THAUM MUAJ KEV KUB NTXHOV

3 | Tuav Rawv Kev Sib Raug Zoo

VIM LI CAS?

Tej txhia nyuaj siab txog tej kev kub ntxhov hauv lub ntiaj teb heev dhau lawm. Lawv cia li tseg tsis nug tej phooj tej ywg moo thiab cia lawv txoj kev sib raug zoo tsuag zuj zus.

Tej tug cais lawv tus kheej ntawm tej phooj tej ywg.
Tej khub niam txiv cia li sib cav sib ceg heev tshaj qub.
Cov niam cov txiv tsis nco xyuas seb me nyuam muaj tej kev txhawj xeeb twg.

Nco Ntsoov Tias

Thaum peb ntsib kev tsaus ntuj, peb cov phooj ywg yog cov uas yuav pab kom peb rov tuaj zog thiab qab siab ua neej.
Tej kev kub ntxhov hauv lub qab ntuj no yuav tsim tau teeb meem hauv lub cuab lub yig uas peb twb tsis nco xav txog.
Tej xov xwm phem yeej ua tau rau me nyuam ntxhov siab.

Koj Ua Tau Li Cas

Phau Vajlugkub hais tias: ‘Tej phooj ywg kuj muaj kev sib hlub txhua lub sij hawm, thiab tej kwv tij kuj yug los sib pab rau thaum muaj kev txom nyem.’—Paj Lug 17:17.

Yog muaj ib tug hmov tshua koj, yuav pab koj tiv taus kev nyuaj siab. Yog li, xav seb leej twg hlub tshua txog koj.

TEJ YAM UAS YUAV—Pab Tau Koj

Txawm muaj kev kub ntxhov los tuav rawv koj txoj kev sib raug zoo nrog luag

TXHAWB KOJ TUS TXIJ NKAWM

Txhawb Koj Tus Txij Nkawm

Phau Vajlugkub hais tias: “Ob leeg zoo dua ib leeg . . . Rau qhov yog ib tug ntog yuav muaj ib tug tsa.” (Tej Lus Qhia 4:9, 10) Ob niam txiv yuav tsum koom siab tsav ib lub tsheb taug ib txog kev. Tsis li ces nyias yuav taus nyias chua nyias kauj tsheb.

Thaum koj ntxhov siab txhob lam tau lam mus cem koj tus txij nkawm. Yuav tsum xyaum rub lub siab ntev.
Ib lub lim tiam twg, los sib tham seb puas muaj tej yam uas neb yuav tau hloov. Tiam sis tsis txhob muab tig los ua lus sib cav sib ceg.
Teem sij hawm los ua tej yam uas neb ob leeg nyiam ua.
Xav txog thaum neb tseem sib sib nyiam sib sib hlub thiab muab tej duab uas thaum neb nyuam qhuav sib yuav tshiab tshiab los saib.

Daviv hais li no: “Txawm ob niam txiv tsis xav ib yam los, qhov ntawd tsis txhais tias ib tug yuav pab tsis tau ib tug. Yog nkawv sib koom siab lawm nkawv ua dab tsi los yeej yuav tiav.”

NUG KOJ TEJ PHOOJ YWG MOO

Nug Koj Tej Phooj Ywg Moo

Txhob tos koj cov phooj ywg txhawb koj xwb. Xav seb koj txhawb tau lawv li cas. Koj txhawb lawv ces yeej cuag li koj txhawb koj thiab.
Ib hnub twg hu mus nug koj ob peb tug phooj ywg moo.
Koj raug yam twg los nug seb koj tej phooj ywg puas raug yam ntawd thiab. Yog lawv raug, nug seb lawv ua li cas thiaj daws tau qhov teeb meem ntawd.

See hais li no: “Peb cov phooj ywg yeej hlub tshua peb thiab lawv yeej paub tias peb hlub lawv. Thaum peb nyuaj siab dhau tsis pom qab yuav ua li cas, lawv yog cov uas yuav pab taw qhia peb.”

XAV TXOG KOJ COV ME NYUAM

Xav Txog Koj Cov Me Nyuam

Phau Vajlugkub hais tias: “Yuav tsum maj mloog tsis txhob maj hais.” (Yakaunpau 1:19) Thaum ntej me nyuam yuav tsis qhia txhua yam rau nej tiam sis yog nej ua siab ntev mloog lawv yeej yuav qhia siab.

Ua siab mos siab muag me nyuam thiaj li xav los cuag koj. Thaum sawv daws los zaum ua ke tham pem ua si, me nyuam yeem qhia siab dua li thaum koj cia li hais kom me nyuam nrog koj tham.
Txhob cia me nyuam mloog tej xov phem heev tshaj qhov uas tsim nyog.
Qhia rau me nyuam tias koj twb npaj li cas los pab nej tsev neeg lawm, kom lawv thiaj tsis txob tsis txhawj.
Npaj thiab xyaum nrog koj cov me nyuam seb thaum muaj xwm txheej ceev lawm yuav ua li cas.

Npib hais li no: “Cia me nyuam qhia rau koj seb lawv txhawj, lawv ntshai los sis chim txog dab tsi. Yog lawv zais tsis kam qhia ces qhia rau lawv tias koj twb raug tej yam ntawd los lawm. Thiab qhia seb dab tsi pab tau koj.”