Tuav Kev Phooj Ywg Kom Ruaj

1. Peb nrhiav tau cov tseem phooj ywg qhov twg?

UA NEEJ nyob rau tiam kawg no yeej nyuaj kawg li tiam sis yog peb tsis muaj tej phooj ywg zoo mas haj yam nyuaj. Yehauvas yeej paub li no, nws thiaj pub peb muaj tej tseem phooj ywg nyob hauv peb tej koom txoos! (Phau Ntawv Nkauj 119:63) Peb muaj ib feem nrog ib tsev neeg teev tiam Yehauvas ua ke thiab muaj txoj kev sib hlub.

2. Peb yuav cog txoj kev phooj ywg zoo li cas nrog cov kwv tij nkauj muam?

² Qhov uas peb cog kev phooj ywg nrog peb cov kwv tij nkauj muam tsis yog peb lam tau lam cog xwb. Peb yeej xav cog txoj kev phooj ywg kom ruaj khov nrog lawv. Peb koom nrog ib tse neeg uas hlub thiab teev tiam Yehauvas, thiab peb kuj hlub Yexus. Txoj kev hlub no pab tau peb muaj kev koom siab koom ntsws. (Yauhas 13:35) Txoj kev sib raug zoo tsis yog cia li lam muaj. Peb yuav tau siv dag siv zog cog kev phooj ywg thiaj muaj tau kev sib raug zoo. Thiab vim peb yog neeg zoo tsis tiav ces peb txoj kev phooj ywg yeej yuav muaj tau teeb meem.

3. Yog vim li cas nyuaj rau peb tuav rawv kev sib raug zoo nrog cov kwv tij nkauj muam?

³ Muaj tseeb tias peb yuav nrog tej tug kwv tij nkauj muam sib raug zoo dua tej tug. Yog vim li cas? Vim tias muaj tej tug nyiam li peb nyiam los sis coj muaj ntsis xws li peb, ces yuav ua rau peb nrog lawv sib raug zoo dua. Tiam sis yuav muaj tej tug hauv peb lub koom txoos uas nyuaj rau peb sib raug zoo nrog. Muaj tej lub sij hawm peb thiab lawv hais tsis sib haum ces yuav ua rau peb tsis nyob ze lawv. Los sis muaj tej tug coj txawv peb los yog nyiam tej yam uas peb tsis nyiam, ces ua rau peb xav tias peb tsis xav nrog lawv ua ke. Los yog muaj tej tug muaj mob muaj nkeeg los sis muaj kev nyuaj siab, ces yuav nyuaj zog muaj txoj kev sib raug zoo. Hauv zaj kawm no peb yuav mus kawm txog Yexus tus qauv, seb thaum nyuaj peb yuav ua li cas peb thiaj tseem tuav rawv kev sib raug zoo nrog cov kwv tij nkauj muam. Tab sis ua ntej no, cia peb mus kawm seb peb yuav xyaum coj li Yehauvas li cas, peb sawv daws thiaj muaj kev sib raug zoo.

COJ LI YEHAUVAS PAB PEB TUAV TAU KEV PHOOJ YWG

4. Yuav ua li cas peb txoj kev phooj ywg thiaj ruaj khov?

⁴ Yuav kom txoj kev phooj ywg ruaj khov peb yuav tau xam pom luag qhov zoo. Yog peb lauj sij hawm nrog cov kwv tij nkauj muam ua ke, peb yuav pom lawv qhov zoo. Tus tub txib Povlauj los muaj lub siab ntshaw plias xav mus koom nrog cov kwv tij nkauj muam. Nws thiaj sau mus rau lub koom txoos nyob hauv Thexalaunikas li no tias: “Peb thiaj nrhiav nrhw kev kom rov tau pom nej tim ntsej tim muag.” (1 Thexalaunikas 2:17) Coob tus pom tias yog sib txuas lus tim ntsej tim muag txhawb, tau txoj kev phooj ywg kom ruaj khov dua. Peb ua tau li no thaum peb mus tshaj tawm ua ke, mus tej kev sib txoos, mus tej rooj sib txoos ib hnub thiab peb hnub. Tiam sis txawm peb tuaj sib sau ua ke los tsis tau txhais tias peb ib leeg yuav tsis muaj teeb meem nrog ib leeg.

5. Piav seb thaum nyuaj, dab tsi pab tau kom peb tuav rawv txoj kev sib raug zoo nrog lwm tus? (Kaulauxis 3:12)

⁵ Yog peb coj li Yehauvas, thaum muaj kev tsis sib haum xeeb, los peb thiaj yuav tuav rawv txoj kev phooj ywg. (Nyeem Kaulauxis 3:12.) Tsis tas li ntawd, yog peb ua neeg txo hwj chim, ua lub siab ntev, ua lub siab zoo, thiab muaj lub siab hmov tshua, ces yuav pab tau peb daws teeb meem thiab tuav rawv kev phooj ywg. Cia peb muab piv li no, lub tshuab uas ua kom lub tsheb ciaj yuav tsum muaj cov roj thiaj khiav tau tus yees. Zoo tib yam li ntawd, yuav kom peb muaj kev sib haum xeeb peb yuav tau coj tus xeeb ceem zoo li tus Khixatias. Cia peb mus tham txog peb yam uas yuav ua nyuaj rau peb ib leeg nrog ib leeg sib raug zoo. Peb yuav tham txog ib qho zuj zus, thiab yuav mus tham tias yog peb xyaum Yexus tus qauv xws li, txo hwj chim, ua siab ntev, ua siab zoo, thiab ua siab mos siab muag, yuav pab tau peb ua ib tug phooj ywg zoo rau lwm tus.

THAUM HAIS TSIS SIB HAUM

6. Kev tsis sib haum xeeb rhuav tau kev phooj ywg li cas?

⁶ Vim li cas nyuaj? Thaum hais tsis sib haum, nyias yuav xav tias nyias qhov thiaj yog. Muab xav tias muaj ob tug kwv tij hais tsis sib haum txog qhov uas seb cov kwv tij nkauj muam yuav mus tshaj tawm li cas. Nyias xav tias nyias qhov zoo dua. Nej puas pom tias qhov nkawd nyias muaj nyias ib txoj kev xav, yuav ua tau teeb meem rau nkawd txoj kev sib raug zoo? Tej zaum yuav ua rau nkawd ib leeg tsis nco qab txo hwj chim rau ib leeg. Yog nkawd tsis los sib tham kom sib nkag siab, tej zaum yuav ua rau ib leeg cib nyeej rau ib leeg. Ces ntev mus ntev tuaj, nkawd txoj kev sib raug zoo yuav nrug deb zuj zus thiab yuav plam txoj kev phooj ywg los muaj, vim tim qhov nyuag teeb meem me me ntawd xwb.

7. Yexus cob qhia nws cov thwj tim tias kev txo hwj chim yuav pab tau lawv li cas thaum muaj kev tsis sib haum xeeb?

⁷ Xyaum txo hwj chim li Yexus. Yexus cob qhia nws cov thwj tim tias thaum lawv muaj kev tsis sib haum xeeb, yuav kom daws tau teeb meem lawv yuav tau ua neeg txo hwj chim. Yexus cov thwj tim twb sib cam tau ntev loo tias lawv tus twg yog tus loj dua. Yuav kom pab tau lawv tsis txhob xav li ntawd, Yexus thiaj li ua tib zoo qhia rau lawv tias, lawv yuav tsum muab lwm tus saib hlob dua lawv. (Mathais 20:25-28) Twb yog Yexus ntuas kom lawv ua neeg txo hwj chim. Txawm twb yog hmo ua ntej luag yuav coj Yexus mus tua, los Yexus tseem mus ntxuav nws cov thwj tim ko taw “ua qauv tseg” rau lawv xyaum. Tseeb tiag tes hauj lwm no yog ib tug tub qhe tes hauj lwm. (Yauhas 13:3-5, 12-16) Qhov uas Yexus ua li ntawd, qhia kom lawv ua neeg txo hwj chim lawv thiaj muaj kev sib raug zoo. Thiab yog lawv muab lwm tus saib hlob dua lawv, ces thaum nyias xav nyias ib yam, los ib leeg thiaj zam tau ib leeg. Tsis tas li ntawd, lawv ib leeg thiaj nyob ze ib leeg thiab thiaj tuav rawv txoj kev phooj ywg.

8. Kev txo hwj chim pab tau koj tuav rawv txoj kev sib raug zoo nrog cov kwv tij nkauj muam li cas thaum hais tsis sib haum? (Kaulauxis 3:13) (Saib cov duab.)

⁸ Yuav ua li cas thiaj tuav rawv txoj kev phooj ywg? Yog koj ua neeg txo hwj chim ces thaum koj thiab lwm tus hais tsis sib haum, los koj yuav zam tau nws lub txim. (Nyeem Kaulauxis 3:13.) Ntxiv ntawd, yuav pab tau koj tsis lam tau lam npau taws, thiab yuav pab tau koj saib txoj kev phooj ywg muaj nqis dua. (Phau Ntawv Nkauj 4:4) Txawm tias neb ib leeg hais tau siab ib leeg lawm los, nco ntsoov tias peb txhua tus yeej tau hais tej yam uas peb xav txog lig. (Tej Lus Qhia 7:21, 22) Koj yuav tau nug koj tus kheej li no, ‘Kuv txoj kev sib raug zoo nrog kuv tus kwv tij nkauj muam tseem ceeb dua, los sis qhov uas kuv hais tias kuv yog, yog qhov tseem ceeb dua?’ Koj cia li zam es ua li nws hais xwb los yeej tsis ua li cas. Tsis txhob muab tej qub lus uas neb hais tsis sib haum coj rov los hais ntxiv lawm, yav tom ntej los txhob hais txog lawm thiab.

9. Yog nyuaj daws ib qho teeb meem uas neb muaj, kev txo hwj chim yuav pab tau neb li cas? (Pajlug 17:9)

⁹ Kev txo hwj chim yuav pab tau koj thaum muaj ib qho teeb meem uas nyuaj daws. Tsis txhob sib cam kom muaj yeej muaj swb. (Nyeem Pajlug 17:9; 1 Kauleethaus 6:7) Nco ntsoov tias neb txoj kev sib raug zoo tseem ceeb dua. Muaj coob tus pom tias thaum yus ua tib zoo mus nrog tus uas yus hais tsis sib haum tham, yuav daws tau teeb meem zoo dua. (Phau Ntawv Nkauj 34:14) Thaum koj mus nrog nws tham, koj kuj hais tau li no: ‘Wb twb ua phooj ywg tau ntev loo lawm. Cia wb ua tib zoo sib tham kom sib to taub?’ Koj kuj hais thov txim thiab lees tias tej zaud koj tau ua tej yam uas tsis zoo rau nws lawm thiab. Yog hais tias tus kwv tij los sis tus nkauj muam thov txim rau koj thiab, ces neb ib leeg ua lub siab dawb paug zam txim rau ib leeg. (Lukas 17:3, 4) Nco ntsoov tias, lub hom phiaj yog kho kom neb txoj kev sib raug zoo ruaj khov, tsis yog tias tus twg ua yog thiab tus twg ua tsis yog.​—Pajlug 18:24.

THAUM IB TUG NYIAM LOS SIS XAV TXAWV IB TUG

10. Dab tsi ua nyuaj kom peb tsis muaj kev sib raug zoo nrog lwm tus?

¹⁰ Vim li cas nyuaj? Tej zaum nyuaj rau peb nrog tej tug kwv tij nkauj muam sib raug zoo vim nyias nyiam nyias ib yam. Muaj tej tug yuav muaj tus cwj pwm uas ua rau peb xeeb txob. Hos muaj tej tug txaj txaj muag vim rau qhov yav tas los lawv ntsib kev tsis ncaj ncees, los sis tej zaud lawv yog ib haiv neeg uas tsis tshua hais lus, los sis lawv ho yog ib tug uas kheev tham dhau. Los sis peb nyias txawv nyias xwb, vim ib co nyiam nrog lwm tus ua ke thiab tham pem hos ib co tsis tshua nyiam tham thiab txaj muag xwb.

11. Yexus tuav rawv kev sib raug zoo nrog cov uas coj txawv nws li cas?

¹¹ Xyaum ua siab ntev li Yexus. Yexus yeej tuav rawv kev sib raug zoo nrog cov uas coj thiab xav txawv nws. Xws li, tus tub txib Yakaunpaus thiab Yauhas ua qhia tias nkawd xav ua ob tug uas tseem ceeb dua lwm tus. Nkawd thiaj mus nug Yexus kom cia ib tug zaum ntawm nws sab xis hos ib tug zaum ntawm nws sab laug thaum Yexus ua vaj ntxwv kav lub Nceeg Vaj. (Malakaus 10:35-37) Yexus tsis coj li nkawd, txawm nws tuav ib tes hauj lwm tseem ceeb nyob saum ntuj ceeb tsheej, los nws txo hwj chim muab tes hauj lwm ntawd tso tseg los yug ua neeg nyob hauv ntiaj teb. (Filipis 2:5-8) Yakaunpaus thiab Yauhas coj txawv ntawm Yexus! Txawm li los, Yexus ua siab ntev rau nkawd thiab rau lwm tus.

12. Dab tsi pab tau Yexus ua siab ntev rau nws cov tub txib?

¹² Yexus paub tias nws cov phooj ywg yuav coj tsis tau zoo txhua lub sij hawm. Thiab nws paub tias qhov uas Yakaunpaus thiab Yauhas nkawd coj li ntawd, los twb vim yog cov tub txib sib txeeb ua tus loj. (Malakaus 9:34) Yexus thiab nws cov tub txib yeej yog ib haiv neeg, thiab loj hlob hauv tib txoj kev coj noj coj ua. Lawv cov thawj coj tiam ntawd txhawb kom tib neeg yuav tsum tuav ib tes hauj lwm tseem ceeb, lawv thiaj muaj koob nto npe. Yexus yeej paub li ntawd, nws thiaj to taub cov tub txib txoj kev xav. Nws thiaj ua siab ntev rau lawv thiab muab sij hawm rau lawv hloov lawv txoj kev xav uas cog ruaj cog khov tau ntau xyoo lawm.​—Malakaus 10:42-45.

13. Qhov uas peb ua siab ntev pab tau peb txoj kev phooj ywg li cas? (Efexaus 4:2)

¹³ Yuav ua li cas thiaj tuav rawv txoj kev phooj ywg? Kav tsij xyaum tiag kom koj ua tau lub siab ntev, koj thiaj uv taus tej tug uas muaj tus cwj pwm uas coj tau xeeb txob koj. (Pajlug 14:29) Peb txhua tus nyias coj txawv nyias, tsis yog tias peb yog neeg phem tiam sis vim peb yeej yug los zoo li ntawd. Yog li yeej tsim nyog peb ris cov kwv tij nkauj muam tus txiaj tus ntsig tias lawv tseem ua siab ntev rau peb. (Nyeem Efexaus 4:2.) Txhob coj nruj dhau, cia nyias coj raws li nyias tus cwj pwm. Peb yuav tau txawj xav txog cov uas txaj txaj muag thiab. Txawm nyuaj rau lawv los, lawv twb ua npaum li lawv ua tau mus nrog lwm tus sib txuas lus. Hos peb yuav tau ua siab ntev rau cov uas kheev kheev tham thiab hais lus ntau ntau. Peb paub tias peb yuav nrog tsis tau txhua tus sib raug zoo zoo, tiam sis nco ntsoov tias peb txhua tus yeej nyob tau sib haum xeeb.

14. Yog peb ua siab ntev peb yuav xam pom dab tsi ntawm peb cov kwv tij nkauj muam?

¹⁴ Qhov uas peb ua siab ntev pab tau peb tsom ntsoov qhov zoo ntawm cov kwv tij nkauj muam. Yog peb ua li no, peb yuav tsis saib ntsoov qhov uas luag coj txawv peb, peb thiaj yuav muaj kev sib raug zoo. Txawm Yakaunpaus thiab Yauhas xav ua tus tseem ceeb thiab muaj meej mom, los nkawd tus cwj pwm qhia tau tias, nkawd yeej pom tias Vajtswv lub Nceeg Vaj yeej muaj tiag. Yexus pom muaj li ntawd, nws thiaj ris txiaj ntsig rau nkawd txoj kev ntseeg. Yog peb xam pom qhov zoo ntawm peb cov kwv tij nkauj muam, ces twb yog peb xyaum Yexus thiab nws Leej Txiv Yehauvas.

15. Peb yuav thov leej twg pab kom peb thiaj muaj kev sib raug zoo nrog tej tug uas coj txawv peb?

¹⁵ Qhov tseem ceeb peb yuav tau yim huab thov Yehauvas pab kom peb muaj kev sib raug zoo nrog cov uas coj txawv peb. Ntxiv ntawd peb yuav tau muab xav ua ntej tias peb yuav coj li cas, yog muaj tej tug coj tau xeeb txob peb. Thiab yog peb paub tias peb yuav mus nrog ib tug uas coj tau meem txom peb, ces zoo rau peb thov Vajtswv pab peb ua ntej kom peb ua tau lub siab tus. Nco ntsoov tias Yehauvas uas yog tus Tswv Tsim, nws yeej to taub tias peb txhua tus nyias yeej coj txawv nyias. Yog li thaum peb thov Yehauvas pab, tso siab plhuav tias nws yeej paub peb cheem tsum dab tsi peb thiaj ua lub siab ntev thev taus. Hos yog thaum nyuaj dhau es ua rau peb rub tsis taus lub siab ntev lawd, peb yuav tau thov Yehauvas pub nws lub hwj huam pab peb, kom peb tswj tau peb lub siab txhob lam ua tej yam uas ua rau lwm tus tu siab.​—Lukas 11:13; Kalatias 5:22, 23.

THAUM MUAJ MOB MUAJ NKEEG LOS SIS NYUAJ SIAB

16. Vim li cas thiaj nyuaj thaum ib tug kwv tij nkauj muam muaj mob muaj nkeeg los sis nyuaj siab?

¹⁶ Vim li cas nyuaj? Thaum ib tug kwv tij nkauj muam muaj mob muaj nkeeg los sis muaj kev nyuaj siab ntxhov plawv, tej zaud lawv yuav hais los sis ua tau tej yam uas ua nyuaj rau peb uv. Xws li tias lawv yuav xav nyob lawv ib leeg, tsis xav nrog leej twg sib txuas lus, los sis lawv yuav ua tau tej yam uas ua rau peb xav tsis thoob. Los yog lawv yuav hais tau tej lus uas mob peb siab. (Yauj 6:2, 3) Ntshe peb cov kwv tij nkauj muam twb muaj kev nyuaj siab tsis txawj tag uas peb twb tsis paub txog. Yog li peb yuav tsum to taub li no, es tsis txhob xav kom lawv coj tau raws li peb lub siab nyiam.

17. Koj kawm tau li cas los ntawm qhov uas Yexus coj rau Npathimias uas yog tus neeg dig muag?

¹⁷ Xyaum muaj lub siab zoo thiab lub siab hmov tshua li Yexus. Yexus muaj lub siab zoo thiab lub siab hmov tshua rau cov uas muaj kev nyuaj siab tab txawm tias nws twb tsis tau paub lawv dua li. Cia peb xav txog seb Yexus coj li cas thaum nws ntsib tus txiv neej dig muag. Thaum nws hnov tias Yexus dua kev tuaj, nws qw nrov nrov kom Yexus hnov nws. Pab neeg coob coob ntawd, muaj ib co hais rau Npathimias kom nws nyob twj ywm txhob qw nrov nrov. Tiam sis nws xav xav kom Yexus kho nws, nws haj yam qw nrov nrov. Pab neeg ntawd puas muaj ib co xeeb txob txog qhov uas nws ua li ntawd? Tej zaum muaj. Txawm li los, Yexus “hlub [nws] heev,” lo lus hlub no yog hais txog tias Yexus hmov tshua txog Npathimias kawg li. (Mathais 20:34; Malakaus 10:46-52) Yexus ua tib zoo hais lus rau Npathimias thiab Yexus pom tias nws yeej muaj kev ntseeg heev. Yexus thiaj ua txuj ci kho kom nws zoo, nws thiaj pom kev.

18. Koj yuav coj li cas rau cov phooj ywg uas muaj mob muaj nkeeg los sis muaj kev nyuaj siab? (1 Thexalaunikas 5:14)

¹⁸ Yuav ua li cas thiaj tuav rawv txoj kev phooj ywg? Peb yuav tau muaj lub siab zoo thiab lub siab hmov tshua. Yog peb muaj ob tug xeeb ceem no yuav pab tau peb txawj “hais lus mos lus muag nplig” cov kwv tij nkauj muam uas muaj mob muaj nkeeg los sis muaj kev nyuaj siab. (Nyeem 1 Thexalaunikas 5:14.) Nco ntsoov tus phooj ywg zoo yeej npaj txhua lub sij hawm pab lwm tus, tshwj xeeb tshaj yog thaum “muaj kev txomnyem.” (Pajlug 17:17) Ib tug phooj ywg uas zoo tsis yog yuav hais lo lus qhuav qhuav xwb, tiam sis nws yuav ua npaum li nws ua tau los txhawb, los nplig thiab tseem yuav ua npaum li nws ua tau los pab nws tus phooj ywg.

19. Peb yuav ua li cas thiaj qhia tias peb ua zoo thiab hmov tshua txog lwm leej lwm tus? (Saib cov duab.)

¹⁹ Koj yuav ua li cas thiaj qhia tias koj hmov tshua thiab xav ua zoo rau lwm tus? Yeej paub tias koj tshem tsis tau koj cov kwv tij nkauj muam tej kev nyuaj siab thiab kev mob kev nkeeg. Tiam sis koj yeej ua qhia tau tias, koj to taub txog tej uas lawv tab tom raug, thiab tej ntawd ua rau lawv xav li cas. (Mathais 7:12; 1 Petus 3:8) Ua tib zoo mloog thaum lawv qhib siab piav qhia rau koj. Yog zoo caij zoo nyoog, hais tej lus zoo los nplig lawv siab. (Pajlug 12:25) Koj yuav tau ceev faj txhob xav tias koj to taub txhua yam uas lawv raug. (Pajlug 18:13) Ua lub siab ntev rau lawv thiab tsis txhob xav kom lawv coj tau raws li koj lub siab xav.​—Efexaus 4:32.

20. Koj xav ua ib tug phooj ywg zoo li cas?

²⁰ Peb yeej saib peb txoj kev sib raug zoo nrog cov kwv tij nkauj muam muaj nqis. Tiam sis peb yuav tau nco ntsoov tias peb yog neeg txhaum, thiab peb ib txhia raug tej yam tsis zoo yav tas los hauv peb lub neej, ces muaj tej thaud peb thiaj ua tau los sis hais tau tej yam uas ua rau lwm tus tu siab. Peb yeej zoo siab tsis txawj tag tias peb cov kwv tij nkauj muam tseem txo hwj chim, ua lub siab ntev, coj zoo, thiab muaj lub siab hmov tshua tuav rawv txoj kev sib raug zoo nrog peb. Cia peb txhua tus siv zog coj cov cwj pwm zoo no, kom peb thiaj ua tau ib tug phooj ywg zoo rau peb cuab kwv tij nkauj muam.