Puas Zoo Rau Kuv Tsav Tsheb?

Ua li cas koj thiaj paub tias puas zoo rau koj tsav tsheb?

Nyob rau tej lub teb chaws nom tswv tsa cai tias yog thaum ib tug twg laus lawm, nws yuav tsum tau kws tshuaj daim ntawv tso cai mas nws mam li tsav tau tsheb. Yehauvas cov tib neeg uas nyob rau tej lub teb chaws ntawd kuj coj raws li ntawd. (Loos 13:1) Txawm tsis muaj li ntawd nyob rau lub teb chaws koj nyob los zaj no haj tseem pab tau koj.

UA ZOO TSHUAJ SEB KOJ PUAS TSAV TAU TSHEB

Muaj ib lub koom haum uas pab cov laus hais tias zoo rau cov laus zaum tsaws xav txog cov lus uas yuav hais tuaj nram qab no:

• Kuv puas pom kev nyeem cov ntawv uas sau rau ntawm ntug kev thiab kuv puas pom kev thaum tsaus ntuj?

• Kuv puas tig tau taub hau mus saib sab xis thiab sab laug kom tsis txhob muaj tsheb ntawm kuv ib sab?

• Ua li kuv puas tshem tau ko taw nrawm nroos mus tsuj kom lub tsheb nres?

• Ua li kuv puas tsav tsheb qeeb qeeb es tav lwm lub tsheb hauv ntej?

• Ua li puas muaj qho zaug kuv yuav luag ua tsheb sib nraus thiab kuv lub tsheb puas mluav thiab kos ntawm ib sab vim kuv pheej tshav ub tshav no?

• Thaum kuv tsav tsheb, tub ceev xwm puas laim teeb kom kuv nres?

• Ua li kuv puas tsaug zog hlias ib pliag ib pliag thaum tsav tsheb?

• Ua li tej tshuaj kuv noj puas ua rau kuv tsav tsis tau tsheb?

• Ua li kuv tsev neeg los sis tej phooj ywg puas hais rau kuv tias lawv txhawj thaum kuv tsav tsheb?

Yog koj tau ua ntau tshaj li hais tas no ces koj yuav tau tseg ntua tsis txhob tsav tsheb. Tiam sis yog tias koj tsuas ua ib los sis ob qho ces koj yuav tau hloov qho yam. Xws li koj yuav tau tsis txhob tsav tsheb ntau ntau, tshuaj ntshis seb koj puas tseem tsav tau tsheb zoo li qub, nug koj tsev neeg los sis tej phooj ywg seb lawv xav li cas thaum koj tsav tsheb, thiab tej zaud kuj zoo rau koj rov qab mus kawm kom paub tsav tsheb dua.

PHAU VAJLUGKUB YUAV PAB KOM KOJ PAUB TXIAV TXIM

Tej zaud yuav nyuaj rau koj xav hais tias koj tsav tsis tau tsheb zoo npaum li yav tas los lawm. Tej zaud koj yuav tsis xav tham txog kev tsav tsheb. Yog li ntawd, phau Vajlugkub tej hauv paus ntsiab lus yuav pab kom koj txawj txiav txim rau qhov zoo li cas? Cia peb mus tham txog ob yam.

Ua neeg txo hwj chim. (Pajlug 11:2) Thaum peb laus zuj zus ces peb lub qhov muag yuav tsis pom kev zuj zus, pob ntseg los yuav tsis hnov lus, tsis tshua muaj zog thiab peb lub hlwb los khiav tsis ceev lawm. Xws li muaj ib txhia tib neeg thaum lawv laus lawm, lawv tsis kam ncaws pob los sis ntaus pob tsam lawv raug mob. Txoj kev tsav tsheb los yeej zoo ib yam li ntawd. Ib tug uas txawj ntsuas nws tus kheej ces nws yuav tsis kam tsav tsheb lawm nyob tsam nws lam raug mob. (Pajlug 22:3) Yog lwm tus txhawj xeeb txog peb tsav tsheb ces peb yuav tau txo hwj chim thiab mloog lawv qhia.​—Muab piv rau 2 Xamuyees 21:15-17.

Peb tsis xav ris lub txim tua neeg. (2 Kevcai 22:8) Yog peb tsav tsis tau tsheb lawm es peb pheej yuam cai tsav ces peb yuav ua tau rau lwm tus raug mob los sis txo tau peb thiab lwm tus txoj sia. Tsis tas li ntawd, peb yuav ris lub txim tuag.

Tsis txhob xav hais tias lwm tus yuav saib tsis taus peb yog peb tsis tsav tsheb lawm. Yehauvas nyiam thaum peb txawj xav, txo hwj chim, thiab xav txog lwm tus txoj kev noj qab haus huv. Nco ntsoov tias Yehauvas yuav pab peb, nplig peb, thiab yuav saib xyuas peb. (Yaxayas 46:4) Yog li ntawd tsis txhob ua siab deb, kav tsij thov Yehauvas tsav tswv yim thiab pab kom koj txawj siv tej hauv paus ntsiab lus hauv phau Vajlugkub los txiav txim seb koj puas tseem yuav tsav tsheb los tsis tsav.