Vajtswv Txojlus Zoo Siv Los Qhuab Qhia

1. Lub ntsiab rau lub rooj sib txoos 2 hnub rau xyoo 2014 hu li cas, thiab lub rooj sib txoos ntawd yuav teb lo lus nug twg?

¹ Yehauvas yog tus uas txawj qhuab qhia tshaj plaws hauv lub qab ntuj no. (Yxy. 30:20, 21) Ua li, Yehauvas qhuab qhia peb li cas? Nws siv nws Txojlus uas yog phau Vajlugkub los qhuab qhia peb. Phau Vajlugkub yog phau ntawv uas zoo tshaj lwm phau ntawv huvsi. Yog li ntawd, tej uas Vajtswv qhuab qhia peb pab tau peb kev noj qab haus huv, txojkev xav, lub siab lub ntsws, thiab txojkev ntseeg li cas? Lub rooj sib txoos 2 hnub rau xyoo 2014 yuav teb lo lus nug no. Lub ntsiab rau lub rooj sib txoos ntawd hu ua, “Vajtswv Txojlus Zoo Siv Los Qhuab Qhia,” uas yog rho hauv 2 Timaute 3:16 los.

2. Cov ntsiab lus uas yuav tham rau lub rooj sib txoos 2 hnub teb tau cov lus nug twg?

² Ua Tib Zoo Mloog Cov Ntsiab Lus No: Cov lus teb rau cov lus nug hauv qab no yog cov ntsiab lus uas yuav tham rau lub rooj sib txoos 2 hnub:

• Vajtswv tej lus qhia pab tau peb lub neej li cas? (Yxy. 48:17, 18)

• Yog tias peb lauj sijhawm mus qhia Vajlugkub puv ntoob, Yehauvas cog lus li cas rau peb? (Mlkh. 3:10)

• Thaum peb hnov tej “lus qhia txawv txawv,” peb yuav tsum ua li cas? (Hnpl. 13:9)

• Peb yuav xyaum li cas peb thiaj txawj qhia li Yexus? (Mth. 7:28, 29)

• Vim li cas tsim nyog peb xub qhia peb tus kheej tso? (Loos 2:21)

• Vajtswv Txojlus zoo siv li cas? (2Tmt. 3:16)

• Txij thaum Yehauvas “co” ib tsoom tebchaws, tau muaj li cas los? (Hk. 2:6, 7)

• Yehauvas tso siab tias peb muaj peev xwm ua dabtsi? (Efx. 5:1)

• Vim li cas tseem ceeb rau peb yuav tsum mob siab coj raws li Yehauvas tej lus qhia? (Lk. 13:24)

3. Vim li cas thiaj tseem ceeb rau peb mus koom thiab ua tib zoo mloog lub rooj sib txoos 2 hnub?

³ Ua ntej Povlauj sau cov lus uas siv los ua lub ntsiab rau lub rooj sib txoos 2 hnub, nws tau sau txog tej kev txom nyem nyuaj siab kawg uas qhia txog hnub kawg hauv 2 Timaute tshooj 3. Povlauj sau tias: “Cov neeg phem thiab cov neeg txawj dag yuav phem heev zuj zus, thiab yuav dag ntxias luag thiab raug luag dag ntxias.” (2Tmt. 3:13) Tseem ceeb heev rau peb ua tib zoo mloog Vajtswv tej lus qhuab qhia thiab muab siv rau peb lub neej, xwv peb thiaj tsis raug luag dag ntxias. Yog li ntawd, cia peb txiav txim siab mus koom lub rooj sib txoos 2 hnub, thiab ua tib zoo mloog Yehauvas tej lus qhuab qhia uas yuav tham rau 2 hnub ntawd.