Sib Kho Sai Li Sai Tau!
PUAS tau muaj ib tug kwv tij nkauj muam ua rau koj tu siab dhau es neb txoj kev sib raug zoo tsis zoo li qub lawm? Yuav kom kho tau neb txoj kev phooj ywg, neb yuav tau maj nroos kho kom neb rov muaj kev sib raug zoo, thiaj yuav pab tau sawv daws muaj kev sib haum xeeb.a
Cia peb muab piv li no, yog tus pob txha lov lawm peb yuav tau muab kho qhov mob thiaj ploj mus. Yog peb tsis muab kho tam sid ces yeej yuav mob. Ntxiv ntawd, haj yam ua rau tus pob txha tsis txawj zoo thiab tsis khov li qub lawm.
Zoo tib yam li peb maj nroos kho tus pob txha uas lov, peb yuav tau maj nroos kho peb txoj kev sib raug zoo nrog peb cov kwv tij nkauj muam. Tsis li ntawd ces peb txoj kev phooj ywg yuav tsuag zuj zus mus xwb. Thiab ib leeg yuav cib nyeej rau ib leeg ces txoj kev phooj ywg yuav tu mus. Yexus hais tias: “kav tsij nrog nws hais kom sib haum ua ntej.” (Mathais 5:25) Kav tsij ua lub siab mos muag mus nrog koj tus phooj ywg tham thiab ib leeg qhia rau ib leeg tias neb xav li cas. Vim li cas qhov uas sib tham kom sib nkag siab ho nyuaj? Cia peb mus tham txog ob yam.
Thawj yam, tej zaum koj cia li yuav kav liam tsis daws neb qhov teeb meem rau qhov koj ntshai mus nrog nws tham.b Tau muaj li no rau Yu-audias thiab Xitikhes uas yog ob tug muam Khixatias, nkawd ib leeg chim rau ib leeg. Nkawd qhov teeb meem muaj ntev loo, rau qhov tus tub txib Povlauj nyob hauv nroog Loos, los nws twb hnov txog huv si. Povlauj txhawb nkawd kom ua npaum li ua tau, kom rov koom ua ib lub siab li qub. (Filipis 4:2) Yog nkawd ib leeg txo hwj chim rau ib leeg, ib leeg qhib siab nrog ib leeg tham, ib leeg zam txim rau ib leeg ces nkawd txoj kev sib raug zoo yuav rov zoo li qub dua.
Yam ob, tej zaum koj xav kom nws xub los nrog koj tham thiab lees nws qhov txhaum ua ntej tso. Tiam sis txhob xav li ntawd, qhov tiag koj xav tau koj tus phooj ywg rov qab, tsis yog ib tug liam txim rau ib tug. Tus kws kho mob, nws tau hau ntsoov kho kom tus pob txha zoo xwb, tsis yog nws yuav thom tas zog seb yog tim li cas tus pob txha thiaj lov. Thaum koj mus nrog koj tus phooj ywg tham, txhob hais tias tim leej twg thiaj muaj teeb meem. Tiam sis nco ntsoov tias neb txoj kev phooj ywg muaj nqis heev, thiab xav seb yuav sib kho li cas neb thiaj rov sib raug zoo li qub dua.
Yog koj muaj teeb meem nrog ib tug kwv tij los sis nkauj muam, kav tsij maj nroos mus nrog nws tham thiab kho neb txoj kev phooj ywg kom rov zoo li qub. Efexaus 4:26 hais tias, “Tsis txhob chim tas hnub.” Thaum peb maj nroos kho ib qho teeb meem ces yuav pab tau sawv daws muaj “kev sib haum xeeb thiaj rub tau [sawv daws] los ua ib pab ib pawg.”—Efexaus 4:1-3.
a Yog ob tug Khixatias muaj teeb meem tiam sis tsis loj luaj twg, nkawd cia li sib kho ntsiag to thiab ib leeg zam txim rau ib leeg xwb. (Mathais 5:23, 24) Hos yog muaj teeb meem loj ces nkawd yuav ua raws li hais nyob ntawm Mathais 18:15, 16 ua ntej tso. Yog tias kho tsis tau qhov teeb meem, nkawd mam mus cuag cov txwj laus.—Mathais 18:17.
b Yog tias muaj ib tug kwv tij los sis nkauj muam ua rau peb tu siab tiam sis peb tseem sib raug zoo li qub ces cia li sib zam txim xwb.—Pajlug 26:20.