Pib Lub 8 Hli Tim 25
PIB LUB 8 HLI TIM 25
Hu Zaj Nkauj 49 thiab Thov Vajtswv
Lub Koom Txoos Kev Kawm Vajlugkub:
my zaj 37, 38 (30 feeb)
Kev Kawm Tshaj Tawm:
Nyeem cov nqe Vajlugkub: Xwm Txheej Taug Kev 14-16 (10 feeb)
Rov Tshuaj Xyuas Kev Kawm Tshaj Tawm (20 feeb)
Kev Kawm Ua Vajtswv Tes Num:
5 feeb: Tej Qauv Zoo. Ua ib ob qho yeeb yam raws nkaus li tej uas tau ntsib thaum mus qhia Vajlugkub. Ua txog ib tug tshaj tawm tsis ntshai tham txog lub Nceeg Vaj. Piav mentsis txog Henplais 6:11, 12, pab kom sawvdaws rau siab mus tshaj tawm lub Nceeg Vaj.
10 feeb: Piav Txog Lub Nceeg Vaj—Ntu 1. Ib tug txwj laus siv cov lus no los ua ib zaj lus qhuab qhia. Thaum nrog ib tug twg tham, peb yuav tsum siv tej ntsiab uas raug lawv siab. Tiamsis tseem ceeb peb yuav tau qhia kom lawv paub txog Vajtswv lub Nceeg Vaj. Peb kuj nyeem lossis hais tej nqe Vajlugkub uas qhia txog lub Nceeg Vaj rau lawv. Nco ntsoov tias thaum koj hais txog lub Nceeg Vaj rau tus tswv tsev koj yuav tau qhia kom nws paub txog lub Nceeg Vaj es tsis yog cia li hais tias Vajtswv lub Nceeg Vaj yog ib lub tseem fwv xwb. Yog koj tsis ua zoo qhia tus tswv tsev nws yuav tsis to taub vim tej txhia xav tias yeej tsis muaj Vajtswv lub Nceeg Vaj rau qhov tsis pom nyob qhov twg li. Yog nws tsis ntseeg koj, tej zaum koj kuj hais ib qho lus piv txwv li no rau nws: Nyob rau ib lub tebchaws loj, muaj ntau tus yeej tsis tau mus txog lub tuam ceeb nroog lossis pom tus nom li. Lawv tsuas hnov xov xwm qhia txog lawv tus nom thiab lub tuam ceeb nroog xwb. Lub Nceeg Vaj los kuj zoo li qhov piv txwv no rau qhov peb tsis pom lub Nceeg Vaj tiamsis tsuas yog phau Vajlugkub thiaj qhia txog lub Nceeg Vaj xwb. Vim li no, thiaj muab phau Vajlugkub txhais ua 2,200 yam lus los qhia peb txog lub Nceeg Vaj, txog tus uas tau pub hwjchim los kav, thiab seb lub Nceeg Vaj yuav ua dabtsi tom ntej no. Yuav kom tibneeg paub seb lub Nceeg Vaj zoo li cas, qhia lawv txog tej yam uas tibneeg xav kom tej nom tej tswv ua rau lawv. Qhia rau lawv tias tsuas yog Vajtswv lub Nceeg Vaj xwb thiaj yuav ua tau raws li tej yam zoo uas tibneeg ntshaw. (Nt.Nk. 145:16) Txhawb kom lawv muaj lub siab zwm rau lub Nceeg Vaj uas Yexus Khetos ua Vajntxwv kav. Qhia lawv paub txog tej txuj ci uas Yexus ua yav tas los kom lawv thiaj cia siab rau yav tom ntej. Thiab qhia lawv txog tej yeeb yam zoo uas Yexus muaj. (Mth. 8:2, 3; 11:28-30) Piav tias Yexus tau los tuag txhiv peb thiab Yehauvas twb tsa nws muaj txojsia nyob mus ib txhis saum ntuj thiab nws twb ua Vajntxwv saum ntuj lawm.—Ttx. 2:29-35.
15 feeb: Piav Txog Lub Nceeg Vaj—Ntu 2. Siv cov lus no los ua lus qhuab qhia thiab lus teb. Qhia tias Vajtswv lub Nceeg Vaj twb kav saum ntuj lawm. Tiamsis tibneeg tsis paub vim lawv tsis pom txog tej xwm txheej uas qhia tias lub Nceeg Vaj yeej kav lawm tiag. Qhia rau lawv tias lub Nceeg Vaj twb kav lawm tiamsis lawv puas paub seb Yexus tau hais tias yuav muaj dabtsi tshwm sim thaum lub Nceeg Vaj sawv kav lawm. Qhia txog tej cim uas muaj tshwm rau Mathai tshooj 24, Malakau tshooj 13, los yog Luka tshooj 21. Ces nug seb vim li cas thaum Yexus ua Vajntxwv saum ntuj lawm ua cas yuav muaj kev phem ua luaj hauv ntiajteb. Mus nyeem Qhia Tshwm 12:7-10, 12. Nyeem Mathai 24:14 thiab qhia tias Vajtswv lub Nceeg Vaj yeej kav lawm tiag vim tabtom muaj li nqe Vajlugkub no hais, ces qhia txog txojkev kawm Vajlugkub uas muaj thoob qab ntuj tamsim no. (Yxy. 54:13) Ua ib qho yeeb yam txog ib tug tshaj tawm qhia ib tug tswv tsev tias Vajtswv lub Nceeg Vaj yeej yog ib lub tseem fwv tiag tiag.
Hu Zaj Nkauj 10 thiab Thov Vajtswv