Yehauvas Pab Tau Koj Thaum Koj Tu Siab

1-2. Qee lub sij hawm tus tub txib Povlauj xav li cas, thiab nws tus qauv pab tau peb li cas? (Loos 7:21-24)

THAUM koj xav txog Povlauj koj pom tias nws tau ua tej yam twg? Koj puas xav tias nws yog ib tug uas muaj lub siab tawv mus tshaj tawm rau ntau lub teb chaws, thiab yog ib tug uas txawj qhia heev, los sis sau tau ntau phau ntawv nyob hauv phau Vajlugkub? Povlauj yeej tau ua tej no huv si lawm. Txawm li los, qee lub sij hawm Povlauj kuj muaj kev ntxhov siab tib yam li peb thiab.

² Nyeem Loos 7:21-24. Thaum Povlauj sau nws tsab ntawv mus rau cov ntseeg nyob hauv lub nroog Loos, nws sau txog nws txoj kev xav uas peb txhua tus yeej xav tib yam li nws. Txawm nws yog ib tug uas muaj kev ntseeg thiab xav ua haum Vajtswv siab los, vim nws yog ib tug neeg zoo tsis tiav, ces muaj ntau zaus yeej nyuaj rau nws ua haum Vajtswv siab. Ntxiv ntawd, tej lub sij hawm Povlauj tu siab txog tej yam uas nws tau ua yav tag los, thiab ntxhov siab txog qhov teeb meem uas nws tab tom muaj.

3. Hauv zaj kawm no peb yuav mus tham txog dab tsi? (Mus saib “Txhais Tawm.”)

³ Txawm nyuaj npaum twg los, Povlauj tsis cia tej kev ntxhova siab tswj nws txoj kev xav. Nyob hauv zaj kawm no peb yuav mus tham txog peb lo lus nug no: Ua cas qee lub sij hawm Povlauj thiaj “ntxhov siab”? Dab tsi pab tau nws kom txhob tu siab? Thiab peb yuav ua li cas peb thiaj kov yeej peb txoj kev tu siab?

UA CAS POVLAUJ NTXHOV SIAB

4. Ua cas Povlauj thiaj tu siab?

⁴ Tej uas Povlauj tau ua yav tas los. Ua ntej Povlauj los ua ib tug Khixatias, lawv muab nws hu uas Xolaus. Nws tau ua tej yam uas phem heev. Xws li thaum nws pom zoo thiab saib ntsoov lawv rho pob zeb ntaus Xatefanaus mus txog thaum nws tuag kiag. (Tes Hauj Lwm 7:58; 8:1) Tsis tas li ntawd, Povlauj yog tus uas ntaus thawj hlo ua phem tsim txom cov Khixatias.​—Tes Hauj Lwm 8:3; 26:9-11.

5. Povlauj xav li cas txog tej uas nws tau ua yav tag los?

⁵ Tom qab Povlauj twb los ua ib tug Khixatias lawm los, qee lub sij hawm nws tu siab txog tej yam uas nws tau ua yav tag los. Thaum nws los ntseeg Vajtswv ntev zuj zus lawm, tej kev phem uas nws tau ua yav tag los, pheej ua rau nws nyuaj siab. Kwv lam xyoo 55 tom qab Yexus, Povlauj sau nws thawj tsab ntawv mus rau cov ntseeg nyob hauv lub nroog Kauleethaus, nws hais tias, “Kuv tsis tsim nyog muab hu ua tub txib vim kuv tsim txom Vajtswv lub koom txoos.” (1 Kauleethaus 15:9) Kwv lam li tsib xyoo tom qab ntawd, nws sau tsab ntawv mus rau cov ntseeg nyob hauv lub nroog Efexaus. Nws hais li no, “kuv yog tus qis tshaj cov dawb huv tib si.” (Efexaus 3:8) Hos thaum nws sau nws tsab ntawv mus rau Timautes, nws hais li no txog nws tus kheej tias, “kuv tuam mom Vajtswv, tsim txom luag, ua saib tsis taus lwm tus.” (1 Timautes 1:13) Siv xav seb Povlauj yuav xav li cas, thaum nws mus xyuas cov koom txoos thiab ntsib cov uas nws tau muab tsim txom los sis ib tug ntawm cov tsev neeg uas nws tau tsim txom yav tag los?

6. Povlauj kuj ntxhov siab ntxiv txog tej yam twg? (Mus saib taw ntawv.)

⁶ Tus saus uas chob cev nqaij. Povlauj muab nws txoj kev ntxhov siab piv rau “tus saus uas chob . . . cev nqaij.” (2 Kauleethaus 12:7) Povlauj tsis qhia tsi ntsees tias qhov teeb meem ntawd yog dab tsi. Tiam sis qhov lus piv txwv nws siv qhia tau tias tej zaum yog ib qhov mob rau lub cev, ib txoj kev tu siab, los sis lwm yam uas ua mob rau nws.b

7. Vim li cas nyuaj rau Povlauj ua tau qhov zoo? (Loos 7:18, 19)

⁷ Zoo tsis tiav. Vim Povlauj yog ib tug neeg zoo tsis tiav thiaj nyuaj rau nws. (Nyeem Loos 7:18, 19.) Povlauj yeej xav ua qhov yog, tiam sis vim nws zoo tsis tiav nws thiaj ua tsis tau. Nws lees tias yeej nyuaj kawg li, cuag li nws muaj ob lub siab uas pheej sib tawm tsam tas zog. Txawm li los Povlauj yeej siv zog kom ua tau qhov zoo. (1 Kauleethaus 9:27) Tej thaud, thaum nws twb siv zog ua kom tau zoo los, nws tseem ua yuam kev ntshe ua rau nws ntxhov siab heev!

DAB TSI PAB TAU POVLAUJ KOM TXHOB TU SIAB

8. Povlauj ua li cas thiaj pab tau nws?

⁸ Raws li Povlauj cov tsab ntawv uas nws sau, nws pom hais tias Vajtswv lub hwj huam pab tau cov Khixatias kom txhob xav txog tej yam uas tsis zoo, tiam sis kom lawv rau siab ntso ua lub neej kom haum Vajtswv siab. (Loos 8:13; Kalatias 5:16, 17) Povlauj hais tag los hais thiab, kom cov Khixatias yuav tsum siv zog tawm tsam tej yam ntxwv uas tsis zoo thiab tej uas lawv ntshaw. Yog lawv ua li no, lawv thiaj ua tau raws li Vajtswv lub siab nyiam. (Kalatias 5:19-21, 26) Raws li tej uas Povlauj hais, peb pom tias nws yeej kawm Vajtswv Txoj Lus kom nws thiaj paub hloov nws tus kheej. Yog li peb yeej pom tias, Povlauj yeej ua raws nraim li nws tau qhia lwm tus.

9-10. Dab tsi pab tau kom Povlauj muaj kev zoo siab? (Efexaus 1:7) (Mus saib daim duab.)

⁹ Txawm tej lub sij hawm Povlauj qaug zog los, nws yeej tseem muaj tau kev zoo siab. Xws li, thaum nws hnov xov zoo txog cov koom txoos uas nyob kev deb ua rau nws xyiv fab heev. (2 Kauleethaus 7:6, 7) Tsis tas li ntawd, qhov uas nws nrog cov kwv tij nkauj muam sib raug zoo kuj ua rau nws muaj kev zoo siab. (2 Timautes 1:4) Ntxiv ntawd nws paub tias nws ua haum Yehauvas siab thiab muaj ib txoj kev sib raug zoo nrog Yehauvas. Povlauj zoo siab heev nws thiaj hais tias, nws teev tiam Yehauvas nrog “lub siab dawb paug.” (2 Timautes 1:3) Thaum Povlauj raug kaw hauv lub nroog Loos, nws txhawb cov kwv tij nkauj muam kom lawv cia li “zoo siab rau tus Tswv.” (Filipis 4:4) Thaum peb nyeem Povlauj cov lus, peb to taub tias nws tsis xav txog nws tej kev ntxhov siab los sis tej uas nws ua yuam kev tas li. Thaum Povlauj pib xav txog tej yam tsis zoo, ces nws hloov kiag mus xav txog tej yam uas ua rau nws kaj siab.

¹⁰ Muaj ib yam ntxiv uas ua rau Povlauj muaj kev zoo siab, yog tus nqi txhiv. Nws nco ntsoov tias tus nqi txhiv yog Yehauvas txoj kev hlub rau nws thiab. (Kalatias 2:20; nyeem Efexaus 1:7.) Povlauj tso siab tias twb vim yog muaj Yexus los tuag theej txhoj, Yehauvas thiaj zam tau nws lub txim mus li. (Loos 7:24, 25) Txawm Povlauj tau ua txhaum yav tag los thiab yog ib tug neeg zoo tsis tiav, los nws tseem “ua tau Vajtswv tus uas muaj txojsia nyob tes haujlwm.”​—Henplais 9:12-14.

11. Povlauj tus qauv txhawb tau peb li cas?

¹¹ Zoo tib yam li Povlauj, peb mloog li peb muaj ob lub siab uas pheej sib tawm tsam tas zog. Xws li peb yuav tau siv zog tswj peb tej kev xav, tej uas peb ua, los sis tej uas peb hais kom peb thiaj ua tau haum Yehauvas siab. Tej lub sij hawm peb yuav xav tias peb ua tsis tau raws li Vajtswv lub siab nyiam. Muaj ib tug muam hluas npe hu uas Liagc hais li no tias: “Thaum kuv xav txog Povlauj lub neej yeej txhawb tau kuv lub zog. Kuv pom tias tsis yog kuv tib leeg xwb thiaj xav li no. Povlauj los yeej yuav tau hloov nws tus kheej thiab. Tej no qhia rau peb tias, Yehauvas paub tias nyuaj npaum li cas rau nws cov neeg.” Peb yuav xyaum Povlauj li cas, peb thiaj ua haum Yehauvas siab thiab muaj kev zoo siab tab txawm tias tej lub sij hawm peb qaug zog?

YUAV UA LI CAS PEB THIAJ KOV YEEJ TXOJ KEV TU SIAB

12. Peb yuav tau ua dab tsi peb thiaj muaj kev zoo siab?

¹² Ua tej uas txhawb peb txoj kev ntseeg. Peb yuav tau ua tej yam uas txhawb peb txoj kev ntseeg peb thiaj nyob ze Yehauvas. Muab xav li no: Peb yuav tau noj zaub noj mov kom zoo, mus dhia, thiab pw kom txaus, peb thiaj noj qab nyob zoo. Tib yam li ntawd, yuav kom txhawb tau peb txoj kev ntseeg, peb yuav tau nyeem Vajtswv Txoj Lus txhua hnub, mus tshaj tawm tas li, npaj rau kev sib txoos, mus koom tej kev sib txoos, thiab npaj lus teb. Yog peb ua tej uas hais no tsis tseg tsis tu, yuav pab kom peb xav txog qhov zoo thiaj tsis ua rau peb qaug zog, tiam sis yuav ua rau peb muaj kev zoo siab.​—Loos 12:11, 12.

13-14. Ib txhia kwv tij nkauj muam tau ua li cas thiaj pab tau lawv?

¹³ Cia peb xav txog ib tug kwv tij hu ua Ntsos (John), thaum nws muaj 39 xyoos, nws mob ib tug kheeb xawm (cancer) uas tsis tshua muaj tib neeg mob. Thaum xub thawj nws ntshai thiab txhawj kawg li. Nws xav tias, ‘Ua cas kuv tseem hluas ua luaj los kuv muaj ib tug mob phem heev?’ Thaum nws mob ntawd, nws tus tub nyuam qhuav muaj peb xyoos xwb. Dab tsi thiaj pab tau kom nws txhob qaug zog? Nws hais tias: “Txawm kuv tsis muaj zog thiab tsis yooj yim los, kuv thiab kuv tsev neeg peb yeej mus tej kev sib txoos, mus tshaj tawm, thiab ua tsev neeg pe hawm ua ke tas li.” Tom qab no thaum Ntsos ua tib zoo rov qab xav txog, nws hais tias: “Thaum xub thawj uas peb ntsib ib qhov teeb meem, peb yeej nyuaj siab thiab tu siab. Tiam sis kuv pom tias Yehauvas pub lub dag lub zog rau peb vim nws hlub peb. Yehauvas yuav pab koj tib yam li nws tau pab kuv.”

¹⁴ Tus muam Liag uas hais tas los no, nws hais ntxiv tias: “Txhua zaus kuv mus koom tej kev sib txoos thiab kawm Vajlugkub rau kuv tus kheej, ua rau kuv nco ntsoov tias Yehauvas hnov kuv tej lus thov thiab hlub kuv heev. Thaum kuv xav li no, ua rau kuv zoo siab kawg li. Naulees (Nolan) uas yog ib tug ncig xyuas thaj tsam nyob sab Afika, nws hais li no txog nws thiab nws tus poj niam Dai-ees (Diane): “Txawm thaum wb qaug zog los wb yeej thov Vajtswv, nyeem Vajtswv Txoj Lus, mus tej kev sib txoos, thiab mus tshaj tawm. Thaum wb ua li no Yehauvas pab kom wb muaj kev zoo siab. Wb yuav tau xav ntsoov tias Yehauvas yuav pab wb thiab foom koob hmoov rau wb. Wb tsis paub tias nws yuav foom koob hmoov li cas rau wb, tiam sis wb paub tias nws yuav ua li nws cog lus tseg.”

15. Piav seb yuav ua li cas peb thiaj tsis ntxhov siab?

¹⁵ Yog tias peb pheej tseem qaug zog los sis tu siab ces peb yuav tau ua lwm yam los pab peb. Muab piv li no, yog koj pheej mob nraub qaum tsis zoo li, tsis yog koj mus taug kev xwb ces yuav zoo. Yuav kom koj paub tias yog vim li cas koj mob, koj yuav tau mus tshawb nrhiav los sis mus cuag kws kho mob, koj thiaj paub tias yog vim li cas. Tib yam li ntawd, thaum peb tu siab los sis ntxhov siab, peb yuav tau mus kawm Vajlugkub thiab mus tshawb nrhiav hauv peb tej ntaub ntawv. Peb kuj mus tham nrog ib tug uas paub tab ntawm txoj kev ntseeg kom thiaj pab tau peb thiab. Cia peb mus tham txog tej yam uas yuav pab tau peb ntxiv.

16. Yuav ua li cas peb thiaj paub tias peb ho ntxhov siab? (Phau Ntawv Nkauj 139:1-4, 23, 24)

¹⁶ Peb thov tau Yehauvas pab kom peb paub tias peb cheem tsum dab tsi. Vaj Ntxwv Daviv yeej paub tias Yehauvas paub nws zoo. Nws thiaj thov kom Yehauvas pab nws to taub tias yog vim li cas nws thiaj ntxhov siab. (Nyeem Phau Ntawv Nkauj 139:1-4, 23, 24.) Peb los yeej thov tau Yehauvas pab kom peb paub tias, yog vim li cas peb thiaj ntxhov siab, thiab pab kom peb muaj lub siab tus. Peb kuj nug tau peb tus kheej li no: ‘Kuv txhawj txog dab tsi? Puas yog muaj tej yam pheej ua rau kuv tu siab? Thaum kuv xav tsis zoo, kuv puas xav txog lwm yam kom ua rau kuv muaj kev zoo siab?’

17. Peb mus kawm tau tej ntsiab lus twg kom thiaj pab txhawb tau peb? (Saib daim duab.)

¹⁷ Mus kawm txog tej lub ntsiab uas pab tau peb. Tej thaum zoo rau peb mus kawm txog Yehauvas ib tug yam ntxwv qhuas lug, yog peb ua li no yuav pab tau peb. Xws li thaum tus tub txib Povlauj ua zoo xav txog tus nqi txhiv, thiab Yehauvas txoj kev zam txim pab tau nws kawg. Peb yeej xyaum tau Povlauj thiab. Yog tias peb mus kawm Vajtswv tej yam ntxwv qhuas lug xws li, Vajtswv txoj kev khuv leej, kev zam txim, thiab nws txoj kev hlub uas tsis paub kawg hauv peb cov ntaub ntawv, los sis hauv peb lub vej xaij jw.org. Thaum peb nrhiav tau tej ntsiab uas pab tau peb, muab sau cia thiab muab tso rau tej qhov chaw uas peb pom tau, kom thaum twg peb muaj kev ntxhov siab peb thiaj li rov qab mus saib tau. Thaum peb nyeem tej nqe Vajlugkub nyob hauv cov ntaub ntawv, peb yuav tau muab los ua tib zoo xav tias peb yuav xyaum tau Yehauvas li cas, thiab tej uas nws qhia rau peb yuav pab kom peb muaj kev zoo siab li cas.​—Filipis 4:8.

18. Ib txhia Khixatias mus kawm txog dab tsi thiaj pab tau lawv?

¹⁸ Tus muam Liag uas hais tas los no mus kawm txog Yauj. Nws hais tias: “Kuv ntsib ntau yam teeb meem tib yam li Yauj, kuv thiaj mus kawm txog Yauj tus qauv. Yauj raug ntau yam teeb meem thiaj ua rau nws qaug zog kawg. Tab txawm Yauj tsis paub hais tias, yog vim li cas nws thiaj raug tej no los, nws tso siab rau Yehauvas.” (Yauj 42:1-6) Ntxiv ntawd, tus muam Dai-ees uas hais tas los no hais tias: “Kuv tus txiv wb mus kawm txog Yehauvas tej yam ntxwv nyob hauv peb tej ntaub ntawv. Wb zoo siab tias Yehauvas pab wb kom xyaum coj tau zoo li nws. Thaum wb ua tej yam yuam kev thiab ua rau wb qaug zog, wb nco ntsoov tias tsuas yog Yehauvas qhuab qhia thiab pab kom wb ua tau neeg zoo xwb. Qhov uas Yehauvas pab wb li no, yim huab ua rau wb txav ze rau nws.”​—Yaxayas 64:8.

YAV PEM SUAB YEHAUVAS YUAV MUAB NQI ZOG RAU PEB

19. Peb tso siab tau li cas?

¹⁹ Yog tias peb twb ua txhua yam li peb tau kawm no lawm los, qee lub sij hawm peb yeej yuav tu siab thiab ntxhov siab. Muaj tej hnub peb yeej yuav qaug zog zis. Txawm li los peb muaj Yehauvas pab peb thaum peb qaug zog. Peb tso siab tias peb yuav muaj tau kev zoo siab, rau qhov peb ua haum Yehauvas siab. Tsis tas li ntawd, tej uas peb ua rau nws, yuav ua rau nws txaus siab rau peb.

20. Koj yuav peem kam tiag li cas?

²⁰ Cia peb kam tiag, tsis txhob cia tej uas peb ua yuam kev yav tag, los sis qhov uas peb zoo tsis tiav, ua rau peb ntxhov siab. Yog muaj Yehauvas pab peb lawm, peb yuav ua tau lub siab tus. (Phau Ntawv Nkauj 143:10) Peb tos nrhw lub neej nyob hauv lub ntiaj teb tshiab. Thaum ntawd txhua yam uas peb xav tsuas yuav ua rau peb muaj kev zoo siab xwb. Tsis tas li ntawd txhua tag kis thaum peb sawv los, peb yuav tsis muaj kev tu siab lawm thiab peb yuav zoo siab hlo teev tiam peb tus Vajtswv Yehauvas.