Ob Txojkev Rau Peb Qhia Vajlugkub Ntxiv
1. Cov Khixatia thawj 100 xyoo tso tau tus qauv twg rau peb xyaum?
1 Cov Khixatia nyob thawj 100 xyoo mus qhia Vajlugkub ib lub tsev rau tsev, thiab mus qhia rau ib zej tsoom sawvdaws ntawm tej chaw uas lawv paub tias yuav ntsib tibneeg. (Ttx. 20:20) Piv txwv li no, lawv tau mus rau hauv lub tuam tsev uas lawv paub tias yuav ntsib tibneeg. (Ttx. 5:42) Thaum Povlauj nyob hauv lub nroog Athee, nws tau qhia txoj xov zoo rau cov neeg uas nws niaj hnub ntsib tom tej kiab tej khw. (Ttx. 17:17) Niaj hnub no los, peb yeej mus tshaj tawm txoj xov zoo ib lub tsev rau tsev. Thiab peb kuj mus tshaj tawm rau tom tej tshav nres tsheb, tej chaw ua lag ua luam, tej chaw ua si, tej kev loj uas muaj neeg coob dhau mus mus los los, thiab lwm qhov chaw uas muaj neeg dhau pes dhev. Tsis tas li ntawd xwb, kuj muaj 2 txojkev ntxiv uas yuav pab tau coob tus mus qhia Vajlugkub rau ib zej tsoom sawvdaws thiab.
2. Pib lub 11 Hlis xyoo 2011, lub koom haum tau sim txojkev qhia Vajlugkub twg?
2 Qhia Vajlugkub Hauv Tej Nroog Loj: Phau 2013 Yearbook sab 16 thiab 17 tau qhia tias pib lub 11 Hlis xyoo 2011, lub koom haum tau sim ib txojkev qhia Vajlugkub hauv lub nroog New York City rau ib zej tsoom sawvdaws. Lawv mus teeb rooj thiab laub rau ntawm tej chaw uas muaj neeg coob dhau mus mus los los, thiab muab tej ntaub ntawv tso saum rooj thiab laub rau tibneeg tau nqa mus nyeem. Cov ntaub ntawv no muaj ua lus Askiv thiab lwm yam lus. Txhua hnub muaj txhiab txhiab tus neeg los nqa mus nyeem, feem coob yog cov uas nyob tej tsev loj loj uas muaj ntau yim neeg nyob es txwv tsis pub Yehauvas cov Timkhawv mus ntsib, thiab yog cov uas pheej tsis nyob tsev. Tibneeg coob heev tau los nqa tej ntaub ntawv mus nyeem. Muaj ib lub hlis, tibneeg nqa 3,797 phau The Watchtower thiab Awake! thiab 7,986 phau ntawv. Kuj muaj coob tus xav kawm Vajlugkub thiab. Lub hom phiaj yog pab tibneeg kawm Vajlugkub, cov uas tso npe thiab chaw nyob, cov kwvtij muab xa mus rau cov koom txoos uas nyob ze lawv kom thiaj mus xyuas tau.
3. Lub koom haum xav kom txojkev qhia Vajlugkub no nthuav mus deb li cas?
3 Vim txojkev qhia Vajlugkub no pab tau tibneeg coob tus, lub koom haum thiaj xav kom mus qhia li no rau tej nroog loj uas muaj neeg coob uas nyob thoob plaws lub ntiajteb. Cov ceg yog cov uas txiav txim seb yuav mus qhia rau lub nroog twg hauv lawv lub tebchaws. Feem ntau yog cov nroog uas muaj ntau qhov chaw rau tibneeg tos tsheb npav (bus) thiab tsheb nqaj, muaj ntau koog tsev ua lag ua luam, lossis muaj ntau koog tsev loj uas muaj ntau yim neeg nyob uas muaj neeg coob dhau mus mus los los. Tom qab ntawd, cov ceg mam li hais rau cov koom txoos uas nyob hauv tej nroog loj ntawd paub, thiab mam li qhia seb yuav mus qhia li cas. Feem ntau cov uas xaiv mus qhia Vajlugkub li no yog cov tho kev thiab cov tho kev tshwj xeeb xwb, tiamsis muaj qee zaus kuj cia rau cov uas pab tho kev mus qhia thiab.
4. Cov uas mus qhia Vajlugkub rau ib zej tsoom sawvdaws hauv tej nroog loj qhia li cas xwb?
4 Yuav Qhia Li Cas: Cov uas mus teeb rooj lossis laub qhia Vajlugkub rau ib zej tsoom sawvdaws hauv tej nroog loj tsuas nyob tos es tibneeg mam los rau ntawm lawv xwb. Thaum muaj ib tug twg los muab ntawv, hais rau tus ntawd tias yog nws nyiam phau twg, cia li nqa mus nyeem. Yog nws muaj lus nug los cov tho kev yeej zoo siab hlo siv phau Vajlugkub los teb nws. Yog nws nqa cov ntaub ntawv mus los tsis txhob hais txog pab nyiaj siab dawb. Yog nws nug txog seb peb muab nyiaj qhov twg los luam peb tej ntaub ntawv, zoo rau lawv piav tias yog leejtwg xav pab nyiaj siab dawb, nws xa tau mus rau qhov chaw nyob hauv cov ntaub ntawv. Yog zoo nug, ces nug seb nws puas xav tau ib tug mus xyuas nws tom tsev, lossis hais rau nws tias yog nws xav kawm, peb qhia Vajlugkub dawb xwb.
5. Txojkev qhia Vajlugkub no pab tau ib nkawm niam txiv muaj kev zoo siab li cas?
5 Qhia Vajlugkub li no muaj kev xyiv fab kawg li. Muaj ib nkawm niam txiv tau sau tias: “Txhua hnub wb zov lub rooj thiab pom tibneeg coob coob dhau pes dhev ua rau wb hajyam nco txiaj ntsig rau tes haujlwm tshaj tawm txoj xov zoo uas tabtom muaj thoob ntiajteb. Cov tibneeg coob coob ntawd ua rau wb xav txog Yehauvas txojkev hlub uas nws tau pub rau txhua tus. Qhov no txhawb tau wb hajyam xav muab wb lub neej ua tes haujlwm tshaj tawm txoj xov zoo mus ntxiv. Txhua hnub uas tibneeg dhau ntawm wb mus, wb xav tias Yehauvas yeej tshuaj txhua tus lub siab seb puas muaj ib tug twg uas muaj lub siab xib rau nws. Wb saib zoo li wb nrog kiag Yehauvas cov tubtxib saum ntuj ua haujlwm ua ke.”
6. (a) Ntau lub koom txoos tabtom npaj ib txojkev qhia Vajlugkub ntxiv rau ib zej tsoom sawvdaws li cas? (b) Cov koom txoos yuav tsum koom siab li cas?
6 Qhia Vajlugkub Rau Ib Zej Tsoom Sawvdaws Hauv Koj Thaj Tsam: Tsis yog yuav mus qhia Vajlugkub rau ib zej tsoom sawvdaws hauv tej nroog loj xwb, kuj muaj ib txojkev qhia Vajlugkub ntxiv uas cov txwj laus tabtom npaj rau hauv cov koom txoos tej thaj tsam. Txojkev qhia Vajlugkub no, cov tshaj tawm kuj mus teeb rooj lossis laub rau ntawm tej qhov chaw uas muaj neeg coob dhau mus mus los los uas nyob hauv lawv lub koom txoos thaj tsam. Txojkev qhia Vajlugkub no tsis zoo li txoj uas qhia rau ib zej tsoom sawvdaws hauv tej nroog loj uas cov ceg tau npaj lawd, thiab cov uas mus zov rooj thiab laub los tsis yog nyob hauv tib lub koom txoos xwb.—Mus saib lub ntsiab me “Yuav Tsum Koom Siab.”
7. Yog lub koom txoos muaj chaw mus teeb rooj lossis laub qhia Vajlugkub rau ib zej tsoom sawvdaws, cov txwj laus yuav npaj li cas?
7 Cov txwj laus yuav tau tshuaj seb lub koom txoos thaj tsam puas muaj tej chaw uas muaj tibneeg coob dhau mus mus los los es zoo teeb rooj lossis laub qhia Vajlugkub. Tej chaw uas zoo mus teeb rooj lossis laub qhia Vajlugkub yog tej chaw tos tsheb npav thiab tsheb nqaj, tshav puam, tej chaw ua si, tej kev uas muaj neeg coob dhau mus mus los los, tej kiab tej khw, tej tsev kawm ntawv qeb siab, tej tshav dav hlau, thiab tej tshav noj tshav haus uas muaj txhua xyoo. Qhov zoo tshaj mas yog mus teeb rooj rau tib lub chaw, rau tib hnub, thiab rau tib lub caij qub. Coob tus pom tias yog mus teeb rooj, mas zoo mus teeb rau tej chaw uas muaj ntau lub khw nyob ua ke. Tiamsis muaj tej qhov chaw kuj zoo mus teeb laub dua, xws li ntawm tej ntug kev uas muaj neeg coob dhau pes dhev. Nyob hauv peb lub Vej xaij (Web site), cov txwj laus mus theej tawm tej ntaub ntawv qhia kom paub teeb rooj lossis laub rau phau The Watchtower thiab Awake! thiab phau Vajlugkub Qhia. Cov uas mus teeb rooj lossis laub hauv lub koom txoos thaj tsam los yuav tau coj tib yam li cov uas mus teeb rau tej nroog loj, thiab yuav tsum coj raws li tus saib xyuas kev qhia Vajlugkub tau hais. Yog tias muaj ib tug twg xav kawm Vajlugkub, tiamsis nws tsis nyob hauv lub koom txoos thaj tsam, cov tshaj tawm yuav tau muab nws lub npe thiab chaw nyob sau rau daim ntawv Please Follow Up (S-43) es muab rau tus ceev ntawv hauv lub koom txoos.
8. Yog koj lub koom txoos tsis muaj chaw mus teeb rooj qhia Vajlugkub rau ib zej tsoom sawvdaws, tseem tshuav txojkev twg rau koj ua?
8 Qhia Vajlugkub Rau Ib Zej Tsoom Sawvdaws Hauv Koj Koog: Tej zaum muaj tej lub koom txoos nyob rau thaj tsam uas tsis muaj neeg coob dhau mus mus los los, lossis tsis muaj ib qho chaw zoo teeb rooj lossis laub qhia Valugkub rau ib zej tsoom sawvdaws. Txawm li ntawd los, xav txhawb cov tshaj tawm mus qhia Vajlugkub li ntawd rau hauv lawv koog. Xav seb hauv koj koog, puas muaj tej kiab tej khw uas muaj neeg coob mus? Puas muaj tej chaw ua si lossis tej chaw uas neeg nyiam mus ncig? Puas muaj tej tshav noj tshav haus uas sawvdaws kheev mus? Yog hauv koj koog muaj tej chaw zoo li no, koj yeej mus teeb tau rooj lossis laub qhia Vajlugkub.
9. Vim li cas peb yuav tau nco ntsoov tshaj tawm txoj xov zoo rau txhua qhov chaw uas muaj tibneeg nyob?
9 Yehauvas xav kom “ib tsoom neeg sawvdaws tau txais kev dim thiab paub txojkev tseeb.” (1Tmt. 2:4) Yog li ntawd, peb thiaj mus tshaj tawm txoj xov zoo rau txhua txoj ke kom tibneeg coob tus thiaj tau hnov ua ntej hnub kawg los txog. (Mth. 24:14) Nyob rau ntau qhov chaw, thaum peb mus tshaj tawm txoj xov zoo, peb yeej tsis ntsib tibneeg nyob tsev li. Tiamsis peb yuav ntsib tau cov neeg ntawd thaum peb mus teeb rooj lossis laub qhia Vajlugkub rau ib zej tsoom sawvdaws. Yog li ntawd, cia peb kub siab ua peb tes num tshaj tawm txoj xov zoo rau txhua qhov chaw uas muaj tibneeg nyob.—2Tmt. 4:5.
[Ntsiab me nyob sab 6]
Yuav Tsum Koom Siab
Hnov xov tias cov tshaj tawm nyob rau tej koom txoos uas sib ze, mus tshaj tawm txoj xov zoo rau tib txojkev, tib qho chaw nres tsheb, tib lub khw, lossis tib qho chaw tos tsheb npav thiab tsheb nqaj. Sawvdaws kuj mus tso ntaub ntawv rau tib qho chaw so, tib qho chaw ntxhua khaub ncaws, thiab mus tshaj tawm rau tib co tsev ua haujlwm. Qhov no ua rau cov tibneeg meem txom txawm yog cov uas tshaj tawm twb tsis mus rau tib lub sijhawm. Yog li ntawd, thaum mus qhia Vajlugkub rau ib zej tsoom sawvdaws, nyias yuav tau mus raws nyias lub koom txoos thaj tsam xwb.
Yog koj xav mus qhia Vajlugkub rau ib zej tsoom sawvdaws nyob rau lwm lub koom txoos thaj tsam, koj yuav tau nrog tus saib xyuas kev qhia Vajlugkub hauv koj lub koom txoos tham tso. Tom qab ntawd, nws mam li mus nrog tus uas saib xyuas kev qhia Vajlugkub ntawm lub koom txoos ntawd tham kom tso cai ua ntej koj yuav mus qhia rau lwm lub koom txoos thaj tsam. Thaum muaj ntau lub koom txoos uas hais ntau yam lus nyob rau ib thaj tsam, cov uas saib xyuas kev qhia Vajlugkub yuav tsum sib tham zoo zoo kom sawvdaws tsis txhob mus qhia Vajlugkub heev heev rau ib qho chaw xwv thiaj tsis ua rau cov tibneeg zej zog meem txom. Yog sawvdaws koom siab, yuav ua tau txhua yam “raws li tsim nyog ua thiab raws li txoj kevcai.”—1Khl. 14:40.
[Duab nyob sab 7]
[Duab nyob sab 7]