Peb Tseem Muaj Taus Kev Xyiv Fab Thaum Tu Lwm Tus

1-2. Yehauvas saib cov uas tu lwm tus zoo li cas? (Pajlug 19:17) (Saib cov duab.)

MUAJ ib tug kwv tij nyob rau Kaus Lim teb hu ua Ntseyaus (Jin-yeol) hais tias: “Kuv poj niam wb sib yuav tau 32 lub xyoos. Tsib lub xyoos dhau los no kuv poj niam muaj ib tug kab mob ua rau nws lub cev laim laima ces kuv thiaj yuav tau los nyob zov tu nws. Kuv hlub kuv poj niam kawg li thiab kuv txaus siab hlo tu nws. Txhua hmo nws pw lub txaj uas kws tshuaj muab rau nws ces kuv thiaj li mus kho chaw pw ntawm nws ib sab thiab tuav nws txhais tes pw tsaug zog.”

² Puas yog koj tab tom tu koj niam koj txiv, koj tus txij nkawm, me nyuam los sis koj ib tug phooj ywg? Koj yeej txaus siab hlo tu nws vim koj hlub nws heev. Tsis tas li ntawd, qhov uas koj tu no kuj qhia tau tias koj hlub Yehauvas koj thiaj tu. (1 Timautes 5:4, 8; Yakaunpaus 1:27) Tiam sis tej zaud luag tsis pom tias koj tu nws sab npaum li cas. Muaj qee lub sij hawm koj yuav xav tias tsis muaj leej twg nkag siab koj tej kev nyuaj siab ntxhov plawv li. Txawm koj tawm rooj plaws koj luag ntxhi los thaum rov qab los txog tsev, koj lub siab yeej quaj dhi. (Ntawv Nkauj 6:6) Nco ntsoov tias txawm tsis muaj leej twg pom koj tej kev nyuaj siab los Yehauvas yeej pom. (Muab piv rau Khiav Dim 3:7.) Yehauvas yeej saib koj txhua teev kua muag thiab tej koj ua rau tus ntawd tseem ceeb heev. (Ntawv Nkauj 56:8; 126:5) Yehauvas hais tias nws yeej yuav muab nqi zog rau tej uas koj tau ua.​—Nyeem Pajlug 19:17.

3. Tej zaum Anplahas thiab Xalas nkawd kuj muaj kev nyuaj siab li cas thaum nkawd tu nkawd txiv yawg?

³ Nyob hauv phau Vajlugkub yeej hais txog ntau tus uas tau tu lwm tus, xws li Anplahas thiab Xalas nkawd tsiv tawm hauv lub nroog Aws, nkawd kuj coj nkawd txiv yawg Thelas uas twb muaj kwv lam li 200 xyoo nrog nkawd mus thiab. Tsis tas li ntawd, nkawd txiv yawg kuj kam nrog nkawd mus deb kwv lam li 960 kilumev (600 mais) rau ntawm Halas. (Chivkeeb 11:31, 32) Txawm nkawd hlub nkawd txiv yawg kawg li los ntshe kuj nyuaj rau nkawd coj nws nrog nkawd mus thiab. Tej zaud nkawd txiv yawg caij tus nees us los sis tus nees luav thawm hnub ces tej zaum kuj mob nws ib ce heev. Muaj qee lub sij hawm ntshe nkawd kuj sab sab lim lim. Txawm li cas los Yehauvas yeej ntxiv dag ntxiv zog rau nkawd. Yehauvas twb pab nkawd lawm ces nws yeej yuav pab koj tib yam nkaus thiab.​—Ntawv Nkauj 55:22.

4. Nyob rau hauv zaj kawm no yuav tham txog dab tsi?

⁴ Yog koj muaj kev xyiv fab ua neej ces yuav pab kom koj tu taus tus uas koj hlub. (Pajlug 15:13) Nco ntsoov tias koj lub neej yuav nyuaj npaum twg los koj yeej muaj taus kev zoo siab. (Yakaunpaus 1:2, 3) Yuav ua li cas koj thiaj li muaj kev zoo siab? Ib qho uas yuav pab tau koj yog thov Yehauvas thiab thov nws pab koj muaj cwj pwm zoo. Nyob rau zaj kawm no peb yuav tham tias cov uas tu lwm tus yuav tau ua li cas xwv lawv thiaj muaj kev zoo siab thiab lwm tus ho pab tau lawv li cas. Ua ntej no cia peb mus tham txog seb vim li cas cov uas tu lwm tus yuav tau pab lawv tus kheej kom muaj kev zoo siab thiab muaj dab tsi ho ua rau lawv muaj kev nyuaj siab.

UA LI CAS TU LWM TUS HO TSIS MUAJ KEV KAJ SIAB?

5. Vim li cas tus uas tu lwm tus yuav tau muaj kev kaj siab?

⁵ Yog tias koj tsis muaj kev kaj siab ces yuav ua rau koj laj laj tu ib tug tib neeg. (Pajlug 24:10) Thaum koj laj tu ib tug twg ces koj yuav pib cem thiab yws daws dom tsis xav pab tus ntawd. Vim li cas ho yooj yim rau ib tug tsis muaj kev kaj siab thaum tu lwm tus?

6. Vim li cas cov uas tu lwm tus ho tsis muaj dag zog ua dab tsi li?

⁶ Tej zaud koj yuav tsis muaj dag zog ua dab tsi. Muaj ib tug muam npe hu ua Lias (Leah) hais tias: “Tu ib tug twg mas txawm hnub ntawd tsis muaj dab tsi los yeej ua rau yus sab sab lim lim. Thaum tsaus ntuj mas kuv twb tsis xav ua ib yam dab tsi. Muaj tej lub sij hawm lwm tus ntaus ntawv tuaj los kuv twb tsis xav teb rov qab.” Hos muaj dua lwm tus hais tias lawv twb tsis tau so los sis pw ib chim li. Muaj ib tug muam npe hu ua Inis (Inés) hais tias: “Kuv pw tsis txaus li. Txhua hmo mas ob txoos teev kuv sawv ib lwm los saib xyuas kuv niam pog. Tau ntau ntau xyoo lawm kuv tus txiv wb twb tsis tau mus ua si rau qhov twg li.” Muaj ib txhia uas tu lwm tus tsis muaj sij hawm mus cuav zos los sis mus ua Yehauvas tes hauj lwm ib tsam qhov twg li vim lawv yuav tau saib ntshis tus tib neeg uas lawv tu. Vim li no lawv thiaj li nyob kho siab khuav thiab tsis dim tes kiag li.

7. Vim li cas cov tu lwm tus ho tu siab los sis lawv lub siab pheej nkaug lawv?

⁷ Tej zaud koj pheej tu siab los sis koj lub siab pheej nkaug koj. Muaj ib tug muam npe hu ua Ntsexikam (Jessica) hais tias: “Kuv lub siab pheej nkaug tias cas kuv tsis ua ntau me ntsis los pab ntxiv. Thaum kuv so los kuv pheej xav hais tias kuv yuav tau rov qab mus pab.” Muaj ib txhia uas tu lwm tus pheej xav hais tias nws ua zoo tsis txaus los mus pab los sis lawv ho xav hais tias lawv tu tsis taus tus tib neeg ntawd ntxiv lawm. Tej txhia sab sab lim lim ces tej zaum lawv hais los sis ua tau tej yam tsis zoo rau tus ntawd. (Yakaunpaus 3:2) Hos muaj dua ib txhia pom lawv tus tib neeg ntxaug zuj zus mas ua rau lawv tu siab kawg li. Muaj ib tug muam npe hu ua Npanplam (Barbara) hais tias: “Qhov uas nyuaj rau kuv tshaj mas yog pom kuv tus tib neeg ib hnub nws ntxaug zuj zus.”

8. Cov uas tu lwm tus xav li cas thaum cov lawv tu ua lawv tsaug?

⁸ Tej zaud koj yuav xav tias cov uas koj tu tsis ris koj txiaj ntsig. Tos ib txhia xav li no los vim yog cov uas lawv tu ntawd tsis ua lawv tsaug los sis qhuas lawv. Ib ob lo lus ua tsaug xwb los yeej zoo lawm hov ntau. (1 Thexalaunikas 5:18) Muaj ib tug muam npe hu ua Melixam (Melissa) hais tias: “Muaj tej lub sij hawm kuv quaj quaj vim kuv ntxhov siab heev. Tiam sis thaum tus uas kuv tu ntawd ua kuv tsaug mas ua rau kuv kaj siab lawm hov ntau tuaj! Txawm nws hais ob peb nyuag lo xwb los twb ua rau kuv muaj siab zim rov qab tu nws dua.” Muaj dua ib tug kwv tij npe hu ua Amadum (Ahmadu) piav tias thaum tus uas nws tu ntawd ris nws txiaj ntsig mas ua rau nws zoo siab heev. Nkawd ob niam txiv tu nws poj niam tus niam hluas tus ntxhais uas qaug dab peg. Nws hais tias: “Txawm tus me ntxhais ntawd tsis paub tias wb ua npaum li cas los pab nws los thaum nws ua wb tsaug los sis sau ob peb los tias nws hlub wb mas raug kuv siab kawg li.”

YUAV UA LI CAS THIAJ KAJ SIAB MUS LI?

9. Yuav ua li cas tus ua tu lwm tus thiaj paub ntsuas tias nws ua taus li cas xwb?

⁹ Xam pom tias muaj tej yam koj ua tau thiab ua tsis tau. (Pajlug 11:2) Peb yeej tsis muaj lub dag zog thiab sij hawm ua txhua yam. Yog li ntawd, peb yuav tau muab luj seb qhov twg peb ua tau thiab qhov twg peb ua tsis tau. Txawm muaj tej lub sij hawm peb ua tsis tau los tsis txhob muab xav ntau ntau. Qhov no qhia tau tias koj tsuas ua tau li koj ua taus xwb. Yog muaj lwm tus hais tias lawv xav pab koj los tsis txhob ua siab deb, kav tsij cia lawv pab. Muaj ib tug kwv tij npe hu ua Ntses (Jay) hais tias: “Txhua hnub peb tsuas ua tau qho qhov xwb los tsis ua cas. Qhov uas peb txawj ntsuas tias peb ua tau npaum li no los sis npaum li tod xwb ces yuav pab tau kom peb muaj lub siab kaj.”

10. Vim li cas zoo rau ib tug uas tu lwm tus ua neeg thoob tsib? (Pajlug 19:11)

¹⁰ Ua neeg thoob tsib. (Nyeem Pajlug 19:11.) Yog koj coj li no ces thaum lwm tus ua rau koj chim los koj yuav ua taus lub siab tus. Tus neeg uas thoob tsib yeej yuav tshawb nrhiav tias vim li cas tus ntawd ho ua li nws ua. Muaj tej tug uas muaj mob hnyav mas nws tus mob kuj ua rau nws ua ib tug neeg siab luv. (Tej Lus Qhia 7:7) Xws li thaum nws zoo neej, nws yeej yog ib tug neeg siab dawb siab zoo thiab txawj xav txog luag tiam sis thaum nws muaj mob lawm ces nws yuav rais ua ib tug neeg cav ncauj, cem taus los sis yws taus. Yog li ntawd tej zaum koj yuav tau tshawb nrhiav nws tus kab mob xwv koj thiaj paub pab nws. Yog koj yim paub zoo txog nws tus mob ces koj yuav yim paub pab nws dua.​—Pajlug 14:29.

11. Cov uas tu lwm tus yuav tau ua dab tsi txhua txhua hnub? (Ntawv Nkauj 132:4, 5)

¹¹ Lauj sij hawm los tsav koj txoj kev sib raug zoo nrog Yehauvas. Tej zaud zoo rau koj txhob mus ua ub ua no ntau ntau xwv koj thiaj muaj sij hawm los ua “yam uas tseem ceeb dua ntais.” (Filipis 1:10) Xws li tsav koj txoj kev sib raug zoo nrog Yehauvas. Vaj Ntxwv Daviv saib txoj kev teev tiam Yehauvas tseem ceeb tshaj nyob hauv nws lub neej. (Nyeem Ntawv Nkauj 132:4, 5.) Zoo ib yam li Daviv, txawm koj tsis xyeej los koj yuav tau lauj sij hawm los nyeem phau Vajlugkub thiab thov Vajtswv. Muaj ib tug muam npe hu ua Elisam (Elisha) hais tias: “Thaum kuv thov Yehauvas, nyeem Ntawv Nkauj, thiab xav txog tej lus uas kuv tau nyeem mas ua rau kuv lub siab tus tus thiab zoo siab heev. Thov Vajtswv pab kuv tshaj plaws li. Kuv yeej thov Vajtswv thawm hnub pab kuv kom ua siab txias txias.”

12. Vim li cas cov tu lwm tus yuav tau siv sij hawm los tu lawv tus kheej?

¹² Lauj sij hawm los saib xyuas koj txoj kev noj qab haus huv. Cov tib neeg uas tu lwm tus mas yeej khwv kawg li. Lawv yeej tsis muaj sij hawm mus kav kiab kav khw mus nrhiav tej zaub mov zoo los yug lawv lub cev thiab npaj zaub mov noj. Yog koj noj tej zaub mov zoo thiab qoj ib ce mas koj lub cev thiab koj lub hlwb yuav khiav tau zoo dua. Yog li ntawd, xyaum noj tej zaub mov los yug koj lub cev thiab qoj ib ce. (Efexaus 5:15, 16) Ntxiv ntawd, pw kom txaus. (Tej Lus Qhia 4:6) Cov neeg uas kawm peb lub cev ntaj ntsug hais tias yog peb pw txaus ces yuav pab kom peb lub hlwb txawj kho peb lub hlwb. Nyob rau hauv ib zaj uas luag sau txog kev kho mob hais tias thaum ib tug neeg pw txaus ces nws yuav tsis tshua ntxhov siab thiab nws ua tau siab tus tus thaum muaj kev ntxhov siab. Ntxiv ntawd, nco ntsoov lauj sij hawm mus yos ua si. (Tej Lus Qhia 8:15) Muaj ib tug muam piav tias: “Thaum tej hnub tshav tshav ntuj, kuv mus nraum zoov thiab mus ziab tshav ntuj. Txhua txhua lub hlis kuv teem ib hnub mus nrog ib tug phooj ywg ua si.”

13. Qhov uas yus luag pab tau dab tsi? (Pajlug 17:22)

¹³ Nco ntsoov luag. (Nyeem Pajlug 17:22; Tej Lus Qhia 3:1, 4) Thaum tu ib tug tib neeg, txawm yus npaj siab ua ib yam los ntau zaus yeej muaj lwm yam los tab kaum ces tej zaud yuav ua rau koj chim thiab npau taws tiam sis txhob xav ntau ntau. Kev luag mas yuav ua rau koj kaj siab lawm hov ntau tuaj. Ntxiv ntawd, yog koj nrog tus uas koj tu ntawd luag ces neb yuav sib ncawg dua.

14. Qhov uas koj mus nrog ib tug uas koj tso siab tau rau tham yuav pab tau koj li cas?

¹⁴ Nrog ib tug uas koj tso siab tham. Tu ib tug tib neeg yeej ua rau yus ntxhov siab hnyo. Yog li ntawd, zoo rau koj muab piav qhia rau ib tug uas koj tso siab tau rau thiab nws yuav tsis muab koj coj mus xyav koob xyav npe rau qhov twg. (Pajlug 17:17) Yog tus ntawd mloog koj piav koj tej kev nyuaj siab ces tej zaum yuav ua rau koj dim pa ntshua thiab kaj siab lawm hov ntau tuaj. Tej zaum nws yuav hais tau ib ob lo lus los txhawb koj zog.​—Pajlug 12:25.

15. Vim li cas zoo rau peb tham txog lub neej nyob hauv lub Vaj Kaj Siab?

¹⁵ Xav txog lub neej hauv lub Vaj Kaj Siab. Nco ntsoov tias Yehauvas tsis yog tsim peb kom ib leeg tu ib leeg. (2 Kauleethaus 4:16-18) Yav tom ntej peb yuav ua neej nyob ib yam li Yehauvas tau npaj tseg cia rau peb. (1 Timautes 6:19) Yog koj nrog tus uas koj tu ntawd tham txog lub neej hauv lub Vaj Kaj Siab seb neb yuav ua dab tsi rau dab tsi mas yuav ua rau neb ob leeg zoo siab heev. (Yaxayas 33:24; 65:21) Ib tug muam npe hu ua Hethawm (Heather) hais tias: “Kuv niaj hnub nrog tus uas kuv tu ntawd tham tias nyob hauv lub Vaj Kaj Siab wb yuav xaws khaub ncaws, mus yos ua si, thiab mus caij tsheb kauj vab rau ub rau no. Wb yuav ua zaub ua mov tos cov uas Yehauvas tsa sawv rov qab los. Wb ua Yehauvas tsaug rau tej no.”

CIA LWM TUS PAB THIAB

16. Peb ho cev tes tau mus pab ib tug uas tu lwm tus li cas? (Saib daim duab.)

¹⁶ Pab cov uas tu lwm tus xwv lawv thiaj tau so qho me ntsis. Yog peb cev tes mus pab ces lawv yuav dim tes mus khiav me ntsis hauj lwm. (Kalatias 6:2) Muaj ib tug muam npe hu ua Nathalias (Natalya) hais tias: “Muaj ib tug kwv tij nyob hauv wb lub koom txoos tuaj nrog kuv tus txiv saib yeeb yaj kiab, mus tshaj tawm thiab tham pem ob zaug ib lub lim tiam. Qhov nws tuaj li no pab kom kuv muaj sij hawm mus taug kev tso pa.” Muaj tej tug lawv kuj mus pw pab tus uas tu ntawd kom nws thiaj li tau zoo pw zaum puav.

17. Peb yuav pab tau tus uas tu li cas xwv nws thiaj mloog tau tej kev sib txoos?

¹⁷ Pab cov uas tu lwm tus kom lawv thiaj li tau zoo mloog tej kev sib txoos. Thaum mus kev sib txoos thiab rooj sib txoos los tus uas tu lwm tus yeej tsis tau zoo mloog ces zoo rau peb mus nrog tus uas nws tu ntawd zaum. Hos yog tias tus lawv tu ntawd tawm tsis tau mus qhov twg ces zoo rau peb mus pauv tus neeg uas tu ntawd chaw es nrog tus neeg nyob hauv tsev saib kev sib txoos saum huab saum cua kom tus uas tu thiaj li mus tau zaum puav kev sib txoos tim ntsej tim muag.

18. Peb ua tau dab tsi ntxiv los pab cov uas tu lwm tus?

¹⁸ Hais lus txhawb cov uas tu lwm tus thiab thov Vajtswv pab lawv. Zoo rau cov txwj laus mus saib ntshuj ntshis cov uas tu lwm tus seb lawv noj nyob li cas. (Pajlug 27:23) Peb txhua tus uas nyob hauv lub koom txoos yuav tau hais lus txhawb thiab qhuas cov uas tu lwm tus. Nco ntsoov thov Yehauvas pub dag pub zog rau lawv thiab pab kom lawv muaj kev kaj siab.​—2 Kauleethaus 1:11.

19. Peb tos rawv dab tsi?

¹⁹ Tshuav tsis ntev tom ntej no Yehauvas yuav tshem tawm kab mob kev nkeeg, kev laus thiab qhov uas tu lwm tus. (Yaxayas 35:5, 6; 65:17; Tshwmsim 21:3, 4) Cheem peb tseem tos rawv hnub ntawd, cia peb nco ntsoov vam khom Yehauvas vim nws yuav pab peb “ua taus siab ntev thiab muaj kev xyiv fab thev dhau txhua yam.”​—Kaulauxis 1:11.