Tus Lej 666 Txhais Li Cas?

Phau Vajlugkub qhia li no

Raws li phau Tshwmsim uas yog phau ntawv kawg hauv phau Vajlugkub, muab tus lej 666, los sis lub npe no, tis rau tus tsiaj qus uas muaj xya lub tau hau thiab kaum tus kub uas tawm hauv hiav txwv los. (Tshwmsim 13:1, 17, 18) Tus tsiaj no yog lub cim rau lub qab ntuj no tej kev nom kev tswv uas tswj kav “txhua lub tebchaws, tsis hais haiv neeg twg, xeem twg thiab cov neeg uas hais yam lus twg los nws kav huv tibsi.” (Tshwmsim 13:7) Lub npe 666 no yog hais txog tej kev nom kev tswv uas qhia tias lawv yeej coj tsis tau zoo raws li Vajtswv pom kiag li. Ua cas thiaj hais li no?

Tsis yog lub npe qhuav qhuav xwb. Cov npe uas Vajtswv muab yeej muaj ntsiab rau. Xws li thaum Vajtswv tis npe rau tus txiv neej hu ua Anplas, txhais tias “Leej Txiv Tus Nyob Siab,” lub npe Anplahas, txhais tias “Yawg Koob Ntawm Txhua Haiv Neeg,” thaum Vajtswv cog lus li ntawd Nws yuav ua kom Anplahas “ua tus yawg koob ntawm ntau haiv neeg.” (Chivkeeb 17:5, hauv qab taw qhia) Ib yam li ntawd, Vajtswv muab tus tsiaj ntawd hu ua 666 los ua lub cim qhia tias nws yuav zoo li cas.

Tus lej rau qhia tias zoo tsis tiav. Ntau zaus, muab cov lej los ua lub cim qhia txog tej yam hauv phau Vajlugkub. Tus lej xya, feem ntau yog siv los qhia txog ib yam twg uas zoo tiav log. Vim tus lej rau tsawg dua tus lej xya, ces qhov no txhais tias Vajtswv suav tias yam ntawd zoo tsis tiav los sis muaj tsis txhij. Qhov no kuj yog hais txog Vajtswv cov yeeb ncuab thiab.​—1 Xwmtxheej Vajntxwv 20:6; Daniyees 3:1.

Thaum hais peb zaug qhia tias tseem ceeb. Tej thaum phau Vajlugkub hais txog ib qho twg peb zaug kom qhia tau tias tseem ceeb heev. (Tshwmsim 4:8; 8:13) Yog li, tus lej 666 qhia tias tib neeg tej kev nom kev tswv yeej tswj thiab kav tsis tau noob neeg raws li Vajtswv pom zoo kiag li. Lawv yeej tswj thiab kav tsis tau kom muaj kev ywj pheej thiab nyob tiaj nyob tus mus ib txhis li, tsuas yog Vajtswv txoj kev kav thiaj yuav ua tau xwb.

Lub cim ntawm tus tsiaj

Phau Vajlugkub hais tias vim tib neeg tso siab plhuav rau lawv tej tsoom fwv cuag li lawv pe hawm cov tsoom fwv ntawd ces lawv yuav tau txais “tus tsiaj ntawd lub cim”. (Tshwmsim 13:3, 4; 16:2) Thaum lawv muab koob meej rau lawv lub teb chaws, lub teb chaws tus chij, los sis qhuas txog lawv tej cuab yeej ua tso ua rog ces twb cuag li lawv pe hawm tej no lawm. Raws li Phau Encyclopedia of Religion hais: “Txoj kev uas nyias khav txog nyias lub teb chaws tau tshwm sim los ua ib txoj kev ntseeg loj kawg nkaus rau tiam no hauv lub qab ntuj khwb.”a

Yuav muab tus tsiaj lub cim ntaus rau ntawm ib tug twg sab tes xis los sis lub hauv pliaj li cas? (Tshwmsim 13:16) Raws li Vajtswv cov lus nkaw rau haiv neeg Ixayees, Vajtswv hais tias: “Pav rau ntawm nej cajnpab thiab dai rau ntawm nej hauvpliaj, nej thiaj yuav nco ntsoov.” (2 Kevcai 11:18) Qhov no tsis yog txhais tias cov neeg Ixayees yuav tau muab Vajtswv tej lus nkaw ntawd sau kiag rau ntawm lawv txhais tes thiab hauv pliaj, tiam sis txhais tias lawv yuav tsum cia Vajtswv txoj lus coj lawv lub neej thiab lawv tej kev xav. Ces ib yam li ntawd, tsis yog yuav muab tus lej 666 no nkaug kiag rau hauv tib neeg tej tawv nqaij, tiam sis tus tsiaj lub cim tsuas yog qhia tias cov twg yog cov uas cia tej kev nom kev tswv tswj hwm lawv lub neej xwb. Cov neeg uas muaj tus tsiaj lub cim no yog cov uas tawm tsam Vajtswv ntag.​—Tshwmsim 14:9, 10; 19:19-21.