PEB KAWM TAU LI CAS LOS NTAWM PHAU VAJLUGKUB

Cov Vas Ntaus Ntses

Yog koj nyeem phau Vajlugkub, koj pom tias Yexus ib co tub txib yog neeg ntaus ntses coj mus muag los yug lawv lub cuab lub yig. (Malakaus 1:16-20) Lawv yeej siv cov vas ntaus ntses nyob ntawm ntug Hiav Txwv Kalilais.

Tib neeg muab tej xov, tej hlua los sis tej hom nroj tsuag uas ua tau ntaub, coj los sib khi sib rig kom ua tau cov vas ntaus ntses. Yuav ua lub vas loj vas me, los nyob ntawm tus neeg ntaus ntses. Yog nws xav txhom cov ntses loj los sis cov ntses me, ces nws mam rig los sis khi lub vas ua cov qhov loj los sis cov qhov me. Muaj ob hom vas lawv siv ntaus ntses. Hom xub thawj yog hom vas me kheej kheej thiab tib neeg muab pob zeb los sis muab qe hlau khi ncig rau lub vas, kom thiaj tog mus tau rau hauv dej. Ces hom vas loj yog ib lub vas ntev ntev uas zoo li ib sab phab ntsa. Tib neeg muab tej yam hnyav khi rau sab hauv qab, hos muab tej yam sib sib uas ntab tau, khi rau sab saum. Lawv ua li no kom yav hauv tog rau hauv dej, hos yav saud ntab saum nplaim dej, ces cov neeg txhom ntses mam rub lub vas kom cov ntses los daig rau cov qhov.

Cov vas ntaus ntses yeej tsis pheej yig, kim kawg li. Tej thaud muaj cov pob zeb nyob hauv qab thu dej ua rau lub vas ntuag tau, los sis yog txhom tau tej tug ntses loj dhau ces kuj ua rau lub vas ntuag tau thiab. (Lukas 5:6) Phau Vajlugkub hais tias Yakaunpaus thiab Yauhas tab tom “ntxiv lub vas.” Qhov uas ntxiv lub vas, lawv siv ib rab koob thiab xov los ntxiv. (Mathais 4:21) Cov neeg ntaus ntses yeej nquag ua li no tom qab uas lawv ntaus ntses tas. Lukas piav qhia tias, cov neeg nuv ntses tawm mus “tsaug lawv cov vas” kom tshem tau tej ub tej no ntawm lub vas mus. (Lukas 5:2) Ces tom qab ntawd, lawv muab lub vas dai ziab kom qhuav, kom lub vas thiaj tsis lwj.​—Exekees 47:10.

Yexus caw cov txiv neej uas txawj ntaus ntses kom raws nws qab, nws yuav qhia kom lawv “txawj nrhiav neeg” ib yam li lawv txawj ntaus ntses.