Yehauvas Pab Kuv Ua Tau Zoo Dua Ntxiv

Kuv pom muaj ntau yam, tiam sis yam uas ua rau kuv qhuas tshaj plaws mas yog cov tib neeg. Kuv pom cov kwv tij nkauj muam hluas ua tib txoj hauj lwm qub mus mus los los cuag li cas, tej zaum ib txhia yuav xav tias tsis lom zem li. Thiab lawv kuj tsis tau kev qhuas los ntawd lwm leej lwm tus pes tsawg. Txawm li los lawv muaj kev zoo siab thiab txaus siab. Lawv tus qauv qhia rau kuv tias kuv yuav tau ua ib tug neeg txo hwj chim ua Yehauvas tes hauj lwm.

Tau ntau xyoo, Yehauvas cob qhia kuv kom txawj ua ib tug tub qhe zoo. Tiam sis ua ntej no, cia kuv piav tias ua cas kuv ho los paub tau qhov tseeb thaum kuv tseem teev dab qhuas Npus Das (Buddhist).

NRHIAV TUS TSEEM VAJTSWV THAUM TSEEM YAU

Kuv yug thiab loj hlob hauv lub nroog Sikhankaus (Chicago) xeev Ilinos (Illinois), teb chaws Yunaithim Xatej. Kuv niam thiab kuv txiv yug tau peb plaub leeg, kuv yog tus hlob. Nkawd tsiv teb chaws Nyiv Pooj tuaj. Twb yog nkawd xav kom peb cov me nyuam tau kawm txawj kawm ntse kom thiaj tau lub neej vam meej.

Kuv niam thiab kuv txiv yeej kub siab lug teev tiam kev cai dab qhuas Npus Das. Thaum kuv niam loj hlob tuaj mas nyob hauv lawv lub tsev, lawv yeej muaj ib lub thaj teev Npus Das. Kuv yawm txiv thiab kuv ob tug dab laug puav leej yog hauj sam. Yog li no thaum kuv yau, kev teev dab qhuas Npus Das tseem ceeb heev rau peb tsev neeg. Thawj yam uas kuv yuav tsum tau ua thaum kuv kawm ntawv los txog tsev, yog kuv yuav tau hlawv xyab thiab muab txhuv muab dej fij rau tus mlom. Txhua txhua hnub xya, peb mus rau lub tsev teev Npus Das, peb seev ib co lus xim hais rau tus mlom uas loj thiab muaj kub leem rau.

Kuv nco qab ntsoov tias thaum kuv muaj xya xyoo, kuv ntsia ntsoov tus mlom nyob hauv peb lub tsev thiab kuv xav twj ywm tias, ‘Kuv lub neej yuav zoo li cas tom qab kuv tuag lawm?’ Txoj kev cai Npus Das qhia tias tom qab yus tuag lawm ces yus muaj ib tug plig mus nyob rau lwm qhov. Kuv thiaj xav tias muaj ib hnub kuv yuav tuag mus ua ib tug plig lawm xwb, ntshe kuv yuav tsis tau ua neeg muaj txoj sia nyob li lawm. Txoj kev xav no ua rau kuv tu siab heev! Cia li ua rau kuv ntxhov siab thiab tag kev cia siab.

Thaum kuv tab tom yuav muaj 15 xyoos, kuv pom hais tias txoj kev cai dab qhuas Npus Das tsis muaj qab hau li. Zoo li kuv pheej nrhiav ib yam dab tsi. (Mathais 5:3) Nyob tob tob hauv kuv nruab siab, kuv xav tias yeej yuav tsum muaj ib tug Vajtswv uas muaj hwj chim loj dua ntais. Kuv xav paub nws heev. Kuv thiaj xav tias nyaj phau Vajlugkub yuav teb tau kuv txoj kev xav. Yog li thaum kev cai Npus Das ua ib lub koob tsheej, mas tsis txaus ntseeg kiag li, lawv ho muag phau Vajlugkub ua lus Askiv King James Version, kuv thiaj yuav ib phau.

Thaum kuv muaj 17 xyoo, kuv coj kuv tus aub mus taug kev, ib tug kwv tij hu ua Vixoos Npasus (Wilson Bashou) txawm los nrog kuv tham. Nws nug kuv tias: “Koj puas paub Vajtswv cog lus li cas rau yav tom ntej?” Qhov uas nws nug kuv li ntawd txawm ua rau wb sib tham ntev loo txog phau Vajlugkub. Vixoos nyeem nqe Vajlugkub nyob ntawm Qhia Tshwm 17:1, ces nws nug kuv tias, “Koj puas paub ntau tus dej uas tus poj muag cev zaum yog hais txog dab tsi?” Kuv tsis paub xyov yog dab tsi li. Ces nws thiaj nyeem nqe 15 rau kuv thiab qhia rau kuv tias, cov dej yog piv txog tib neeg. Ua rau kuv xav tsis thoob li tias Yehauvas Cov Tim Khawv cia phau Vajlugkub rov txhais phau Vajlugkub. Tom qab wb sib tham tag thiab nyias yuav mus nyias, nws muab tau ib phau ntawv rau kuv.a Phau ntawv ntawd hloov hlo kuv lub neej.

Tau kaum hnub tom qab ntawd kuv mus koom kev sib txoos tom Tsev Nceeg Vaj. Kuv tseem nco ntsoov lawv txoj kev hlub thiab qhov uas lawv tos txais kuv zoo heev. Txij thaum ntawd los kuv mus kev sib txoos tsis tu ncua. Ces Vixoos thiaj pib qhia Vajlugkub rau kuv. Kuv nyiam kawm Vajlugkub heev, tej thaud wb kam kawm ntev li yim txoos teev. Kuv niam thiab kuv txiv txhawj txog kuv ces nkawd thiaj tawm tsam tsis pub kuv kawm Vajlugkub. Thaum kuv yim kawm kuv yim ntseeg tias yeej yog qhov tseeb. Kuv thiaj ua kev cai raus dej nyob rau xyoo 1983.

UA IB TUG THO KEV

Thaum lub sij hawm uas kuv ua kev raus dej ntawd, kuv tseem tab tom kawm ntawv qib siab nyob hauv ib lub tsev kawm ntawv uas nto npe heev, kuv mus kawm txog tshuaj. Kuv niam thiab kuv txiv yeej siv zog khwv heev kom kuv thiaj tau mus kawm ntawv qib siab. Yog kuv xav kawm twj ywm los yeej tau, tiam sis kuv xav muab qhov uas zoo tshaj rau Yehauvas thiab xav ua hauj lwm puv ntoob rau nws.

Kuv txiv ceeb toom kuv li no, nws hais tias, “Yog koj tso tseg tsis kawm ntawv qib siab ces kuv yuav muab koj ncaws tawm mus!” Kuv yeej tu siab thiab tsis pom qab yuav xav li cas. Kuv hlub kuv niam thiab kuv txiv nkawd heev, kuv yeej tsis xav ua kom nkawd tu siab. Nyob tom lub tsev uas kuv nyob kawm ntawv, kuv niaj hmo tawm mus sab nraum zoov thiab thov Yehauvas. Kuv thov tias, “Yehauvas pab kom kuv txawj txiav txim siab zoo.” Thaum kuv txiav txim siab tias kuv yuav tsis kawm ntawv qib siab ntxiv lawm, kuv txiv thiaj muab kuv ntiab tawm. Ces kuv thiaj hu mus rau Vixoos thiab qhia rau nws paub tias yog vim li cas. Nws hais kom kuv mus nrog nws nyob. Kuv ntim kuv tej khoom ces kuv caij lub tsheb loj mus rau tim Vixoos lub tsev. Thaum ntawd kuv muaj lub siab tus yees, yog li kuv thiaj paub tias kuv txiav txim siab yog lawm.

Kuv zoo li tus noog uas dim plaws hauv lub pob tawb tawm lawm! Kuv muaj kev ywj pheej teev tiam Yehauvas kawg siab kawg ntsws. Yog li kuv thiaj ua ib tug tho kev nyob rau xyoo 1984.

Lub sij hawm uas kuv ua ib tug tho kev, Yehauvas pab kuv xyaum muaj tej yam ntxwv xws li, peem kam tiag tsis txhob tso tseg. Muaj ib hnub thaum yav tav su tsis muaj leej twg khoom nrog kuv mus tshaj tawm li, yeej ua rau kuv qaug zog. Txawm li los kuv mus tshaj tawm. Tom qab uas kuv twb tshaj tawm tau ob txoos teev lawm, kuv txiav txim siab tias kuv yuav mus rau ib lub tsev ntxiv lawm xwb. Kuv twb sab sab thiab muaj kuv ib leeg xwb thiab zoo li twb yuav los nag. Ces kuv xav rau kuv tus kheej tias, ‘Kuv yuav tsum los tsis tsum ne?’ Tab sis kuv txawm nce taw ntaiv ntawm lub tsev ntawd mus rau tshooj peb, kuv mus ntsib ib tug tub hluas uas yog neeg Filipis. Kuv xav twb ywm rau kuv tus kheej tias, ‘Ntshe nws yuav tsis nyiam tej uas kuv qhia li os.’ Qhov uas kuv xav li ntawd kuv xav tau yuam kev loj heev! Kuv thiaj pib qhia Vajlugkub rau nws, ces tom qab no nws los ua kuv ib tug kwv tij ntawm sab kev ntseeg.

KUV KAWM TAU NTAU YAM HAUV NPE-EE

Tom qab kuv nrog Vixoos nyob tau ob lub xyoos, kuv raug caw mus ua hauj lwm nyob hauv Npe-ee xyoo 1985. Ua li kuv hais thaum xub thawj, kuv raug xa mus ua hauj lwm hauv chav luam thiab tom ntaub ntawv. Muaj ib hnub thaum kuv luam cov ntaub ntawv, kuv luam lub ntsiab yuam kev rau ntawm daim plhaub lawm. Kuv twb luam tau ntau puas daim lawm ces yuav tau muab pov tseg kom tas. Cov kwv tij thiaj hais kom kuv mus piav qhia rau tus kwv tij uas saib xyuas chav ntawd. Kuv piav qhia tias kuv tau ua yuam kev lawm, tiam sis muaj ib yam uas kuv tsis tau hais. Tus kwv tij uas saib xyuas chav ntawd ua tib zoo hais rau kuv tias, “Yeej zoo rau yus hais thov txim.” Tam sim ntawd, kuv mam ras dheev tias tseem ceeb rau kuv lees qhov uas kuv ua yuam kev, thiab kuv yuav tsum tau hais thov txim.

Ib yam uas pab tau kuv haj yam txawj ua hauj lwm pab lwm tus, yog thaum kuv pom cov kwv tij laus uas ua hauj lwm ntev nyob hauv Npe-ee tus qauv. Muaj ib zaug, kwv tij Metoos Heetshaus (Milton Henschel) uas yog ib tug ntawm Pab Uas Ntaus Thawj, nws nrog peb noj su ua ke. Hnub ntawd muaj neeg coob tshaj li niaj zaus, ces cov kwv tij nkauj muam uas nqa zaub nqa mov, nqa tsis cuag ncua. Peb uas yog cov kwv tij hluas txawm pib yws luj loos hais tias, ua cas lawv yuav ua hauj lwm qeeb ua luaj. Kwv tij Metoos tsis hais ib los li, nws sawv twj ywm mus pab cov kwv tij nkauj muam nqa dej nqa mov rau sawv daws noj. Qhov uas nws txo hwj chim ua li ntawd, yuav ua rau kuv nco ntsoov mus tas kuv sim neej. Ua rau kuv xav txog thaum Yexus tiam nws cov tub txib.​—Yauhas 13:3-5.

“KOJ YUAV TAU KAWM LUS NYIV POOJ!”

Nyob rau xyoo 1987, kuv mus saib teb chaws Nyiv Pooj, kuv pom tias cov kwv tij nkauj muam txo hwj chim heev thiab kub siab lug mus tshaj tawm. Kuv xav pab lawv kawg li tiam sis kuv tsis paub hais lus Nyiv Pooj. Muaj ib tug muam npe hu ua Mitshikau Auda (Michiko Oda), nws ua hauj lwm hauv Npe-ee, nws ntsia ntsoov kuv ces nws txawm hais li no rau kuv, “Koj yuav tau kawm lus Nyiv Pooj!” Ces kuv thiaj kawm lus Nyiv Pooj. Kuv twb tsis paub tias nws cov lus yuav hloov hlo kuv lub neej.

Ob peb lub hlis tom qab ntawd, kuv thiaj li hloov mus koom ib lub koom txoos Nyiv Pooj nyob hauv lub xeev Nuj Yauj. Qhov uas kuv kawm lus Nyiv Pooj qhib ntau txoj hau kev rau kuv ua Yehauvas tes hauj lwm ntxiv. Nyob rau xyoo 1989, yog thawj zaug uas kuv mus koom lub rooj sib txoos ua lus Nyiv Pooj nyob hauv lub nroog Lo Eentsulem (Los Angeles) xeev Kalifaunias (California). Kuv thiaj mus pom Mivakaum Aunami (Miwako Onami) uas yog ib tug tho kev, nws ua yeeb yam saum sam thiaj, thaum kuv pom nws kuv nyiam nws heev.

Mivakaum wb sib yuav xyoo 1992, thiab wb ob leeg ua hauj lwm nyob hauv Npe-ee hauv lub nroog Npluavlees xeev Nuj Yauj. Kuv tus poj niam yog ib tug neeg txawj xav thiab mob siab txog lwm leej lwm tus, thiab nws yeej txaus siab hlo pab luag. Nws tus qauv pab tau kuv txawj ua zoo rau lwm tus. Kuv zoo siab tias Yehauvas muab nws los ua kuv tus poj niam, nws ua rau kuv muaj kev zoo siab thiab nws nplig tau kuv kawg li.

CEG NPE-EE NYIV POOJ THIAB ROV MUS UA COV TSHAJ TAWM

Ntev mus ntev tuaj wb niam tais thiab yawm txiv uas nyob teb chaws Nyiv Pooj txawm muaj mob hnyav. Cov kwv tij thiaj tso cai rau wb hloov mus ua hauj lwm nyob ceg Npe-ee Nyiv Pooj, kom wb thiaj mus nyob ze thiab tu tau nkawd. Yog li xyoo 1999 wb thiaj tsiv mus nyob tid.

Ceg Npe-ee Nyiv Pooj tos txais wb zoo heev, ua rau wb yoog tau wb lub neej tshiab zoo heev. Kuv kawm tau ntau yam los ntawm cov kwv tij nkauj muam Nyiv Pooj, xws li lawv muaj lub siab dawb siab zoo thiab qhov uas lawv nyiam tos txais qhua heev. Thaum hais txog ua hauj lwm, lawv rau siab ntso ua thiab yeej ua tiag tiag. Tsis tas li ntawd, thaum lawv ua hauj lwm ua ke lawv ua tau zoo heev. Ua cas thiaj hais li no? Cov neeg Nyiv Pooj pom tias thaum lawv koom siab ua hauj lwm ua ke, yuav ua rau sawv daws ua tau hauj lwm zoo dua li yus ua yus tus kheej. Lawv tus qauv txhawb tau kuv ua ib tug neeg txo hwj chim nrog lwm tus ua hauj lwm ua ke, thiab pab kuv ris txiaj ntsig rau ib feem me me uas kuv tau txhawb Yehauvas lub ntsiab.

Vim kev coj noj coj ua lawv coj txawv ces tej thaud nyuaj rau kuv to taub tias, yog vim li cas lawv thiaj daws tej teeb meem li lawv daws. Kuv kawm tau tias kuv yuav tau ua siab ntev thiab tsis txhob lam tau lam hais tshawv tshawv. Ntev mus kuv kuj hloov kuv tus cwj pwm, thiab pom tias Yehauvas yeej foom koob hmoov rau tej kev txiav txim siab, tsuav yog peb ua raws li lub koom haum qhia kom ua. Rau qhov tias thaum kawg, Yehauvas yog tus uas ua kom peb tes hauj lwm mus tau zoo.

Kuv nquag muab tej uas kuv kawm hauv Npe-ee uas pab tau kuv piv rau tej uas tau pab Mauxes tus uas cev Vajtswv lus. Yehauvas pab Mauxes tau 40 xyoo thaum uas nws tseem yog ib tug tswv yug yaj, kom nws xyaum ua ib tug neeg siab mos siab muag. Zoo tib yam li Mauxes, kuv yog ib tug uas tau kawm ntawv siab. Ces kuv cia txoj kev kawm ntawv siab ua rau kuv khav theeb tsawv, thiab tso siab rau kuv tus kheej. Tiam sis qhov uas kuv ua hauj lwm hauv Npe-ee, cob qhia tau kuv ua ib tug neeg txo hwj chim thiab kom tso siab rau Yehauvas. Tib yam li Yehauvas ua siab ntev cob qhia Mauxes kom ua tau zoo ntxiv, Yehauvas kuj ua siab ntev cob qhia kom kuv ua tau zoo ntxiv tau ntau ntau lub xyoos los no thiab.

Wb tu thiab saib xyuas wb niam tais thiab yawm txiv yuav luag muaj 24 xyoos, ces nkawd mam tas sim neej. Lub sij hawm wb tu nkawd, wb yeej ib sij txais ib tsab xov tooj, yeej ua rau wb txhawj, thiab yeej ib sij mus rau tsev kho mob. Ces wb niam tais Maxakau (Masako) tsuas mob heev zuj zus lawm xwb, cia li ua rau nws mus tsis taus kev lawm. Yeej nyuaj rau nws mus koom tej kev sib txoos thiab mus tshaj tawm. Ua ntej thaum nws yuav tso peb tseg, nws tau nyob hauv laub lawm xwb. Txawm li los nws txoj kev hlub rau Yehauvas nyob ruaj khov kho. Thaum twg nws tham txog qhov tseeb hauv phau Vajlugkub mas ua rau nws zoo siab heev. Kuv kawm tau los ntawm kuv niam tais tias txawm lub neej yuav zoo li cas los xij, peb yuav tsum muaj kev zoo siab thiab kev txaus siab teev tiam Yehauvas. Nws tus qauv yog ib tug qauv zoo heev uas kuv yuav khaws mus xyaum.

Nyob rau xyoo 2024, wb lub neej tau hloov hlo. Wb ua hauj lwm nyob hauv Npe-ee tau ntau tshaj li 30 xyoo, tiam sis wb raug xa rov mus ua cov tshaj tawm. Tam sim no wb ua ob tug tho kev tshwj xeeb nyob hauv lub pov txwv Aukinava (Okinawa), thiab wb muaj lub cib fim mus tshaj tawm rau cov neeg nyob ze lub tshav rog. Tej kev cob qhia uas wb tau txais nyob hauv Npe-ee pab tau wb zoo heev thaum uas wb raug xa rov mus ua cov tshaj tawm. Wb yeej siv lub sij hawm kom muaj nuj nqis thiab ua raws li teev tseg, kom wb thiaj tau hau ntsoov siv zog ua tes hauj lwm mus tshaj tawm. Yehauvas tau foom koob hmoov rau wb muaj cov uas wb mus qhia Vajlugkub rau, lawv yeej zoo tam li wb tsev neeg. Wb kawm tau tias tseem ceeb kawg li uas yuav tsum hlub tib neeg. Kuv tus poj niam thiab kuv ua Yehauvas tsaug tsis txawj tag rau tes hauj lwm uas nws muab rau wb ua.

CIA YEHAUVAS PAB KOM UA TAU ZOO NTXIV

Kuv tsev neeg tsis tawm tsam kuv txoj kev ntseeg lawm, tiam sis lawv tseem tsis tau nrog kuv ntseeg Yehauvas. Txawm li los Yexus cog lus tseg tias, tus uas tso nws tsev neeg tseg thiab los ua nws li thwj tim, yuav tau txais 100 npaug ntxiv cov kwv tij nkauj muam ntawm txoj kev ntseeg uas zoo li ib tse neeg. (Malakaus 10:29, 30) Yeej muaj tseeb li no rau kuv. Yog kuv yuav suav tag nrho cov tsev neeg uas nyob thoob qab ntuj uas hlub thiab saib xyuas kuv, kuv suav tsis tag li.

Kuv tseem khaws phau ntawv uas tus kwv tij Vixoos muab rau kuv los txog niaj hnub nim no. Phau ntawv no ua rau kuv nco ntsoov tias Yehauvas tau coj kuv los nrhiav nws li cas. (1 Xwmtxheej Vajntxwv 28:9) Kuv yeej yuav cia Yehauvas pab kuv tas zog kom kuv haj yam ua tau zoo ntxiv mus li, thiab kuv yuav pab lwm tus los kawm paub qhov tseeb kom lawv thiaj tau txoj sia ntev dhawv mus ib txhis.