Tiv Thaiv Koj Lub Laj Lim Tswvyim
1. Lub rooj sib txoos 2 hnub muaj lub ntsiab hu li cas? Thiab lub hom phiaj ntawm lub rooj sib txoos yog dabtsi?
1 Yexus qhia kom nws cov thwjtim hlub Yehauvas kawg siab kawg ntsws, thiab kawg lawv lub tswvyim. (Mth. 22:37, 38) Xyoo no cov rooj sib txoos, yog npaj los pab peb tshuaj xyuas peb lub siab, seb zoo li cas tiag. Yog li ntawd, lub rooj sib txoos loj thiaj hu ua, “Tswj Koj Lub Siab Rau Txhua Fab!” Xyoo 2013, lub rooj sib txoos 1 hnub kuj muaj lub ntsiab hu ua, “Tiv Thaiv Lub Siab Uas Paub Qhov Zoo Ntawm Qhov Phem.” Ua li lub rooj sib txoos 2 hnub yuav muaj lub ntsiab hu li cas? Lub ntsiab hu ua, “Tiv Thaiv Koj Lub Laj Lim Tswvyim,” rho hauv Mathai 22:37 los. Lub hom phiaj yog kom peb ua tib zoo tshuaj xyuas tej uas peb xav hauv nruab siab, xwv thiaj haum Yehauvas siab.
2. Peb yuav tsum cuab pob ntseg mloog, thiaj teb tau cov lus nug twg?
2 Yuav Kawm Txog Dabtsi: Thaum peb mus koom lub rooj sib txoos 2 hnub, peb yuav tsum cuab pob ntseg mloog zoo zoo, peb thiaj teb tau cov lus nug nram no:
• Peb yuav ua li cas peb thiaj tsis qaug rau tibneeg lub tswvyim?
• Peb yuav pab yaws daim ntaub uas npog tibneeg lub siab li cas?
• Peb yuav tsum xyaum tus cwj pwm twg?
• Yog tias peb xav txog tej yam zoo xwb, yuav pab tau peb li cas?
• Peb yuav cia Yehauvas cob peb lub siab thiab peb txojkev xav li cas?
• Cov niam tsev txiv tsev, thiab tej metub menyuam yuav coj li cas, tsev neeg thiaj muaj kev zoo siab?
• Peb yuav npaj li cas rau Yehauvas hnub?
• Qhov uas peb npaj txhij ua Yehauvas tes haujlwm yog li cas?
• Cov uas xyaum coj raws lawv tau kawm, yuav tau zoo li cas?
3. Vim li cas tseem ceeb rau peb mus koom 2 hnub tibsi? Thiab vim li cas yuav tsum ua tib zoo mloog thiab coj raws li tej lus qhia ntawd?
3 Xatas xav ntxeev ntxias peb lub siab, kom peb coj raws li nws lub tswvyim. (2Khl. 11:3) Twb yog vim li ntawd, peb yuav tsum tiv thaiv peb lub laj lim tswvyim, thiab tswj peb txojkev xav tiag tiag. Peb yuav tsum xyaum kom peb muaj Yexus Khetos lub siab, es tawm tsam lub qab ntuj tus cwj pwm uas tsis leem cai. (1Khl. 2:16) Cia peb npaj mus koom kom tau lub rooj sib txoos no, 2 hnub tibsi. Cuab pob ntseg mloog txhua zaj lus qhia. Muab tej lus ntawd, coj los siv rau peb lub neej, peb thiaj npaj txhij thiab kub siab mus ua Vajtswv tes dej num rau lub Nceeg Vaj.—1Pt. 1:13.