn Soon.” (Mat. 14:33) Es is interesant tas ti tisipele tas net kesaat hon noo tas Yeesus te wuner kemacht hot fer proot fersoriche. Mërk mool was Markus too triwer kexproch hot: “Wii [ti aphostele] tas kesiin hon, hon se sich ferxrok, wayl tii net ferxtan hon was tas wuner fom proot petayt hot.” (Mar. 6:50-52) Tii hon net ferxtan tas Yeehoowa Yeesus ti kraft kep hat fer fiil kreeser wunere mache wii aynfach proot fersoriche. (w24.12 s. 5 ap. 7)

Meyer khene tsayche wii fiil weyert meyer kepe fer Yeehoowa sayn liip wën mer ti woche foer un noo tëm Aantenke penutse fer se tsayche wii petanklich meyer weeche tas fray khaaf opfer sin. Meyer sole im Aantenke sin un anere in laate fer aach khome. Tuu aus leye fer tëne woos tuu in laatst was im Aantenke pasiirt. Es weyer kuut tëne tsayche ti wiiteos Fer was is Yeesus kextorep? un Tuu aan Yeesus sayn toot aan tenke. Ti elteste sole ti inatiiwe in laate. Xtel tich mool foer ti frooheet woos im himel un uf te eyert kept wën etliche fon Yeehoowa sayn ferloerne xeef tsurik khome! (Luk. 15:4-7) Im Aantenke, wole mer al pekriise, awer hauptseechlich tii woo nay sin orer woo een lang tsayt net mee tsu een fersamlung khome. Meyer wole hon tas se sich tehëm xpiire. (Rom. 12:13) (w25.01 s. 29 ap. 15)

Es is woer tas tas fray khaaf opfer helft uns ferxteen tas Yeehoowa kerecht is. Awer es helft uns hauptseechlich ferxteen wii tiif tëm sayn liip tsu uns is. (Yoo. 3:16; 1 Yo. 4:9, 10) Tas fray khaaf opfer lërnt uns in tas Yeehoowa wil net ploos hon tas mer fer imer leepe, awer aach tas mer teel fon sayn familye wëre. Tenk mool noo: wii Aatam kesint hot, khent eyer net mee teel fon Yeehoowa sayn familye wëre. Tes weeche, wii mer uf te welt khom sin, waare mer aach net teel fon Yeehoowa sayn familye. Awer weeche tas fray khaaf opfer, khene al ti mënxe woo aan Yeehoowa klaape un tëm foliche, eene taach teel fon sayn familye wëre. Xon yets, khene mer een ticht fraayntxaft mit Yeehoowa un unser priiter un xwestere hon. Yeehoowa tuut uns wërklich liipe! (Rom. 5:10, 11) (w25.01 s. 21 ap. 6)

Wayl tee uns fiil liipt, hot Yeehoowa uns een weyertlich kexenk kep: tee hot sayn Soon kexikt fer sayn leepe fer ti mënxe ap kepe. (Rom. 5:8; 2 Kor. 9:15) Wayl Yeesus tas kemacht hot, khanst tuu een ticht fraayntxaft mit Yeehoowa hon. Tuu host aach ti hofnung fer eewiche leepe kriin. Yawool, meyer hon fiile uersache fer petanklich tsu Yeehoowa sin. Fer uns helfe wayter petanklich sin un uns nii ferkese was Yeehoowa un Yeesus uns kemacht hon, hot Yeesus uns kexikt yeetes yoer tsum Aantenke fon sayn toot keen. (Luk. 22:19, 20) Tiise yoer tuut tas Aantenke pasiire am tunerstaach, 2^te april fon 2026. Kewis meyer al pleene tat sin. Es wërt kuut fer uns al sin tsayt hoole foer un noo tëm Aantenke fer triwer noo tenke aan was Yeehoowa un sayn Soon fer uns kemacht hon. (w25.01 s. 20 ap. 1-2)

Tuu khanst wayter lërne iwer ti liip woo Yeehoowa un Yeesus tsu uns hon wëns tuu wayter too triwer noo tenkst. Im xtant in te woche foer un noom Aantenke, khanst tuu eene orer mee Ewankeelye mit acht leese. Fersuuch net fiile kapitele uf een mool leese. Xtats tas, lees mit ketult un suuch anere uersache warom mer Yeehoowa un Yeesus liipe sole. Wëns tuu xon haufe yoore in te woerheet pist, fiilaycht tuust tuu tich frooe ep es noch naye tinge sin woos tuu lërne khanst iwer Yeehoowa sayn kerechtichkheet, liip un tas fray khaaf opfer. In woerheet, kepts imer naye tinge fer se lërne iwer tiise un anere sache. Soo, lees un xtutiir ti xeene informatsyoone in unser puplikatsyoone. (w25.01 s. 24-25 ap. 13-15)