Hanyoyin Kyautata Yadda Muke Wa’azi—Yadda Za Mu Ba da Littafin nan Menene Ainihi Littafi Mai Tsarki Yake Koyarwa?

Muhimmancinsa: Littafin nan Menene Ainihi Littafi Mai Tsarki Yake Koyarwa? shi ne ainihin littafin da muke amfani da shi wajen koyar da mutane. Amma kafin mu yi amfani da shi wajen yin nazari da wani, zai dace mu ba shi nasa kofi. Saboda haka, ya kamata dukanmu mu ƙware wajen ba da littafin a wa’azi. (Mis. 22:29) Akwai hanyoyi da yawa na yin hakan, kuma masu shela ne za su zaɓi gabatarwar da suka fi so.

Yadda Za Mu Cim ma Hakan:

Ka yi wata tambaya da ke da alaƙa da wani babi a littafin da za ta ja hankalin mutumin. Za ka iya yin amfani da ɗaya daga cikin tambayoyin da ke farkon kowane babi. Bayan mutumin ya ba da amsa sai ka karanta wani nassin da ya dace. Bayan haka, sai ka nuna masa sakin layin da ya tattauna wannan batun kuma ku ɗan tattauna shi tare.
Wata hanya kuma ita ce yin amfani da gabatarwa da ke shafin farko don ka jawo hankalin mutumin. Bayan haka, sai ka yi amfani da littafin don ka nuna wa mutumin abin da Littafi Mai Tsarki ya faɗa game da batun. Alal misali, za ka iya ambata wani labari na kwana-kwanan nan kuma ka bayyana cewa mutane da yawa suna neman amsoshin tambayoyin da ke shafi na 3. Ko kuma ka ce kuna ziyartar mutane ne don ku gaya musu wani albishiri game da nan gaba. Sai ka nuna masa hotunan da ke shafi na 4 da 5 kuma ka tambaye shi, “Wane cikin waɗannan alkawura ne za ka so ka ga cikawarsa?” Za ka kuma iya ce kuna ziyartar mutane ne don ku taimaka musu su sami amsoshin tambayoyi masu muhimmanci game da rayuwa. Bayan haka, ka nuna wa mutumin tambayoyin da ke shafi na 6 kuma ka ce ya zaɓi tambayar da zai fi so ku tattauna.
Za ka iya soma nazarin Littafi Mai Tsarki da shi kai tsaye. Za ka iya cewa: “Muna nuna wa mutane wannan littafin da muke amfani da shi wajen yin nazarin Littafi Mai Tsarki. Ka taɓa ganin littafin kuwa? [Ka bari ya ba da amsa.] Idan kana da ‘yan mintoci, zan so in nuna maka yadda za ka iya yin amfani da shi don nazari da naka Littafi Mai Tsarki.”

Ku Bi Shawarar Nan a Wannan Watan:

Ku gwada yadda za ku yi hakan a ibadarku ta iyali.
Sa’ad da kake wa’azi, ka gaya wa wasu masu shela abin da kake da niyyar cewa kafin ka ba da littafin. (Mis. 27:17) Idan gabatarwa da ka yi amfani da ita ba ta jan hankalin mutane, ka gwada wata.