Yehauvas Cov Tib Neeg Nyiam Coj Qhov Ncaj

1. Yauxej raug sim li cas, thiab nws ho coj li cas?

YAUXEJ uas yog Yakhauj tus tub raug sim. Nws tus tswv Pautifas tus poj niam ntxias tias: “Koj mus nrog kuv pw.” Yauxej tsis kam ua li nws hais. Thaum ib txhia nyeem txog zaj no, lawv yuav xav tias, ‘Vim li cas Yauxej ho tsis kam?’ Pautifas twb tsis nyob tsev lawm. Tsis tas li ntawd, Yauxej twb yog ib tug qhev nyob rau hauv nkawv tsev. Yog nws tsis kam ces tus poj niam no yeej yuav tsub kev nyuaj siab ntxhov plawv rau nws xwb. Txawm li ntawd los Yauxej tsis kam, yeeb vim yog nws hais tias: “Kuv yuav ua li cas muaj pluaj siab deev koj thiab ua txhaum rau Vajtswv?”​—Chivkeeb 39:7-12.

2. Ua li cas Yauxej ho paub tias txoj kev deev luag poj luag txiv ho txhaum Vajtswv?

² Nyob rau lub caij ntawd, twb tsis tau muaj Mauxes Txoj Kev Cai uas hais tias “tsis txhob deev luag pojniam luag txiv.” (Khiav Dim 20:14) Tau ob puas xyoo tom qab no, mam li muaj txoj kev cai no rau cov Ixayees coj. Txawm li ntawd los Yauxej toov tau tias tej uas Yehauvas lub siab xib yog li cas tiag. Xws li nws yeej paub tias nyob rau hauv txoj kev sib yuav, Yehauvas tsim ib tug poj niam rau ib tug txiv neej xwb. Thiab nws yeej hnov ntsoov txog qhov uas Yehauvas tiv thaiv nws pog koob Xalas ob zaug kom tsis txhob ua txhaum. Txuas ntxiv ntawd, Yehauvas haj tseem tau tiv thaiv Ixaj tus poj niam Lenpekas kom tsis txhob ua txhaum tib yam nkaus. (Chivkeeb 2:24; 12:14-20; 20:2-7; 26:6-11) Thaum Yauxej xav txog tej yam Yehauvas tau ua tag ntawd, nws thiaj li pom tias yuav tau coj li cas thiaj zoo yam li Yehauvas lub siab xav. Yauxej txoj kev sib raug zoo nrog Yehauvas loj heev, nws thiaj xav ua npaum li nws ua tau los coj qhov ncaj qhov yog raws li Yehauvas pom zoo.

3. Nyob rau hauv zaj kawm no yuav piav txog dab tsi?

³ Txawm peb yog noob txaug neeg txhaum los peb yeej nyiam qhov ncaj qhov ncees. Tiam sis yog peb tsis ua tib zoo, tej zaud peb yuav mus coj raws li lub qab ntuj neeg no. (Yaxayas 5:20; Loos 12:2) Nyob rau hauv zaj kawm no, peb yuav mus piav seb kev ncaj ncees yog li cas tiag thiab seb yuav tsav tau peb lub neej li cas. Tom qab ntawd, peb yuav piav txog peb txoj hau kev uas rub tau peb lub siab ntsws los coj li Yehauvas lub siab nyiam.

KEV NCAJ NCEES YOG LI CAS TIAG?

4. Muaj coob leej ntau tus hais li cas txog tus neeg nyiam coj ncaj ncees?

⁴ Thaum hais txog ib tug neeg ncaj ncees mas neeg kheev xav hais tias nws tsab ntse, suav txim rau luag los sis ua neeg muab hlob. Nco ntsoov tias Vajtswv tsis nyiam tus neeg coj li ntawd. Thaum Yexus tseem nyob hauv ntiaj teb no, nws thiaj hais txog cov thawj coj kom tsis txhob ua neeg ncaj ncees raws li lawv pom zoo xwb. (Tej Lus Qhia 7:16; Lukas 16:15) Tus neeg uas coj raws li Yehauvas hais tias ncaj, nws yeej tsis muab nws tus kheej tsav loj dua lwm tus.

5. Raws li nyob hauv phau Vajlugkub, piav seb kev ncaj ncees yog li cas tiag.

⁵ Txoj kev ncaj ncees txhais tau tias ua raws li Yehauvas pom zoo. Nyob rau hauv phau Vajlugkub tau hais tias, lub ntsiab ntawm kev “ncaj ncees” yog coj tau lub neej raws li Yehauvas lub siab nyiam. Xws li, Yehauvas hais rau tej tub lag tub luam tias kom yuav tsum siv rab teev uas “tsis ntxo” luag. (2 Kevcai 25:15) Yog ib tug ntseeg twg xav ua li Vajtswv pom zoo, thaum nws ua lag ua luam nws yuav tau coj ncaj rau txhua fab. Txuas ntxiv ntawd, yog ib tug neeg twg nyiam ua ncaj, nws yeej tsis pom zoo thaum luag ua saib tsis taus lwm tus. Tsis tas li ntawd, tus neeg uas nyiam ua ncaj “raws li Vajtswv lub siab nyiam” yuav ua ib yam twg los, nws yeej xav seb Yehauvas pom zoo li cas.​—Kaulauxais 1:10.

6. Vim li cas peb ho tso siab tau rau Yehauvas tej lus uas nws hais tias yog thiab tsis yog? (Yaxayas 55:8, 9)

⁶ Nyob rau hauv phau Vajlugkub piav tias Yehauvas yog lub hauv paus ntawm txoj kev ncaj ncees. (Yelemis 50:7) Vim Yehauvas yog tus Tswv Tsim, nws thiaj li yog tus uas tsim nyog txiav txim tias qhov twg ncaj, qhov twg tsis ncaj. Peb yog noob txaug neeg txhaum, peb tsis paub qhov twg yog, qhov twg tsis yog. Tiam sis Yehauvas tsis zoo li peb tib neeg. Nws paub tias ua li no yog, ua li tod tsis yog. (Pajlug 14:12; nyeem Yaxayas 55:8, 9.) Yehauvas tsim peb muaj nws tus yam ntxwv. Yog li ntawd, peb yeej ua tau lub neej raws li nws hais tias ncaj ncees. (Chivkeeb 1:27) Thiab peb yeej txaus siab hlo mloog thiab ua li nws hais npaum li peb ua tau vim peb xav ua kom haum nws siab.​—Efexus 5:1.

7. Piav seb vim li cas ho zoo rau peb muaj kab lig kev cai los tswj hwm.

⁷ Yog peb mloog li Yehauvas hais tias yog thiab tsis yog, yuav tsav tau peb lub neej lawm hov ntau tuaj. Xws li txhua lub tuam txhab rau nyiaj txiav txim tias nyias tej nyiaj txiag muaj nqis los sis tsis muaj nqis npaum li cas rau nyias lub tsev rau nyiaj ces thaum kawg txhua yam yuav ntxhov niab xwb. Los sis yog cov kws tshuaj thiab cov neeg tu mob tsis coj raws li tsab cai hauv tej tsev kho mob ces yuav ua rau ib txhia neeg mob nruam sim. Yog li ntawd, qhov uas muaj tej kab lig kev cai los tswj hwm yeej tiv thaiv tau txhua yam kom ntws tau du dais. Zoo tib yam li ntawd, qhov uas Vajtswv tias yog thiab tsis yog yuav tiv thaiv tau peb tib yam nkaus.

8. Cov nyiam ua ncaj ua ncees yuav tau txais tej koob hmoov twg?

⁸ Yehauvas yeej foom koob hmoov rau cov neeg uas coj nws tej kab lig kev cai. Nws cog lus rau lawv tias: “Cov neeg ncaj ncees yuav ua cov kav lub [ntiaj teb], thiab nyob hauv lub [ntiaj teb] ntawd mus ibtxhis li.” (Phau Ntawv Nkauj 37:29) Yog peb zaum tsaws xav txog thaum ntawd mas txhua tus yuav nyob thaj yeeb sib haum xeeb thiab kaj siab lug vim sawv daws coj raws li Yehauvas tej kab lig kev cai. Yehauvas yeej xav kom peb txhua tus tau txais lub neej zoo yam li no. Yog li ntawd, thaum Yehauvas hais tias qhov twg ncaj qhov twg zoo ces peb yeej txaus siab li ntawd. Cia peb ua tib zoo piav txog peb txoj hau kev uas rub tau peb lub siab ntsws los coj li Yehauvas lub siab nyiam.

COJ YEHAUVAS TEJ KEV CAI

9. Ua li cas peb thiaj nyiam kev ncaj ncees?

⁹ Qhov 1: Saib taus tus uas tsim tsa txoj cai ntawd. Yuav kom peb nyiam txoj kev ncaj ncees, peb yuav tau tsav peb txoj kev sib raug zoo nrog tus uas tsa tej kev cai ntawd. Yog peb yim nrog Yehauvas sib raug zoo, peb yim nyiam coj raws li qhov uas nws tias yog thiab tsis yog. Muab ua piv txwv tias: Yog Adas thiab Evas nkawv hmov tshua Yehauvas, nkawv yeej mloog nws tej kev cai.​—Chivkeeb 3:1-6, 16-19.

10. Anplahas tau ua li cas xwv nws thiaj nkag siab tej uas Yehauvas lub siab xav?

¹⁰ Peb yeej tsis xav xyaum Adas thiab Evas nkawv tus yam ntxwv li. Yog peb yim kawm txog Yehauvas ces peb yim ris nws txiaj ntsig thiab peb yuav nkag siab tej uas nws lub siab xav. Thaum peb coj tau li Yehauvas qhia ces peb txoj kev sib raug zoo nrog nws yuav nthuav dav zuj zus, xws li Anplahas. Txawm qho yam uas Yehauvas txiav txim siab es nws tsis nkag siab los nws tsis twv Yehauvas. Nws nrhiav txhua txoj hau kev kom paub tej Yehauvas lub siab nyiam. Xws li thaum Yehauvas txiav txim siab yuav muab lub nroog Xaudoos thiab Kaumaulas rhuav pov tseg. Anplahas yeej txhawj nyob tsam “tus uas txiav txim rau tej neeg ntiajteb tagnrho” lam muab cov neeg zoo thiab cov neeg phem thooj txhij rhuav pov tseg. Vim Anplahas pheej txhawj, nws thiaj li nug Yehauvas mus mus los los txog ntau yam. Yehauvas ua siab ntev teb nws. Anplahas mam li ras txog tias Yehauvas yeej tshuaj sawv daws lub siab lub ntsws ua ntej nws yuav rhuav tshem ib tug twg pov tseg.​—Chivkeeb 18:20-32.

11. Anplahas tau ua li cas los qhia tias nws yeej tso siab rau Yehauvas vim nws hmov tshua Yehauvas?

¹¹ Thaum Anplahas nrog Yehauvas sib txuas lus txog lub nroog Xaudoos thiab Kaumaulas tas, nws haj yam nrog Yehauvas sib raug zoo thiab saib taus Yehauvas tshaj qhov qub. Tau ntau xyoo tom qab no, kuj muaj qho yam los sim Anplahas seb nws puas tso siab rau Yehauvas. Yehauvas hais kom Anplahas muab nws tib leeg tub txi rau Yehauvas. Vim Anplahas paub Yehauvas zoo, nws yeej tsis nug ib los li. Anplahas cia li mus ua li Yehauvas hais kom nws ua xwb. Ntshe thaum ntawd nws lub siab lub ntsws yeej dua rhe ua tej niag ntshiv. Nws yeej xav mus xav los txog tej Yehauvas tau ua dhau los lawm. Nws yeej paub tias Yehauvas yeej tsis ua ib yam twg uas tsis ncaj ncees los sis tsis zoo. Raws li tus tub txib Paulus tau hais, Anplahas yeej xav tias ib hnub twg Yehauvas yuav tsa nws tus tub Ixaj rov qab los. (Henplais 11:17-19) Tsis tas li ntawd, Yehauvas twb cog lus hais tias Ixaj yuav yog ib haiv neeg tus yawg koob tiam sis thaum ntawd Ixaj twb tsis tau muaj cuab muaj yig. Anplahas tso siab rau Yehauvas tias Yehauvas yeej yuav ua qhov ncaj qhov yog. Vim Anplahas muaj kev ntseeg, nws thiaj ua txhua yam li Yehauvas hais.​—Chivkeeb 22:1-12.

12. Peb xyaum tau Anplahas li cas? (Phau Ntawv Nkauj 73:28)

¹² Cia peb xyaum Anplahas es rau siab ntso kawm kom paub Yehauvas ntxiv zuj zus. Yog peb ua li ntawd, peb txoj kev sib raug zoo nrog Yehauvas yuav loj zuj zus thiab peb yuav nco ntsoov ua li nws lub siab nyiam. (Nyeem Phau Ntawv Nkauj 73:28.) Peb txoj kev xav los yuav xav li Yehauvas xav. (Henplais 5:14) Yog ho muaj ib tug twg haub ntxias kom peb mus ua tej yam tsis zoo, los peb thiaj tsis mus ua. Peb yuav tsis xav ua ib yam dab tsi rau Yehauvas tu siab los sis rhuav peb txoj kev sib raug zoo nrog nws. Cia peb mam li mus tham txuas ntxiv seb peb yuav ua li cas thiaj qhia tias peb nyiam ua ncaj ua ncees.

13. Peb nrhiav kev ncaj ncees tau li cas? (Pajlug 15:9)

¹³ Qhov 2: Xyaum ib hnub dhau ib hnub kom nyiam txoj kev ncaj ncees. Yog peb xav kom peb ib ce muag, peb yuav tau qoj peb lub cev txhua txhua hnub. Yog li ntawd, peb yuav tau xyaum ib hnub dhau ib hnub xwv peb thiaj nyiam tej uas Yehauvas hais tias zoo. Yog peb xyaum tiag, yeej tsis nyuaj ua luaj twg. Yehauvas yeej txawj xav txog luag thiab tsis kom peb ua ntau tshaj li qhov peb ua tau. (Phau Ntawv Nkauj 103:14) Yehauvas “txaus siab rau cov neeg ncaj ncees.” (Nyeem Pajlug 15:9.) Yog peb xav ua qhov ncaj qhov yog, peb yuav tau xyaum tiag xwv peb thiaj ua tau. Yehauvas yeej yuav pab kom peb ua tau ib qeb zuj zus lawm yav tom ntej.​—Phau Ntawv Nkauj 84:5, 7.

14. Thaum “muab kev ncaj ncees los ua daim hlau thaiv hauvsiab” yog dab tsi, thiab ua li cas peb yuav tsum muaj los thaiv hauv siab?

¹⁴ Yehauvas xav kom peb nco ntsoov tias qhov ua raws li nws lub siab nyiam, yeej tsis nyuaj ua luaj twg coj. (1 Yauhas 5:3) Vim qhov ua raws li Yehauvas nyiam yuav tiv thaiv peb txhua txhua hnub. Yog li ntawd, tus tub txib Paulus thiaj tau piav txog tej cuab yeej uas tus tub rog yuav tau muaj los tiv thaiv. (Efexus 6:14-18) Xws li yam tiv thaiv tau tus tub rog lub hauv nrob yog daim hlau thaiv hauv siab. Thaum “muab kev ncaj ncees los ua daim hlau thaiv hauvsiab” txhais hais tias peb cia Yehauvas ua tus txiav txim seb qhov twg yog yam zoo. Daim hlau thaiv lub hauv nrob li cas ces Yehauvas txoj kev ncaj ncees yuav tsom kwm peb tej kev xav ib yam li ntawd. Yog li ntawd, peb tej cuab yeej yuav tsum muaj daim hlau thaiv hauv siab uas yog kev ncaj ncees.​—Pajlug 4:23.

15. Yuav ua li cas koj thiaj muab tau daim hlau uas yog kev ncaj ncees coj los thaiv hauv siab?

¹⁵ Ua ntej koj yuav txiav txim siab ua ib yam twg, koj zaum tsaws xav tias Vajtswv puas pom zoo ces twb yog koj muab daim hlau ntawd los thaiv koj hauv siab lawm. Tsis tas li ntawd, ua ntej koj yuav hais lus, mloog nkauj, saib yeeb yaj kiab, nyeem ntawv, ua zoo tshuaj koj tus kheej yam li hais no: ‘Tej kuv mloog thiab saib no puas zoo rau kuv? Yehauvas puas pom zoo rau kuv mloog thiab saib tej no? Ua li kuv puas pom los sis hnov tej yam uas Yehauvas suav tias tsis zoo, xws li kev nruj kev tsiv, kev nkhib nkhaus, kev sib daj sib dee los sis ua neeg siab hlob?’ (Filipis 4:8) Yog li ntawd, thaum koj txiav txim siab ua tej yam raws li Yehauvas lub siab nyiam ces yuav tiv thaiv tau koj kom tsis txhob mus ua tej yam phem.

16-17. Raws li nyob hauv Yaxayas 48:18, ua li cas peb ho coj tau Yehauvas tej kev cai mus tag ib txhiab ib txhis?

¹⁶ Peb yuav ua li cas thiaj coj tau Yehauvas tej kev cai tas zaj tas zog? Cia peb mam li soj ntsuas hauv Yaxayas 48:18 seb Yehauvas hais li cas. (Nyeem.) Yehauvas cog lus tias thaum peb coj ncaj coj ncees ces yuav zoo yam li “hiavtxwv ntas.” Muab zaum tsaws xav li no tias koj tab tom sawv ntsug ntawm tus ntug hiav txwv. Koj pom dej hiav txwv nphau mus nphau los. Koj yeej tsis xav ib zaug li tias ib hnub twg hiav txwv yuav tsis nphau ntxiv lawm. Koj yeej paub ntsoov tias tej dej ntawd yeej nphau tau qas txhiab qas vam xyoo los lawm ces yeej yuav nphau mus li.

¹⁷ Thaum peb coj ncaj coj ncees ces zoo yam li hiav txwv ntas mus ntas los li cas? Ua ntej koj yuav txiav txim siab ua ib yam dab tsi, zaum tsaws xav seb Yehauvas xav kom koj ua li cas ces koj mam li ua li ntawd. Txawm txoj kev txiav txim siab ntawd nyuaj npaum twg los xij peem, Yehauvas yeej yuav cev tes los txhawb thiab pab kom koj ua tau qhov zoo qhov yog txhua txhua hnub.​—Yaxayas 40:29-31.

18. Vim li cas peb yuav tau txhob suav txim rau lwm tus raws li peb pom zoo?

¹⁸ Qhov 3: Cia Yehauvas suav lwm tus lub txim seb lawv ua yog los tsis yog. Txawm peb ua npaum li peb ua tau kom coj tau Yehauvas tej kev cai los cia peb nco ntsoov tsis txhob suav txim rau lwm tus xwv peb thiaj li tsis xav tias peb zoo tshaj lwm tus. Yog li ntawd, peb tsis muaj cai hais tias tus no los sis tus tod ua tsis haum Yehauvas siab vim Yehauvas yog “tus uas txiav txim rau tej neeg ntiajteb tagnrho.” (Chivkeeb 18:25) Yehauvas tsis tau tso cai kom peb suav txim rau ib tug twg. Tsis tas li ntawd, Yexus tau sam hwm hais tias: “Cia li tseg tsis txhob txiav txim rau luag, Vajtswv thiaj yuav tsis txiav txim rau nej.”​—Mathais 7:1.b

19. Yauxej tau ua li cas los qhia tias nws tso Yehauvas ua tus txiav txim?

¹⁹ Cia peb rov mus piav txog Yauxej dua. Txawm lwm tus ua lim hiam rau nws los nws tsis suav txim rau lawv. Nws cov tij laug muab nws ntes, muab nws muag coj mus ua cev qhev, thiab dag lawv txiv tias Yauxej tuag lawm. Tau ntau ntau xyoo tom qab no, Yauxej mam li rov ntsib nws tsev neeg dua. Nyob rau lub caij ntawd, Yauxej rais los mus ua ib tug nom siab heev. Yog nws xav pauj kua zaub ntsuab rau nws cov tij laug los yeej tau. Yauxej cov tij laug yeej me siab nyob tsam nws lam ua phem rau lawv txawm tias lawv twb thov kom nws zam lawv lub txim. Tiam sis Yauxej hais rau lawv tias: “Nej tsis txhob ntshai, kuv tsis muaj cuabkav tsav kuv lub hwjchim kom loj dua Vajtswv.” (Chivkeeb 37:18-20, 27, 28, 31-35; 50:15-21) Yauxej xam pom hais tias Yehauvas thiaj yog tus txiav txim tau ncaj ncees rau nws cov tij laug.

20-21. Ua li cas peb thiaj tsis xav tias peb zoo dua lwm tus?

²⁰ Yauxej tso Yehauvas ua tus txiav txim, cia peb xyaum ua li ntawd thiab. Peb tsis txhob xav qhov phem txog cov kwv tij nkauj muam ntseeg vim peb tsis paub lawv lub siab thiab vim li cas lawv ua li lawv ua ntawd. Yehauvas thiaj paub tej uas lawv “lub siab xav.” (Pajlug 16:2) Nws nyiam txhua haiv neeg. Yog li ntawd, nws thiaj xav kom peb “ua lub siab dav” rau txhua tus. (2 Kauleethaus 6:13) Cia peb hmov tshua peb cov kwv tij nkauj muam ntseeg es tsis txhob suav txim rau lawv.

²¹ Tsis tas li ntawd, peb tsis muaj cai los mus suav txim rau ib tug twg uas tsis tau los ntseeg Yehauvas. (1 Timautes 2:3, 4) Koj puas tau suav txim rau ib tug nruab ze twg hais tias, “Tus neeg no yeej yuav tsis los ntseeg Yehauvas ib zaug li”? Yog peb coj li no ces tam li peb hais tias peb zoo dua nws. Yehauvas cia “txhua haivneeg uas nyob thoob plaws hauv lub qab ntuj no” muaj lub cij fim los lees lawv tej kev txhaum. (Tes Haujlwm 17:30) Nco ntsoov hais tias tus neeg uas nws suav tias nws zoo dua lwm tus, Yehauvas suav tias nws zoo tsis txaus.

22. Vim li cas koj ho nyiam ua ncaj ua ncees?

²² Yog peb nyiam qhov uas Yehauvas suav hais tias yog qhov zoo ces yuav ua rau peb muaj kev zoo siab thiab yuav pab kom peb txawj coj rau lwm tus xwv lawv thiaj xav nrog peb thiab xav paub Yehauvas. Cia peb xyaum coj raws li nyob hauv Mathais 5:6 uas hais tias: “Cov uas ntshaw kev ncaj ncees yog cov uas zoo siab rau qhov lawv yuav tau raws li lawv lub siab ntshaw.” Nco ntsoov tias Yehauvas pom txhua yam uas koj tau ua dhau los lawm thiab nws yeej txaus siab tias koj xyaum coj qhov zoo qhov yog. Lub qab ntuj neeg no tsuas coj phem zuj zus ntxiv lawm xwb, tiam sis Yehauvas hmov tshua cov “ua ncaj ua ncees.”​—Phau Ntawv Nkauj 146:8.