Maay

Noo tas Yeehoowa sayn folek fon te sklaaweray im Ejipt pefrayt hot, hot eyer priister in kextelt fer im tapernakel tiine. Un Tee hot ti lewiiter in kextelt fer anere flichte im tapernakel uf phase. Hot Yeehoowa peser uf kephast tii woo im tapernakel ketiint hon orer tat ticht keleept hon? Nee! Yeehoowa hoolt khee sayt raus. Yeete israeliiter khont een ticht fraayntxaft mit Yeehoowa hon. Tsum payxpiil: Yeehoowa hot sich sicher kelos tas ti kans natsyoon khont te wolk un fayer phoste siin woo iwer te tapernakel waar. (Eeks. 40:38) Wën tas wolk aan kefang hot tsu een naye plats keen, khont tas kanse folek tas siin, soo kaar tii woo wayt wech fom tapernakel akampiirt waare. Soo, khonte se sayn tinge samele, sayn parake tsu xpane un mit tëm rest fom folek keen. (Nuu. 9:15-23) Kraat soo hayt, ekaal tas lant woo mer leepe, khene mer xpiire tas Yeehoowa uns liipt, uf phast un xitst. (w24.06 s. 4 ap. 10-12)

Tawi sayn soon, Apsaloon, waar pextimt Tawi um pringe un kheenich uf sayn plats wëre. (2 Sam. 15:12, 13) Tes weeche must Tawi fiks fon Yeruusalem ap haue. Wii sayn tiiner am aus rayse waare, hot Tawi kemërkt tas yemant must in Yeruusalem plaype fer mee informatsyoone kriin iwer Apsaloon sayn pleen. Tes weeche hot Tawi Satok un anere priister tsurik tsu te xtat kexikt tas se khente tëm imer informatsyoone xike. (2 Sam. 15:27-29) Awer tii miste fiil uf phase. Tawi hat een plaan un tee hot ti hilef fon sayn troye fraaynte Satok un Husay ferlangt fer tas fërtich pringe. (2 Sam. 15:32-37) Husay must sich ferxtele wii wën eyer Apsaloon pay kextan hët un tëm aanreete kepe iwer wii Tawi atakiire. Soo teet Tawi tsayt kriin fer sich fer een atak foer perayte. Noo heyer, hot Husay mit Apyatar un Satok kexproch iwer was pasiirt is un ti 2 mëner muste sich sicher lose tas Tawi ti informatsyoone kreecht. (2 Sam. 17:8-16) Tas waar wichtich fer Tawi sayn leepe xitse. (2 Sam. 17:21, 22) (w24.07 s. 4-5 ap. 9-10)

Etliche fon Yeehoowa sayn tiiner tuun sich noch unruych xpiire weeche ti sinte woo se friier kemacht hon — foer orer noo sayn taaf. Awer meyer sole uns erinere tas Yeehoowa uns tas fray khaaf opfer kep hot weeche sayn tiif liip tsu uns. Un kewis wil eyer hon tas mer sayn kexenk aan nëme. Yeehoowa lost uns sicher tas wën mer ‘ti sache mit tëm in te ray tuun’, tuut eyer uns kans fertsaye. Meyer sin aarich petanklich tas unser liipliche Fater ferkest sich fon te sinte woo mer friier kemacht hon! In te selwich tsayt, tuut eyer sich imer traan tenke fom kuutes woo mer kemacht hon. (Psal. 103:9, 12; Hep. 6:10) Wëns tuu tich unruych xpiirst weeche was tuu friier kemacht host, xtreng tich aan fer tich konsentriire aan was tuu yets un im futuer mache khanst. Tuu khanst net ënere was xon pasiirt is, awer tuu khanst Yeehoowa hayt loope un kefale. Un tuu khanst iwer te wunerlich futuer woo eyer tich ferxproch hot, tenke. (w24.10 s. 8 ap. 8-9)

Wiis tuu ti Piipel leest, khan sin tas tuu siist soo fiile tinge woos tuu tich ferpesere khanst tas tuu oone muut wërst. Tsum payxpiil: wole mer saan tas hayt tuut tayn Piipel leesung tsayche tas mer sole net een persoon peser wii ti anere pehantele. (Tya. 2:1-8) Tuu mërkst tas tuu ënerunge too triwer mache khanst. Tas is yets tayn tsiil. Te taach truf, leest tuu etliche wersikele woo tsayche tas mer mise unser wërter uf phase. (Tya. 3:1-12) Tuu mërkst tas tuu als mool was kropes orer nekatiiwes kesaat host. Soo tuu ëntxlist ufmuuticher sin wëns tuu mit te anere fertseelst. Te neekste taach, tuut tayn Piipel leesung tsayche tas mer sole net fraaynte fon te welt sin. (Tya. 4:4-12) Tuu mërkst tas tuu must peser uf phase mit tayn ferkniichunge. Im 4^te taach, fiilaycht tuust tuu xpiire tas es tsu xweyer is tas ales mache. Playp net oone muut. Ferkes tich net tas “ti nay personaliteet” aan tsiie, is etwas woo mer wayter mache mise. (w24.09 s. 5-6 ap. 11-12)

Yeesus wust tas Yeehoowa sayn situatsyoon peopacht hot un tee hot ketraut tas Kot ti kans unkerechtichkheet in te richtich tsayt tsum ën pringe teet. Wën yemant uns unkerecht pehantelt, khene mer soo wii Yeesus, kontroliire was mer saan. Wën es was kleenes is, fiilaycht khene mer es soo lose. Orer khan sin tas mer raus suuche niks saan wën unser wërter ti tinge noch xlimer lose teete. (Ekl. 3:7; Tya. 1:19, 20) In anere situatsyoone, fiilaycht mise mer etwas saan; tsum payxpiil: wën mer mërke tas yemant unkerecht pehantelt is orer wën mer ti woerheet xitse mise. (Aph. 6:1, 2) Wën mer xpreche, mise mer uns aan xtrenge fer tas mit respekt un tsaamheet mache. Meyer khene aach Yeesus noo mache wën mer traue uf “Tee woo mit kerechtichkheet richt”. (1 Phe. 2:23) (w24.11 s. 5-6 ap. 10-12)

Es lost uns aarich froo wën een sintiche persoon sich peroyt! (Luk. 15:7) Opwool ti elteste sich fiil too traan aan xtrenge, weer tuut ti persoon wërklich helfe sich ënere? Eriner tich was te aphostel Phaul kexrip hot iwer tii woo een sint mache: “Fiilaycht lost Kot tas se sich peroye.” (2 Tim. 2:25) Soo, es is Yeehoowa, net een mënx, woo een krist helft sayn ketanke un aanxtelung ënere. Phaul leet aus ti kuute tinge woo pasiire noo tas een persoon sich peroyt: tii khan een kenauer khëntnis fon te woerheet kriin, aan sich khome un fom Taywel sayn fale aus rayse. (2 Tim. 2:26) Wën yemant sich peroyt, tuun ti elteste tëm wayter pesuuche. Tii tuun tëm helfe sayn klaape ferxtërke, wayter khëmpfe keeche Satanaas sayn fersuuchunge un mache was richtich is. (Hep. 12:12, 13) (w24.08 s. 23 ap. 14-15)

Ti layt woo Yeesus fersoricht hot, hon sich traan kehal aan sayn fisixe neetichkheete un winxe erfiile. Wii soo? Te neekste taach, hon se kesiin tas Yeesus un sayn aphostele faart kang sin. Etliche xif sin fon Tiperias khom. Soo sin ti layt in kextii un tsu Kafarnaum kang, fer Yeesus trefe. (Yoo. 6:22-24) Was wolte se? Mee iwer tas Raych lërne? Nee. Tii wolte hauptseechlich mee proot kriin. Wii wise mer tas? Mërk mool was pasiirt is wii ti layt Yeesus kefun hon ticht pay Kafarnaum. Yeesus hot taytlich kesaat tas se tëm trefe khom sin ploos wayl se wolte mee ese kriin. Awer opwool se sich “sat fon proot kes [hon]”, waar tas een “ese woo fertërpt”. Tee hot se uf kemuut fer tas ese xafe woo sayn Fater fersoriche teet un “woo halt un woo tsum eewiche leepe nëmt”. (Yoo. 6:26, 27) (w24.12 s. 5 ap. 8-9)

Pruuter, fer eene kuute leerer sin, say tich sicher tas tayn inlërnung un aanreete imer mit te Piipel xtime. Tuu ti Piipel un unser puplikatsyoone kuut xtutiire. (Xpr. 15:28) Soo lang wiis tuu tas machst, mërk wii unser puplikatsyoone ti tekste aus leye. Soo tuust tuu ti tekste in te richtich aat penutse. Un wëns tuu in lërnst, xtreng tich aan fer ti hërtse fon tëne woo tich horiche, aan krayfe. Fer een peser leerer wëre, ferlang un kep acht tsu te aanreete woo speryente elteste tich kepe. (1 Tim. 5:17) Ti elteste sole sayn priiter un xwestere uf muute. Awer als mool wërt es neetich tas ti elteste yemant xtark aan reete. Noch soo, mise se tas imer mit kuutheet mache. Wëns tuu imer liiplich pist un tayn inlërnung uf te Piipel xtaypst, wërst tuu een kuute leerer, wayls tuu Yeesus, te Kroose Leerer, noo machst. (Mat. 11:28-30; 2 Tim. 2:24) (w24.11 s. 24 ap. 16)

Meyer khene Yeehoowa eere torich was mer iwer tëm saan. Yeehoowa sayn folek is uf kemuut tsu Tëm singe, sayn naame loope, ti kuute notisye fon sayn retung aus xpreche un sayn eer fer ti natsyoone pekhant mache. (Psal. 96:1-3) Tas sin aate wii mer khene Yeehoowa eere. (Aph. 4:29) Meyer khene Yeehoowa aach eere mit unser materyaalixe tinge. Kot sayn woere aanpeeter hon tëm imer soo keert. (Xpr. 3:9) Ti israeliiter, tsum payxpiil, hon kontripuytsyoone kemacht fer te thempel paue un uf phase. (2 Khe. 12:4, 5; 1 Kro. 29:3-9) Etliche fon Yeesus sayn tisipele hon fon “sayn aychne tinge” kep soo tas Yeesus un ti aphostele tas neetiches hëte. (Luk. 8:1-3) Un ti Piipel saat tas, wii etliche priiter kelit hon weeche een hungernoot, hon priiter fon anere pletse tëne kelt kexikt. (Aph. 11:27-29) Hayt khene mer aach Yeehoowa eere torich unser fraywiliche kontripuytsyoone. (w25.01 s. 3 ap. 8; s. 4 ap. 11)

Was hot Kornëlyus keholef sich taafe lose? Ti Piipel saat tas Kornëlyus “un ale in sayn haus hon Kot tiif respektiirt”. Un Kornëlyus hot noo un noo tsu Kot aan kehal. (Aph. 10:2) Wii Pheeter tëm ti kuute notisye kepreeticht hot, hon Kornëlyus un sayn familye aan Yeesus keklaapt un sich klaych taafe kelos. (Aph. 10:47, 48) Sicher waar Kornëlyus wilich fer ti neetiche ënerunge mache fer Yeehoowa mit sayn familye aan peete. (Yos. 24:15; Aph. 10:24, 33) Kornëlyus khent kelos hon tas sayn wichtich xtel tëm um hale teet een krist wëre. Awer tee hot net erlaupt tas soo was pasiire teet. Must tuu kroose ënerunge in tayn leepe mache fer tich taafe lose? Wën yaa, Yeehoowa selepst wërt tayn Helfer sin. Wëns tuu pextimt pist Yeehoowa tiine tëm noo ti piiplixe funtamente, tuut eyer tich seechne. (w25.03 s. 5 ap. 12-13)

Wëns tuu nekatiiwe kexichte heerst iwer ti Orkanisatsyoon orer iwer ti priiter woo ti kemaynt fiire, eriner tich wii Kot sayn faynte Yeesus un ti eyerste kriste pehantelt hon. Yeesus hot foer raus kesaat tas ti layt teete sich keeche Kot sayn tiiner xtele un liie iwer tëne fertseele un tas tuut kenau soo hayt pasiire. (Mat. 5:11, 12) Ti falxe kexichte tuun uns net hinerkeen wën mer ferxteen weer too hiner traan is un etwas klaych mache fer uns xitse. Wii khene mer uns xitse? Xtos ti falxe kexichte ap. Te aphostel Phaul hot taytlich kelos was mer mache sole wën mer falxe kexichte heere. Tee hot fer Timoteus kesaat tas eyer solt ‘etliche persoone xike net acht kepe fer falxe kexichte’ un “ti falxe kexichte woo keen keeche was haylich is”, ap xtose. (1 Tim. 1:3, 4) Xtats acht kepe fer ti falxe kexichte woo fom Taywel khome, hale mer uns traan aan te “nutsliche wërter” fon te woerheet. (2 Tim. 1:13) (w24.04 s. 11 ap. 16; s. 13 ap. 17)

Playp eenich mit tëne woo leaal tsu Yeehoowa sin. Yeehoowa wil hon tas mer eenich sin in unser aanpeetung tsu tëm. Meyer tuun eenich plaype soo lang wii mer uns aan te woerheet hale. Tii woo ti informatsyoone aus teele woo net mit te woerheet xtime, tuun ti kemaynt teele. Tes weeche, saat uns Yeehoowa: “Halt aych fon tëne wech”; wën net, khente mer uns fon te woerheet ap lenke. (Rom. 16:17) Wën mer ti woerheet erkhëne un uns fest too traan hale, plaype mer ticht pay Yeehoowa un hale mer unser klaape xtark. (Ëfe. 4:15, 16) Meyer wëre net hinerkang fon Satanaas sayn falxe inlërnunge un informatsyoone. Un torich ti kroos tripulatsyoon, tuun mer in sicherheet plaype, wayl Yeehoowa uns uf phast. Hal tich wayter aan was woer is un “te Kot fon friit wërt mit [tich] sin”. (Fili. 4:8, 9) (w24.07 s. 13 ap. 16-17)

Yeesus hot sich hauptseechlich traan kehal aan te layt woo sich iwerlaat kexpiirt hon weeche sayn sinte. Tee hot se in kelaat sayn nookeener wëre. Tee wust tas ti sint is hinich al ti xwiirichkheete woo ti mënxe layte. Tes weeche hot eyer mëner un fraae keholef woo wii sintiche layt pekhant waare. Tee hot tas mit een ferklaychung aus keleet: “Ti kesunte mënxe prayche khee tokter, awer ti kranke, yaa.” Tan hot eyer kesaat: “Ich sin net ti kerechte ruufe khom, awer ti sinter.” (Mat. 9:12, 13) Yeesus hot kraat tas kemacht. Tsum payxpiil, wii een fraa tëm sayn fiis mit treene kewext hot, hot eyer liiplich mit tëne kexproch un sayn sinte fertsayt. (Luk. 7:37-50) Yeesus hot wichtiche woerheete fer ti samaritaanix fraa in kelërnt, opwool eyer wust tas se een imoraalixe leepe hat. (Yoo. 4:7, 17-19, 25, 26) Weeche ti sint, khomt te toot; awer Kot hot Yeesus soo kaar ti kraft kep fer mëner, fraae un khiner fom toot uf ruufe. (Mat. 11:5) (w24.08 s. 4 ap. 9-10)

Yeehoowa tuut sayn naame im futuer eere, wën eyer kerechtichkheet pringt. Weeche ti xlime aktsyoone un xrekliche liie fon te falxe relichyoone, tuut Kot klaych Papiloon ti Kroos fernichte. (Apo. 17:5, 16; 19:1, 2) Fiilaycht etliche woo tas siin, ëntxlise aan fange Yeehoowa mit uns aan peete. Tsum xlus, im Armaxeton, tuut Yeehoowa Satanaas sayn kanse sisteem fernichte. Ale layt woo sich keeche Yeehoowa xtele un liie iwer tëm fertseele, wëre fernicht. Awer Yeehoowa tuut rete ale woo tëm liipe, foliche un eere. (Mar. 8:38; 2 The. 1:6-10) Noo te letste proop, am ën fon Yeesus Kristus sayn Tausent Yoore Rechiirung, wërt Yeehoowa xon pewayst hon tas eyer fertiint aanpeetung kriin. (Apo. 20:7-10) In tiise tsayt, “wërt [ti eyert] fol mit te khëntnis iwer Yeehoowa sayn hërlichkheet, soo wii tas waser tas meer tekt”. (Hap. 2:14) Es wërt een xeen tsayt sin wën al Yeehoowa loope tuun soo wii eyer es fertiint. (w25.01 s. 6-7 ap. 15-16)

Was teet ti hepreeyxe kriste helfe ti yachtung aus hale? Te aphostel Phaul wolt hon tas se mërke teete ti nutse woo mer kriin wën mer ti proope aus hale. Tee hot aus keleet tas, wën ti kriste proope mit mache, khan Kot tas penutse fer tëne iipe. Tii khene kwaliteete woo Kot kefale, ëntwikele orer ferpesere. Es weyer laychter fer ti hepreeyxe kriste ti proope aus hale wën se sich traan hale teete aan te resultaate fon te proope. (Hep. 12:11) Phaul hot ti hepreeyxe kriste uf kemuut koraajix sin un net uf kepe foer ti proope. Te aphostel Phaul khont kuute aanreete kepe iwer wii ti yachtung aus hale. Eep eyer een krist kep is, hot Phaul ti kriste keyacht un tee hot kesiin wii krop se pehantelt waare. Tee wust aach wii aus hale, wayl tee selepst hot fiile sorte opositsyoon mit kemacht noo eyer een krist kep is. (2 Kor. 11:23-25) (w24.09 s. 12 ap. 16-17)

Yeete taach, wërts wichticher se preetiche. Warom? Wayl es feelt ploos noch een kleen pisye tsayt fer tas ën khome. Tenk aan was Yeesus iwer ti preetich aarwayt in te letste taache foer raus kesaat hot, tëm noo was in Markus 13:10 xteet. Tëm noo Matheus sayn Ewankeelyum, hot Yeesus kesaat tas ti kuute notisye teete uf te kans pewoont eyert kepreeticht wëre eep “tas ën” khemt. (Mat. 24:14) “Tas ën” petayt ti komplët fernichtung fon Satanaas sayn xlechte welt. Yeehoowa hot xon “te taach un ti xtun” pextimt fer ti ewënte woo klaych pasiire. (Mat. 24:36; Aph. 1:7) Tiise taach is yeete xtun tichter. (Rom. 13:11) Foerlaywich, mise mer wayter preetiche. Too is een wichtich frooch woo meyer al uns mache wole: Warom tuun mer ti kuute notisye preetiche? In khortse wërter, weeche liip. Wën mer preetiche, tsayche mer unser liip tsu te kuute notisye, tsu te layt un hauptseechlich tsu Yeehoowa un sayn naame. (w24.05 s. 14-15 ap. 2-3)

Eltere, tuut ayre khiner uf muute iwer ti natuer tenke. Wën teyer uf te kolonii laaft orer in een kaate xaft, helft ayre khiner ti interesante mustere siin woo noo un noo in te natuer foer khome. Tiise mustere tsayche tas yemant kluuch es kepleent hot. Tsum payxpiil, in te natuer sin fiile tinge wii een spiraal kemustert un ti syentiste tuun tas xon fiile yoore xtutiire. Een syentist, woo Nicola Fameli heest, saat tas wëns tuu tseelst ti numer spiraale in etwas in te natuer, tuust tuu imer ti selwich sekwëns fon numere fine. Tiise numere sin kenënt wii sekwëns fon Fibonacci. Meyer khene spiraale in fiile tinge siin, soo wii in etliche kalaksye, in te xnek hayser, in te pleter fon te plantse un in te sunepluum. (w24.12 s. 16 ap. 7)

Mooses, Tawi un Yoohan hon fiile yoore tsurik keleept. Sayn leepe waar fiil anerste wii unseres. Awer es kept fiile eenlichkheete tswixich tii un meyer. Soo wii meyer, hon se te woere Kot ketiint, tsu tëm kepeet un uf tëm ketraut fer hilef un aanreete kriin. Un soo wii tiise mëner, klaape mer tas Yeehoowa seechent tii woo tëm aan heere. Soo wole mer ti aanreete fon tiise elter mëner noo keen un Yeehoowa sayn kesetse aan heere. Wën mer folich sin, tuut Kot uns seechne un helfe. Meyer tuun “een lang tsayt leepe”, yaa, fer imer! Meyer wëre aach froo wayl mer unser liipliche Fater im himel kefale, woo uns peser peloone khan wii meyer uns foer xtele khene! (Ëfe. 3:20) (w24.11 s. 13 ap. 20-21)

Im eyerste yoer hunert, waare etliche priiter wii ministeryaale tiiner in kesetst. (1 Tim. 3:8) Siits aus tas se kexaft hon “fer hilef kepe”, soo wii te aphostel Phaul kexrip hot. Ti ministeryaale tiiner hon een wichtich un praktix aarwayt kemacht; soo khonte ti elteste sich traan hale aan te aarwayt fer ti priiter in lërne un uf phase. Tsum payxpiil, fiilaycht hon ti ministeryaale tiiner keholef kopye fon te Xrifte mache orer ti neetiche materyaale khaafe fer tas mache. Mërk mool etliche fon te wichtiche tinge woo ti ministeryaale tiiner in tayn kemaynt mache. (1 Phe. 4:10) Tii khene in kesetst wëre fer ti rechnunge orer teritoorye fon te kemaynt uf phase, puplikatsyoone pextele, te autyo un wiiteo ekipamënt hantele, wii intikatoore tiine orer helfe te Raych Saal in te ray lose. Soo khan ales in te kemaynt richtich pariire. (1 Kor. 14:40) (w24.10 s. 19 ap. 4-5)

Meyer khene kwalkee proop aus hale — ti kleene un ti kroose — wën mer uns traan tenke tas Yeehoowa leept un tas eyer fërtich fer uns helfe is. Tee is te Ale Mechtiche Kot un tee khan uns ti kraft fer aus hale kepe. Tes weeche, khene mer ti sicherheet hon tas mer ti proope aus hale khene. Wën mer Yeehoowa sayn hilef mërke in te kleene proope, kriin mer ti sicherheet tas eyer uns aach helfe tuut in te kroose proope. Kuk mool 2 situatsyoone woo Tawi sayn fertraung uf Yeehoowa ferxtërkt hon. Wii eyer een yunge xeefer waar un te trop xeef fon sayn papa uf kephast hot, hon een leep un, een aner mool, een pëer een xoof fom trop wech kefang. In tiise 2 situatsyoone hot Tawi mit koraaj ti wilte tiere noo keyacht un ti xeef keret. Awer Tawi hot net ketenkt tas eyer tas aleen kemacht kriit hat: tee wust tas Yeehoowa too hiner traan waar. (1 Sam. 17:34-37) Wayl Tawi sich too traan ketenkt hot, hot eyer ti sicherheet kriit tas te lepeentiche Kot tëm aach im futuer ferxtërke teet. (w24.06 s. 21 ap. 5-6)

Xtel tich mool foer tas tuu tsu een festche in kelaat pist. Solst tuu keen orer net? Wëns tuu net khënst ti persoon woo tas festche orkanisiirt un weest net was kepleent kep is, must tuu tëne soo sorte frooche mache: “Woo un wanee tuut tas festche pasiire? Wii fiil layt khome? Weer hot ti flicht fer tas festche uf phase? Weer keet? Was fer aktiwiteete sin kepleent kep? Wëre alkohoolixe ketrenk petiint?” Ti antworte fer tiise frooche tuun tich helfe een kluuch ëntxlus mache. Tan, noo te informatsyoone samele, tenk iwer ti kans situatsyoon. Tsum payxpiil: un wëns tuu tsum wise kriist tas etliche woo tsum festche keen, net Yeehoowa sayn kesetse foliche? Orer tas nimant kontroliire tuut wii fiil alkohoolixe ketrenk petiint wëre? Meecht tas meechlich sin tas tiise festche ausm kontrol keet? (1 Phe. 4:3) Wëns tuu iwer ti kanse kleenichkheete tenkst, wërts laychter een kluuch ëntxlus mache. (w25.01 s. 15 ap. 4-5)

Torich tas fray khaaf opfer khan Yeehoowa ti sinte fon tëne woo sich peroye, aus wixe. Kot penutst ferklaychunge fer uns helfe tas ferxteen. Es is aarich xweyer een roote flek fon een xtof ap wexe. Awer Yeehoowa penutst tiise ferklaychung fer uns tsayche tas unser sinte soo komplët ap kewext wëre, tas mer se net mee siin khene. Ti sinte sin aach mit xulte ferklaycht. (Mat. 6:12; Luk. 11:4) Soo, yeetes mool woo mer keeche Yeehoowa sinte, es is wii wën unser xulte kreeser weyer. Sicher is unser xulte mechtich kroos! Awer wën Yeehoowa unser sinte fertsayt, es is wii wën eyer unser xulte kanseliire teet. Tee ferlangt net tas mer noch mool “petsaale” ti sinte woo xon fertsayt kep sin. Soo wii een persoon froo wërt wën sayn xulte kanseliirt sin, soo wëre mer aach mechtich froo wën Yeehoowa unser sinte fertsayt. (w25.02 s. 10 ap. 9-10)

Wën ti eltere alt wëre, fiilaycht es is neetich tas sayn khiner tëne mit kelt un anere tinge fersoriche un fiile khiner mache tas mit frooheet. (1 Tim. 5:4) Awer ti eltere woo uf Yeehoowa traue, ferxteen tas se frooer wëre wën se sayn khiner helfe Yeehoowa tiine, net wën se khiner tsiie mim opjetiiw fer tëne im futuer fersoriche. (3 Yo. 4) Torich tayn payxpiil, lërn tayn khiner in uf Yeehoowa traue soo lang wiis tuu tëne foer peraytst fer sich selepst fersoriche. Soo lang wii se noch yung sin, tsaych tas xtram xafe, was kuutes is. (Xpr. 29:21; Ëfe. 4:28) Wii se am wakse sin, helf tëne sayn pestes in te xuul mache. Ti eltere khene unersuuchung mache fer piiplixe funtamente fine un tan sayn khiner helfe kluuche ëntxlise iwer xuul mache. Ti eltere sayn tsiil is sayn khiner helfe sich selepst fersoriche un mee tsayt hon fer se preetiche, fiilaycht soo kaar wii pyoneere. (w25.03 s. 30-31 ap. 15-16)

In Isayas 65, fine mer Yeehoowa sayn pexraypung fom kaystlich paratiis. Tiise profetsii hot sich eyerst erfiilt in 537 F.K. In tiise tsayt, waare ti yuute woo sich peroyt hate, fon Papiloon pefrayt un tii khonte tsurik tsu sayn haymat lant keen. Yeruusalem un sayn thempel waare fernicht, awer Yeehoowa hot sayn folek keseechent un tëne keholef ti xtat noch mool xeen lose un te thempel wiiter penutse wii tas haupste plats fer Yeehoowa aan peete in Israël. (Isa. 51:11; Sak. 8:3) Een tsweete erfiilung fon Isayas sayn profetsii hot aan kefang in 1919 N.K. In tiise tsayt, sin Yeehoowa sayn tiiner fray kemacht kep fon Papiloon ti Kroos, woo al ti falxe relichyoone petayt. Tan hot tas kaystlich paratiis aan kefang sich ferkreese torich ti kans eyert. Flaysiche preeticher fom Raych hon fiile kemaynte uf kemacht un kristliche kwaliteete ketsaycht. Mëner un fraae woo friier wyolënt un imoraal waare, hon ti “nay personaliteet [aan ketsoo], woo tëm noo Kot sayn wile kemacht kep is”. (w24.04 s. 20-21 ap. 3-4)

In etliche lënter, is es keweent tas ti eltere orer een aner folyeeriche mënx een man orer fraa fer sayn letiche parente raus suuche. In anere lënter, is es keweent tas ti familye un fraaynte yemant fer een letich persoon fine un tan orkanisiire tas te man un ti fraa sich trefe fer se siin ep se aan fange tuun namoriire orer net. Wën es tich ferlangt wërt soo was orkanisiire, tenk aan was ti tswaay kërn hon un prayche. Wëns tuu tenkst tas een persoon een kuute man orer fraa fer een parent orer fraaynt wëre khent, fersuuch ti persoon sayn kwaliteete kuut khëne lërne, un tas haupste: sii ep se een kuut fraayntxaft mit Yeehoowa hot. Een ticht fraayntxaft mit Yeehoowa is fiil wichticher wii kelt, xuul orer een important xtel hon. Awer ferkes tich net tas weer ëntxlise tuut ep se sich hayrate tuun orer net, sin ti letiche pruuter un xwester. (w24.05 s. 23 ap. 11)

Meyer khene een pheyerche woo am namoriire is, helfe torich was mer saan un net saan. Als mool, mise mer uns selepst kontroliire. (Xpr. 12:18) Tsum payxpiil, fiilaycht wole mer fer ti anere saan tas een pheyerche aan kefang hot se namoriire. Awer khan sin tas tas pheyerche wil tas selepst fer ti anere pekhant mache. Meyer sole net kwatxe iwer een pheyerche woo am namoriire is orer tëne kritikiire weeche perseenliche sache. (Xpr. 20:19; Rom. 14:10; 1 The. 4:11) Meyer sole aach niks saan orer frooe woo khent mache tas een pheyerche sich ketswung xpiirt fer sich hayrate. Un wën een pheyerche ëntxlist aus naner keen? Meyer sole net perseenliche frooche mache orer eene fon tëne ti xult kepe. (1 Phe. 4:15) Wën een pheyerche ëntxlist aus naner keen, sole mer net rechne tas se een xlecht ëntxlus kemacht hon. Ofts, es tsaycht tas ti tsayt woo se namoriirt hon, hot sayn opjetiiw erfiilt: tëne helfe een kluuch ëntxlus mache. Noch soo, tiise ëntxlus mache waar net laycht un tas pheyerche is sicher traurich kep. Tes weeche is es wichtich aate suuche fer tëne helfe. (w24.05 s. 31 ap. 15-16)

Eene fon te xweyerste proope woo mer mit mache khene, is wën een parent orer ticht fraaynt Yeehoowa im xtich lost. (Psal. 78:40) Woo xtërker unser liip tsu te persoon is, woo xweyer wërts fer uns sin ti situatsyoon aus hale. Wëns tuu soo een sort situatsyoon xon mit kemacht host, Satok sayn payxpiil fon troyheet khan tich ferxtërke. Tee is troy tsu Yeehoowa keplip, soo kaar wii sayn fraaynt Apyatar raus kesuucht hot untroy sin. Tas is pasiirt wii Tawi sayn toot ticht waar. Sayn soon Atoniias fersuucht hot sich kheenich mache uf Tawi sayn plats — opwool Yeehoowa Salomon raus kesuucht hat fer te neekste kheenich wëre. (1 Kro. 22:9, 10) Apyatar hot ëntxlist Atoniias pay xteen. (1 Khe. 1:5-8) Soo khene mer saan tas eyer net ploos untroy tsu Tawi un Satok waar, awer aach tsu Yeehoowa. Torich mee wii 40 yoore hon Satok un Apyatar mitsamer wii priister kexaft. (2 Sam. 8:17; 15:29; 19:11-14) (w24.07 s. 6 ap. 14-15)

Meyer khene uns sicher sin tas wayter keeche ti fersuuchung khëmpfe, tuut sich loone. Wën mer een sint mache, khene mer fiilaycht, “torich een tsayt een kuut leepe hon”. Awer, wën mer Yeehoowa sayn kesetse foliche, wëre mer noch frooer. (Hep. 11:25; Psal. 19:8) Tas pasiirt wayl mer kemacht kep sin fer Tëm foliche. (Xee. 1:27) Wën unser aktsyoone Yeehoowa kefale, kriin mer een sauwer kewise un ti xans fer eewiche leepe kriin. (1 Tim. 6:12; 2 Tim. 1:3; Yuu. 20, 21) Es is woer tas ‘tas flayx xwach is’. (Mat. 26:41) Awer, es wil net saan tas mer kaar niks keeche unser xwacheete mache khene. Yeehoowa is fërtich fer uns ti neetich kraft kepe. (2 Kor. 4:7) Awer, mërk mool tas Yeehoowa kept uns iwermeesich kraft. Meyer mise unser moos kraft kepe, es wil saan, uns aan xtrenge yeete taach fer keeche ti fersuuchung khëmpfe. Yeehoowa tuut unser kepeete antworte un uns mee kraft kepe wëns neetich is. (1 Kor. 10:13) Yawool, mit Yeehoowa sayn hilef, khene mer uns wayter keeche ti fersuuchung xitse. (w24.07 s. 19 ap. 19-21)

Te aphostel Phaul hot fer Timoteus, een aner elteste, kesaat tas eyer solt tii woo kesint hon, foer al ti peopachter tisipliniire. Phaul wolt net saan tas ti kans kemaynt imer teel fon te “peopachter” waar. Xtats tas, waar tee am xpreche iwer ti phaar layt woo xon iwer ti sint wuste. Im xtant, hon se etwas kesiin; orer khan sin tas ti persoon woo kesint hot mit tëne too triwer kexproch hot. Ti elteste tuun ploos fer tiise layt saan tas ti sintiche persoon tisipliniirt kep is. Als mool, fiile in te kemaynt xon wise tas yemant een xweyer sint kemacht hot; orer tuun se tas tsiimlich sicher tsum wise kriin. In soo een sort situatsyoon, weyer ti kans kemaynt in te “peopachter” tepay. Tes weeche sol een elteste fer ti kemaynt pekhant mache tas te pruuter orer ti xwester tisipliniirt kep is. Warom? Phaul kept ti antwort: “Tas ti anere soo awisiirt wëre” fer net een xweyer sint mache. (w24.08 s. 24 ap. 16-17)

Meyer mise fiil se tuun hon in Yeehoowa sayn aarwayt pis tas ën. Ti kesalpte mise sich wachsam hale tas Yeesus se mit nëmt fer sayn himlix peloonung kriin. (Mat. 24:40) Tii tuun hërtslich waarte ti tsayt wën se mit Yeesus im himel “fersamelt wëre”. Noom Armaxeton kriich, wëre se Yeesus sayn praut in te hayrat fom Lam. (2 The. 2:1) Yeesus sayn kericht khomt klaych, awer mer prayche khee pang hon. Wën mer uns troy hale, tuut unser liipliche Fater im himel uns ti “iwermeesich kraft” kepe tas mer “foer te Mënxe Soon xteen plaype [khene]”. (2 Kor. 4:7; Luk. 21:36) Ekaal op mer hofe im himel orer uf te eyert leepe, wën mer aan heere was Yeesus uns aan kesaat hot, tuun mer Yeehoowa kefale. Un weeche Yeehoowa sayn unfertiint kuutheet, wëre unser naame im puuch fom leepe kehal. (Tan. 12:1; Apo. 3:5) (w24.09 s. 24-25 ap. 19-20)

Wii khanst tuu mit tayn nekatiiwe xpiirunge um keen? Tenk tich traan ti kuute tinge woos tuu host, too tepay Yeehoowa sayn seechen. Un ferkes tich net tas tii woo Yeehoowa net tiine, hon tas net. Fer ti meyerste layt woo Yeehoowa net tiine, een kuute aarwayt hon is tas haupste, wayl tii waarte niks peseres fer te futuer. Awer tuu, im keeche teel, kriist xon yets fiile kuute tinge fon Yeehoowa. Un tee ferxprecht tich noch peser tinge im futuer kepe. (Psal. 145:16) Un tenk aach too triwer: tuu khanst tich net kans sicher sin iwer wii tayn leepe weyer wëns tuu anere ëntxlise kemacht hëst. Awer tuu khanst tich kans sicher sin: wëns tuu ëntxlise machst weeche liip tsu Kot un ti anere, tuust tuu imer ti kreest frooheet im leepe hon. (w24.10 s. 27 ap. 12-13)