CIA LI CEEV FAJ ZOV TOS!
Kev Ntseeg Thiab Tsov Rog Hauv Yus Khees—Phau Vajlugkub Hais Li Cas Xwb?
Cov thawj coj hauv tej kev ntseeg tau hais li cas txog ntsuj rog hauv teb chaws Yus Khees (Ukraine)? Tej xov xwm tau tshaj tawm li cas xwb?
Phau EUobserver tau tshaj tawm rau lub 3 Hlis tim 7 xyoo 2022 tias: “Tus thawj coj hauv lub tshawj Russian Orthodox [Lav Xias Authados] hu ua Patriarch Kirill [Pherhi-as Khilaus], tsis tau hais ib los li cas txog qhov uas Lav Xias mus tua lwm lub teb chaws. . . . Tej uas nws lub tshawj pheej tau dag txog teb chaws Yus Khees yog tej uas Putin [Phuthees] siv los ua chaw tiag rau nws mus ua rog.”
Phau AP News tau tshaj tawm rau lub 3 Hlis tim 8 xyoo 2022 tias: “Patriarch Kirill tau qhia tias qhov uas nws lub teb chaws mus txeeb teb chaws Yus Khees yeej raug cai lawm. Nws piav tias qhov uas ua ntsuj nrog no yog los mus tawm tsam kev txhaum.”
Phau Jerusalem Post tau tshaj tawm rau lub 3 Hlis tim 16 xyoo 2022 tias: “Hnub 1 tas los no tus thawj coj hauv lub tshawj Ukrainian Orthodox [Yus Khees Authados] hu ua Metropolitan Epiphanius I of Kyiv [Merhauphalitees Epifani-as Tus Ib Hauv Lub Nroog Khij] tau foom koob hmoov rau nws cov tswv cuab kom ‘kav tsij tua cov Lav Xias uas tuaj txeeb teb chaws’ . . . [Nws] kuj hais tias tua tub rog Lav Xias yeej tsis txhaum.”
Lub koom haum UCCROa tau tshaj tawm rau lub 2 Hlis tim 24 xyoo 2022 tias: “Peb [uas yog lub koom haum Ukrainian Council of Churches and Religious Organizations (UCCRO)] txhawb Yus Khees pab tub rog thiab txhua tus uas sawv tiv thaiv peb. Peb thov foom khoob hmoov rau lawv kom lawv tiv thaiv tau teb chaws Yus Khees txhob poob mus rau tus tawm tsam peb txhais tes, thiab thov Vajtswv pab lawv.”
Koj xav li cas? Puas tsim nyog tej kev ntseeg uas lees tias ntseeg Yexus Khetos txhawb lawv cov tswv cuab mus ua tsov ua rog? Phau Vajlugkub hais li cas xwb?
Keeb kwm kev ntseeg txuam kev tsov kev rog
Tej kev ntseeg ib txwm ua txuj hais tias lawv xav kom muaj kev thaj yeeb tiam sis lawv ho pom zoo muaj kev tsov kev rog. Ib txhia txhawb tib neeg ua tsov ua rog thiab ib txhia tseem hais tias yeej tsim nyog ua tsov ua rog lawm. Yehauvas Cov Tim Khawv twb muab lawv lub siab nkhaus ntawd nthuav qhia tau ntau xyoo los lawm. Saib seb peb tej ntaub ntawv tau hais li cas.
Zaj “The Crusades—A ‘Tragic Illusion’” piav txog thaum txoj kev ntseeg Kav Tos Liv tuav Vajtswv thiab Khetos nkawd ob lub npe loj xov tua tib neeg pov tseg.
Zaj “The Catholic Church in Africa” piav txog lub caij uas ib haiv neeg sawv tua ib haiv kom tu noob nrho. Tej kev ntseeg yeej tsis tav txoj kev sib ntaus sib tua ntawd li.
Zaj “Is Religion to Blame?,” “Religion’s Role in Man’s Wars,” thiab “Religion Takes Sides” piav txog qhov uas cov Kav Tos Liv, cov Authados, thiab cov Plos Tes Tas (Protestant) tej thawj coj nyias txhawb nyias lub teb chaws tog ua tsov ua rog.
Puas tsim nyog cov ntseeg Yexus txhawb kev tsov kev rog?
Yexus hais tias: “Hlub kwv tij zej zog ib yam li koj hlub koj tus kheej.” (Mathais 22:39) “Cia li hlub nej cov yeeb ncuab.”—Mathais 5:44-47.
Xav seb: Yog ib pawg ntseeg twg txhawb kom lawv cov tswv cuab mus ua tsov ua rog lawv puas tseem hais tau tias lawv muaj kev hlub li Yexus qhia? Mus nyeem lo lus teb hauv zaj “True Christians and War” thiab “Is It Possible to Love One’s Enemies?”
Yexus hais tias: “Kuv lub tebchaws tsis yog lub ntiajteb no. Yog kuv lub tebchaws yog lub ntiajteb no, kuv cov thwjtim yeej yuav tawmtsam kom yeej.” (Yauhas 18:36) “Txhua tus uas siv ntaj yuav tuag rau hniav ntaj.”—Mathais 26:47-52.
Xav seb: Yog Yexus twb tsis pub nws cov thwj tim siv ntaj los tiv thaiv nws, puas tsim nyog cov ntseeg niaj hnub no sib ntaus sib tua? Mus nyeem zaj “Is War Compatible With Christianity?” seb cov ntseeg Yexus thaum ub tau ua raws nkaus li Yexus tus qauv thiab nws tej lus qhia li cas.
Yuav ua li cas rau tej kev ntseeg uas txhawb kev tsov kev rog?
Phau Vajlugkub qhia tias Vajtswv tsis lees paub tej kev ntseeg uas hais tias lawv sawv Yexus cev tiam sis tsis coj raws li Yexus qhia.—Mathais 7:21-23; Titus 1:16.
Phau Tshwm Sim qhia tias Vajtswv yuav muab “cov neeg uas nyob hauv ntiajteb no” cov ntshav rau tej kev ntseeg ntawd ris. (Tshwmsim 18:21, 24) Mus nyeem zaj “Lub Nroog Npanpiloos Uas Loj Dua Ntais Yog Dab Tsi?” seb yog vim li cas.
Yexus qhia tias txhua txoj kev ntseeg uas Vajtswv tsis lees paub yuav raug rhuav tshem vim lawv tej hauj lwm phem, ib yam li tsob ntoo phem uas yuav “raug muab ntov pov hlawv.” (Mathais 7:15-20) Mus nyeem zaj “Hnub Kawg Rau Kev Ntseeg Cuav Ze Lawm!” seb lawv yuav raug rhuav tshem li cas.
Cov duab los ntawm: Sefa Karacan/Anadolu Agency/Getty Images; Maxym Marusenko/NurPhoto via Getty Images
a Lub koom haum UCCRO los sis Ukrainian Council of Churches and Religious Organizations muaj 15 lub tshawj nyob rau hauv, uas yog cov ntseeg Authados, cov Kav Tos Liv Kilis thiab Loos, cov Plos Tes Tas, cov Evangelical [Ivantselikaus], kuj muaj cov Yudais thiab cov Moxalees nyob rau hauv lub koom haum no thiab.