Vajtswv Txojlus Muaj Hwjchim
1. Lub ntsiab rau lub rooj sib txoos 1 hnub rau xyoo 2014 hu li cas?
1 Phau Vajlugkub txawv ntawm tej ntaub ntawv uas tibneeg sau. Rau qhov phau Vajlugkub muaj hwjchim hloov tau tej uas peb xav thiab tej uas peb ua kom haum Vajtswv siab. Yog li, Vajtswv Txojlus puas muaj hwjchim tiag? Peb yuav tau muab Vajtswv Txojlus uas muaj hwjchim los siv rau peb lub neej li cas? Thiab peb yuav tau siv txojlus ntawd mus pab lwm tus li cas? Lub rooj sib txoos 1 hnub uas yuav muaj rau xyoo 2014 yuav tham txog cov ntsiab lus no. Lub ntsiab rau lub rooj sib txoos no hu ua, “Vajtswv Txojlus Muaj Hwjchim,” uas yog rho hauv Hinplus (Henplais) 4:12 los, VTL. Peb tso siab tias lub rooj sib txoos 1 hnub ntawd yuav txhawb tau txhua leej txhua tus txojkev ntseeg!
2. Peb yuav tsum ua tib zoo mloog thiaj teb tau cov lus nug twg?
2 Ua Zoo Mloog Thiaj Teb Tau Cov Lus Nug No: Thaum koj mus koom lub rooj sib txoos 1 hnub, ua tib zoo mloog thiaj teb tau cov lus nug nram no.
• Vim li cas tsim nyog peb tso siab rau Yehauvas Txojlus? (Nt.Nk. 29:4)
• Peb yuav tsum ua dabtsi lub hwjchim hauv Vajtswv Txojlus thiaj pab tau peb lub neej? (Nt.Nk. 34:8)
• Koj yuav qhia Vajlugkub li cas, tibneeg thiaj pom lub hwjchim hauv Vajtswv Txojlus? (2Tmt. 3:16, 17)
• Peb yuav tau ua li cas peb thiaj tsis qaug rau Xatas lub qab ntuj tej kev haub ntxias? (1Yh. 5:19)
• Yuav kom cov hluas loj hlob ntawm sab kev ntseeg, lawv yuav tsum ua dabtsi? (Ylm. 17:7)
• Thaum peb qaug zog, yuav ua li cas peb thiaj rov muaj zog? (2Khl. 12:10)
• Yuav ua li cas peb thiaj hloov tau peb lub siab thiab tus cwj pwm uas tsis zoo? (Efx. 4:23)
3. Thaum peb mus koom lub rooj sib txoos 1 hnub, tsis yog peb mus mloog xwb, tiamsis peb yuav tau ua dabtsi thiaj pab tau peb?
3 Tej uas peb tseem yuav mus mloog yuav pab tau peb sawvdaws heev. Lub rooj sib txoos 1 hnub kuj yog ib hnub uas peb yuav tau mus ntsib peb cov kwvtij nkauj muam coob tus thiab, ib yam li thaum peb mus lub rooj sib txoos 2 hnub thiab lub rooj sib txoos loj. (Nt.Nk. 133:1-3; 2Khl. 6:11-13) Yog li ntawd, thaum peb mus lub rooj sib txoos no, siv sijhawm nrog cov phoojywg tham pem ua ke, thiab mus zeem phoojywg nrog cov uas tuaj tshiab. Yog hnub ntawd muaj tus kwvtij uas saib xyuas cheeb tsam lossis ib tug uas tuaj Npe-ee tuaj, siv sijhawm mus ntsib nws thiab nws tus pojniam es nrog nkawd tham. Muaj ntau yam uas peb yuav pom thiab kawm nyob rau lub rooj sib txoos 1 hnub uas yuav tuaj no!