Tshaj Tawm Lub Nceeg Vaj Tau 100 Xyoo!
1. Muaj li 100 xyoo dhau los, Kwvtij Rutherford tau txhawb Yehauvas cov tibneeg li cas?
1 “Saib maj, tus Vajntxwv twb sawv kav lawm! Nej yog cov uas tshaj tawm txog tus Vajntxwv ntawd. Yog li ntawd, cia li tshaj tawm, tshaj tawm, tshaj tawm txog tus Vajntxwv thiab nws lub nceeg vaj.” Muaj li 100 xyoo dhau los, Kwvtij Rutherford tau hais cov lus no los txhawb kom Yehauvas cov tibneeg mus tshaj tawm txoj xov zoo txog lub Nceeg Vaj thoob plaws rau txhua qhov. Niaj hnub no los peb tseem ua li ntawd. Peb twb mus qhia txoj xov zoo txog lub Nceeg Vaj rau “txhua tus neeg thoob qab ntuj” ib yam li cov Khixatia txheej thaum ub. (Khx. 1:23) Tau li 100 xyoo no, peb tau siv dabtsi los tshaj tawm Vajtswv lub Nceeg Vaj xwb? Peb yuav ua li cas los tshaj tawm Vajtswv lub Nceeg Vaj ntxiv?
2. Peb cov ntaub ntawv txhawb Vajtswv lub Nceeg Vaj li cas?
2 Yav Tas Los: Tau ntau xyoo, peb cov ntaub ntawv yeej yog sau los txhawb Vajtswv lub Nceeg Vaj xwb. Txij xyoo 1939 los, peb siv phau ntawv Phau Tsom Faj Tshaj Tawm Txog Yehauvas Lub Nceeg Vaj los tshaj tawm txog Vajtswv lub Nceeg Vaj thiab qhia txog tej uas lub Nceeg Vaj yuav ua. Phau Awake! kuj qhia tias tsuas yog Vajtswv lub Nceeg Vaj xwb thiaj yuav pab tau noob neej. Ob phau ntawv no yog ob phau uas tau muab txhais ua ntau yam lus thiab tau muab tseb ntau tshaj txhua phau huvsi thoob ntiajteb.—QTsh. 14:6.
3. Peb tau siv tej yam zoo li cas los tshaj tawm lub Nceeg Vaj?
3 Yehauvas cov tibneeg tau siv ntau yam los tshaj tawm lub Nceeg Vaj. Thaum ub peb siv paj taub, xov tooj cua, thiab tso suab. Tej yam uas peb siv no ua rau txoj xov zoo ncha mus deb heev txawm tias lub sijhawm ntawd tsis tau muaj coob tus mus tshaj tawm txoj xov zoo. (Nt.Nk. 19:4) Tau ob peb xyoos no, peb muab tej ntaub ntawv Vajlugkub tso rau hauv lub Vej xaij jw.org kom coob tus thiaj hnov txog lub Nceeg Vaj, tsis hais cov nyob rau tej tebchaws uas tsis pub peb mus qhia Vajlugkub ywj siab.
4. Peb tau siv lwm txojke twg mus qhia Vajlugkub thiab?
4 Yehauvas cov tibneeg kuj tau siv lwm txojkev los tshaj tawm lub Nceeg Vaj thiab. Txij xyoo 1996 los, tsis yog peb mus qhia Vajlugkub ib lub tsev rau tsev xwb, tiamsis peb kuj pib mus qhia rau tom tej chaw ua si, tej tshav nres tsheb, thiab tej chaw ua lag ua luam. Tsis ntev tas los no, peb kuj mus qhia Vajlugkub rau hauv tej nroog loj uas nyob thoob plaws lub ntiajteb thiab. Tsis tas li ntawd xwb, tej koom txoos los kuj mus teeb rooj thiab laub qhia Vajlugkub rau tej chaw uas muaj neeg coob dhau mus mus los los hauv lawv thaj tsam. Txawm li ntawd los, qhov uas mus tshaj tawm ib lub tsev rau tsev tseem yog qhov uas tseem ceeb tshaj rau peb.—Ttx. 20:20.
5. Peb ua tau dabtsi pib lub xyoo tshiab no?
5 Yav Tom Ntej: Nyob rau lub 9 Hlis no uas yog pib lub xyoo tshiab, yuav muaj coob tus tho kev ntxiv. Koj puas ua tau ib tug thiab? Yog tias koj ua tsis tau, puas muaj tej lub sijhawm uas koj ua tau ib tug pab tho kev? Txawm koj ua tau ib tug tho kev thiab tsis tau los, yog koj kub siab lug tshaj tawm txog lub Nceeg Vaj ces Yehauvas yeej yuav foom koob hmoov rau koj.—Mlkh. 3:10.
6. Vim li cas lub 10 Hli 2014 no, yuav yog ib lub hlis tshwj xeeb heev?
6 Lub Nceeg Vaj tau sawv kav txwm nkaus 100 xyoo rau lub 10 Hli 2014 no. Yog li ntawd, thiaj tsim nyog Phau Tsom Faj uas muab tseb rau sawvdaws rau lub 10 Hli tham txog Vajtswv lub Nceeg Vaj. Vim li no, koj puas yuav rau siab ntso mus tseb phau ntawv no rau tibneeg coob li coob tau? Cia peb rau siab ntso mus tshaj tawm txoj xov zoo hais txog Vajtswv lub Nceeg Vaj rau cov uas xav mloog.—Ttx. 8:12.