Phau Ntawv Yauj Yuav Pab Peb Thev Kev Txom Nyem

1-2. Vim li cas ho zoo rau peb nyeem phau ntawv Yauj?

PHAU ntawv Yauj twb sau tau kwv lam li 3,500 xyoo thaws thawv dhau los lawm. Muaj coob leej ntau tus xam pom hais tias yog ib phau ntawv uas sau tau zoo heev vim tus sau siv tej lus yooj yim thiab tob tob kom ua rau tib neeg nkag siab. Txawm Mauxes yog tus sau los Vajtswv Yehauvas yog tus tshoov nws lub siab kom nws sau li ntawd.​—2 Timautes 3:16.

² Tos phau ntawv Yauj tseem ceeb heev los, yeeb vim yog nyob rau hauv tham txog qhov uas yuav tau tiv txheem Vajtswv lub npe kom dawb huv. Tsis tas li ntawd, phau ntawv no haj tseem qhia txog tej uas tib neeg ib txwm xav paub hauv lub neej xws li vim li cas Vajtswv ho cia tib neeg tiv kev txom nyem. Ntxiv ntawd, kuj qhia rau peb txog Vajtswv txoj kev hlub, nws lub tswv yim, nws txoj kev ncaj ncees, thiab nws lub dag lub zog. Xws li nyob rau hauv phau ntawv Yauj hu Yehauvas ua “tus uas muaj Hwjchim Loj Kawg Nkaus” 31 zaug.

3. Peb khaws tau dab tsi los ntawm phau ntawv Yauj?

³ Cia peb muab phau ntawv Yauj piv tias zoo li peb mus nce ib lub roob. Thaum peb nce mus txog saum lub ncov roob, peb mam li pom txhua yam nyob puag ncig peb. Zoo ib yam li ntawd thaum peb nyeem phau ntawv Yauj, peb mam li pom tseeb tseeb tias Yehauvas xav li cas thaum peb raug kev txom nyem. Txuas ntxiv no peb yuav kawm seb phau ntawv Yauj yuav pab tau cov Ixayees puag thaum ub thiab peb niaj hnub nim no li cas rau li cas. Tsis tas li ntawd, peb yuav kawm kom peb paub muab siv coj mus pab lwm tus li cas thiab.

VAJTSWV CIA YAUJ TIV KEV TXOM NYEM

4. Yauj thiab cov Ixayees tsis zoo sib thooj li cas?

⁴ Yauj yog ib tug txiv neej nplua nuj heev thiab muaj koob nto npe. (Yauj 1:3) Nyob rau sab hnub tuaj tsis muaj ib tug uas muaj txiag nplua nuj npaum li nws. Yauj nyob rau lub teb chaws hu ua Uxes uas tej zaum yog sab hnub tuaj ntawm lub teb chaws uas Vajtswv cog tseg. Lub sij hawm uas Yauj ua neej nyob ntawd kuj yog lub sij hawm cov Ixayees ua cev qhev nyob rau teb chaws Iyiv. Cov Ixayees txawm pib mus pe tej dab mlom tiam sis Yauj haj tseem kub siab lug teev tiam Yehauvas. (Yausuas 24:14; Exekees 20:8) Yehauvas thiaj li hais li no txog Yauj tias: “Tej neeg uas nyob hauv ntiajteb tsis muaj ib tug uas ncajncees thiab zoo npaum li nws.”a (Yauj 1:8) Ntshe Xatas chim heev thaum nws pom Yauj muaj txiag nplua nuj thiab haj tseem kub siab lug teev tiam Yehauvas!

5. Vim li cas Yehauvas ho cia Yauj tiv kev txom nyem? (Yauj 1:20-22; 2:9, 10)

⁵ Xatas iab liam tias yog Yauj raug kev txom nyem mas nws yeej yuav tsis kam teev tiam Yehauvas. (Yauj 1:7-11; 2:2-5) Txawm Yehauvas hlub hlub Yauj los nws yuav tau cia Xatas sim seb puas raws li Xatas liam tiag. (Yauj 1:12-19; 2:6-8) Xatas thiaj muab Yauj tej tsiaj txhu huv tib si mus lawm, tua nws kaum leej me nyuam, thiab ua rau Yauj npua mob ua paug viag thoob plaws ib ce. Txawm Xatas ua npaum li no los Yauj yeej tsis kam tso Yehauvas tseg hlo li. (Nyeem Yauj 1:20-22; 2:9, 10.) Ntev mus ntev tuaj Yehauvas thiaj li rov qab kho Yauj tej mob kom zoo du dais, pub nws rov muaj txiag nplua nuj, kho kom nws muaj koob nto npe, muab kaum leej me nyuam rov rau Yauj, thiab ntxiv Yauj lub hnub nyoog 140 xyoo ntxiv mas nws pom plaub tiam xeeb leej xeeb ntxwv. (Yauj 42:10-13, 16) Yauj tus yam ntxwv pab tau Yehauvas cov tib neeg txheej thaum ub thiab niaj hnub nim no li cas?

6. Yog cov Ixayees paub txog Yauj lub neej ntshe yuav pab tau lawv li cas? (Saib daim duab.)

⁶ Tej zaum yuav pab tau cov Ixayees lub neej. Cov Ixayees lub neej nyuaj heev thaum lawv nyob rau tim Iyiv. Xws li Yausuas thiab Kalej nkawd lub neej hluas ces yeej ua qhev xwb. Tab txawm tsis yog tim nkawd los nkawd yeej yuav tau nrog cov Ixayees nyob rau tom roob moj sab qhua plaub caug xyoo thaws thawv. Kheev lam cov Ixayees paub txog tej uas Yauj raug thiab tej koob hmoov uas nws tau ces pab tau lawv thiab lawv cov xeeb ntxwv nkag siab tias tim leej twg es lawv thiaj raug kev txom nyem. Tsis tas li ntawd, lawv kuj yuav nkag siab tias vim li cas Vajtswv ho cia lawv tiv kev txom nyem thiab Vajtswv saib qhov uas lawv tuav rawv lawv txoj kev ntseeg tseem ceeb npaum li cas.

7-8. Piav seb phau ntawv Yauj ho pab tau cov uas raug kev txom nyem li cas.

⁷ Pab tau peb li cas. Muaj coob leej ntau tus tib neeg tsis kam ntseeg Vajtswv lawm vim lawv tsis paub tias vim li cas lawv ua zoo npaum twg los lawv pheej tau qhov phem xwb. Xws li nyob teb chaws Lavadam (Rwanda) muaj ib tug poj niam hu ua Paj Dawb.b Thaum nws tseem yau nws yeej ib txwm ntseeg Vajtswv tiam sis thaum muaj tej yam kev phem los raug rau nws ces nws txawm hloov siab lawm. Nws niam thiab nws txiv nkawd sib nrauj, nws txiv tshiab los tsis hlub nws, nws kuj raug luag mos, thiab thaum nws mus rau tej tsev teev ntuj los tsis muaj neeg nplig nws siab li. Yog li ntawd, Paj Dawb thiaj li sau ib tsab ntawv rau Vajtswv tias: “Vajtswv, kuv ua hnub ua hmo thov koj, xyaum ua neeg zoo los koj tseem cia qhov phem los raug kuv. Zaum no kuv yuav tso koj tseg mus ua ywj kuv siab.” Peb nrog Paj Dawb thiab cov uas xav li nws tu siab vim lawv xav tias tim Vajtswv lawv thiaj raug kev txom nyem.

⁸ Nyob hauv phau ntawv Yauj qhia hais tias tib neeg raug kev txom nyem tsis yog vim Vajtswv tiam sis yog tim Xatas! Tsis tas li ntawd thaum tib neeg raug kev txom nyem, tsis yog tim lawv tau ua txhaum tiam sis yog vim lawv mus tom thawj ces ho raug lawv xwb. (Tej Lus Qhia 9:12; Yauj 4:1, 8) Ntxiv ntawd, yog peb rau siab ntso teev tiam Vajtswv ces peb yuav txhawb nqa tau Vajtswv lub koob lub npe thiab nws yuav teb tau tej lus uas Xatas nkaug. (Yauj 2:3; Pajlug 27:11) Tom qab Paj Dawb kawm nrog Yehauvas Cov Tim Khawv ces nws mam li nkag siab tias Vajtswv tsis yog tus rhawv nws tej kev txom nyem. Nws hais tias: “Kuv rov qab thov Vajtswv thiab qhia rau nws paub tias thaum kuv hais rau nws tias kuv yuav tso nws tseg, nyob hauv kuv lub siab kuv yeej tsis xav ua li ntawd. Yav thaud kuv tsis paub Vajtswv tiag tiag tiam sis tam sim no kuv paub tias nws hlub kuv heev mas ua rau kuv zoo siab kawg li.” Cia peb mam li mus kawm txuas ntxiv seb nyob hauv phau ntawv Yauj ho pab tau peb li cas thaum peb raug kev sim siab.

ZAJ HAIS TXOG YAUJ PAB KOM PEB UA SIAB NTEV THEV

9. Yauj zoo li cas xwb thaum nws zaum ntawm ntug cub? (Yakaunpaus 5:11)

⁹ Yauj zaum ntawm ntug cub, ib ce mob hlwv ua paug viag ua rau nws ntsaj laws nyo hau khoov yuav lawm xwb. Nws tej nqaij doog dub nciab ua tej thaj thiab nws tshuav daim tawv tuav pob txha lawm xwb. Nws tsis muaj ib lub zog li, nws tsuas muab ib daim txhais lauj kaub av coj los maj mam kuam nws tej qhov txhab thiab nws niaj hnub ntsaj vim nws thev tsis taus nws tej mob. Tiam sis qhov nws peem nws txoj sia thev nws tej mob tsis yog nws xav ua neej nyob xwb tiam sis nws xav teev tiam Yehauvas mus li. (Nyeem Yakaunpaus 5:11.) Cia peb soj ntsuas ntxiv seb dab tsi pab tau Yauj, nws thiaj li thev taus tej uas nws raug.

10. Piav seb Yauj raug zoo npaum li cas nrog Yehauvas.

¹⁰ Yauj qhia siab rau Yehauvas. (Yauj 10:1, 2; 16:20) Xws li nyob rau ntawm tshooj 3, Yauj xav tias Yehauvas yog tus tsim tej teeb meem ntawd rau nws ces nws thiaj li tu siab heev. Txawm Yauj peb tug phooj ywg nias qees tias tim Yauj tau ua txhaum es Yehauvas thiaj li rau txim rau nws los Yauj ua tawv qhawv tias nws tsis kam tso Yehauvas tseg ib zaug li. Yog peb nyeem Yauj cov lus txuas ntxiv, peb yuav pom tias ntu uas nws raug sim ntawd, nws xav tias nws ua tau ncaj dua Vajtswv. (Yauj 10:1-3; 32:1, 2; 35:1, 2) Hos tej thaud nws lam tau lam hais tej zaj los daws tias nws yeej npuab siab nraim rau Yehauvas. (Yauj 6:3, 26) Hos nyob rau ntawm tshooj 31, Yauj xav kom Yehauvas qhuas nws tiam sis tsis tsim nyog rau Yauj niam qees kom Yehauvas ua li ntawd.​—Yauj 31:35.

11. Yehauvas xav li cas xwb txog Yauj tej lus?

¹¹ Tos Yauj hais tej lus li nws hais rau Yehauvas los, yeeb vim yog Yauj yeej cia siab ntsoov rau Yehauvas thiab vam tias Yehauvas yeej yuav coj ncaj rau nws. Yehauvas thiaj li hais lus hauv ib nthwv cua rau Yauj tiam sis nws tsis qhia tias vim li cas Yauj thiaj raug kev txom nyem thiab nws kuj tsis tsub txim rau Yauj txog tej lus uas Yauj yws mus yws los. Yehauvas nrog Yauj tham lus ib yam li leej txiv nrog nws tus tub sib txuas lus xwb ces Yauj mam li xam pom tias nws paub tsis cuag li Yehauvas thiab Yauj thiaj li txaj muag rau tej lus uas nws hais ntawd kawg nkaus li. (Yauj 31:6; 40:4, 5; 42:1-6) Ua li zaj no ho pab tau cov nyob txheej thaum ub thiab niaj hnub nim no li cas rau li cas?

12. Ua li cas zaj uas hais txog Yauj ho pab tau cov Ixayees?

¹² Tej zaum yuav pab tau cov Ixayees lub neej. Yeej tsis yooj yim rau Mauxes los coj haiv neeg Ixayees vim ntau zaus lawv tsis mloog Yehauvas lus. Cov Ixayees uas tawv ncauj niaj zaug yws txog Yehauvas tiam sis Mauxes tsis coj li lawv. Nws thov Yehauvas thiab qhia nws tej kev txhawj xeeb rau Yehauvas paub. (Khiav Dim 16:6-8; Teev Npe 11:10-14; 14:1-4, 11; 16:41, 49; 17:5) Tsis tas li ntawd, muaj tej thaud Yehauvas kuj tau ntuas Mauxes thiab. Xws li thaum lawv los tsuam chaw nyob rau Kades, Mauxes txawm chim heev rau lawv ces nws “lam tau lam hais lus tsis xav tom ntej tom qab” thiab tsis nco qab qhuas Yehauvas. (Phau Ntawv Nkauj 106:32, 33) Vim muaj li no Yehauvas thiaj li tsis pub Mauxes mus rau hauv lub teb chaws uas nws cog tseg. (2 Kevcai 32:50-52) Qhov uas Yehauvas ua li no tej zaum ua rau Mauxes tu siab me ntsis tiam sis Mauxes kuj yuav li Yehauvas hais. Zaj uas hais txog Yauj no tej zaum kuj yuav pab cov Ixayees kom lawv qhia siab rau Yehauvas, tsis txhob xav tias lawv coj tau ncaj dua Yehauvas, txo hwj chim thiab mloog Yehauvas tej lus qhuab ntuas.

13. Zaj uas hais txog Yauj pab tau peb thev li cas? (Henplais 10:36)

¹³ Pab tau peb li cas. Niaj hnub nim no peb yeej raug ntau yam kev nyuaj siab xws li muaj mob muaj nkeeg, cov uas peb hlub tau tag sim neej, muaj teeb meem nyob rau hauv lub cuab lub yig ces peb yuav tau thev kam tiag. (Nyeem Henplais 10:36.) Muaj qee lub sij hawm, muaj tej tug kuj hais tau siab tau qis ces yim huab ua rau peb nyuaj siab heev. (Pajlug 12:18) Tiam sis zaj uas hais txog Yauj pab kom peb nco ntsoov qhia siab rau Yehauvas thiab cia siab ntsoov tias Yehauvas yeej yuav mloog peb tej lus thov. (1 Yauhas 5:14) Ntxiv ntawd thaum muaj kev ntxhov siab es peb ho hais tau ib qho qhov twg yuam kev los Yehauvas yuav tsis rau txim rau peb tiam sis yuav ntxiv dag ntxiv zog thiab tsav tswv yim rau peb. (2 Xwmtxheej Vajntxwv 16:9; Yakaunpaus 1:5) Thaum Yehauvas ho siv nws lub koom haum, cov txwj laus, nws Txoj Lus, los sis ib tug kwv tij los sis nkauj muam los ntuas peb, cia peb xyaum Yauj tus yam ntxwv es txo hwj chim mloog. (2 Kauleethaus 13:11; Henplais 12:5-7) Txuas ntxiv no peb yuav tham seb peb ho muab tau Yauj lub neej coj mus pab lwm tus li cas.

SIV PHAU NTAWV YAUJ MUS PAB LWM TUS

14. Thaum tib neeg nug tias vim li cas peb raug kev txom nyem, koj yuav piav li cas?

¹⁴ Thaum koj mus tshaj tawm txoj xov zoo es tib neeg nug koj tias vim li cas tib neeg raug kev txom nyem ces koj yeej mus qhia txog thaum nyob hauv lub vaj Edees, Xatas tau dag ntxias thawj khub niam txiv kom sawv tawm tsam Vajtswv ces tib neeg thiaj li raug kev txom nyem thiab kev ploj kev tuag. (Chivkeeb 3:1-6; Loos 5:12) Ntxiv ntawd koj yuav piav tias Vajtswv tsuas sej me ntsis sij hawm kom qhia tias Xatas tej lus dag ntxias tsis muaj tseeb, thiab yav tom ntej Vajtswv yuav muab tej kev txom nyem tshem tawm mus thiab cia tib neeg nyob mus ib txhis hauv lub ntiaj teb no. (Tshwmsim 21:3, 4) Yog koj piav li hais tas no los kuj zoo kawg li.

15. Peb yuav siv phau ntawv Yauj li cas xwv tib neeg thiaj li nkag siab vim li cas tib neeg raug kev txom nyem? (Saib cov duab.)

¹⁵ Muaj dua ib yam uas koj kuj piav tau txog yog Yauj. Qhia rau nws paub hais tias Yauj kuj nug tib co lus uas nws nug thiab. (Yauj 7:17-21) Ces tom qab ntawd, koj mam li piav tias Xatas yog tus ua rau Yauj raug kev txom nyem nyuaj siab, tsis yog tim Vajtswv. Tos Xatas ua li no rau Yauj los twb yog nws xav iab liam tias tib neeg tsuas teev tiam Vajtswv vim lawv xav tau ub tau no xwb. Txawm Vajtswv tsis yog tus ua rau Yauj raug kev txom nyem los nws kuj tsis txwv vim nws paub hais tias cov uas teev tiam nws yeej yuav qhia tias Xatas tej lus nkaug tsis muaj tseeb. Ntev mus ntev tuaj Vajtswv kuj foom koob hmoov rau Yauj vim nws tuav rawv nws txoj kev ntseeg. Thaum peb piav tas, peb kuj hais rau tus peb qhia ntawd tias tej kev txom nyem uas tib neeg raug tsis yog Vajtswv ua rau tib neeg.

16. Piav seb phau ntawv Yauj ho pab tau Mas li cas.

¹⁶ Cia peb mus tham seb phau ntawv Yauj ho pab tau Mas li cas. Xyoo 2021, muaj ib hnub ib tug muam txawm hu xov tooj mus qhia Vajlugkub. Nws hu mus ntsib Mas. Nws nyeem ib nqe Vajlugkub ces txawm piav tias Vajtswv mloog peb tej lus thov thiab Nws cog lus tias yav tom hauv ntej yuav muaj ntau yam zoo. Tom qab ntawd, tus muam nug seb Mas ho xav li cas. Mas thiaj li qhia rau nws paub tias Mas tab tom sau ib tsab ntawv faj tseg cia ua ntej nws yuav txo nws txoj sia. Mas hais tias nws ntseeg Vajtswv tiam sis tag kis ntawd tej zaum Vajtswv tsis kam yuav nws. Ces tus muam ntawd thiaj li qhia Yauj lub neej rau Mas paub. Yog li ntawd, Mas xav hais tias nws yuav tsum tau nyeem kom tag phau ntawv Yauj tso. Ces tus muam txawm xa phau Vajlugkub mus rau nws tau nyeem. Tom qab ntawd Mas kuj kawm Vajlugkub kom nws haj yam paub Vajtswv zoo dua qhov qub.

17. Vim li cas koj ho ris txiaj ntsig tias Yehauvas muab phau ntawv Yauj tso rau hauv nws Txoj Lus? (Yauj 34:12)

¹⁷ Phau Vajlugkub yeej muaj peev xwm pab tau cov ua raug kev txom nyem nyuaj siab. (Henplais 4:12) Peb zoo siab kawg li uas Yehauvas muab phau ntawv Yauj sau tseg cia rau phau Vajlugkub! (Yauj 19:23, 24) Phau ntawv Yauj qhia rau peb tseeb tseeb tias “Vajtswv tus uas muaj Hwjchim Loj Kawg Nkaus yeej tsis ua phem.” (Nyeem Yauj 34:12.) Tsis tas li ntawd, kuj qhia tias vim li cas Vajtswv cia muaj kev txom nyem, peb yuav ua dab tsi kom thiaj thev taus, thiab seb peb yuav ua li cas peb thiaj pab tau cov uas raug kev txom nyem nyuaj siab. Nyob rau zaj txuas ntxiv tom ntej yuav tham seb phau ntawv Yauj pab tau cov uas yuav tau ntuas lwm tus li cas.