Teb Chaws Lav Xias Mus Txeeb Teb Chaws Yus Khees

Lub 2 Hlis tim 24 xyoo 2022 thaum kaj ntug txoog Lav Xias txawm tso tub rog tuaj txeeb teb chaws Yus Khees (Ukraine). Txawm tej nom tswv thoob ntiaj teb txwv tsis pub ua rog los lawv cheem tsis tau li. Qhov lawv sib ntaus sib tua no puas yuav raug lwm lub teb chaws thiab? Tus sawv cev rau lub koom haum ntiaj teb UN (United Nations) uas yog Athauni-au Nkutiles (António Guterres) tau hais ob peb hnub dhau los no tias: “Qhov teeb meem no yuav tsim kev kub ntxhov loj heev. Peb yeej tsis xav pom li. Qhov no yuav ua rau cov teb chaws hauv Yus Luv thiab tej teb chaws thoob qab ntuj nyob tsis tiaj tsis tus.”

Phau Vajlugkub hais li cas txog tej xwm txheej no?

• Yexus Khetos tau hais tias yuav muaj ib hnub uas “ib haiv neeg sawv tawm tsam ib haiv neeg thiab ib lub teb chaws sawv tawm tsam ib lub teb chaws.” (Mathais 24:7) Mus nyeem zaj “What Is the Sign of ‘the Last Days,’ or ‘End Times’?” seb phau Vajlugkub qhia li cas txog kev tsov kev rog thiab seb cov kev tsov kev rog no muaj raws nkaus li Yexus cov lus li cas.

• Phau Tshwm Sim hauv phau Vajlugkub muab kev tsov kev rog piv rau ib tug txiv neej uas caij rawv “ib tug nees liab cuag nplaim taws” uas tab tom “caum txoj kev thaj yeeb tawm hauv ntiaj teb mus.” (Tshwm Sim 6:4) Mus nyeem zaj “The Four Horsemen—Who Are They?” ua lus Askiv seb zaj lus faj lem no hais li cas txog kev tsov kev rog niaj hnub no.

• Tej lus faj lem hauv phau Daniyees piav tias “tus vaj ntxwv qaum teb” thiab “tus vaj ntxwv qab teb” yuav sib tawm tsam. (Daniyees 11:25-45) Saib zaj yeeb yaj kiab hu ua Daniyees Tshooj 11 Muaj Tshwm Sim Li Cas seb ua li cas peb thiaj paub tias Lav Xias thiab cov teb chaws uas koom tes nrog Lav Xias ho yog tus vaj ntxwv qaum teb.a

• Phau Tshwm Sim kuj qhia tias tej teb chaws yuav “tuaj ua ke ua rog rau hnub tseemceeb uas Vajtswv tus uas muaj hwjchim loj kawg nkaus teem cia lawm.” (Tshwmsim 16:14, 16) Tiam sis ntsuj rog no yuav tsis yog tib neeg cov teb chaws rov sib tawm tsam li peb pom tam sim no. Mus nyeem zaj “What Is the Battle of Armageddon?” ua lus Askiv seb ntsuj rog ntawd yuav zoo li cas tiag.

Ua cas koj thiaj cia siab tau rau yav tom hauv ntej?

• Phau Vajlugkub hais tias Vajtswv yuav “ua rau tej kev tsov kev rog hauv ntiajteb no tiaj tus.” (Phau Ntawv Nkauj 46:9) Mus nyeem zaj “A Real Hope for a Better Tomorrow” ua lus Askiv seb Vajtswv tau cog lus li cas.

• Yexus qhia nws cov thwj tim thov kom Vajtswv los kav los sis kom Nws lub Nceeg Vaj los. (Mathais 6:9, 10) Vajtswv lub Nceeg Vaj yog nws lub tseem fwv saum ntuj uas yuav los kho txhua yam kom muaj tiav raws li Vajtswv lub siab nyiam. Vajtswv xav kom lub ntiaj teb muaj kev thaj yeeb xwb. Mus saib zaj yeeb yaj kiab Vajtswv Lub Nceeg Vaj Yog Dabtsi? seb Vajtswv lub Nceeg Vaj pab tau koj li cas.

Yehauvas Cov Tim Khawv muaj tshaj li 129,000 tus nyob hauv teb chaws Yus Khees. Lawv coj ib yam li Yehauvas Cov Tim Khawv thoob ntiaj teb es xyaum Yexus tus qauv, tsis tuaj ib roog nom tswv twg tog thiab tsis ua tsov ua rog. (Yauhas 18:36) Thoob qab ntuj Yehauvas Cov Tim Khawv rau siab ntso tshaj tawm “txoj xov zoo txog Vajtswv txoj kev kav.” Vajtswv txoj kev kav nkaus nkaus xwb thiaj yuav kho tau tib neeg tej teeb meem, xws li kev tsov kev rog. (Mathais 24:14) Yog koj xav paub seb phau Vajlugkub pab tau koj muaj kev vam kev cia siab li cas thov tiv tauj peb.