Vajtswv Txoj Lus Yog Leej Twg los sis Yog Dab Tsi?
Phau Vajlugkub qhia li no
Lo lus uas hais tias “Vajtswv txoj lus” feem ntau yog hais txog Vajtswv ib tsab xo los sis cov xov uas Vajtswv muab los rau nws haiv neeg. (Lukas 11:28) Nyob rau tej qho chaw hauv phau Vajlugkub, lo lus “Vajtswv Txoj Lus” los sis “Txoj Lus” yog hais txog ib lub npe meej mom.—Tshwmsim 19:13; Yauhas 1:14.
Vajtswv txoj xov. Cov uas cev Vajtswv lus kheev hais tias tej lus uas lawv hais rau cov neeg yog Vajtswv txoj lus. Xws li thaum Yelemis hais nws cov lus faj lem, nws xub pib hais tias ‘Yehauvas hais rau kuv hais tias.’ (Yelemis 1:4, 11, 13; 2:1) Ua ntej Xamuyees qhia Xa-ules tias Vajtswv tau xaiv nws los ua vaj ntxwv, tus cev Vajtswv lus Xamuyees hais tias: “Wb nyob ntawm no ib pliag tso, kuv yuav qhia rau koj hais tias, Vajtswv hais li cas rau kuv.” 1 Xamuyees 9:27.
Lub npe meej mom. Nyob hauv phau Vajlugkub, kuj muab Yexus Khetos lub npe meej mom uas thaum nws yog ib tug plig saum ntuj ceeb tsheej thiab thaum nws yug los ua neeg hauv ntiaj teb no hu ua “Txoj Lus.” Cia peb saib seb vim li cas peb ho hais tau li no:
Twb muaj Txoj Lus ua ntej tsim tau txhua yam lawm. “Thaum chiv keeb yeej muaj Txoj Lus. . . Tus no yeej nrog Vajtswv nyob thaum chiv keeb los lawm.” (Yauhas 1:1, 2) Yexus Khetos yog Vajtswv tus Tub hlob. . . Yexus Khetos yeej xub nyob dua ib puas tsav yam huv tibsi.”—Kaulauxais 1:13-15, 17.
Txoj Lus los ua neeg nyob hauv ntiaj teb. “Txoj Lus los yug ua neeg thiab nrog peb nyob.” (Yauhas 1:14) Yexus Khetos “tso ib puas tsav yam tseg, yeem ua ib tug qhev thiab los yug ua tib neeg.”—Filipis 2:5-7.
Txoj Lus yog Vajtswv tus Tub. Tom qab hais cov lus saum no tag “Txoj Lus los yug ua neeg,” tus tub txib Yauhas hais ntxiv tias: “Peb pom nws lub hwj chim, yog lub hwj chim ci ntsa iab uas leej txiv pub rau nws tib leeg tub.” (Yauhas 1:14) Yauhas kuj tau sau tias: “Yexus yog Vajtswv tus Tub.”—1 Yauhas 4:15.
Txoj Lus muaj tej yeeb yam xws li Vajtswv. “Txoj Lus zoo li Vajtswv” (Yauhas 1:1) Yexus muaj tag nrho Vajtswv tej yeeb yam thiab nws tus yam ntxwv zoo kiag li Vajtswv ntag.—Henplais 1:2, 3.
Txoj Lus kav li ib tug vaj ntxwv. Phau Vajlugkub qhia tias nyob saum Txoj Lus lub taub hau muaj “ntau lub kausmom kub.” (Tshwmsim 19:12, 13) Kuj muab Txoj Lus hu ua “Tus Vajntxwv ntawm txhua tus vajntxwv thiab tus Tswv ntawm txhua tus tswv.” (Tshwmsim 19:16) Yexus kuj muaj lub npe meej mom ib yam li ntawd thiab.—1 Timautes 6:14, 15.
Txoj Lus yog tus sawv cev rau Vajtswv. Lub npe meej mom “Txoj Lus” qhia hais tias tus ntawd yog tus uas coj Vajtswv txoj xov mus qhia rau tib neeg. Yexus hais tias nws yog tus uas ua tes hauj lwm no ntag: “Leej Txiv tus uas txib kuv los sam hwm kom kuv hais thiab kuv qhia xwb. . . . Yog li ntawd, txhua yam uas kuv hais, kuv tsuas hais raws li Leej Txiv qhia rau kuv xwb.”—Yauhas 12:49, 50.