Vim Li Cas Thiaj Muab Yexus Hu Ua Vajtswv Tus Tub?
Phau Vajlugkub qhia li no
Phau Vajlugkub qhia ntau zaus tias Yexus yog “Vajtswv tus Tub.” (Yauhas 1:49) Qhov no qhia tias Vajtswv yog tus pub txoj sia rau Yexus thiab rau ib puas tsav yam. (Phau Ntawv Nkauj 36:9; Tshwmsim 4:11) Tiam sis phau Vajlugkub tsis qhia peb tias Vajtswv pub txoj sia rau Yexus ib yam li neeg ntiaj teb pub txoj sia rau lawv cov me nyuam.
Phau Vajlugkub kuj muab cov tub txib saum ntuj hu ua “Vajtswv cov tub.” (Chivkeeb 6:2, Txojlus Txhais Tshiab) Thiab thaum xub tsim Adas uas yog thawj tug tib neeg hauv ntiaj teb no, phau Vajlugkub qhia tias “Adas yog Vajtswv tub.” (Lukas 3:38) Tiam sis phau Vajlugkub qhia tias Yexus yog tus Tub uas tseem ceeb thiab muaj nuj nqis tshaj plaws rau qhov nws yog tus uas Vajtswv tib leeg tsim.
Ua ntej Yexus los nyob hauv ntiaj teb, nws puas yog nyob saum ntuj ceeb tsheej?
Yog. Yexus nyob saum ntuj ceeb tsheej ua ntej nws yug los ua tib neeg hauv ntiaj teb. Yexus kuj qhia ncaj tias: “Kuv los saum ntuj los.”—Yauhas 6:38; 8:23.
Vajtswv xub tsim Yexus ces nws mam li tsim lwm yam. Phau Vajlugkub qhia li no txog Yexus tias:
Nws “yog Vajtswv tus Tub hlob.”—Kaulauxais 1:15.
Nws ‘yog ib puas tsav yam uas Vajtswv tsim los lub hauv paus.’—Tshwmsim 3:14.
Yexus yog tus ua tiav zaj lus faj lem no, ‘Nws yeej muaj caj ces sib txuas ua ntu zus thaum ub los.’—Mikhas 5:2; Mathais 2:4-6.
Ua ntej Yexus los rau hauv ntiaj teb, nws ua dab tsi?
Thaum Yexus nyob saum ntuj ceeb tsheej, nws muaj lub meej mom siab heev. Thaum Yexus thov Vajtswv, nws hais txog nws lub meej mom no. Nws thov tias: “Leej Txiv, ua ntej muaj qab ntuj neeg, kuv tau koob meej nyob ntawm koj ib sab. Nim no thov koj pub kuv rov tau lub koob meej ntawd.”—Yauhas 17:5.
Nws pab nws Leej Txiv tsim tag nrho ib puas tsav yam. Yexus ua hauj lwm ‘nyob rawv ntawm Vajtswv ib sab li tus kws tsa tsev ntag.’ (Pajlug 8:30) Phau Vajlugkub qhia txog Yexus tias: ‘Tsis hais tej uas nyob saum nruab ntug thiab tej uas nyob hauv ntiaj teb no, txhua yam ntawd puav leej yog Vajtswv hais kom Yexus tsim.’—Kaulauxais 1:16.
Vajtswv siv Yexus los tsim kom muaj cov tub txib saum ntuj, thiab txhua yam uas nyob saum ntuj thiab hauv ntiaj teb huv si. (Tshwmsim 5:11) Vajtswv zoo li tus kws uas ua qauv tsev, hos Yexus zoo li tus tsa vaj tsa tsev. Tus kws uas ua qauv tsev qhia rau tus tsa vaj tsa tsev seb nws xav kom zoo li cas ces tus tsa vaj tsa tsev mam li tsim raws li ntawd.
Nws yog Txoj Lus. Thaum piav txog Yexus lub neej saum ntuj ceeb tsheej, phau Vajlugkub muab Yexus hu ua “Txoj Lus.” (Yauhas 1:1) Lub npe meej mom no qhia tias Vajtswv siv nws tus Tub los cev lus rau cov tub txib saum ntuj.
Yexus kuj ua tus cev lus rau neeg ntiaj teb thiab. Tej zaum Yexus twb yog tus cev Vajtswv lus rau Adas thiab Evas nkawv hauv lub vaj Edees. (Chivkeeb 2:16, 17) Lub sij hawm thaum cov Ixayees taug kev hauv tiaj suab puam los, tej zaum Yexus twb yog tus coj lawv kev thiab yog tus uas Vajtswv hais kom lawv mloog.—Khiav Dim 23:20-23.a
a Vajtswv tsis yog siv Yexus los cev nws lus xwb, nws yeej siv lwm cov tub txib saum ntuj thiab. Xws li, Vajtswv kom cov tub txib saum ntuj los qhia Mauxes Txoj Kev Cai rau cov Ixayees thaum ub.—Tes Hauj Lwm 7:53; Kalatias 3:19; Henplais 2:2, 3.