Hanyoyin Kyautata Yadda Muke Wa’azi—Koyar da Sababbi

Muhimmancinsa: Wajibi ne sababbin almajiran Yesu su koyi kiyaye “dukan iyakar abin” da ya umurce mu, kuma hakan ya haɗa da koya wa mutane gaskiya. (Mat. 28:19, 20) Sababbi da yawa sun ƙware su soma yin jawabi a Makarantar Hidima ta Allah kuma wataƙila sun soma yi wa danginsu da abokansu wa’azi. Amma, yayin da suke ƙara daraja abin da suke koya kuma suka san cewa Jehobah yana so kowa ya ji bishara, hakan zai iya motsa su su so yin wa’azi. (Rom. 10:13, 14) Bayan an amince sababbi su zama masu shela da ba su yi baftisma ba, zai dace a koyar da su sosai domin hakan zai taimaka musu su kasance da gaba gaɗi.—Luk. 6:40.

Yadda Za Mu Cim ma Hakan:

Ka taimaki sababbin masu shela karɓan littattafan da za su yi amfani da su a wa’azi. Ka nuna masa yadda ka shirya jakar wa’azinka kuma ka gaya masa aikin kowane littafin da ka ɗauka.
Kai da sabon mai shelan ku zaɓi gabatarwar da ke Hidimarmu ta Mulki kuma ku koya yadda za a yi amfani da shi. Ka ƙarfafa shi ya yi amfani da gabatarwar ba tare da ya haddace shi ba. Ku koya dabarun yin wa’azi da ya dace da yankinku daga littafin nan Benefit From Theocratic Ministry School Education shafi na 82. Ka nanata muhimmancin saka tufafin da suka dace da kuma yin ado mai kyau.—2 Kor. 6:3, 4.
Ka ci gaba da koyar da shi. Ka nuna masa katin da aka rubuta yankuna dabam-dabam, kuma ka koya masa yadda zai rubuta bayanai game da mutumin da ya yi ma wa’azi. Ka nuna masa yadda zai rubuta bayani game da wani da ya nuna cewa yana son saƙonmu. Ka koya masa yadda zai yi amfani da dandalin jw.org da kuma ƙasidar nan Good News for People of All Nations a hidima. Ka taimaka masa ya riƙa koma ziyara wurin wani da ke son saƙonmu.—1 Kor. 3:6.
Ka kasance da haƙuri kuma ka riƙa yaba masa. (Mis. 25:11) Ka kafa misali mai kyau. Ƙwazonka da kuma yadda ka nuna cewa ka damu da shi zai taimake shi sosai har bayan shekaru da yawa.

Ku Bi Shawarar Nan a Wannan Watan:

Ka kai ɗalibinka wa’azi gida-gida da kuma koma ziyara. Idan ba ka da ɗalibi, ka gayyaci wani mai shela da bai ƙware sosai ba don ku yi wa’azi tare.