Koj Yuav Ris Txiaj Ntsig Rau Tus Nqi Txhiv Li Cas?

1-2. Yexus muab nws txoj sia los tuag txhiv peb, yog li peb yuav tau ua li cas? (2 Kauleethaus 5:14, 15) (Saib daim duab.)

YOG muaj ib lub tsev vau los tais koj, es muaj ib tug neeg los pab koj, koj thiaj li dim tau, koj puas yuav ris nws txiaj ntsig? Txawm tus neeg ntawd mus pab lwm tus thiab los, koj tus kheej yeej xav qhia rau nws tias, koj ris nws lub txiaj lub ntsig kawg li.

² Raws li zaj kawm ua ntej peb twb kawm tias, peb cawm tsis tau peb dim ntawm lub txim uas peb saws tau. Txawm li ntawd los, Yexus tus nqi txhiv cawm tau peb ntawm (1) tej kev txhaum uas peb ua, (2) muaj kev cia siab rau lub neej zoo tiav log rau yav tom ntej, thiab (3) rov nrog tau Vajtswv sib raug zoo. Tus nqi txhiv kuj pab tau peb muaj txoj sia nyob mus ib txhis hauv Yehauvas lub ntiaj teb tshiab. Tus nqi txhiv qhia rau peb paub tias, Yexus yeej ib txwm hlub tib neeg ua ntej nws los rau hauv lub ntiaj teb. (Pajlug 8:30, 31) Tus tub txib Povlauj sau li no tias “Khetos txoj kev hlub yeej kav rawv peb.” (Nyeem 2 Kauleethaus 5:14, 15.) Yog li, peb yuav tau ua qhia tias peb yeej ris txiaj ntsig rau Yexus tus nqi txhiv thiab nws txoj kev hlub rau peb.

3. Vim li cas ib tug ris txiaj ntsig txawv ib tug txog tus nqi txhiv?

³ Koj yuav ua li cas qhia tias koj ris txiaj ntsig rau tus nqi txhiv? Tej zaum koj yuav xav txawv ntawm lwm tus. Muab piv txwv li no, muaj peb tug neeg mus rau tib qhov chaw, tiam sis peb tug neeg ntawd nyias tuaj nyias ib lub zos tuaj, thiab nyias yuav taug nyias ib txoj kev tuaj. Zoo tib yam li ntawd, qhov uas koj ris txiaj ntsig rau tus nqi txhiv yuav txawv ntawm lwm tus. Peb yuav mus kawm tias zaj no pab tau: (1) cov uas tseem kawm Vajlugkub, (2) cov uas twb ua kev cai raus dej, thiab (3) cov uas tsis tuaj kev sib txoos lawm.

COV UAS TSEEM KAWM VAJLUGKUB

4. Yehauvas pom li cas txog cov uas tseem kawm Vajlugkub?

⁴ Yog koj tseem kawm Vajlugkub, muab ua tib zoo xav li no: Qhov uas koj los kawm, qhia tau tias koj yog ib tug uas Yehauvas rub los nrog nws sib raug zoo. (Yauhas 6:44; Tes Hauj Lwm 13:48) “[Yehauvas] paub txhua yam uas [koj] xav.” Qhov no qhia tau tias qhov uas koj siv zog kawm txog nws, thiab hloov koj lub neej kom coj tau raws li nws lub siab nyiam, ua rau Yehauvas zoo siab heev. (1 Xwmtxheej Vajntxwv 28:9; Pajlug 27:11) Tus nqi txhiv pab tau kom koj nrog Yehauvas sib raug zoo. (Loos 5:10, 11) Yog li koj yuav tsum saib kom muaj nqis.

5. Raws li Filipis 3:16 hais cov uas tseem kawm Vajlugkub yuav tau coj li cas?

⁵ Yog koj tseem kawm Vajlugkub koj yuav ua qhia tias koj ris txiaj ntsig rau tus nqi ntxhiv li cas? Ib txoj ke uas peb qhia tias peb ris txiaj ntsig, yog peb ua raws li tus tub txib Povlauj cov lus uas nws hais nyob ntawm Filipis 3:16 uas hais tias: “Txawm peb paub Vajtswv zoo npaum li cas los cia peb peem tiag mus lawm tom ntej kom peb yim huab paub Vajtswv ntxiv.” Lwm phau Vajlugkub muab nqe no txhais hais tias: “Peb tau hau ntsoov mus lawm yav tom ntej.” Yog li tsis txhob cia leej twg los sis ib yam dab tsis, los tav tau koj txoj hau kev kawm Vajlugkub kom tau txoj sia mus ib txhis.​—Mathais 7:14; Lukas 9:62.

6. Cov uas tseem kawm Vajlugkub yuav ua li cas, yog nyuaj rau lawv ntseeg los sis hloov tej yam kom haum Vajtswv siab? (2 Kevcai 30:11-14) (Saib daim duab.)

⁶ Koj yuav ua li cas yog hais tias nyuaj rau koj ntseeg txog ib yam uas koj nyuam qhuav kawm nyob hauv phau Vajlugkub? Mus tshawb nrhiav thiab kawm txog yam ntawd, thiab thov Yehauvas pab koj kom koj to taub. (Phau Ntawv Nkauj 86:11) Yog koj twb ua li ntawd tag lawm los koj tseem tsis nkag siab qees, ces muab ncua me ntsis cia tso. Lwm zaus koj mam rov los kawm ntxiv tej zaum koj yuav to taub. Tiam sis, koj yuav tsum kawm Vajlugkub twj ywm. Ua li koj yuav ua li cas, yog tias koj tso tseg tsis tau tej yam uas tsis haum Yehauvas siab? Nco ntsoov tias Yehauvas yeej tsis hais kom peb ua ib yam uas peb ua tsis tau. Koj yeej muaj peev xwm coj tau raws li nws tej kev cai. (Nyeem 2 Kevcai 30:11-14.) Tsis tas li ntawd, Yehauvas twb cog lus tias nws yuav pab koj. (Yaxayas 41:10, 13; 1 Kauleethaus 10:13) Yog li tsis txhob tso tseg, kav tsij mloog Yehauvas lus. Tsis txhob xav txog qhov teeb meem ntawd tas li, tiam sis ua zoo xav txog tus nqi txhiv uas Yehauvas muab pub rau koj. Thaum koj txoj kev hlub rau Yehauvas loj zuj zus tuaj lawm, koj yuav pom tias “Vajtswv tej lus peb yeej coj tsis nyuaj li.”​—1 Yauhas 5:3.a

7. Cov hluas uas loj hlob hauv qhov tseeb yuav tau ua tib zoo xav txog dab tsi?

⁷ Ua li nej cov hluas uas loj hlob hauv qhov tseeb ne? Nej los yuav tau kawm Vajlugkub thiab. Nej yog cov uas tseem ceeb tshaj uas nej niam thiab nej txiv qhia Vajlugkub rau. Phau Vajlugkub hais tias: “Nej cia li los nyob ze Vajtswv, Vajtswv thiaj yuav los nyob ze nej.” (Yakaunpaus 4:8; 1 Xwmtxheej Vajntxwv 28:9) Thaum koj txav los nyob ze Yehauvas, nws yeej yuav txav los nyob ze koj thiab. Tsis yog tias koj loj hlob hauv ib tsev neeg uas teev tiam Yehauvas es nws thiaj xav txav los ze koj. Tiam sis qhov tseeb tiag, Yehauvas yeej xav kom koj los ua nws tus phooj ywg. Dab tsi pab tau koj muaj ib txoj kev sib raug zoo nrog Yehauvas? Twb yog muaj tus nqi txhiv, yog li koj yuav tau saib rau nqi. (Loos 5:1, 2) Yog li xyoo no ua ntej koj mus koom ua kev cai nco txog Yexus, ua tib zoo xav tias nws txoj kev tuag muaj nqis npaum li cas rau koj? Txawm koj yuav muaj tej hom phiaj twg ntawm sab kev ntseeg los xij, cia li ua qhia tias koj ris txiaj ntsig rau tus nqi txhiv uas Yehauvas pub rau koj.b

COV UAS UA KEV CAI RAUS DEJ

8. Cov ua kev cai raus dej qhia tias lawv ris txiaj ntsig li cas rau tus nqi txhiv?

⁸ Yog koj ua kev cai raus dej lawm, ces koj twb ua qhia tias koj ris txiaj ntsig rau tus nqi txhiv. Xws li, koj twb txav los nyob ze Yehauvas thiab hloov koj lub neej los coj raws li nws tej kev cai lawm. Tsis tas li ntawd koj kuj mloog Yexus tej lus sam hwm, kom mus coj tib neeg los ua nws li thwj tim. Koj kuj muab koj tus kheej cob rau Yehauvas thiab ua kev cai raus dej. Puas muaj tej tug tawm tsam koj vim koj los ntseeg Yehauvas? (2 Timautes 3:12) Koj muaj lub siab npuab rawv teev tiam Yehauvas vim koj hlub nws thiab ris txiaj ntsig rau tus nqi txhiv.​—Henplais 12:2, 3.

9. Cov uas ua kev cai raus dej lawm yuav tau ceev faj li cas?

⁹ Txawm peb ua kev cai raus dej lawm los peb yuav tau ceev faj. Rau qhov tias ntev mus ntev tuaj, peb yuav tsis nco saib tias tus nqi txhiv muaj nqi npaum li cas lawm. Ua cas ho muaj tau li ntawd? Cia peb mus kawm txog cov Khixatias nyob hauv Efexaus. Yexus qhuas lawv txog qhov uas lawv muaj lub siab ntev thev. Txawm li los nws hais rau lawv tias: “Tshuav ib qho uas kuv tsis qhuas nej: Yav tas los nej yeej hlub kuv, tiamsis nimno nej tsis hlub kuv lawm.” (Tshwmsim 2:3, 4) Raws li Yexus cov lus hais, ntev mus ntev tuaj cov Khixatias txoj kev hlub rau nws yuav txawj tsuag. Tej zaum ib tug Khixatias thov Vajtswv, mus kev sib txoos, mus tshaj tawm los nws lam ua lawm xwb. Tej uas nws ua ntawd tsis yog ua los ntawm lub siab hlub lawm. Yog tias koj txoj kev hlub rau Yehauvas tsuag zuj zus lawm koj yuav tau ua li cas?

10. Peb kawm tau li cas los ntawm qhov uas Povlauj hais rau Timautes? (1 Timautes 4:13, 15)

¹⁰ Tus tub txib Povlauj hais rau Timautes tias kom nws ua tib zoo “xav txhij xav txhua” thiab kom nws ua tib zoo xav “kom thawm” Timautes thiaj li yuav ua tau Vajtswv tej hauj lwm. (Nyeem 1 Timautes 4:13, 15.) Yuav kom peb ua tau raws li Povlauj cov lus hais, peb yuav tau xav seb peb yuav ua li cas peb txoj kev teev tiam thiaj li muaj nqis, thiab peb thiaj li “kub siab lug ua Vajtswv Yehauvas tes hauj lwm.” (Loos 12:11) Xws li koj kuj ua tib zoo npaj rau kev sib txoos, thiaj pab tau koj ua tib zoo mloog. Los yog thaum koj kawm Vajlugkub rau koj tus kheej, mus nyob rau tej qhov chaw ntsiag to, es koj thiaj li muab tau tej uas koj kawm coj los ua tib zoo xav. Zoo tib yam li lub cub tawg, peb yuav tau tsij taws tas zog thiaj li yuav cig. Yog li yuav kom peb ris txiaj ntsig rau Yehauvas thiab tus nqi txhiv, peb yuav tau kawm nws Txoj Lus tsis tseg tsis tu. Ntxiv ntawd, lub lim tiam ua ntej koj yuav mus koom ua kev cai nco txog Yexus, ua tib zoo xav txog tej koob hmoov uas Yehauvas pub rau peb. Yog peb ua li no, yim huab yuav pab peb ris txiaj ntsig rau tus nqi txhiv. Twb vim yog muaj tus nqi txhiv peb thiaj muaj kev sib raug zoo nrog Yehauvas.

11-12. Piav seb tej lub sij hawm yog koj tsis kub siab lawm puas yog Yehauvas tsis pub nws lub hwj huam dawb huv rau koj? (Saib daim duab.)

¹¹ Yog tej thaud koj tsis kub siab teev tiam Vajtswv li qhov uas koj xav los txhob qaug zog, thiab tsis yog tias nws tsis muab nws lub hwj huam rau koj lawm. Nej puas nco qab thaum tus tub txib Povlauj hais rau cov ntseeg hauv lub nroog Kauleethaus txog qhov uas nws mus tshaj tawm, nws hais li no tias: “Txawm kuv yuam kuv tus kheej ua xwb los, tes hauj lwm tseem ceeb no yeej yog muab cob rau kuv lawm.” (1 Kauleethaus 9:17) Nws tus nru lus yog li cas?

¹² Tej lub sij hawm Povlauj tsis kub siab mus tshaj tawm, los nws yeej peem tas zog mus, tab txawm tias nws tsis xav mus. Koj kuj ua tau li Povlauj ua thiab. Kav tsij peem tas zog txawm tias koj tsis muaj lub siab xav ua. Thov kom Vajtswv pub koj “muaj lub siab kub lug thiab muaj zog npho ua raws li nws siab nyiam.” (Filipis 2:13) Kav tsij ua tej uas pab tau koj nyob ze Yehauvas. Tso siab tias yog koj ua npaum li koj ua tau, ces ntev mus koj txoj kev hlub rau Yehauvas yuav ruaj khov thiab koj yuav rov kub siab lug.

13. Yuav ua li cas peb thiaj paub tias peb nyob ruaj hauv txoj kev ntseeg?

¹³ Tej thaud zoo rau peb tshuaj peb tus kheej li 2 Kauleethaus 13:5 hais: “Tshuaj nej tus kheej seb nej puas tuav kev ntseeg ruaj nreeg. Sim nej tus kheej thiaj paub tseeb tias nej zoo li cas tiag.” Xws li peb kuj rov nug peb tug kheej tias, ‘Kuv puas muab lub Nceeg Vaj tso ua ntej hauv kuv lub neej?’ (Mathais 6:33) ‘Tej uas kuv saib thiab tej uas kuv nyeem puas qhia tias kuv ntxub tej yam phem?’ (Phau Ntawv Nkauj 97:10) ‘Tej uas kuv hais thiab tej uas kuv ua puas txhawb kom cov kwv tij nkauj muam muaj kev sib haum xeeb thiab koom ib lub siab?’ (Efexaus 4:2, 3) Lub caij uas peb ua kev cai nco txog Yexus yog ib lub sij hawm zoo rau peb tshuaj peb tus kheej seb peb puas ua peb lub neej raws li Yexus pom zoo.

COV UAS TSIS TUAJ KEV SIB TXOOS

14. Ua cas ib txhia thiaj tsis tuaj koom kev sib txoos lawm?

¹⁴ Muaj ib cov kwv tij nkauj muam kub siab lug teev tiam Yehauvas tau ntau xyoo, tiam sis lawv cia li tsis tuaj koom kev sib txoos lawm. Yog vim li cas? Vim muaj ib txhia ntsib “kev nyuaj siab ntxhov plawv.” (Lukas 21:34) Muaj ib txhia cia lwm tus tej lus los sis tej uas lawv ua, ua rau lawv qaug zog lawv thiaj tsis tuaj kev sib txoos lawm. (Yakaunpaus 3:2) Hos ib txhia tau mus ua kev txhaum loj thiab lawv tsis nrhiav kev pab rau lawv. Txawm yog yuav tim li cas los xij, koj yuav ua li cas koj thiaj rov los koom tau lub koom txoos? Yehauvas thiab Yexus nkawd txoj kev hlub nrog rau tus nqi txhiv yuav txhawb kom koj ua dab tsi?

15. Yehauvas mob siab txog cov yaj uas ploj lawm li cas? (Exekees 34:11, 12, 16)

¹⁵ Yehauvas xav li cas txog cov uas tsis tuaj koom kev sib txoos. Yehauvas yeej nco ntsoov lawv thiab nws yeej tsis chim rau lawv. Nws yeej ua txhua yam kom mus nrhiav tau cov yaj uas ploj lawd rov qab los. Yehauvas yuav pub rau lawv noj thiab yuav pab lawv kom lawv rov los cuag tau nws. (Nyeem Exekees 34:11, 12, 16.) Yehauvas puas yuav pab koj tib yam li ntawd? Nws yeej yuav pab xwb! Yog koj tab tom kawm zaj no, ces qhia tau tias koj muaj lub siab xav ua haum Yehauvas siab. Zoo tib yam li thaum xub thawj, Yehauvas pom koj muaj lub siab zoo nws thiaj coj koj los cuag nws, thiab los koom nrog nws cov neeg. Nws yeej tseem pom koj muaj lub siab zoo thiab nws yeej xav kom koj rov qab los rau hauv lub koom txoos.

16. Muaj dab tsis pab tau cov yaj uas ploj lawm rov qab los cuag Yehauvas? (Saib daim duab.)

¹⁶ Phau ntawv me uas muaj lub ntsiab ua lus Askiv hu ua, Return to Jehovah muaj cov ntsiab lus uas hais li no: “Koj yeej tso siab tau tias thaum koj rov los cuag Yehauvas, nws yeej yuav pab koj. Nws yuav pab kom koj thev taus tej kev nyuaj siab ntxhov plawv. Tsis tas li ntawd, nws yuav pab kom koj txhob xav txog tej uas lwm tus ua los sis hais mob koj. Ntxiv ntawd nws yuav zam koj lub txim thiab pab kom koj xav rau qhov zoo thiab muaj lub siab tus. Qhov uas Yehauvas pab koj li no, yuav pab tau koj rov los nrog nws tsev neeg teev tiam ua ke.” Nco ntsoov tias cov txwj laus yeej muaj lub siab xav pab koj thiab. Cov txwj laus “zoo ib yam li lub tsev uas thaiv cua thiab lub chaw nkaum cua daj cua dub.” (Yaxayas 32:2) Yeej paub tias koj ris txiaj ntsig kawg li rau tus nqi txhiv, yog li rov nug koj tus kheej tias, ‘Kuv yuav ua li cas kuv thiaj rov nrog tau Yehauvas sib raug zoo?’ (Yaxayas 1:18; 1 Petus 2:25) Xws li koj mus koom puas tau kev sib txoos? Koj kuj mus nrog ib tug txwj laus tham thiab qhia rau nws tias, koj xav rov qab los nrog Yehauvas sib raug zoo. Yog li nug nws tias koj yuav tau ua li cas? Tej zaum koj kuj yuav tau kawm Vajlugkub ib ntus. Koj yeej tso siab tau tias Yehauvas yeej yuav foom koob hmoov rau koj thiab rau qhov uas koj ris txiaj ntsig rau tus nqi txhiv.

KOJ YUAV UA LI CAS?

17-18. Peb yuav siv peb lub sij hawm li cas ua ntej mus koom ua kev cai nco txog Yexus xyoo no?

¹⁷ Yexus qhia tias tos Yehauvas pub kom muaj tus nqi txhiv los, twb yog los pab kom “txhua tus uas ntseeg tus Tub ntawd thiaj tsis raug puas tsuaj tiam sis tau txoj sia ntev dhawv mus ib txhis.” (Yauhas 3:16) Vim muaj tus nqi txhiv, Yehauvas thiaj pab tau peb dim ntawm lub txim thiab txoj kev tuag. Yog li peb yuav tsum saib rau nqi. (Loos 3:23, 24; 2 Kauleethaus 6:1) Thaum yuav txog caij ua kev cai nco txog Yexus, ua tib zoo xav txog Yehauvas thiab Yexus nkawd txoj kev hlub rau peb. Yog peb ua li no, peb thiaj li yuav paub ris txiaj ntsig rau nkawd txoj kev hlub.

¹⁸ Koj yuav ua li cas qhia tias, koj ris txiaj ntsig rau tus nqi txhiv? Tej zaum qhov uas koj ris txiaj ntsig yuav txawv ntawm lwm tus. Txawm li los koj yeej tso siab tau tias, Yehauvas yuav foom koob hmoov rau qhov uas koj tuaj koom ua ke nrog cov kwv tij nkauj muam nyob thoob qab ntuj. Lawv txhua tus siv zog ua lub neej raws li Yehauvas “pom zoo tsis yog raws li lawv pom zoo.”​—2 Kauleethaus 5:15.