Kawm Kom Paub Yehauvas Zoo Ntxiv

1. Peb xav li cas txog Yehauvas txoj kev txawj ntse, nws lub tswv yim thiab tej uas nws tau ua?

KOJ puas tau xav tias Yehauvas ntse npaum li cas, muaj tswv yim npaum li cas, thiab nws tau ua ntau yam zoo heev uas ua rau peb xav tsis thoob li? Thaum peb xav txog peb tus Tswv Tsim mas ua rau peb ris nws txiaj ntsig tsis txawj tag. Tej zaud peb kuj yuav xav tib yam li tus tub txib Povlauj uas thaum nws hais tias: “Vajtswv yog tus foom koob hmoov nplua mias! Nws lub tswv yim thiab kev txawj ntse tob kawg nkaus! Vajtswv txoj kev txiav txim tsis muaj leej twg paub txog, thiab nws tes hauj lwm tsis muaj leej twg yuav nkag siab tau!”​—Loos 11:33, 34.

2. Ua li cas peb ho paub tau Yehauvas?

² Txawm peb paub tsis txhij tsis txhua txog Yehauvas los, peb yeej paub txog tej yam tias nws zoo li cas. Vaj Ntxwv Daviv hais rau nws tus tub Xalaumoos tias: “Koj cia li lees yuav koj txiv tus Vajtswv thiab cia li ua koom tu nws kawg siab kawg ntsws . . . Yog koj nrhiav nws koj yuav ntsib nws.” (1 Vaj Keeb Kwm 28:9) Tau ntau pua xyoo tom qab no, tus tub txib Yauhas hais rau nws cov kwv tij nkauj muam tias, Yexus “pub tswvyim rau peb kom peb paub tus uas yog Vajtswv tiag.” (1 Yauhas 5:20) Thiab Yexus kuj hais tias nws “qhia Leej Txiv rau tus twg, tus ntawd thiaj paub xwb.”​—Mathais 11:27.

3. Peb yuav mus tham txog dab tsi hauv zaj no?

³ Cov uas muab lawv tus kheej cob rau Yehauvas twb tau kawm ntau yam txog nws lawm. Txawm li ntawd los, peb yeej kawm txog nws tsis paub tag li. (Yauhas 17:3) Peb yeej tseem kawm tau ntxiv tias, dab tsi thiaj ua rau Yehauvas zoo siab thiab peb yuav ua li cas peb thiaj haj yam tso siab rau nws. Txawm peb teev tiam Yehauvas ntev npaum li cas lawm los, cia peb ua tib zoo xav txog peb lo lus nug no: Qhov uas peb paub Yehauvas yog li cas tiag? Vim li cas peb yuav tsum paub nws zoo ntxiv tuaj? Thiab yuav ua li cas peb thiaj paub nws zoo ntxiv?

QHOV UAS PEB PAUB YEHAUVAS YOG LI CAS TIAG?

4. Ib txoj ke peb paub Yehauvas yog li cas?

⁴ Ib txoj ke uas yuav pab tau peb paub Yehauvas, yog mus kawm seb Yehauvas hais li cas rau cov Yudais uas rov tim Npanpiloos los. Yehauvas cog lus li no rau lawv: “Kuv yuav ua kom lawv paub hais tias kuv yog [Yehauvas].” (Yelemis 24:7) Cov Yudais yeej paub ntau yam txog Yehauvas lawm. Tiam sis tom qab uas lawv rov tim Npanpiloos los, lawv yuav tau haj yam nrog Yehauvas sib raug zoo ntxiv. Ib phau ntawv uas qhia txog phau Vajlugkub hais li no: “Qhov uas peb paub Vajtswv, txawv ntawm qhov uas peb paub Vajtswv zoo heev li peb yog nws tus phooj ywg zoo. Muab piv li no, yog peb nyeem txog kev hlub xwb yeej tsis zoo npaum li thaum peb qaug kiag kev hlub nrog ib tug neeg.” Tsis yog peb paub tias Yehauvas muaj ib lub npe thiab nws yog Vajtswv xwb ces txaus lawm. Peb yuav tsum tau paub tias Yehauvas zoo li cas tiag tiag.

5. Peb kawm tau li cas los ntawm Vaj Ntxwv Yauxiyas txog qhov uas los paub Yehauvas?

⁵ Thaum peb los kawm txog Yehauvas, peb paub tias nws nyiam li cas thiab nws ntxub yam twg. Cia peb xav txog Vaj Ntxwv Yauxiyas. Phau Vajlugkub qhia tias: “Thaum Yauxiyas ua vajntxwv tau yim xyoo, nws tseem hluas heev, nws pib pehawm nws yawgkoob uas yog Vajntxwv Daviv tus Vajtswv.” (2 Xwmtxheej Vajntxwv 34:3) Yauxiyas tsis yog kawm kom paub ntxiv txog Vajtswv xwb, tiam sis nws tseem ua ntau yam ntxiv thiab. Nws coj raws li tej uas nws tau kawm. Yeeb vim li no, Yehauvas thiaj hais rau Yelemis tus cev nws lus tias, Yauxiyas “ibtxwm ua ncaj thiab ua zoo” thiab nws pab cawm cov neeg txom nyem thiab cov uas tsis muaj leej twg pab. Yehauvas hais ntxiv tias: “Tus uas ua li no thiaj yog tus uas paub [kuv].”​—Yelemis 22:15, 16.

6. Raws li Phau Ntawv Nkauj 9:10 hais, yog peb yim huab paub Yehauvas ces yim huab pab tau peb li cas?

⁶ Nyeem Phau Ntawv Nkauj 9:10. Yog peb yim huab paub Yehauvas ces peb yim huab tso siab rau nws. Tau muaj tseeb li no rau tus tub txib Povlauj. Thaum Povlauj raug kaw zaum kawg ua ntej lawv muab nws tua, nws hais li no: “Kuv tsis txaj muag li. Kuv yeej paub tus uas kuv ntseeg.” (2 Timautes 1:12) Tej uas Povlauj tau kawm paub txog Yehauvas thiab tej uas Yehauvas tau pab nws, ua rau Povlauj tso siab plhuav rau Yehauvas kawg siab kawg ntsws. Povlauj tso siab tuag nthi tias Yehauvas yeej nco ntsoov nws thiab tej hauj lwm uas nws ua rau Yehauvas, thiab Yehauvas yeej yuav tsa nws rov los tau txoj sia.

VIM LI CAS PEB YUAV TSUM PAUB YEHAUVAS ZOO NTXIV TUAJ?

7. Thaum peb los ntseeg Yehauvas ntev lawm yuav muaj tau li cas rau peb?

⁷ Thaum peb nyuam qhuav los kawm txog Yehauvas, peb yeej rau siab ntso kawm kom paub nws. Tiam sis thaum peb los teev tiam nws ntev lawm, peb yuav tsis tshua kub siab kawm kom haj yam paub nws ntxiv tuaj. Vim li cas ho hais li no? Thaum peb nyeem Vajlugkub rau peb tus kheej los sis nyeem nrog lub koom txoos tom kev sib txoos, tej zaud peb yuav xav ntsoov tias cov lus ntawd pab tau peb li cas, los sis peb yuav coj mus pab lwm tus li cas. Qhov uas peb xav li ntawd yeej zoo, rau qhov phau Vajlugkub yeej txhawb kom peb ua li ntawd. (2 Timautes 3:16, 17) Tiam sis phau Vajlugkub kuj qhia txog tus Vajtswv uas tshoov neeg sau nws txoj lus thiab. (Phau Ntawv Nkauj 25:8-10) Peb tsis txhob xav ntsoov tias phau Vajlugkub yuav pab tau peb thiab lwm tus li cas xwb, es tsis nco nug peb tus kheej tias, ‘Qhov nod qhia li cas txog Vajtswv Yehauvas?’a

8. Yog peb yim huab kawm kom paub Yehauvas zoo, haj yam pab tau peb txoj kev sib raug zoo nrog nws li cas? (Phau Ntawv Nkauj 73:24-28)

⁸ Thaum peb paub Yehauvas zoo zuj zus tuaj, peb txoj kev sib raug zoo nrog nws yim huab yuav ruaj khov. Muab xav li no, tom qab uas koj nyeem Vajlugkub txhua txhua hnub, saib Yehauvas Cov Tim Khawv Tshooj TV, los sis tom qab mus koom ib lub rooj sib txoos tas, koj xav li cas xwb? Yeej ua rau peb nyob ze peb Leej Txiv Yehauvas dua. Yog vim li cas? Rau qhov peb kawm ntau yam ntxiv txog nws. Ces ua rau peb xav qhuas nws thiab ua nws tsaug. Peb xav tib yam li Axas uas thaum nws hais tias: “Vajtswv yog kuv lub zog, nws yog tus uas kuv ntshaw mus ibtxhis.” (Nyeem Phau Ntawv Nkauj 73:24-28.) Txhua zaus uas peb kawm kom peb haj yam paub Yehauvas zoo ntxiv tuaj, yim huab ua rau peb ris nws txiaj ntsig tias nws yog peb tus phooj ywg uas zoo tshaj plaws.

9. Piav seb yog peb “nco ntsoov” Yehauvas yuav pab tau peb li cas?

⁹ Yog peb “nco ntsoov” Yehauvas ces peb yuav xav txog tej uas peb tau kawm txog nws. Peb thiaj paub tias yam twg haum thiab tsis haum nws siab, peb thiaj txawj txiav txim siab zoo. (Pajlug 3:5, 6) Cia peb muab piv txwv li no: Coob tus kwv tij nkauj muam nyias yeej muaj nyias ib lub xov tooj thiab lawv yeej muaj lawv tus txij nkawm daim duab nyob rau hauv. Qhov uas lawv ua li no lawv thiaj nco ntsoov txog lawv tus txij nkawm, thiab txhua yam uas lawv ua lawv xav ua haum nws siab, thiaj tsis ua rau nws tu siab. Zoo tib yam li ntawd, yog peb xav ntsoov txog Yehauvas ces peb yuav txiav txim siab ua tej yam uas haum nws siab.​—Phau Ntawv Nkauj 19:13, 14.

10. Yog peb kawm txog Yehauvas yuav pab tau peb li cas?

¹⁰ Yehauvas tsim peb muaj tus yam ntxwv zoo li nws, yog li peb yeej xyaum tau nws cov yam ntxwv. (Chiv Keeb 1:26) Thiab yog peb yim huab kawm kom paub txog Yehauvas cov yam ntxwv, ces peb haj yam yuav txawj xyaum nws. Yexus yws cov xib hwb thiab cov Falixais tias, lawv tsis coj raws li Vajtswv cov yam ntxwv li. Lawv saib ntsoov tej yam me uas tsis tseem ceeb luaj twg hauv Mauxes Txoj Kev Cai, tiam sis “[lawv] ho tsis quav ntsej tej yam tseem ceeb hauv Mauxes Txoj Kev Cai kom ua siab ncaj, muaj siab hlub, thiab muab siab npuab Vajtswv.” (Mathais 23:23) Cia peb tsis txhob xyaum coj zoo li cov thawj coj ntawd. Tiam sis peb yuav tau ua zoo xav txog Vajtswv tej kev cai thiab nws tej hauv paus ntsiab lus tias tej ntawd qhia li cas txog Yehauvas. Yog peb ua li ntawd, peb thiaj yuav xyaum tau Yehauvas.​—1 Yauhas 4:8, 11.

YUAV UA LI CAS PEB THIAJ PAUB YEHAUVAS ZOO NTXIV?

11. Leej twg pab koj los paub Yehauvas?

¹¹ Leej twg pab koj los paub Yehauvas? Tej zaum kuj yog koj niam koj txiv uas ntseeg Yehauvas. Nkawd muab tej zaj hauv phau Vajlugkub los qhia rau koj tias Vajtswv zoo li cas, thiab qhia tias nws muaj cov yam ntxwv twg los ntawm tej uas nws tsim. Los sis koj tau kawm Vajlugkub nrog Yehauvas ib tug Tim Khawv. Nws muab phau Nyob Kaj Siab Lug Mus Ib Txhis! los qhia rau koj. Nws pab koj ua tib zoo kawm txog tej zaj nyob hauv phau Vajlugkub los sis qhia txog tej uas Yehauvas tau tsim, thiaj pab tau koj pom tias Yehauvas muaj tej yam ntxwv zoo qhuas lug.b (Nehemis 8:8; Tes Hauj Lwm 14:17) Cia peb tham ntxiv seb peb yuav kawm txog Yehauvas mus li, li cas.

12-13. Peb kawm tau li cas txog Yehauvas thaum peb nyeem phau Vajlugkub? Piav. (Yelemis 39:15-18) (Saib daim duab .)

¹² Thawj yam, yuav kom peb kawm ntxiv txog Yehauvas mus li, peb yuav tau mus nyeem thiab kawm Vajlugkub. Tej thaud phau Vajlugkub kuj qhia tsi ntsees txog Yehauvas tej yam ntxwv. (Khiav Dim 34:6, 7) Tiam sis feem ntau phau Vajlugkub qhia txog tej tib neeg thiab tej uas lawv txiav txim siab ua. Thaum peb nyeem txog tej zaj hauv phau Vajlugkub, ua tib zoo xav seb peb kawm tau li cas txog Yehauvas.

¹³ Saib seb peb kawm tau li cas los ntawm tus qauv no. Thaum peb nyeem Yelemis 38:6-13, peb pom tias Enpemelej uas yog neeg Sudas mus cawm Yelemis tus uas cev Vajtswv lus. Peb xyaum tau Enpemelej tus qauv uas muaj lub siab hlub, muaj lub siab tawv, thiab xam pom txog lwm tus. Tiam sis koj puas pom tias Yehauvas muaj tej yam ntxwv zoo li cas? (Nyeem Yelemis 39:15-18.) Koj pom nqe twg qhia tias Yehauvas muaj kev ris txiaj ntsig, coj ncaj, thiab tsis xaiv leej twg ntsej muag? Puas muaj lwm yam ntxiv uas koj kawm tau txog Yehauvas cov yam ntxwv? Thaum koj nyeem ib zaj hauv nws Txoj Lus, ua zoo xav seb koj kawm tau li cas txog Yehauvas tej xeeb ceem. Nco ntsoov qhuas thiab ua Yehauvas tsaug rau nws tej yam ntxwv zoo kawg nkaus.

14. Yuav pab tau peb li cas yog peb ua tib zoo xav txog tej uas Yehauvas tsim?

¹⁴ Yam ob, peb kawm ntxiv txog Yehauvas mus li, yog thaum peb ua tib zoo xav txog tej uas nws tau tsim. (Phau Ntawv Nkauj 145:9, 10) Yeej paub tias peb yuav tau ua ntau tshaj li qhov uas kawm txog tej uas nws tau tsim xwb. Muaj tej txhia tib neeg siv tag nrho lawv lub neej los kawm txog tej uas Vajtswv tau tsim, los lawv twb tsis paub txog Vajtswv tej yam ntxwv, thiab lawv twb tsis lees paub tias muaj ib tug Tswv Tsim! Tus tub txib Povlauj sau tias: “Txawm neeg tsis pom Vajtswv los yog lawv saib tej uas Vajtswv tsim txij thaum ntuj tsim teb raug los, lawv yeej paub tias Vajtswv zoo li cas.” (Loos 1:20) Ib phau Vajlugkub uas hais txog tib nqe no, hais li no “ib tug uas txawj xav yeej pom tau Vajtswv tej yam ntxwv.” Yog li peb yuav tau ua tib zoo xav txog tej uas Yehauvas tau tsim, peb thiaj pom tias nws yog ib tug Tswv Tsim uas muaj tej yam ntxwv li cas tiag.

15. Pharhiv ua li cas nws thiaj paub Yehauvas zoo dua ntxiv tuaj, thiab koj xyaum tau nws li cas? (Saib daim duab.)

¹⁵ Peb coob tus nyob rau hauv nroog ces yeej tsis tshua pom tej nroj tsuag, tej xyoob ntoo thiab tej tsiaj uas Vajtswv tsim. Yog tias koj nyob hauv nroog, koj puas tseem kawm tau txog tej uas Vajtswv tsim? Pharhiv (Patrick) nyob hauv lub nroog Npaxevaus (Brazzaville) teb chaws Khonkaus (Congo).c Nws hais tias: “Txhua txhua hnub kuv saib tej uas Yehauvas tsim seb kuv kawm tau li cas. Kuv pom tej me kab me noog nrhiav noj thiab nrhiav chaw ua zes. Muaj ib zaug kuv ua tib zoo saib seb cov noog ua lawv lub zes li cas. Lawv nrhiav tej yam nyob ntawm tog vaj tog tsev los ua zes tos txais lawv cov me nyuam.” Pharhiv tsis yog saib cov noog seb lawv ua li cas xwb, tiam sis nws ua tib zoo xav txog tus Tswv Tsim. Nws hais ntxiv tias: “Kuv pom tias Yehauvas mob siab txog cov tsiaj no, txawm hais tias zoo li lawv twb tsis tseem ceeb luaj twg. Qhov no qhia rau kuv tias Yehauvas yeej mob siab txog kuv, thiab nws yeej yuav pab kom kuv muaj yam ub yam no raws li kuv cheem tsum.”

16. Dab tsi pab tau Maivliag paub Yehauvas zoo dua ntxiv, thiab peb xyaum tau nws li cas? (Saib daim duab.)

¹⁶ Yam peb, peb kawm ntxiv txog Yehauvas mus li, yog peb ua tib zoo xav txog tej uas Yehauvas tau ua los pab peb. Maivliag uas yog Yexus niam kuj tau ua li no. Nws paub Yehauvas zoo rau qhov Yehauvas “txaus siab heev rau [nws].” (Lukas 1:30) Tiam sis Yehauvas txib nws ua ib tes hauj lwm uas tseem ceeb thiab tsis yooj yim, yog kom Maivliag ua nws tus Tub leej niam. Yehauvas txib tus tub txib saum ntuj Kali-ees thiab Elixanpes uas yog Maivliag tus nruab ze kom txhawb Maivliag lub zog. Yehauvas xav kom Maivliag paub tias nws yeej tso siab rau Maivliag thiab yuav pab Maivliag. Ces Maivliag ua tib zoo xav txog Yehauvas lub hwj chim, kev khuv leej, qhov uas Yehauvas tsis xaiv ntsej xaiv muag, thiab qhov uas Yehauvas hmov tshua txog cov tib neeg uas lwm tus saib tsis muaj nqis. (Lukas 1:46-55) Zoo tib yam li uas Maivliag ris txiaj ntsig kawg rau tej uas Yehauvas tau pab nws, peb los yuav tau ris txiaj ntsig rau tej uas nws tau pab peb thiab. (Henplais 4:16) Thaum Yehauvas tau pab koj, nug koj tus kheej li no: ‘Qhov nod qhia kuv li cas txog Yehauvas? Yehauvas qhia nws tus yam ntxwv twg rau kuv?’

PEB KAWM TXOG YEHAUVAS TSIS PAUB TAG

17-18. Vim li cas peb thiaj hais tias peb kawm txog Yehauvas tsis paub tag li?

¹⁷ Peb tseem yuav kawm tau ntau yam txog Yehauvas thaum peb nyob hauv lub ntiaj teb tshiab. Tseem yuav muaj tej phau ntawv tshiab qhia seb Yehauvas xav kom peb ua li cas. (Tshwmsim 20:12) Thaum ntawd peb haj yam yuav paub Yehauvas zoo dua, rau qhov peb yuav muaj sij hawm kawm txog tej uas nws tau tsim. (Yaxayas 11:6-9) Thiab thaum peb pom nws tsa cov uas peb hlub sawv rov los tau txoj sia thiab thaum peb pom nws pab txhua tus zoo tiav log zuj zus, peb yim huab yuav to taub txog peb Leej Txiv.

¹⁸ Peb yeej yuav kawm thiab paub Yehauvas tsis txawj tag li. Nws ib txwm nyob mus ib txhiab ib txhis, peb yeej yuav tsis “totaub txog nws lub tswvyim.” (Phau Ntawv Nkauj 90:2; 147:5) Ntxiv ntawd peb yeej “tsis txawj tshawb nrhiav tej uas Vajtswv ua thaum chiv keeb chiv thawj mus txog thaum kawg.” (Tej Lus Qhia 3:11) Txawm peb teev tiam Yehauvas ntev npaum li cas lawm los, peb yuav tsum ua npaum li peb ua tau los kawm txog peb Leej Txiv tus uas hlub peb tshaj plaws.