Ua Lub Tshoob Uas Hwm Yehauvas

1-2. Yehauvas xav kom koj rooj tshoob zoo li cas xwb?

YOG koj tab tom sib qhaib lawm ntshe yog ib lub sij hawm uas muaj kev zoo siab heev! Tej zaud koj twb npaj tej ub tej no txhij zog tias yuav ua li cas rau li cas lawm. Yehauvas xav kom koj muaj kev lom zem xauv npo rau hauv koj rooj tshooba thiab tsuas xav kom neb tau txais kev zoo siab luag ntxhwb ntxhi mus yav tom ntej xwb.​—Pajlug 5:18; Xalumoos Tej Nkauj 3:11.

² Nco ntsoov tias tseem ceeb heev uas neb rooj tshoob yuav tsum ua kom Yehauvas tau ntsej muag. Vim li cas ho hais li ntawd thiab neb ho ua kom neb rooj tshoob raug ntsej muag li cas? Nyob rau hauv zaj kawm no, txawm tias hais txog ib khub nkauj nyab nraug vauv uas tab tom npaj nkawd rooj tshoob xwb los zaj no haj tseem pab tau cov uas pab nkawd khiav rooj tshoob thiab cov uas tuaj koom rooj tshoob ntawd.

VIM LI CAS NEB ROOJ TSHOOB YUAV TSUM HWM YEHAUVAS?

3. Ua ntej yuav npaj ib rooj tshoob, tus nkauj nyab thiab nraug vauv yuav tau xav txog dab tsi ua ntej thiab yog vim li cas?

³ Tus nkauj nyab nraug vauv yuav tau saib tej hauv paus ntsiab lus hauv phau Vajlugkub los pab nkawd npaj nkawd rooj tshoob vim Yehauvas yog tus rhawv tsim kom muaj txoj kev sib yuav. Nws yog thawj tug uas txis Adas thiab Evas nkawd ua txij nkawm. (Chivkeeb 1:28; 2:24) Yog li ntawd, cov uas npaj yuav ua tshoob yuav tau xav txog seb yuav ua li cas rooj tshoob ntawd thiaj npaj tau kom hwm Yehauvas lub koob lub npe.

4. Vim li cas cov nkauj nyab nraug vauv yuav tau ua tshoob kom raug Yehauvas ntsej muag?

⁴ Thaum koj yuav ua ib rooj tshoob, nco ntsoov xav txog Yehauvas vim nws yog koj Leej Txiv tus uas nyob saum ntuj ceeb tsheej thiab yog koj ib tug Phooj Ywg zoo heev thiab koj tsis xav ua tej yam los mus rhuav neb txoj kev sib raug zoo. (Henplais 12:9) Tsis tas li ntawd, koj kuj tsis xav ua ib yam dab tsi kom Yehauvas mob siab. (Phau Ntawv Nkauj 25:14) Txhua yam zoo uas Yehauvas tau ua rau koj lub neej, yeej tsim nyog koj ua koj lub tshoob kom raug nws ntsej muag.​—Phau Ntawv Nkauj 116:12.

KOJ HWM YEHAUVAS LI CAS?

5. Phau Vajlugkub pab tau kom tus nkauj nyab nraug vauv txawj npaj nkawd rooj tshoob li cas?

⁵ Nyob rau hauv phau Vajlugkub tsis sau tseg kom ua tshoob li cas rau li cas thiaj zoo. Tiam sis nco ntsoov tias peb yuav tau ua rooj tshoob kom raws li nom tswv txoj kev lig kev cai. (Mathais 22:21) Txawm tias nyob hauv phau Vajlugkub tsis qhia tsi ntsees los peb kuj coj tau raws li tej hauv paus ntsiab lus hauv phau Vajlugkub kom thiaj li hwm Yehauvas thiab ua rau nws muaj kev zoo siab. Cia peb mus tham txog tej hauv paus ntsiab lus ntawd.

6. Vim li cas ho tseem ceeb rau ob tug uas xav sib yuav coj raws li nom tswv tej kev cai?

⁶ Mloog nom tswv tej cai. (Loos 13:1, 2) Nyob rau tej lub teb chaws, nom tswv tsa muaj cai rau cov uas xav sib yuav coj. Yog li ntawd, ob tug uas xav sib yuav ntawd yuav tsum nrhiav seb yog li cas rau li cas. Yog tsis paub no los ho mus nug cov txwj laus.

7. Ib rooj tshoob yuav tsum zoo li cas?

⁷ Ua zoo tshuaj kom rooj tshoob ua rau Yehauvas tau ntsej muag. (1 Kauleethaus 10:31, 32) Nco ntsoov tias koj lub tshoob yuav tsum zoo phim raws li ib tug uas ua raws li lub hwj huam tsis yog coj raws li qab ntuj neeg. (Kalatias 5:19-26) Tus nraug vauv yuav tsum ua zoo saib kom rooj tshoob ua tau raug Yehauvas ntsej muag thiab yog ib hnub uas txhua yam ntws tau mus zoo vim nws yuav yog tus txiv tsev thiab tus coj rau ntawm lub cuab lub yig. Yuav ua li cas ib rooj tshoob thiaj zoo li hais tas no? Yuav muaj ib zaj lus qhuab qhia uas tus kwv tij txhawb kom tus nkauj nyab nraug vauv thiab sawv daws uas tuaj ntawd nco ntsoov tias Yehauvas yog tus rhawv tsim kom muaj txoj kev sib yuav thiab yuav pab kom cov tuaj ntawd saib rooj tshoob rau nqi. Feem ntau cov uas yuav sib yuav yeej xub pib lawv rooj tshoob nyob rau hauv lub Tsev Nceeg Vaj. Yog koj xav siv lub Tsev Nceeg Vaj los ua koj rooj tshoob, nco ntsoov sau ntawv mus hais rau cov txwj laus paub sai li sai tau.

8. Thaum ua noj ua haus, yuav ua li cas koj rooj tshoob thiaj li ua tau rau Yehauvas tau ntsej muag? (Loos 13:13)

⁸ Nyeem Loos 13:13. Yog koj npaj kom muaj noj muaj haus tom qab, koj yuav tau ua zoo tshuaj kom rooj tshoob tsis txhob ua raws li lub qab ntuj neeg ua. Lo lus Kilis uas hais tias “noj tsau haus qaug qw ua nqaj ua nqug” yog hais txog tib neeg haus cawv ntau ntau thiab tso nkauj nrov pig poog mus txog tsheej tag hmo. Yog koj yuav muaj dej caw nyob rau hauv koj rooj tshoob, ua tib zoo saib kom tib neeg tsis txhob haus ntau ntau.b Yog tso nkauj no los saib kom tsis txhob nrov dhau, cov qhua uas tuaj koom sib tham pem los ib tug thiaj hnov ib tug. Ua zoo tshuaj seb cov nkauj uas koj tso ntawd tej ntsiab lus thiab tej suab nkauj puas ua rau lwm tus xav yuam kev.

9. Tus nkauj nyab thiab nraug vauv yuav tau nco ntsoov li cas thaum lwm tus sawv los hais lus thiab thaum tso ub tso no rau sawv daws saib los sis mloog?

⁹ Nyob rau tej thaj chaw, tsev neeg los sis tej phooj ywg kuj sawv los hais ob peb los txog tus nkauj nyab thiab nraug vauv. Tej thaud lawv kuj tso duab los sis yeej yaj kiab txog tus nkauj nyab thiab nraug vauv los sis lwm yam kev lom zem. Tej no yeej zoo heev tiam sis nco ntsoov saib xyuas kom ua tau los txhawb lwm tus lub zog xwb. (Filipis 4:8) Zaum tsaws nug koj tus kheej li no tias: ‘Puas yog ib qho uas saib taus lwm tus? Puas txhawb nqa txoj kev ua txij nkawm? Puas ua rau Yehauvas tau ntsej muag?’ Tso dag tso luag los tau tiam sis nco ntsoov tsis txhob hais tej yam ua rau lwm tus xav txog kev pw ua niam txiv. (Efexaus 5:3) Yog tias tsev neeg los sis cov phooj ywg yuav sawv los hais dab tsi ntawm rooj tshoob, koj yuav tau ua zoo tshuaj seb lawv yuav hais dab tsi thiab koj yuav tau qhia rau lawv paub tias koj xav kom lawv hais dab tsi rau dab tsi xwb.

10. Vim li cas tus nkauj nyab thiab nraug vauv yuav tau tsis txhob ua tshoob kom nchuav lug? (1 Yauhas 2:15-17)

¹⁰ Txhob ua tshoob kom nchuav lug. (Nyeem 1 Yauhas 2:15-17.) Yehauvas zoo siab heev rau cov uas ua kom nws tau ntsej muag dua li ua kom luag qhuas lawv. Yog li ntawd peb yuav tau tswj peb tus kheej kom tsis txhob siv nyiaj phum lam ntsuav thiab ua kom luag qhuas. Vim li cas zoo rau koj ua ib lub tshoob kom yooj yim? Nyob rau teb chaws Nuavem (Norway) muaj ib tug kwv tij hu ua Maij (Mike) hais tias: “Wb tsis tiv nuj nqis dab tsi ces wb kuj tseem ua tau ob tug tho kev. Txawm wb ua wb lub tshoob yooj yim xwb los yeej zoo nkauj thiab ua rau wb nco ntsoov.” Nyob rau teb chaws Eedias, muaj ib tug muam npe hu ua Thanpithas (Tabitha) hais tias: “Wb ua lub tshoob yooj yim xwb, wb tsis npaj ntau pes tsawg ces wb kuj tsis ntxhov siab thiab tsis muaj kev sib cov nyom.”

11. Tus nkauj nyab thiab nraug vauv yuav tsum hnav tej tsoos zoo li cas? (Saib cov duab.)

¹¹ Koj puas tau npaj hais tias koj yuav hnav Ii cas rau koj rooj tshoob? Koj yeej xav hnav kom zoo du dais, tab txawm cov nyob puag txheej thaum ub yeej nrhiav tej tsoos zoo zoo los hnav. (Yaxayas 61:10) Txawm cev tsoos uas koj hnav ua tshoob zoo tsis thooj li tej tsoos uas koj hnav mus rau ub rau no los nco ntsoov tsis txhob hnav tej tsoos uas tsis raug ntsej muag. (1 Timautes 2:9) Tsis txhob hnav los sis tseev zam kom ua rau lwm tus tsuas pom koj cev tsoos xwb.​—1 Petus 3:3, 4.

12. Vim li cas tus nkauj nyab nraug vauv yuav tau ua tib zoo tshuaj ua ntej muab tib neeg tej kab lig kev cai tso rau hauv nkawd rooj tshoob?

¹² Tsis txhob ua tej kab lig kev cai uas hla Vajtswv Txoj Lus. (Tshwmsim 18:4) Niaj hnub nim no cov uas tsis teev tiam Yehauvas muab kev ntseeg cuav, kev dab qhuas thiab kev hem los mus txuam nrog lawv rooj tshoob. Yehauvas ceeb toom peb kom txav deb deb ntawm tej yam uas qias tsis huv no. (2 Kauleethaus 6:14-17) Ua ntej koj yuav txhab tib neeg tej kab lig kev cai rau hauv koj rooj tshoob, koj yuav tau mus ua tib zoo tshawb seb lub hauv paus pib li cas rau li cas thiab seb nyob hauv phau Vajlugkub hais li cas koj mam li muab coj los ua rau hauv koj rooj tshoob.

13. Tus nkauj nyab thiab nraug vauv yuav tau xyaum Yehauvas li cas thaum nkawd txais paj tshab?

¹³ Nyob rau ntawm thaj tsam uas koj nyob, tib neeg puas nqa paj tshab tuaj pub rau tus nkauj nyab nraug vauv? Peb txhawb kom cov uas ntseeg Yehauvas nco ntsoov muab khoom pub rau lwm tus, yog tias lawv muab mas yuav ua rau lawv muaj kev zoo siab. (Pajlug 11:25; Tej Hauj Lwm 20:35) Tej zaud cov muaj nyiaj yuav muab tau khoom zoo dua cov uas txom nyem. Nco ntsoov tias tus muab tsis tau ntau los sis khoom zoo los peb yuav tau ris lawv txiaj ntsig. Tsis tas li ntawd, yog leej twg ho muab tsis tau ib yam khoom dab tsi no los peb yuav tsum tsis txhob xav hais tias ua li cas lawv ho tsis muab dab tsi li. Peb yuav tau xyaum Yehauvas es ris txiaj ntsig rau txhua yam uas lwm tus muab vim lawv muaj lub siab dawb paug muab raws li lawv muaj.​—2 Kauleethaus 9:7.

TEJ YAM YUAV TAU ZAM THIAB TSIS TXHOB UA NYUAJ

14. Muaj qho khub nkauj nyab nraug vauv tau ntsib li cas?

¹⁴ Thaum koj npaj ib rooj tshoob, tej zaum yuav muaj ntau yam los cuam tshuam. Xws li tej zaum yuav tsis yooj yim rau koj ua ib lub tshoob me me. Muaj ib tug kwv tij nyob rau teb chaws Xolomees Ailees (Solomon Islands) npe hu ua Tshalim (Charlie) hais tias: “Kuv tsis pom qab caw pes tsawg leej tuaj koom thaum peb ua noj haus rau kuv rooj tshoob vim nyob rau peb haiv neeg yeej ib txwm caw txhua leej txhua tus tuaj koom!” Hos Thanpithas hais tias: “Nyob rau peb teb chaws Eedias mas tib neeg kheev hu zej zog tuaj noj tuaj haus. Kuv niam thiab kuv txiv nkawd tsis pom zoo rau wb caw 100 leej xwb tiam sis thaum kawg nkawd kuj ua li wb hais.” Hos Xelas (Sarah) uas nyob rau teb chaws Eedias hais tias: “Tib neeg tsuas xav kom tau ntsej tau muag. Kuv ib tug viv ncaus ua nws rooj tshoob nchuav lug xwb mas ua rau kuv pheej xav tias ntshe kuv yuav tau ua li ntawd thiab.” Yog koj ntsib tej yam zoo li hais tas no koj yuav ua li cas?

15. Vim li cas zoo rau peb thov Yehauvas ua ntej yuav npaj ib rooj tshoob?

¹⁵ Thov Yehauvas tsis so thaum koj npaj koj rooj tshoob. Qhib siab lug qhia koj tej kev txhawj xeeb rau Yehauvas paub. (Filipis 4:6, 7) Thov Yehauvas pab kom koj txawj txiav txim siab ua koj rooj tshoob li cas, pab kom koj muaj lub siab tus, thiab muaj lub siab tawv yog ho muaj kev cov nyom. (1 Petus 5:7) Thaum koj pom Yehauvas cev tes pab koj mas yuav ua rau koj yim huab tso siab rau nws. Thanpithas hais tias: “Wb txhawj heev tsam wb ho hais lus tsis sib haum thiab ho hais tsis sib haum wb ob tog neeg. Ua ntej wb yuav tham txog seb npaj tshoob li cas mas wb yeej thov Yehauvas ua ntej. Wb yeej xam pom tias Yehauvas pab wb heev vim peb sawv daws puav leej hais lus sib haum.”

16-17. Vim li cas zoo rau sawv daws sib txuas lus kom nkag siab thaum npaj tshoob?

¹⁶ Ua tib zoo hais lus. (Pajlug 15:22) Tus nkauj nyab thiab nraug vauv yuav tau ua tib zoo txiav txim siab seb yuav ua li cas hauv nkawd rooj tshoob xws li yuav ua rau hnub twg, puas muaj nyiaj txawm peem, yuav caw leej twg tuaj, thiab lwm yam uas hais tsis txhij tsis txhua. Ua ntej neb ob leeg yuav txiav txim siab ua li cas, neb ob leeg yuav tau los zaum ua ke rov qab muab tham seb neb ua tau li cas rau li cas lawm, neb puas tau thov lwm tus pab neb tuav tswv yim, thiab neb puas tau tshawb nrhiav Vajtswv Txoj Lus los pab neb tsav tswv yim thiab. Thaum koj hais lus rau tus uas koj xav yuav ua txij nkawm los sis thaum koj hais rau koj tsev neeg los ua tib zoo qhia rau lawv tias koj nyiam ua li cas rau li cas, lawv thiaj paub. Tsis txhob nias qees yuav koj siab xwb. Yog koj niam koj txiv thov tej yam kom koj ua rau rooj tshoob es koj ua tau ces tsis txhob ua siab deb kav tsij ua. Nco ntsoov tias kuj yog ib hnub tseem ceeb heev rau lawv thiab. Yog hais tias koj ho tsis pom zoo ua li lawv hais no los ua tib zoo qhia rau lawv paub tias yog vim li cas koj thiaj tsis ua. (Kaulauxis 4:6) Nco ntsoov hais rau koj tsev neeg tias koj lub zeem muag rau rooj tshooj yog xav kom ua rau txhua tus muaj kev lom zem thiab ua kom Yehauvas tau ntsej muag.

¹⁷ Yog tias koj niam koj txiv tsis teev tiam Yehauvas mas yeej yog ib qho nyuaj uas koj yuav tau qhia rau lawv paub tias koj nyiam li cas rau rooj tshoob. Muaj ib tug kwv tij npe hu ua Xethos (Santhosh) uas nyob teb chaws Eedias hais tias: “Wb ob tse tib neeg xav kom wb muab peb haiv neeg tej kab lig kev cai txuam rau hauv wb rooj tshoob. Yeej siv sij hawm ntev kawg li rau wb qhia tias wb nyiam li cas rau li cas. Yog tej qhov uas tsis hla Yehauvas tej kev cai ces wb kuj cia lawv ua. Xws li txawm wb xav noj hom zaub mov li wb lub siab nyiam los wb tau muab cov zaub mov hloov kom haum sawv daws siab. Tsis tas li ntawd, wb kuj tsis muaj hu nkauj thiab seev cev vim lawv tsis swm.”

18. Yuav ua li cas koj rooj tshoob thiaj ntws tau zoo zoo? (1 Kauleethaus 14:40) (Saib daim duab.)

¹⁸ Ua tib zoo npaj kom zoo zoo. Yog koj ua zoo npaj lawm ces koj yuav tsis ntxhov siab rau hnub koj ua tshoob. (Nyeem 1 Kauleethaus 14:40.) Nyob rau teb chaws Tais Vam (Taiwan) muaj ib tug kwv tij npe hu ua Vees (Wayne) hais tias: “Ob peb hnub ua ntej wb rooj tshoob, wb hu kom cov uas pab wb tuaj sab laj ua ke. Wb piav seb hnub wb ua tshoob, wb xav kom mus li cas rau li cas. Hnub ntawd sawv daws kuj xyaum seb tus twg yuav ua qhov twg xwv txhua yam thiaj ntws tau zoo zoo.” Nco ntsoov saib kom ua raws sij hawm xwv cov qhua thiaj li pom tias koj saib lawv lub sij hawm muaj nuj nqis.

19. Yuav kom ua tau koj rooj tshoob thaum noj haus ntws tau zoo zoo koj yuav tau npaj li cas?

¹⁹ Thaum koj npaj koj rooj tshoob, ua zoo xav seb tsam lam muaj teeb meem li cas ho tshwm sim. (Pajlug 22:3) Xws li nyob rau ntawm thaj tsam koj nyob thaum tib neeg ua tshoob, puas muaj neeg cia li lam tuaj koom? Yog tias muaj tib neeg ua li ntawd ces koj yuav tau npaj seb koj yuav ua li cas. Tsis tas li ntawd, qhia rau koj tej nruab ze uas tsis teev tiam Yehauvas paub tias nyob rau ntawm rooj tshoob yuav muaj li cas rau li cas. Yog koj ho xav kom txhua yam ntws tau zoo zoo ces koj yuav tau npaj ib tug kwv tij paub tab los mus ua tus saib xyuas. (Yauhas 2:8) Nco ntsoov piav qhia rau tus kwv tij paub ua ntej tias koj npaj siab ua li cas rau li cas rau hauv koj rooj tshoob xwv nws thiaj li paub ua raws li koj tau npaj tseg.

20. Tus nkauj nyab nraug vauv yuav tau nco ntsoov li cas thaum npaj rau nkawd rooj tshoob?

²⁰ Tej zaum thaum koj tab tom npaj koj lub tshoob, koj yuav ntxhov siab hnyo xwb tiam sis nco ntsoov tias tsuas yog ib hnub xwb ces dhau lawm. Tsis tas li ntawd, yuav yog thawj hnub uas neb ob leeg pib neb ob leeg lub neej teev tiam Yehauvas ua ke. Ntxiv ntawd, nco ntsoov ua neb lub tshoob kom yooj yim thiab ua rau Yehauvas tau ntsej muag. Yog neb tso siab rau Yehauvas pab neb ces neb yuav ua tau ib lub tshoob uas zoo thiab tsis ua rau neb khuv xim dab tsi hlo li.​—Phau Ntawv Nkauj 37:3, 4.