Npuab Siab Rau Yehauvas Thaum Txoj Kev Ntseeg Raug Sim

1-2. Muaj li cas thaum Yexus qhia nyob hauv lub nroog Khapena-us?

MUAJ ib hnub Yexus tab tom qhia ib pab neeg nyob hauv lub nroog Khapena-us. Nws hais rau lawv tias: “Yog nej tsis noj neeg Leej Tub cev nqaij thiab haus nws cov ntshav, nej yuav tsis tau txoj sia.” Yexus kuj hais ntxiv tias: “Tus uas noj kuv cev nqaij thiab haus kuv cov ntshav yuav tau txoj sia ntev dhawv mus ib txhis, thiab kuv yuav tsa nws ciaj sawv rov los rau hnub kawg.” (Yauhas 6:53, 54) Yexus cov thwj tim coob tus tsis nyiam tej uas nws qhia. Lawv hais tias: “Nws qhia txawv dhau, leej twg yuav xav mloog?”​—Yauhas 6:60.

² Cov uas tsis nyiam qhov uas Yexus qhia txawm tso Yexus tseg tsis raws nws qab lawm. Puas yog lawv tsis muaj kev ntseeg rau nws li? Qhov tiag, ua ntej Yexus qhia li no rau lawv, lawv ib co ntawd txaus siab heev rau tej uas Yexus ua. Lawv thiaj hais tias: “Tus no yeej yog tus cev Vajtswv lus uas cog tseg tias yuav los hauv lub qab ntuj no.” (Yauhas 6:14) Yog li qhov no qhia tau tias, cov thwj tim no yeej muaj kev ntseeg rau Yexus. Tiam sis thaum lawv txoj kev ntseeg raug sim, lawv tsis muaj lub siab npuab Yexus tiag.

3. Yexus cov tub txib coj li cas tom qab lawv hnov Yexus cov lus tas? (Saib daim duab.)

³ Tiam sis Yexus cov tub txib coj txawv cov thwj tim ntawd, lawv npuab siab rawv rau Yexus. Thaum Yexus nug cov tub txib tias puas yog lawv yuav tso nws tseg thiab, Petus thiaj teb ntua tias: “Tus Tswv, peb yuav thim rov qab mus cuag leej twg? Koj thiaj qhia txog txoj sia ntev dhawv mus ib txhis xwb. Peb yeej ntseeg thiab paub tias koj yog tus Tub Qhe Dawb Huv uas Vajtswv txib los.” (Yauhas 6:68, 69) Txawm thaum ntawd Petus thiab cov tub txib tsis to taub txog qhov uas Yexus hais kom lawv noj nws cev nqaij thiab haus nws cov ntshav, los lawv yeej tseem npuab siab rawv rau Yexus. Vim li cas? Vim rau qhov lawv ntseeg tias Yexus yeej yog “tus Khetos uas Vajtswv txib los.”​—Lukas 9:20, 35.

4. Peb txoj kev npuab siab rau Vajtswv yuav raug sim li cas?

⁴ Yuav muaj ntau yam los sim peb txoj kev npuab siab rau Yehauvas. Xws li peb yuav coj li cas thaum muaj ib txoj kev to taub tshiab txog ib nqe Vajlugkub, los sis muaj ib txoj kev hloov tshiab txog peb tes hauj lwm mus tshaj tawm? Los sis thaum peb raug ib txoj kev nyuaj siab es peb tsis to taub tias yog vim li cas Yehauvas thiaj cia peb raug? Tsis tas li ntawd, peb txoj kev npuab siab rau Vajtswv kuj yuav raug sim thaum ib tug kwv tij nkauj muam uas peb sib raug zoo nrog hais los sis ua tej yam uas siab peb. Los yog muaj ib tug uas peb hwm thiab saib taus ua los sis hais tej yam uas tsis ncaj ncees rau peb.

5. Piav seb vim li cas peb yuav tau txhawb kom peb txoj kev ntseeg nyob ruaj khov? (Kaulauxis 1:23)

⁵ Yuav kom peb npuab siab rau Yehauvas twj ywm cia peb muab piv li no. Nyob rau ib thaj chaw uas nquag muaj av qeeg, yuav kom ib lub tsev nyob ruaj khov khwb kho yuav tau ua lub plag tsev kom ruaj khov, kom thaum muaj av qeeg los thiaj tsis vau yooj yim. Qhov uas peb npuab siab rau Vajtswv kuj zoo tib yam li ntawd. Peb yuav tau txhawb peb txoj kev ntseeg kom nyob ruaj khov rau ntawm Yehauvas. Yog thaum peb ntsib tej teeb meem uas zoo li hais nyob hauv nqe tas los no peb thiaj yuav sawv khov kho thiab npuab siab rawv rau Yehauvas.​—1 Kauleethaus 15:58; nyeem Kaulauxis 1:23.

6. Dab tsi pab tau cov tub txib npuab siab rawv rau Yexus?

⁶ Txawm lwm cov tso Yexus tseg tag lawm los, dab tsi pab tau Yexus cov tub txib npuab siab rawv rau nws? Twb yog cov tub txib ntseeg tag siab nrho tias, yeej tsim nyog lawv pe hawm Yehauvas tus uas tsim ib puas tsav yam. Thiab lawv ntseeg tias Yexus yog Vajtswv tus Tub, thiab yog lawv mloog nws lus ces lawv yuav tau txoj sia ntev dhawv mus ib txhis. Yeej muaj ntau yam yuav los sim peb txoj kev ntseeg, tiam sis cia peb mus kawm txog peb yam uas pab tau peb npuab siab rawv rau Vajtswv. Peb yam ntawd yog: (1) Yehauvas yog tus tsim ib puas tsav yam. (2) Yehauvas yog tus tshoov neeg sau phau Vajlugkub. (3) Yehauvas siv nws lub koom haum los ua nws tes hauj lwm niaj hnub nim no. Yog peb ntseeg ruaj nreeg tias muaj tseeb raws li peb yam no, thaum peb txoj kev ntseeg raug sim los peb yuav npuab siab rawv rau Yehauvas.

YEHAUVAS YOG TUS TSWV TSIM

7. Tshwmsim 4:11 pab tau peb nco ntsoov li cas thiab yuav pab tau peb li cas thaum peb txoj kev ntseeg raug sim?

⁷ Nyeem Tshwmsim 4:11. Nqe Vajlugkub no qhia rau peb tias Yehauvas yog tus uas tsim ib puas tsav yam. Vim li no thiaj tsim nyog peb pe hawm nws. Thiab thaum peb ua tib zoo xav txog nws lub hwj chim uas loj kawg nkaus, peb ntseeg tau tias txawm peb yuav raug tej teeb meem twg los nws yeej yuav pab tau peb. Tiam sis peb paub tias Xatas muab ntau yam los dag ntxias tib neeg tias tsis muaj Vajtswv. Txawm tej neeg tshawb txuj los qhia tias, txoj sia cia li rhawv los xwb tsis muaj tus tsim. Yog peb tseem ua xyem xyav tias xyov Yehauvas puas yog tus Tswv Tsim thiab xyov nws puas hlub peb, ces thaum peb txoj kev ntseeg raug sim peb yuav tsis tso siab tias nws yuav pab peb.​—Henplais 11:6.

8-9. Yog koj pheej ua xyem xyav tias xyov puas muaj tus Tswv Tsim tiag ces koj yuav tau ua li cas? (Saib daim duab.)

⁸ Yog koj ua xyem xyav tias xyov Yehauvas puas yog tus Tswv Tsim, koj yuav tau maj nroos mus tshawb peb tej ntaub ntawv thiab mus kawm txog lub ntsiab no. Yog koj ua li no, koj yuav pom tias yeej muaj pov thawj qhia tias Yehauvas yeej yog tus uas tsim ib puas tsav yam. Koj kuj mus tshawb nrhiav tej ntaub ntawv uas yuav txhawb tau koj txoj kev ntseeg kom ruaj nreeg.a Ntxiv ntawd, peb kuj muaj cov yeeb yaj kiab los sis cov ntaub ntawv uas muaj lub ntsiab hu ua “Puas Muaj Ib Tug Tsim?” uas koj mus kawm tau nyob hauv lub vej xaij jw.org. Ib tug muam hluas uas nyob teb chaws Yunaithim Xatej hu ua Ntsexikas (Jessica), nws hais li no: “Tom qab kuv nyeem phau ntawvb uas tham txog seb tib neeg rhawv los li cas, kuv pom tias tej uas hais hauv yeej qhia tsi ntsees tias muaj tus Tswv Tsim tiag. Kuv yeej paub li no lawm tiam sis tom qab kuv kawm phau no tag, ua rau kuv haj yam tso siab tias muaj tus Tswv Tsim tiag tiag.” Tsis tas li ntawd, muaj coob tus kuj mus kawm phau “Nyob Kaj Siab Lug Mus Ib Txhis!” zaj kawm 6 thiab 7. Tej zaum koj twb tau kawm phau no lawm tiam sis zoo rau koj rov mus kawm dua.

⁹ Tom ntej no yog koj yuav kawm ib yam tshiab rau koj tus kheej, zoo rau koj mus kawm txog lub ntsiab tias puas muaj Vajtswv tiag. Qhov uas koj mus kawm txog lub ntsiab no tsis yog txhawb kom koj ntseeg tias muaj Vajtswv xwb, tiam sis yuav pab koj pom tias Vajtswv muaj tej xeeb ceem zoo li cas thiab. (Loos 1:20) Ntxiv ntawd, koj tseem yuav muab tau tej uas koj kawm mus pab tus uas ua xyem xyav tias xyov puas muaj Vajtswv tiag. Yeej muaj ntau tsav ntau yam ua pov thawj qhia tias yeej muaj tus Tswv Tsim.

Nebula: IAC/RGO/David Malin Images; fish and car: Mercedes-Benz USA; plane: Kristen Bartlett/University of Florida

YEHAUVAS TSHOOV NEEG SAU PHAU VAJLUGKUB

10. Vim li cas phau Vajlugkub tseem ceeb rau peb? (2 Timautes 3:16, 17)

¹⁰ Nyeem 2 Timautes 3:16, 17. Phau Vajlugkub yog Yehauvas tej lus uas nws muab los qhia noob neej. Kuj qhia tias txoj sia rhawv li cas los, vim li cas muaj tib neeg, thiab Vajtswv lub ntsiab yog li cas thiab nws xav kom peb ua dab tsi. Peb ntseeg tias cov lus nyob hauv phau Vajlugkub yog Yehauvas tej lus. Yog li phau Vajlugkub thiaj tseem ceeb heev. Peb yuav tau kawm kom peb to taub txog nws Txoj Lus, thiab coj los siv hauv peb lub neej npaum li peb ua tau.

11. Dab tsi pab tau koj ruaj siab tias phau Vajlugkub yeej yog Vajtswv tshoov kom neeg sau?

¹¹ Vim li cas peb ruaj siab tias Yehauvas yog tus tshoov neeg sau phau Vajlugkub? Muaj ntau yam uas peb ruaj siab tau. Xws li phau Vajlugkub yeej qhia meej meej tias tau muaj dab tsi tshwm sim nyob yav thaum ub. (Lukas 3:1, 2) Tsis tas li ntawd, thaum hais txog tej huab cua thiab ib puas tsav yam nyob hauv ntiaj teb, los yeej qhia tau meej tseeb. (Yauj 26:7) Ntxiv ntawd txawm Xatas ua txhua yam los rhuav tshem phau Vajlugkub, los tseem muab phau Vajlugkub txhais thiab luam tawm ntau tshaj lwm phau ntawv. Muaj 40 tus txiv neej uas nyias nyob nyias ib lub sij hawm tau sau phau Vajlugkub, thiab siv kwv lam li 1,600 xyoo los sau thiaj sau tau tag nrho phau Vajlugkub. Txawm li los, yeej puav leej sau tau sib dhos daws. Txawm yuav nyob tiam twg lub sij hawm twg los phau Vajlugkub yeej pab tau tib neeg lub neej. (Pajlug 13:20; 15:21; Mathais 7:12) Muaj ntau zaj lus faj lem nyob hauv phau Vajlugkub twb muaj tiav lawm. Tej no ua tau pov thawj qhia rau peb tias, peb yeej tso siab plhuav tau rau phau Vajlugkub. (Yausuas 23:14) Muaj tseeb tiag, phau Vajlugkub yeej yog Vajtswv tshoov kom neeg sau!

12. Peb yuav ua li cas yog peb ua xyem xyav tias xyov puas yog Yehauvas tshoov kom neeg sau phau Vajlugkub?

¹² Peb yuav ua li cas yog peb pheej xav tias xyov phau Vajlugkub puas yog Vajtswv tshoov neeg sau? Yog muaj li no, peb yuav tau thov Vajtswv pab thiab mus tshawb nrhiav kawm ntxiv kom peb tsis txhob ua xyem xyav. Cia peb mus saib seb tau muaj li cas rau ib tug kwv tij hluas hu ua Ntsawdee (Jordan). Nws loj hlob hauv ib tsev neeg uas teev tiam Yehauvas. Nws hais li no: “Kuv yeej tsis lam tau lam ntseeg ib yam uas lwm tus qhia rau kuv. Kuv yog ib tug neeg uas yuav tau muab coj los ua tib zoo xav zoo zoo. Txawm kuv twb ntseeg tias muaj Yehauvas los tej thaud, kuv yeej tseem ua xyem xyav. Thaum zoo li ntawd, kuv mus tshawb nrhiav peb tej ntaub ntawv coj los kawm seb muaj li cas tiag thiaj pab tau kuv tsis ua xyem xyav lawm.” Yog peb paub vim li cas peb ruaj siab tias Yehauvas yeej yog tus tshoov neeg sau phau Vajlugkub, ces peb txoj kev ntseeg yuav nyob ruaj khov.​—1 Kauleethaus 3:12, 13.

YEHAUVAS NROG NRAIM NWS COV TIB NEEG

13. Yog peb ua xyem xyav tias xyov puas yog Yehauvas siv nws lub koom haum ua nws tes hauj lwm ces peb yuav tau ua li cas?

¹³ Yog peb tseem ua xyem xyav tias xyov puas yog Yehauvas siv nws lub koom haum los ua nws tes hauj lwm, ces peb yuav tau maj nroos nrhiav kev pab. Yuav kom pab tau peb txhob ua xyem xyav, peb nug tau li no: “Cov neeg twg yog cov uas siv zog ua lawv lub neej raws li phau Vajlugkub tej lus qhia? Pawg ntseeg twg thiaj qhia raws li phau Vajlugkub qhia? (2 Timautes 4:3, 4) Niaj hnub nim no leej twg thiaj ua raws li Yehauvas lub siab nyiam?​—Mathais 7:20, 21.

14. Yehauvas Cov Tim Khawv ua kom cov lus hais nyob ntawm Mathais 24:14 muaj tiav li cas?

¹⁴ Thaum hais txog ua raws li Vajtswv lub siab nyiam, peb nug tau peb tus kheej li no, ‘Nyob rau tiam kawg no, leej twg yog cov uas mus tshaj tawm txoj xov zoo thoob qab ntuj raws li Yexus sam hwm?’ (Mathais 24:14) Peb yeej paub meej tias Yehauvas siv nws cov neeg uas yog Yehauvas Cov Tim Khawv mus tshaj tawm txoj xov zoo. Tsuas yog Yehauvas Cov Tim Khawv xwb, thiaj mus tshaj tawm txoj xov zoo txog Vajtswv txoj kev kav, rau ntau tshaj li 240 lub teb chaws. Peb twb ua tes hauj lwm tshaj tawm txoj xov zoo ntev tshaj li 100 xyoo lawm. Muaj tseeb tias peb tau hau ntsoov ua tes hauj lwm uas tseem ceeb tshaj, uas yog mus tshaj tawm txoj xov zoo.​—Mathais 28:19, 20.

15. Yehauvas Cov Tim Khawv qhuas Yehauvas lub npe li cas? (Mathais 6:9; Yaxayas 43:10)

¹⁵ Nyeem Mathais 6:9 thiab Yaxayas 43:10. Peb tau lub npe hu ua Yehauvas Cov Tim Khawv, thiab peb yeej txaus siab hlo ua Yehauvas ib tug Tim Khawv. Tib neeg feem coob twb tsis paub tias Vajtswv lub npe hu ua Yehauvas. Peb zoo siab kawg li tias, peb muab Yehauvas lub npe tso rau hauv phau Vajlugkub li ib txwm tsim nyog muaj nyob rau hauv. Nyob hauv peb phau Vajlugkub Vajtswv Txoj Lus Rau Cov Nyob Lub Qab Ntuj Tshiab, Yehauvas lub npe kam tshwm ntau tshaj li 7,000 zaus.

16. Ua cas peb hais tau tias Yehauvas Cov Tim Khawv ua raws li cov lus sam hwm hais nyob ntawm Yauhas 13:34, 35? (Saib daim duab.)

¹⁶ Nyeem Yauhas 13:34, 35. Txawm lub ntiaj teb no sib faib ua pab ua pawg thiab ib leeg ntxub ib leeg, los peb cuab kwv tij muaj kev koom siab thiab sib hlub. Peb sawv daws nyias nyob nyias ib lub teb chaws, nyias muaj nyias kev coj noj coj ua, nyias muaj nyias ib lub neej, thiab nyias loj hlob txawv nyias. Txawm li los peb txhua tus yeej ua npaum li peb ua tau kom muaj kev sib haum xeeb thiab kev sib hlub. Thaum koj mus ncig xyuas lwm qhov chaw, koj puas tau mus koom ib txoj kev sib txoos? Yog koj twb mus koom lawm, koj yeej pom tias peb cuab kwv tij yeej muaj kev sib hlub thiab muaj kev sib haum xeeb. Qhov no qhia rau peb tias, yeej yog Yehauvas siv nws cov Tim Khawv los ua nws tes hauj lwm niaj hnub nim no. Yog peb nco ntsoov li no, txawm peb txoj kev ntseeg yuav raug sim li cas los xij, peb yuav npuab siab rawv rau Yehauvas.

TXHOB TSO YEHAUVAS TSEG

17-18. Peb yuav ntsib tej teeb meem twg, tiam sis peb yuav muaj peev xwm hais tau li cas?

¹⁷ Peb nyob rau tiam kawg lawm ces yim huab muaj kev nyuaj siab ntxhov plawv. (2 Timautes 3:1, 13) Tej zaud peb yuav ntsib tej teeb meem uas ua rau peb nyuaj siab. Los sis Yehauvas lub koom haum txiav txim ua tej uas ua nyuaj rau peb to taub. Los yog muaj ib tug kwv tij nkauj muam to taub peb yuam kev los sis hais tau tej yam uas siab peb. Tej zaum yuav daws tsis tau peb tej teeb meem tam sid, los sis peb tsis nkag siab tias yog vim li cas thiaj muaj li no los raug peb.

¹⁸ Txawm peb yuav raug tej kev nyuaj siab los, peb yeej npuab siab tau rau Yehauvas. Yog li, yuav kom peb npuab siab rawv rau Yehauvas, peb yuav tsum ntseeg tias Yehauvas yog tus Tswv Tsim, phau Vajlugkub yeej yog nws Txoj Lus tiag tiag, thiab Yehauvas Cov Tim Khawv yeej yog cov uas ua raws li nws lub siab nyiam. Ces peb thiaj yuav hais tau rau Yehauvas tib yam li Petus hais rau Yexus tias: “Tus Tswv, peb yuav thim rov qab mus cuag leej twg? Koj thiaj qhia txog txoj sia ntev dhawv mus ib txhis xwb.”