Tej Uas Peb Xav Paub
Tsis ntev tom ntej no Yehauvas “lub homphiaj” uas nws yuav muab tso rau nom tswv lub siab yog dab tsi?
Nyob rau hauv Tshwmsim 17:16, 17 tau hais li no txog qhov pib ntawm txoj kev txom nyem loj kawg nkaus tias: “Kaum tus kub thiab tus tsiaj uas koj pom puavleej yuav ntxub tus niamntiav ntawd. Lawv yuav txeeb txhua yam uas nws muaj huv tibsi mus, thiab cia nws nyob liabqab; lawv yuav noj nws cev nqaij thiab muab hluavtaws hlawv nws povtseg. Rauqhov Vajtswv tau tshoov lawv lub siab kom lawv ua rawsli Nws lub homphiaj, los ntawm qhov uas lawv koom ua ib lub siab muab lawv tej hwjchim rau tus tsiaj nyaum ntawd kav mus txog thaum uas muaj tiav rawsli Vajtswv tej lus tau hais tseg lawm.” Yav thaum ub peb ntseeg tias qhov uas Yehauvas muab nws “lub homphiaj” tso rau tej nom tswv lub siab yog los mus rhuav kev ntseeg cuav.
Qhov uas peb muab hloov dua tshiab lawm yog Yehauvas yuav muab nws “lub homphiaj” tso rau nom tswv lub siab kom lawv “muab lawv tej hwjchim rau tus tsiaj.” Cia peb mus kawm seb yuav muaj tshwm sim li cas rau li cas.
Zaj lus faj lem no hais txog leej twg? “Tus niamntiav” yog kev ntseeg cuav. “Tus tsiaj” yog hais txog lub koom haum UN (United Nations). Yav thaum ub lub koom haum no yog tsim tsa los mus kho kev ruaj ntseg. Lub koom haum no pib rau xyoo 1919 thiab lub npe yav thaud yog Lis Au Neseem (League of Nations). (Tshwmsim 17:3-5) “Kaum tus kub” yog tag nrho tej nom tswv uas txhawb nqa tus tsiaj.
Tus niam ntiav thiab tus tsiaj txoj kev sib raug zoo yog li cas tiag? Tus niam ntiav “caij” rawv tus tsiaj qhia hais tias nws txhawb nqa tus tsiaj thiab xav tswj hwm tus tsiaj ntawd.
Yuav muaj li cas los raug tus niam ntiav? Tus tsiaj thiab kaum tus kub yuav “ntxub tus niamntiav” mas yuav muab txhua yam uas tus niam ntiav muaj txeeb mus kom tas thiab yuav qhia rau txhua leej txhua tus tias tus niam ntiav phem npaum li cas. Lawv yuav muab tus niam ntiav ua kom puas tsuaj ib yam li Yehauvas tau hais tseg lawm. (Tshwmsim 17:1; 18:8) Tom qab ntawd yuav tsis muaj kev ntseeg cuav nyob qhov twg ntxiv li lawm. Tiam sis ua ntej yuav muaj tshwm sim li no Yehauvas yuav tshoov ib tsoom teb chaws siab kom lawv ua ib yam uas tsis tau muaj dua ib zaug li tso.
Yehauvas yuav tshoov ib tsoom teb chaws kom ua dab tsi? Nws yuav tshoov kom kaum tus kub ua raws li nws “lub homphiaj” uas yog “muab lawv tej hwjchim rau tus tsiaj” uas yog lub koom haum UN. (Tshwmsim 17:13) Qhov no qhia tias tsis yog cov nom tswv lub tswv yim muab hwj chim rau lub koom haum UN tiam sis yog Vajtswv tshoov lawv lub siab kom ua li ntawd. (Pajlug 21:1; muab piv rau Yaxayas 44:28.) Tej yuav muaj tshwm sim no yuav los raug nthawv nthav. Ces lub koom haum UN yuav muab kev ntseeg cuav rhuav tshem tawm mus.
Peb tos rawv dab tsi? Cheem peb twb paub li no lawm, tsis txhob tos xov xwm tshaj tawm saum huab saum cua los qhia peb tias nom tswv yuav pib txhawb nqa lub koom haum UN zuj zus. Tib pliag ntshis xwb Yehauvas yuav tshoov kom tej nom tswv muab hwj chim rau lub koom haum UN. Thaum peb pom tej no tshwm sim ces peb paub tias txoj kev txom nyem loj kawg nkaus yuav pib. Cheem peb tseem tos lub sij hawm ntawd, cia peb “tsis txhob tsaug zog li lwm cov, tiam sis cia li feeb meej thiab ceev faj zov tos” vim tej no yuav tshwm sim sai sai tom ntej no!—1 Thexalaunikas 5:6.