Hwm Vajtswv Li Aunpadiyas

Aunpadiyas yog tus tub txib saib xyuas Vaj Ntxwv Ahaj tej cuab txhiaj cuab tam. Vaj Ntxwv Ahaj yog ib tug neeg uas lim hiam heev, nws cia muaj kev pe hawm tus dab Npa-as nyob thoob plaws hauv teb chaws Ixayees. Txawm li los Aunpadiyas yog ib tug uas hwm Yehauvas thaum nws tseem yog “menyuam yaus los lawm” thiab nws tsis xav ua ib yam uas tsis haum Yehauvas siab. (1 Vajntxwv 18:1-13) Yog li thaum tus Poj Vaj Yexenpees txib kom muab cov uas cev Yehauvas lus tua pov tseg, Aunpadiyas thiaj ua siab tawv qhawv coj 100 tus cev Vajtswv lus mus zais. Zais ib tug xwb twb nyuaj kawg lawm, tiam sis Aunpadiyas kam zais 100 leej. Tsis tas li ntawd, nws tseem yuav tau nqa zaub nqa mov mus rau lawv noj rau lub caij uas muaj kev tshaib kev nqhis loj heev! Thiab nws yuav tau ua tib zoo ceev faj tsis txhob pub leej twg pom tias nws pab lawv. Vim tias Vaj Ntxwv thiab Poj Vaj muaj coob tus uas cev Npa-as lus.​—1 Vajntxwv 18:19.

Peb kawm tau li cas los ntawm Aunpadiyas? Txawm tias Aunpadiyas ntshai Ahaj los, nws muab qhov uas hwm Yehauvas saib hlob dua. Yog li qhov no thiaj ua rau nws muaj lub siab tawv qhawv cawm nws cov kwv tij tab txawm hais tias nws yuav raug tua los xij. Yog nyob koj lub teb chaws peb tej hauj lwm raug txwv, koj kuj xyaum kom muaj lub siab paub hwm Vajtswv. Yog peb ua li no ces yuav pab kom peb txhawb tau peb cov kwv tij nkauj muam uas ntsib kev tawm tsam los sis kev nyuaj siab.