Cov Thawj Saib Xyuas Kev Noj Qab Nyob Zoo Ceeb Toom Tias Tej Vej Xaij Zeem Phooj Ywg Yuav Ua Tau Teeb Meem Rau Cov Hluas—Phau Vajlugkub Hais Li Cas?

Nyob rau lub 5 Hlis tim 23, xyoo 2023, ib tug thawj uas saib xyuas kev noj qab nyob zoo nyob teb chaws Mekas ceeb toom sawv daws tias, tej vej xaij zeem phooj ywg tsis zoo rau coob leej ntau tus hluas.

• “Txawm cov vej xaij zeem phooj ywg zoo rau tej tug me nyuam yaus los sis tej tug me nyuam hluas los, muaj pov thawj qhia tias kuj ua tau rau tej me nyuam yaus thiab cov hluas puas siab puas ntsws, thiab ua tau rau lawv noj tsis qab nyob tsis zoo.”—Social Media and Youth Mental Health: The U.S. Surgeon General’s Advisory, 2023.

Tej yam uas cov tshawb fawb nrhiav pom hais hauv qab no qhia tias yeej tsim nyog peb txhawj.

• Cov me nyuam hluas uas muaj 12 xyoos txog 15 xyoos uas “siv tej vej xaij zeem phooj ywg ntau tshaj 3 txoos teev rov saud txhua txhua hnub, yuav muaj kev puas siab puas ntsws, kev txhawj xeeb thiab kev nyuaj siab ntau tshaj ob npaug.”

• Cov me nyuam uas muaj 14 xyoos, “uas nquag siv tej vej xaij zeem phooj ywg, lawv pw tsis txaus, muaj neeg hais lus saib tsis taus lawv hauv Is Taws Nej, lawv xav tias lawv tsis zoo nkauj los sis tsis zoo nraug, lawv saib lawv tus kheej tsis rau nqi, thiab lawv muaj kev ntxhov siab. Tej no muaj tshwm sim rau cov me nyuam ntxhais ntau dua cov me nyuam tub.

Yuav ua li cas cov niam cov txiv thiaj tiv thaiv tau lawv cov me nyuam ntawm tej yam phem no? Phau Vajlugkub muaj tswv yim yuav pab tau nej.

Cov niam cov txiv ua tau li no

Saib xyuas koj tus me nyuam. Nej yog niam yog txiv, nej yuav tsum xam pom tias, yuav muaj tej yam tsis zoo twg los raug nej cov me nyuam thiab ua zoo xav seb puas tsim nyog nej tus me nyuam siv tej vej xaij zeem phooj ywg los tsis tsim nyog.

• Phau Vajlugkub tej hauv paus ntsiab lus: ‘Qhia me nyuam kom paub ua nws lub neej.’​—Pajlug 22:6.

• Yog xav paub ntxiv, mus nyeem zaj ua lus Askiv hu ua “Should My Child Use Social Media?”

Yog koj tso cai rau koj tus me nyuam siv tej vej xaij zeem phooj ywg, koj yuav tsum ceev faj tias tsam muaj tej yam tsis zoo rau koj tus me nyuam, thiab koj yuav tsum saib xyuas koj tus me nyuam seb nws siv li cas rau li cas. Koj yuav ua li no li cas?

Tiv thaiv koj tus me nyuam ntawm tej yam tsis zoo. Cob qhia koj tus me nyuam kom nws paub tias yam twg tsis zoo thiab kom nws zam txhob mus saib.

• Phau Vajlugkub tej hauv paus ntsiab lus: ‘Tsis tsim nyog nej yuav ua nkauj ua nraug, ua kev phem kev qias thiab ntshaw luag tug. Txawm yog nej yuav hais txog xwb los twb tsis tsim nyog hais. Thiab tsis tsim nyog nej hais tej lus vuab tsuab uas ntsawv mloog.’​—Efexus 5:3, 4.

• Tej uas yuav pab tau nej ntxiv, mus nyeem zaj ua lus Askiv “Teaching Your Teenager Social Media Safety.”

Siv muaj caij muaj nyoog. Qhia koj tus me nyuam tias koj tsuas pub nws siv tej vej xaij zeem phooj ywg thaum twg thiab ntev li cas xwb.

• Phau Vajlugkub tej hauv paus ntsiab lus: ‘Nej yuav tsum ceev faj thiab . . . ua li cov neeg uas muaj tswv yim , yuav tsum siv txhua lub sij hawm kom muaj nqis.’​—Efexus 5:15, 16.

• Siv zaj yeeb yaj kiab kos duab Yuav Siv Tej Vej Xaij Ntaus Phoojywg Li Cas? los pab koj tus me nyuam kom nws to taub tias vim li cas tseem ceeb rau nws siv tej vej xaij zeem phooj ywg kom muaj caij muaj nyoog.