TEJ UAS PEB XAV PAUB

Ob lo lus cog tseg uas hais nyob ntawm Kalatias 4:24, yog hais txog dab tsi?

Tom qab uas tus tub txib Povlauj qhia tias Xalas thiab Hankas zoo li cas rau Anplahas ces nws txawm hais li no: “Tau muab tej no los ua ib zaj yeeb yam ua piv txwv. Ob tug poj niam no piv txog ob lo lus cog tseg.” (Kalatias 4:22-24) Yav tas los, peb nkag siab tias ob lo lus cog tseg no, yog Mauxes Txoj Kev Cai thiab lo lus cog tseg tshiab. Tiam sis, tom qab uas peb rov ua tib zoo kawm zoo zoo, peb to taub tias yog hais txog lwm yam. Peb pom tias Povlauj tsis yog hais txog lo lus cog tseg tshiab, tiam sis yog hais txog Vajtswv lo lus cog tseg rau Anplahas. Cia peb mus kawm seb Povlauj hais li cas.a

Povlauj muab tus poj niam ua qhev uas yog Hankas hais txuam nrog lub Roob Xinais. (Kalatias 4:25) Hankas yog hais txog Mauxes Txoj Kev Cai uas hais nyob ntawm lub Roob Xinais xyoo 1513 ua ntej Yexus. (Khiav Dim 19:5, 6) Cov Yudais yog neeg txhaum zoo tsis tiav, ces lawv coj tsis tau raws nkaus li Txoj Kev Cai qhia. Yog li cov Yudais yuav tau nco ntsoov tias lawv ua cev qhev rau lub txim txhaum. Lo lus cog tseg no yuav pab tau haiv neeg Ixayees paub tias tus Mexiyas yog leej twg, rau qhov tsuas yog tus Mexiyas tib leeg xwb thiaj yuav coj tau raws nraim li Txoj Kev Cai qhia. Thaum tus Mexiyas uas zoo tiav log tsis muaj ib qho txhaum los tuag theej txhoj, nws thiaj tso tau noob txaug neeg txhaum dim lub txim thiab txoj kev tuag. (Kalatias 3:19, 24, 25) Tom qab uas Yexus Khetos ua rau Vajtswv lub ntsiab muaj tiav lawd, Mauxes Txoj Kev Cai xaus lawm.​—Loos 10:4.

Povlauj kuj muab Hankas piv rau Xalas, uas yog “tus poj niam tsis ua qhev” uas yug tau tus tub “raws li lo lus cog tseg.” (Kalatias 4:23) Lo lus cog tseg ntawd yog hais txog Vajtswv lo lus cog tseg rau Anplahas. (Kalatias 3:29; 4:28, 30) Nyob ntawm Chivkeeb 22:18 Yehauvas qhia li no txog lo lus cog tseg. Nws hais li no: “Kuv yuav foom koob hmoov tawm ntawm koj cov xeebntxwv mus rau txhua haivneeg uas nyob thoob ntiajteb, vim koj mloog kuv lus.”

Lo lus cog tseg rau Anplahas, kuj qhia ntxiv txog lo lus cog tseg uas Yehauvas hais nyob hauv lub vaj Edees. (Chivkeeb 3:15) Peb kawm tau tias hauv nqe no “tus xeebntxwv” yuav los ntawm Anplahas caj ces los. Povlauj piav qhia tias tus “xeebntxwv” yog hais txog Yexus Khetos. Tiam sis cov uas “ua Khetos li tub qhe,” uas yog pab 144,000 leej yuav ua vaj ntxwv nrog Yexus kav saum ntuj, lawv kuj yog ib feem ntawm caj ces no thiab. (Kalatias 3:16, 29; Tshwmsim 14:1-3) Cov uas txais yuav thiab mloog Yexus lus, yuav tau txais tej koob hmoov zoo kawg li, vim Vajtswv lo lus cog tseg rau Anplahas.

Povlauj pab kom peb to taub li cas txog zaj “yeeb yam ua piv txwv”? Nws xav kom cov Yudais uas nyob rau nws tiam to taub tias, yog lawv pheej xav coj raws li Mauxes Txoj Kev Cai, ces lawv zoo li tus ntxhais qhev Hankas. Tiam sis yog tias lawv txais yuav Anplahas tus “xeeb ntxwv,” tus uas tseem ceeb tshaj uas yog Yexus Khetos, ces lawv zoo li Xalas uas yog tus poj niam tsis ua qhev. Lawv yuav dim lub txim txhaum thiab txoj kev tuag. (Yauhas 8:32-34) Yog tias lawv tsis txais yuav Yexus, ces twb yog lawv tsis to taub txog lub ntsiab rau Mauxes Txoj Kev Cai, uas yog coj lawv mus rau Khetos.

Coob tus Khixatias uas nyob hauv Kalatias, uas Povlauj sau nws tsab ntawv mus rau tsis yog neeg Yudais, thiab lawv yeej ib txwm tsis tau coj raws li Mauxes Txoj Kev Cai. Muaj ib co Yudais hauv lub koom txoos pheej hais tas zog kom lawv ua raws li Mauxes Txoj Kev Cai, uas yog kom lawv yuav tsum ua kev cai txiav. Povlauj thiaj piav qhia tias, tsis muaj qab hau yuav ua li ntawd. Lawv twb txais yuav Yexus Khetos lawm, yog li lawv tsis ua “cev qhev” rau lub txim txhaum lawm.​—Kalatias 5:1, 10-14.